अकिंचित्करकर्मभ्यः प्रत्याहृत्य कृपावशात्।
सुब्रह्मण्यः स्तुतावस्यां तन्नः षण्मुखः प्रचोदयात्।।2।।

या वर्णपदवाक्यार्थगद्यपद्यस्वरूपिणी।
वाचि नर्तयतु क्षिप्रं मेधां देवी सरस्वती।।4।।

मन्दा निन्दालोलुपाहं स्वभावा

देतत्स्तोत्रं पूर्यते किं मयेति।

मा ते भीतिर्हे मते त्वादृशाना
मेषा नेत्री राधसा सूनृतानाम्।।6।।

तस्य मध्ये मणिद्वीपः कल्पकारामभूषितः।
अस्तु मे ललितावासः स्वस्तिदा अभयंकरः।।8।।

तत्र वप्रावली लीला गगनोल्लङ्घिगोपुरम्।
मातः कौतूहलं दद्यात्सँ् हार्यं(?) नगरं तव।।10।।

तत्रैव चिन्तामणिधोरणार्चिभि

र्विनिर्मितं रोपितरत्नश्रृङ्गम्।

भजे भवानीभवनावतंस
मादित्यवर्णं तमसः परस्तात्।।12।।

पञ्चब्रह्ममयो मञ्चस्तत्र यो बिन्दुमध्यगः।
तव कामेशि वासोऽयमायुष्मन्तं करोतु माम्।।14।।

पर्यङ्कतल्पोपरि दर्शनीयं

सबाणचापाङ्कुशपाशपाणिम्।

अशेषभूषारमणीयमीडे
त्रिलोचनं नीलकण्ठं प्रशान्तम्।।16।।

तत्र कामेशवामाङ्के खेलन्तीमलिकुन्तलाम्।
सच्चिदानन्दलहरीं महालक्ष्मीमुपास्महे।।18।।

शिवे नमन्निर्जरकुञ्जरासुर

प्रतोलिकामौलिमरीचिवीचिभिः।

इदं तव क्षालनजातसौभगं
चरणं नो लोके सुधितां दधातु।।20।।

केशोद्भूतैरद्भुतामोदपूरै

राशाबृन्दं सान्द्रमापूरयन्तीम्।

त्वामानम्य त्वत्प्रसादात्स्वयंभू
रस्मान्मायी सृजते विश्वमेतत्।।22।।

कल्हारश्रीमञ्जरीपुञ्जरीतिं

धिक्कुर्वन्तीमम्ब ते पाटलिम्ना।

मूर्तिं ध्यात्वा शाश्वतीं भूतिमाय
न्निन्द्रो राजा जगतो य ईशे।।24।।

पुंस्कोकिलकलक्वाणकोमलालापशालिनि।
भद्राणि कुरु मे मातर्दुरितानि परासुव।।26।।

षोढान्यासादिदेवैश्च सेविता चक्रमध्यगा।
कामेशमहिषी भूयः षोडशी शर्म यच्छतु।।28।।

त्वमेव कारणं कार्यं क्रिया ज्ञानं त्वमेव च।
त्वामम्ब न विना किंचित्त्वयि सर्वं प्रतिष्ठितम्।।30।।

दुष्टान्दैत्यान्हन्तुकामां महर्षी

न्शिष्टानन्यान्पातुकामां कराब्जैः।

अष्टाभिस्त्वां सायुधैर्भासमानां
दुर्गां देवी(ँ्) (?) शरणमहं प्रपद्ये।।32।।

नाहं मन्ये दैवतं मान्यमन्य

त्त्वत्पादाब्जादम्बिके कुम्भजाद्याः।

ये ध्यातारो भक्तिसंशुद्धचित्ताः
परामृतात्परिमुच्यन्ति सर्वे।।34।।

कल्याणि त्वं कुन्दहासप्रकाशै

रन्तर्ध्वान्तं नाशयन्ती क्षणेन।

हन्तास्माकं ध्यायतां त्वत्पदाब्ज
मुच्चतिष्ठ महते सौभगाय।।36।।

मद्वश्या ये दुराचारा ये च सन्मार्गगामिनः।
भवत्याः कृपया सर्वे सुवर्यन्तु यजमानाः।।38।।

भवानि तव पादाब्जनिर्णेजनपवित्रताः।
भवामयप्रशान्त्यै त्वामपो याचामि भेषजम्।।40।।

नो वा यागैर्नैव पूर्तादिकृत्यै

र्नो वा जप्यैर्नो महद्भिस्तपोभिः।

नो वा योगैः क्लेशकृद्भिः सुमेधा
निचाय्येमां शान्तिमत्यन्तमेति।।42।।

बन्धूकाभैर्भानुभिर्भासयन्ती

विश्वं शश्वत्तुङ्गपीनस्तनार्धा।

लावण्याब्धेः सुन्दरि त्वं प्रसादा
दायुः प्रजाँ् रयिमस्मासु धेहि।।44।।

वाग्देवीति त्वां वदन्त्यम्ब केचि

ल्लक्ष्मीर्गौरीत्येवमन्येऽप्युशन्ति।

शश्वन्मातः प्रत्यगद्वैतरूपां
शंसन्ति केचिन्निविदो जनाः।।46।।

ये संपन्नाः साधनैस्तैश्चतुर्भिः

शुश्रूषाभिर्देशिकं प्रीणयन्ति।

सम्यग्विद्वाञ्शुद्धसत्त्वान्तराणां
तेषामेवैतां ब्रह्मविद्यां वदेत।।48।।

जगत्पवित्रि मामिकामपाहराशु दुर्जराम्।
प्रसीद मे दयाधुने प्रशस्तिमम्ब नः स्कृधि।।50।।

भण्डभण्डनलीलायां रक्तचन्दनपङ्किलः।
अङ्कुशस्तव तं हन्याद्यश्च नो द्वेषते जनः।।52।।

चञ्चद्बालातपज्योत्स्नाकलामण्डलशालिने।
ऐक्षवाय नमो मातर्बाहुभ्यां तव धन्वने।।54।।

शरणं करवाण्यम्ब चरणं तव सुन्दरि।
शपे त्वत्पादुकाभ्यां मे नान्यः पन्था अयनाय।।56।।

दरिद्रं मां विजानीहि सर्वज्ञासि यतः शिवे।
दूरीकृत्याशु दुरितमथा नो वर्धया रयिम्।।58।।

मूलाधारादूर्ध्वमन्तश्चरन्तीं

भित्त्वा ग्रन्थीन्मूर्ध्नि निर्यत्सुधार्द्राम्।

पश्यन्तस्त्वां ये च तृप्तिं लभन्ते
तेषां शान्तिः शाश्वती नेतरेषाम्।।60।।

त्वद्भक्तानामम्ब शान्तैषणानां

ब्रह्मिष्ठानां दृष्टिपातेन पूतः।

पापीयानप्यावृतः स्वर्वधूभिः
शोकातिगो मोदते स्वर्गलोके।।62।।

विद्वन्मुख्यैर्विद्रुमाभं विशाल

श्रोणीशिञ्जन्मेखलाकिङ्किणीकम्।

चन्द्रोत्तंसं चिन्मयं वस्तु किंचि
द्विद्धि त्वमेतन्निहितं गुहायाम्।।64।।

चक्षुःप्रेङ्खत्प्रेमकारुण्यधारां

हंसज्योत्स्नापूरहृष्यच्चकोराम्।

यामाश्िलष्यन्मोदते देवदेवः
सा नो देवी सुहवा शर्म यच्छतु।।66।।

का मे भीतिः का क्षतिः किं दुरापं

कामेशाङ्कोत्तुङ्गपर्यङ्कसंस्थाम्।

तत्त्वातीतामच्युतानन्ददात्रीं
देवीमहं निःऋतिं वन्दमानः।।68।।

तारुण्योत्तुङ्गितकुचे लावण्योल्लासितेक्षणे।
तवाज्ञयैव कामाद्या मास्मान्प्रापन्नरातयः।।70।।

कुर्वे गर्वेणापचारानपारा

न्यद्यप्यम्ब त्वत्पदाब्जं तथापि।

मन्ये धन्ये देवि विद्यावलम्बं
मातेव पुत्रं बिभृतास्वेनम्।।72।।

चक्रं सेवे तारकं सर्वसिध्यै

श्रीमन्मातः सिद्धयश्चाणिमाद्याः।

नित्या मुद्रा शक्तयश्चाङ्गदेव्यो
यस्मिन्देवा अधि विश्वे निषेदुः।।74।।

विद्युद्वल्लकन्दलीं कल्पयन्तीं

मूर्तिं स्फूर्त्या पङ्कजं धारयन्तीम्।

ध्यायन्हि त्वां जायते सार्वभौमो
विश्वा आशाः पृतनाः संजयञ्जयन्।।76।।

सिन्दूराभैः सुन्दरैरंशुबृन्दै

र्लाक्षालक्ष्म्यां मज्जयन्तीं जगन्ति।

हेरम्बाम्ब त्वां हृदा लम्बते य
स्तस्मै विशः स्वयमेवानमन्ते।।78।।

कण्ठात्कुण्डलिनीं नीत्वा सहस्रारं शिवे तव।
न पुनर्जायते गर्भे सुमेधा अमृतोक्षितः।।80।।

तवानुग्रहनिर्भिन्नहृदयग्रन्थिरद्रिजे।
स्वात्मत्वेन जगन्मत्वा ततो न विजुगुप्सते।।82।।

ह्रीमित्येकं तावकं वाचकार्णं

यज्जिह्वाग्रे देवि जागर्ति किंचित्।

को वायं स्यात्कामकामस्त्रिलोक्यां
सर्वेऽस्मै देवा बलिमावहन्ति।।84।।

नूनं सिंहासनेश्वर्यास्तवाज्ञां शिरसा वहन्।
भयेन पवमानोऽयं सर्वा दिशोऽनुविधावति।।86।।

दारिद्रयाब्धौ देवि मग्नोऽपि शश्व

द्वाचा याचे नाहमम्ब त्वदन्यम्।

तस्मादस्मद्वाञ्छितं पूरयैत
दुषा सा नक्ता सुदुघेव धेनुः।।88।।

साधकः सततं कुर्यादैक्यं श्रीचक्रदेहयोः।
तथा देव्यात्मनोरैक्यमेतावदनुशासनम्।।90।।

इष्टानिष्टप्राप्तिविच्छित्तिहेतुः

स्तोतुं वाचां क्लृप्तिरित्येव मन्ये।

त्वद्रूपं हि स्वानुभूत्यैकवेद्यं
न चक्षुषा गृह्यते नापि वाचा।।92।।

यस्ते राकाचन्द्रबिम्बासनस्थां

पीयूषाब्धिं कल्पयन्तीं मयूखैः।

मूर्तिं भक्त्या ध्यायते हृत्सरोजे
न तस्य रोगो न जरा न मृत्युः।।94।।

वैरिञ्चोघैर्विष्णुरुद्रेन्द्रबृन्दै

र्दुर्गाकालीभैरवीशक्तिसंघैः।

यन्त्रेशि त्वं वर्तसे स्तूयमाना
न तत्र सूर्यो भाति न चन्द्रतारकम्।।96।।

पुष्पवत्पुल्लताटङ्कां प्रातरादित्यपाटलाम्।
यस्त्वामन्तः स्मरत्यम्ब तस्य देवा असन्वशे।।98।।

वामाङ्कस्थामीशितुर्दीप्यमानां

भूषाबृन्दैरिन्दुरेखावतंसाम्।

यस्त्वां पश्यन्संततं नैव तृप्तः
तस्मै च देवि वषडस्तु तुभ्यम्।।100।।

भक्त्याभक्त्या वापि पद्यावसान

श्रुत्या स्तुत्या चैतया स्तौति यस्त्वाम्।

तस्य क्षिप्रं त्वत्प्रसादेन मातः
सत्याः सन्तु यजमानस्य कामाः।।102।।

माधुरीसौरभावासचापसायकधारिणीम्।
देवीं ध्यायन्पठेदेतत्सर्वकामार्थसिद्धये।।104।।

यः पठति स्तुतिमेतां

विद्यावन्तं तमम्ब धनवन्तम्।

कुरु देवि यशस्वन्तं
वर्चस्वन्तं मनुष्येषु।।106।।

त्वामेवाहं स्तौमि नित्यं प्रणौमि

श्रीविद्येशां वच्मि संचिन्तयामि।

अध्यास्ते या विश्वमाता विराजो
हृत्पुण्डरीकं विरजं विशुद्धम्।।108।।