प्रोक्त्वा पूर्वममुष्यशब्दमथ च प्राणा इह प्राणका

स्तद्वज्जीव इह स्थितेति च तथा सर्वेन्द्रियाणीति च।

भूयो वाङ्मनसावुदीर्य तदनु प्राणा इहायान्त्विति।
स्वाहान्तं प्रजपेन्मनुं निशितधीः प्राणान्प्रतिष्ठापयेत्।।31.2।।

नाभेर्देशादापदं पाशबीजं

हृद्देशादा नाभिदेशं च शक्तिम्।

आहृद्देशं मस्तकादङ्कुशाख्यं
न्यस्त्वा यादीन्धातुभिर्न्यस्य सप्त।।31.4।।

रक्ताम्बोधिस्थपोतोल्लसदरुणसरोजाधिरूढा कराब्जैः

पाशं कोदण्डमिक्षूद्भवमथ गुणमप्यङ्कुशं पञ्चबाणान्।

बिभ्राणा स्रक्कपालं त्रिणयनलसिता पीनवक्षोरुहाढ्या
देवी बालार्कवर्णा भवतु सुखकरी प्राणशक्तिः स्वरूपा।।31.6।।

शाक्ते पीठे देवीं षट्कोणस्थैः प्रजेशहरिरुद्रैः।
वाणीलक्ष्मीगिरिजासहितैरङ्गैश्च मातृलोकेशैः।।31.8।।

पाशाङ्कुशान्तरितशक्तिमनोः परस्ता

दुच्चार्य यादिवसुवर्णगणं सहंसम्।

पश्चादमुष्यपदमुच्चरतु प्रयोग
मन्त्रोऽयमित्थमुदितो ग्रहसंख्यया वा।।31.10।।

बद्ध्वा साध्या पाशबीजेन शक्त्या

गृह्णन्नाकृष्याङ्कुशेनाथ यादीन्।

दूतीश्चोक्त्वा साध्यनाम्नाथ धातू
नेवं मन्त्रो यावदात्मा सवीर्यः।।31.12।।

वायव्याग्नेयैन्द्रवारीण्महेश

क्रव्यात्सोमप्रेतराण्मध्यकेषु।

स्थानेष्वेतेष्वष्ट यादीन्सहंसा
न्भृङ्गान्ध्यायेद्वीजबिन्दुप्रबद्धान्।।31.14।।

बीजानि रक्तानि तु वश्यकर्म

ण्यम्भोधराभान्यभिचारकाले।

धूम्राणि विद्वेषविधौ समोहे
पीतानि संस्तम्भविधौ स्मरेच्च।।31.16।।

प्राणप्रतिष्ठाकर्मैवं विधायैकादशापरम्।
पुत्तल्यादौ खचित्ते वा तांस्तु संस्तम्भयेद्भुवा।।31.18।।

पाशाद्यत्रिकयुक्तमूलहृदयभ्रूमध्यसूत्रायिता

साग्निः साध्यललाटरन्ध्रवगतोऽप्यामूलमाजग्मुषि।

योन्यां त्वात्महृदब्जमेवमनिशं भ्राम्यत्यसौ चिन्त्य तं
शक्तिर्जन्मशतान्यपीह वशयेत्साध्यं समाकर्षयेत्।।31.20।।