Preliminary Texts

।।श्रीः।।
।।निर्वाणषट्कम्।।
मनोबुद्ध्यहंकारचित्तानि नाहं

न कर्णं न जिह्वा न च घ्राणनेत्रे।

न च व्योम भूमिर्न तेजो न वायु
श्चिदानन्दरूपः शिवोऽहं शिवोऽहम्।।1।।

न च प्राणसंज्ञो न वै पञ्चवायु

र्न वा सप्तधातुर्न वा पञ्चकोशः।

न वाक्पाणिपादौ न चोपस्थपायू
चिदानन्दरूपः शिवोऽहं शिवोऽहम्।।2।।

न मे द्वेषरागौ न मे लोभमोहौ

मदो नैव मे नैव मात्सर्यभावः।

न धर्मो न चार्थो न कामो न मोक्ष
श्चिदानन्दरूपः शिवोऽहं शिवोऽहम्।।3।।

न पुण्यं न पापं न सौख्यं न दुःखं

न मन्त्रो न तीर्थं न वेदा न यज्ञाः।

अहं भोजनं नैव भोज्यं न भोक्ता
चिदानन्दरूपः शिवोऽहं शिवोऽहम्।।4।।

न मृत्युर्न शङ्का न मे जातिभेदः

पिता नैव मे नैव माता च जन्म।

न बन्धुर्न मित्रं गुरुर्नैव शिष्य
श्चिदानन्दरूपः शिवोऽहं शिवोऽहम्।।5।।

अहं निर्विकल्पो निराकाररूपो

विभुत्वाच्च सर्वत्र सर्वेन्द्रियाणाम्।

न चासंगतं नैव मुक्तिर्न बन्ध
श्चिदानन्दरूपः शिवोऽहं शिवोऽहम्।।6।।


इति श्रीमत्परमहंसपरिव्राजकाचार्यस्य

श्रीगोविन्दभगवत्पूज्यपादशिष्यस्य

श्रीमच्छंकरभगवतः कृतौ

निर्वाणषट्कं संपूर्णम्।।