शिवं नित्यमेकं विभुं तारकाख्यं

सुखाकारमाकारशून्यं सुमान्यम्।

महेशं कलेशं सुरेशं परेशं
नरेशं निरीशं महीशं प्रपद्ये।।2।।

महारत्नपीठे शुभे कल्पमूले

सुखासीनमादित्यकोटिप्रकाशम्।

सदा जानकीलक्ष्मणोपेतमेकं
सदा रामचन्द्रं भजेऽहं भजेऽहम्।।4।।

लसञ्चन्द्रिकास्मेरशोणाधराभं

समुद्यत्पतङ्गेन्दुकोटिप्रकाशम्।

नमद्भह्मरूद्रादिकोटिररत्न
स्फुरत्कान्तिनीराजनाराधिताङ्घ्रिम्।।6।।

यदा मत्समीपं कृतान्तः समेत्य

प्रचण्डप्रकोपैर्भटैर्भीषयेन्माम्।

तदाविष्करोषि त्वदीयं स्वरूपं
सदापत्प्रणाशं सकोदण्डबाणम्।।8।।

स्वभक्ताग्रगण्यैः कपीशैर्महीशै

रनीकैरनेकैश्च राम प्रसीद।

नमस्ते नमोऽस्त्वीश राम प्रसीद
प्रशाधि प्रशाधि प्रकाशं प्रभो माम्।।10।।

नमः सञ्चिदानन्दरूपाय तस्मै

नमो देवदेवाय रामाय तुभ्यम्।

नमो जानकीजीवितेशाय तुभ्यं
नमः पुण्डरीकायाताक्षाय तुभ्यम्।।12।।

नमो विश्वकर्त्रे नमो विश्वहर्त्रे

नमो विश्वभोक्त्रे नमो विश्वमात्रे।

नमो विश्वनेत्रे नमो विश्वजेत्रे
नमो विश्वपित्रे नमो विश्वमात्रे।।14।।

शिलापि त्वदङ्घ्रिक्षमासङ्गिरेणु

प्रसादाद्धि चैतन्यमाधत्त राम।

नरस्त्वत्पदद्वन्द्वसेवाविधाना
त्सुचैतन्यमेतीति किं चित्रमत्र।।16।।

स पुण्यः स गण्यः शरण्यो ममायं

नरो वेद यो देवचूडामणिं त्वाम्।

सदाकारमेकं चिदानन्दरूपं
मनोवागगम्यं परं धाम राम।।18।।

दशग्रीवमुग्रं सपुत्रं समित्रं

सरिद्दुर्गमध्यस्थरक्षोगणेशम्।

भवन्तं विना राम वीरो नरो वा
सुरो वामरो वा जयेत्कस्त्रिलोक्याम्।।20।।

सदा राम रामेति रामामृतं ते

सदाराममानन्दनिष्यन्दकन्दम्।

पिबन्नन्वहं नन्वहं नैव मृत्यो
र्बिभेमि प्रसादादसादात्तवैव।।22।।

अवीरासनस्थैरचिन्मुद्रिकाढ्यै

रभक्ताञ्जनेयादितत्त्वप्रकाशैः।

अमन्दारमूलैरमन्दारमालै
ररामाभिधेयैरलं दैवतैर्नः।।24।।

हरे राम सीतापते रावणारे

खरारे मुरारेऽसुरारे परेति।

लपन्तं नयन्तं सदाकालमेवं
समालोकयालोकयाशेषबन्धो।।26।।

प्रसीद प्रसीद प्रचण्डप्रताप

प्रसीद प्रसीद प्रचण्डारिकाल।

प्रसीद प्रसीद प्रपन्नानुकम्पिन्
प्रसीद प्रसीद प्रभो रामचन्द्र।।28।।