व्याप्तं हाटकविग्रहैर्जलचरैरारूढदेवव्रजैः

पोतैराकुलितान्तरं मणिधरैर्भूमीधरैर्भूषितम्।

आरक्तामृतसिन्धुमुद्धुरचलद्वीचीचयव्याकुल
व्योमानं परिचिन्त्य संततमहो चेतः कृतार्थीभव।।2।।

जातीचम्पकपाटलादिसुमनःसौरभ्यसंभावितं

ह्रींकारध्वनिकण्ठकोकिलकुहूप्रोल्लासिचूतद्रुमम्।

आविर्भूतसुगन्धिचन्दनवनं दृष्टिप्रियं नन्दनं
चञ्चच्चञ्चलचञ्चरीकचटुलं चेतश्िचरं चिन्तय।।4।।

रम्यद्वारपुरप्रचारतमसां संहारकारिप्रभ

स्फूर्जत्तोरणभारहारकमहाविस्तारहारद्युते।

क्षोणीमण्डलहेमहारविलसत्संसारपारप्रद
प्रोद्यद्भक्तमनोविहार कनकप्राकार तुभ्यं नमः।।6।।

क्वापि प्रोद्भटपद्मरागकिरणव्रातेन संध्यायितं

कुत्रापि स्फुटविस्फुरन्मरकतद्युत्या तमिस्रायितम्।

मध्यालम्बिविशालमौक्तिकरुचा ज्योत्स्नायितं कुत्रचि
न्मातः श्रीमणिमन्दिरं तव सदा वन्दामहे सुन्दरम्।।8।।

मणिसदनसमुद्यत्कान्तिधारानुरक्ते

वियति चरमसंध्याशङ्किनो भानुरथ्याः।

शिथिलितगतकुप्यत्सूतहुंकारनादैः
कथमपि मणिगेहादुच्चकैरुच्चलन्ति।।10।।

विदूरमुक्तवाहनैर्विनम्रमौलिमण्डलै

र्निबद्धहस्तसंपुटैः प्रयत्नसंयतेन्द्रियैः।

विरिञ्चिविष्णुशंकरादिभिर्मुदा तवाम्बिके
प्रतीक्ष्यमाणनिर्गमो विभाति रत्नमण्डपः।।12।।

प्रवेशनिर्गमाकुलैः स्वकृत्यरक्तमानसै

र्बहिःस्थितामरावलीविधीयमानभक्तिभिः।

विचित्रवस्त्रभूषणैरुपेतमङ्गनाजनैः
सदा करोतु मङ्गलं ममेह रत्नमण्डपः।।14।।

इन्द्रादींश्च दिगीश्वरान्सहपरीवारानथो सायुधा

न्योषिद्रूपधरान्स्वदिक्षु निहितान्संचिन्त्य हृत्पङ्कजे।

शङ्खे श्रीवसुधारया वसुमतीयुक्तं च पद्मं स्मर
न्कामं नौमि रतिप्रियं सहचरं प्रीत्या वसन्तं भजे।।16।।

कस्तूरिकाश्यामलकोमलाङ्गीं

कादम्बरीपानमदालसाङ्गीम्।

वामस्तनालिङ्गितरत्नवीणां
मातङ्गकन्यां मनसा स्मरामि।।18।।

प्रमत्तवारुणीरसैर्विघूर्णमानलोचनाः

प्रचण्डदैत्यसूदनाः प्रविष्टभक्तमानसाः।

उपोढकज्जलच्छविच्छटाविराजिविग्रहाः
कपालशूलधारिणीः स्तुवे त्वदीयदूतिकाः।।20।।

आस्तीर्णारुणकम्बलासनयुतं पुष्पोपहारान्वितं

दीप्तानेकमणिप्रदीपसुभगं राजद्वितानोत्तमम्।

धूपोद्गारिसुगन्धिसंभ्रममिलद्भृङ्गावलीगुञ्जितं
कल्याणं वितनोतु मेऽनवरतं श्रीमण्डपाभ्यन्तरम्।।22।।

सर्वाङ्गस्थितिरम्यरूपरुचिरां प्रातः समभ्युत्थितां

जृम्भामञ्जुमुखाम्बुजां मधुमदव्याघूर्णदक्षित्रयाम्।

सेवायातसमस्तसंनिधिसखीः संमानयन्तीं दृशा
संपश्यन्परदेवतां परमहो मन्ये कृतार्थं जनुः।।24।।

पाद्यं ते परिकल्पयामि पदयोरर्घ्यं तथा हस्तयोः

सौधीभिर्मधुपर्कमम्ब मधुरं धाराभिरास्वादय।

तोयेनाचमनं विधेहि शुचिना गाङ्गेन मत्कल्पितं
साष्टाङ्गं प्रणिपातमीशदयिते दृष्ट्या कृतार्थी कुरु।।26।।

निधेहि मणिपादुकोपरि पदाम्बुजं मज्जना

लयं व्रज शनैः सखीकृतकराम्बुजालम्बनम्।

महेशि करुणानिधे तव दृगन्तपातोत्सुका
न्विलोकय मनागमूनुभयसंस्थितान्दैवतान्।।28।।

कनककलशजालस्फाटिकस्नानपीठा

द्युपकरणविशालं गन्धमत्तालिमालम्।

स्फुरदरुणवितानं मञ्जुगन्धर्वगानं
परमशिवमहेले मज्जनागारमेहि।।30।।

तत्र स्फाटिकपीठमेत्य शनकैरुत्तारितालंकृति

र्नीचैरुज्झितकञ्चुकोपरिहितारक्तोत्तरीयाम्बरा।

वेणीबन्धमपास्य कङ्कतिकया केशप्रसादं मना
क्कुर्वाणा परदेवता भगवती चित्ते मम द्योतताम्।।32।।

कृतपरिकरबन्धास्तुङ्गपीनस्तनाढ्या

मणिनिवहनिबद्धा हेमकुम्भीर्दधानाः।

सुरभिसलिलनिर्यद्गन्धलुब्धालिमालाः
सविनयमुपतस्थुः सर्वतः स्नानदास्यः।।34।।

प्रत्यङ्गं परिमार्जयामि शुचिना वस्त्रेण संप्रो़ञ्छनं

कुर्वे केशकलापमायततरं धूपोत्तमैर्धूपितम्।

आलीबृन्दविनिर्मितां यवनिकामास्थाप्य रत्नप्रभं
भक्तत्राणपरे महेशगृहिणि स्नानाम्बरं मुच्यताम्।।36।।

विलुलितचिकुरेण च्छादितांसप्रदेशे

मणिनिकरविराजत्पादुकान्यस्तपादे।

सुललितमवलम्ब्य द्राक्सखीमंसदेशे
गिरिशगृहिणि भूषामण्टपाय प्रयाहि।।38।।

स्निग्धं कङ्कतिकामुखेन शनकैः संशोध्य केशोत्करं

सीमन्तं विरचय्य चारू विमलं सिन्दूररेखान्वितम्।

मुक्ताभिर्ग्रथितालकां मणिचितैः सौवर्णसूत्रैः स्फुटं
प्रान्ते मौक्तिकगुच्छकोपलतिकां ग्रथ्नामि वेणीमिमाम्।।40।।

त्वामाश्रयद्भिः कबरीतमिस्रै

र्बन्दीकृतं द्रागिव भानुबिम्बम्।

म़ृडानि चूडामणिमादधानं
वन्दामहे तावकमुत्तमाङ्गम्।।42।।

मीनाम्भोरुहखञ्जरीटसुषमाविस्तारविस्मारके

कुर्वाणे किल कामवैरिमनसः कंदर्पबाणप्रभाम्।

माध्वीपानमदारुणेऽतिचपले दीर्घे दृगम्भोरुहे
देवि स्वर्णशलाकयोर्जितमिदं दिव्याञ्जनं दीयताम्।।44।।

उडुकृतपरिवेषस्पर्धया शीतभानो

रिव विरचितदेहद्वन्द्वमादित्यबिम्बम्।

अरुणमणिसमुद्यत्प्रान्तविभ्राजिमुक्तं
श्रवसि परिनिधेहि स्वर्णताटङ्कयुग्मम्।।46।।

नानादेशसमुत्थितैर्मणिगणप्रोद्यत्प्रभामण्डल

व्याप्तैराभरणैर्विराजितगलां मुक्ताच्छटालंकृताम्।

मध्यस्थारुणरत्नकान्तिरुचिरां प्रान्तस्थमुक्ताफल
व्रातामम्ब चतुष्किकां परशिवे वक्षःस्थले स्थापय।।48।।

करसरसिजनाले विस्फुरत्कान्तिजाले

विलसदमलशोभे चञ्चदीशाक्षिलोभे।

विविधमणिमयूखोद्भासितं देवि दुर्गे
कनककटकयुग्मं बाहुयुग्मे निधेहि।।50।।

विततनिजमयूखैर्निर्मितामिन्द्रनीलै

र्विजितकमलनालालीनमत्तालिमालाम्।

मणिगणखचिताभ्यां कङ्कणाभ्यामुपेतां
कलय वलयराजीं हस्तमूले महेशि।।52।।

आलवालमिव पुष्पधन्वना

बालविद्रुमलतासु निर्मितम्।

अङ्गुलीषु विनिधीयतां शनै
रङ्गुलीयकमिदं मदर्पितम्।।54।।

व्यालम्बमानवरमौक्तिकगुच्छशोभि

विभ्राजिहाटकपुटद्वयरोचमानम्।

हेम्ना विनिर्मितमनेकमणिप्रबन्धं
नीवीनिबन्धनगुणं विनिवेदयामि।।56।।

निबद्धशितिपट्टकप्रवरगुच्छसंशोभितां

कलक्वणितमञ्जुलां गिरिशचित्तसंमोहनीम्।

अमन्दमणिमण्डलीविमलकान्तिकिम्मीरितां
निधेहि पदपङ्कजे कनकघुङ्घुरूमम्बिके।।58।।

पदाम्बुजमुपासितुं परिगतेन शीतांशुना

कृतां तनुपरम्परामिव दिनान्तरागारुणाम्।

महेशि नवयावकद्रवभरेण शोणीकृतां
नमामि नखमण्डलीं चरणपङ्कजस्थां तव।।60।।

गृहाण परमामृतं कनकपात्रसंस्थापितं

समर्पय मुखाम्बुजे विमलवीटिकामम्बिके।

विलोकय मुखाम्बुजं मुकुरमण्डले निर्मले
निधेहि मणिपादुकोपरि पदाम्बुजं सुन्दरि।।62।।

चलन्त्यामम्बायां प्रचलति समस्ते परिजने

सवेगं संयाते कनकलतिकालंकृतिभरे।

समन्तादुत्तालस्फुरितपदसंपातजनितै
र्झणत्कारैस्तारैर्झणझणितमासीन्मणिगृहम्।।64।।

वेधाः पादतले पतययमसौ विष्णुर्नमत्यग्रतः

शंभुर्देहि दृगञ्चलं सुरपतिं दूरस्थमालोकय।

इत्येवं परिचारिकाभिरुदिते संमाननां कुर्वती
दृग्द्वन्द्वेन यथोचितं भगवती भूयाद्विभूत्यै मम।।66।।

अग्रे केचन पाश्र्वयोः कतिपये पृष्ठे परे प्रस्थिता

आकाशे समवस्थिताः कतिपये दिक्षु स्थिताश्चापरे।

संमर्दं शनकैरपास्य पुरतो दण्डप्रणामान्मुहुः
कुर्वाणाः कतिचित्सुरा गिरिसुते दृक्पातमिच्छन्ति ते।।68।।

कस्मैचित्सुचिरादुपासितमहामन्त्रौघसिद्धिं क्रमा

देकस्मै भवनिःस्पृहाय परमानन्दस्वरूपां गतिम्।

अन्यस्मै विषयानुरक्तमनसे दीनाय दुःखापहं
द्रव्यं द्वारसमाश्रिताय ददतीं वन्दामहे सुन्दरीम्।।70।।

तव दहनसदृक्षैरीक्षणैरेव चक्षु

र्निखिलपशुजनानां भीषयद्भीषणास्यम्।

कृतवसति परेशप्रेयसि द्वारि नित्यं
शरभमिथुनमुच्चैर्भक्तियुक्तो नतोऽस्मि।।72।।

स्वस्थानस्थितदेवतागणवृते बिन्दौ मुदा स्थापितं

नानारत्नविराजिहेमविलसत्कान्तिच्छटादुर्दिनम्।

चञ्चत्कौसुमतूलिकासनयुतं कामेश्वराधिष्ठितं
नित्यानन्दनिदानमम्ब सततं वन्दे च सिंहासनम्।।74।।

कर्पूरादिकवस्तुजातमखिलं सौवर्णभृङ्गारकं

ताम्बूलस्य करण्डकं मणिमयं चैलाञ्चलं दर्पणम्।

विस्फूर्जन्मणिपादुके च दधतीः सिंहासनस्याभित
स्तिष्ठन्तीः परिचारिकास्तव सदा वन्दामहे सुन्दरि।।76।।

प्रान्तस्फुरद्विमलमौक्तिकगुच्छजालं

चञ्चन्महामणिविचित्रितहेमदण्डम्।

उद्यत्सहस्रकरमण्डलचारु हेम
च्छत्रं महेशमहिले विनिवेशयामि।।78।।

संतुष्टां परमामृतेन विलसत्कामेश्वराङ्कस्थितां

पुष्पौघैरभिपूजितां भगवतीं त्वां वन्दमाना मुदा।

स्फूर्जत्तावकदेहरश्मिकलनाप्राप्तस्वरूपाभिदाः
श्रीचक्रावरणस्थिताः सविनयं वन्दामहे देवताः।।80

त्रिपुरासुधार्णवासन

मारभ्य त्रिपुरमालिनी यावत्।

आवरणाष्टकसंस्थित
मासनषट्कं नमामि परमेशि।।82।।

उड्यानजालंधरकामरूप

पीठानिमान्पूर्णगिरिप्रसक्तान्।

त्रिकोणदक्षाग्रिमसव्यभाग
मध्यस्थितान्सिद्धिकरान्नमामि।।84।।

तारानाथकलाप्रवेशनिगमव्याजाद्गतासुप्रथं

त्रैलोक्ये तिथिषु प्रवर्तितकलाकाष्ठादिकालक्रमम्।

रत्नालंकृतिचित्रवस्त्रललितं कामेश्वरीपूर्वकं
नित्याषोडशकं नमामि लसितं चक्रात्मनोरन्तरे।।86।।

हृदयमथ शिरः शिखाखिलाद्ये

कवचमथो नयनत्रयं च देवि।

मुनिजनपरिचिन्तितं तथास्त्रं
स्फुरतु सदा हृदये षडङ्गमेतत्।।88।।

सर्वाशापरिपूरके वसुदलद्वन्द्वेन विभ्राजिते

विस्फूर्जन्त्रिपुरेश्वरीनिवसतौ चक्रे स्थिता नित्यशः।

कामाकर्षणिकादयो मणिगणभ्राजिष्णुदिव्याम्बरा
योगिन्यः प्रदिशन्तु काङ्क्षितफलं विख्यातगुप्ताभिधाः।।90।।

लसद्युगदृशारके स्फुरति सर्वसौभाग्यदे

शुभाभरणभूषितत्रिपुरवासिनीमन्दिरे।

स्थिता दधतु मङ्गलं सुभगसर्वसंक्षोभिणी
मुखाः सकलसिद्धयो विदितसंप्रदायाभिधाः।।92।।

अन्तःशोभिदशारकेऽतिललिते सर्वादिरक्षाकरे

मालिन्या त्रिपुराद्यया विरचितावासे स्थितं नित्यशः।

नानारत्नविभूषणं मणिगणभ्राजिष्णु दिव्याम्बरं
सर्वज्ञादिकशक्तिबृन्दमनिशं वन्दे निगर्भाभिधम्।।94।।

चूताशोकविकासिकेतकरजः प्रोद्भासिनीलाम्बुज

प्रस्फूर्जन्नवमल्लिकासमुदितैः पुष्पैः शरान्िनर्मितान्।

रम्यं पुष्पशरासनं सुललितं पाशं तथा चाङ्कुशं
वन्दे तावकमायुधं परशिवे चक्रान्तराले स्थितम्।।96।।

सर्वानन्दमये समस्तजगतामाकाङ्क्षिते बैन्दवे

भैरव्या त्रिपुराद्यया विरचितावासे स्थिता सुन्दरी।

आनन्दोल्लसितेक्षणा मणिगणभ्राजिष्णुभूषाम्बरा
विस्फूर्जद्वदना परापररहः सा पातु मां योगिनी।।98।।

वैरमुद्धतमपास्य शंभुना

मस्तके विनिहितं कलाच्छलात्।

गन्धलुब्धमधुपाश्रितं सदा
केतकीकुसुममर्पयामि ते।।100।।

अगरुबहलधूपाजस्रसौरभ्यरम्यां

मरकतमणिराजीराजिहारिस्नभाम्।

दिशि विदिशि विसर्पद्गन्धलुब्धालिमालां
वकुलकुसुममालां कण्ठपीठेऽर्पयामि।।102।।

धूपं तेऽगरुसंभवं भगवति प्रोल्लासिगन्धोद्धुरं

दीपं चैव निवेदयामि महसा हार्दान्धकारच्छिदम्।

रत्नस्वर्णविनिर्मितेषु परितः पात्रेषु संस्थापितं
नैवेद्यं विनिवेदयामि परमानन्दात्मिके सुन्दरि।।104।।

शिम्बीसूरणशाकबिम्बबृहतीकूश्माण्डकोशातकी

वृन्ताकानि पटोलकानि मृदुना संसाधितान्यग्निना।

संपन्नानि च वेसवारविसरैर्दिव्यानि भक्त्या कृता
न्यग्रे ते विनिवेदयामि गिरिजे सौवर्णपात्रव्रजे।।106।।

सितयाञ्चितलड्डुकव्रजा

न्मृदुपूपान्मृदुलाश्च पूरिकाः।

परमान्नमिदं च पार्वति
प्रणयेन प्रतिपादयामि ते।।108।।

अग्रे ते विनिवेद्य सर्वममितं नैवेद्यमङ्गीकृतं

ज्ञात्वा तत्त्वचतुष्टयं प्रथमतो मन्ये सुतृप्तां ततः।

देवीं त्वां परिशिष्टमम्ब कनकामत्रेषु संस्थापितं
शक्तिभ्यः समुपाहारामि सकलं देवेशि शंभुप्रिये।।110।।

पङ्क्त्योपविष्टान्परितस्तु चक्रं

शक्त्या स्वयालिङ्कितवामभागान्।

सर्वोपचारैः परिपूज्य भक्त्या
तवाम्बिके पारिषदान्नमामि।।112।।

दृश्यते तव मुखाम्बुजं शिवे

श्रूयते स्फुटमनाहतध्वनिः।

अर्चने तव गिरामगोचरे
न प्रयाति विषयान्तरं मनः।।114।।

चक्षुः पश्यतु नेह किंचन परं घ्राणं न वा जिघ्रतु

श्रोत्रं हन्त श्रृणोतु न त्वगपि न स्पर्शं समालम्बताम्।

जिह्वा वेत्तु न वा रसं मम परं युष्मत्स्वरूपामृते
नित्यानन्दविघूर्णमाननयने नित्यं मनो मज्जतु।।116।।

गणाधिनाथं वटुकं च योगिनीः

क्षेत्राधिनाथं च विदिक्चतुष्टये।

सर्वोपचारैः परिपूज्य भक्तितो
निवेदयामो बलिमुक्तयुक्तिभिः।।118।।

ताम्बूलं विनिवेदयामि विलसत्कर्पूरकस्तूरिका

जातीपूगलवङ्गचूर्णखदिरैर्भक्त्या समुल्लासितम्।

स्फूर्जद्रत्नसमुद्गकप्रणिहितं सौवर्णपात्रे स्थितै
र्दीपैरुज्ज्वलमन्नचूर्णरचितैरारार्तिकं गृह्यताम्।।120।।

ताम्बूलोद्भासिवक्त्रैस्त्वदमलवदनालोकनोल्लासिनेत्रै

श्चक्रस्थैः शक्तिसंघैः परिहृतविषयासङ्गमाकर्ण्यमानम्।

गीतज्ञाभिः प्रकामं मधुरसमधुरं वादितं किंनरीभि
र्वीणाझंकारनादं कलय परशिवानन्दसंधानहेतोः।।122।।

यथेप्सितमनोगतप्रकटितोपचारार्चितां

निजावरणदेवतागणवृतां सुरेशस्थिताम्।

कृताञ्जलिपुटो मुहुः कलितभूमिरष्टाङ्गकै
र्नमामि भगवत्यहं त्रिपुरसुन्दरि त्राहि माम्।।124।।

क्वाहं मन्दमतिः क्व चेदमखिलैरेकान्तभक्तैः स्तुतं

ध्यातं देवि तथापि ते स्वमनसा श्रीपादुकापूजनम्।

कादाचित्कमदीयचिन्तनविधौ संतुष्टया शर्मदं
स्तोत्रं देवतया तया प्रकटितं मन्ये मदीयानने।।126।।