कनककलशशोभमानशीर्षं

जलधरलम्बि समुल्लसत्पताकम्।

भगवति तव संनिवासहेतो
र्मणिमयमन्दिरमेतदर्पयामि।।3।।

कनकमयवितर्दिस्थापिते तूलिकाढ्ये

विविधकुसुमकीर्णे कोटिबालार्कवर्णे।

भगवति रमणीये रत्नसिंहासनेऽस्मि
न्नुपविश पदयुग्मं हेमपीठे निधाय।।5।।

दूर्वया सरसिजान्वितविष्णु

क्रान्तया च सहितं कुसुमाढ्यम्।

पद्मयुग्मसदृशे पदयुग्मे
पाद्यमेतदुररीकुरु मातः।।7।।

जलजद्युतिना करेण जाती

फलतक्कोललवङ्गगन्धयुक्तैः।

अमृतैरमृतैरिवातिशीतै
र्भगवत्याचमनं विधीयताम्।।9।।

एतच्चम्पकतैलमम्ब विविधैः पुष्पैर्मुहुर्वासितं

न्यस्तं रत्नमये सुवर्णचषके भृङ्गैर्भ्रमद्भिर्वृतम्।

सानन्दं सुरसुन्दरीभिरभितो हस्तैर्धृतं ते मया
केशेषु भ्रमरभ्रमेषु सकलेष्वङ्गेषु चालिप्यते।।11।।

दधिदुग्धघृतैः समाक्षिकैः

सितया शर्करया समन्वितैः।

स्नपयामि तवाहमादरा
ज्जननि त्वां पुनरुष्णवारिभिः।।13।।

बालार्कद्युति दाडिमीयकुसुमप्रस्पर्धि सर्वोत्तमं

मातस्त्वं परिधेहि दिव्यवसनं भक्त्त्या मया कल्पितम्।

मुक्ताभिर्ग्रथितं सुकञ्चुकमिदं स्वीकृत्य पीतप्रभं
तप्तस्वर्णसमानवर्णमतुलं प्रावर्णमङ्गीकुरु।।15।।

बहुभिरगरुधूपैः सादरं धूपयित्वा

भगवति तव केशान्कङ्कतैर्मार्जयित्वा।

सुरभिभिररविन्दैश्चम्पकैश्चार्चयित्वा
झटिति कनकसूत्रैर्जूटयन्वेष्टयामि।।17।।

मञ्जीरे पदयोर्निधाय रुचिरां विन्यस्य काञ्चीं कटौ

मुक्ताहारमुरोजयोरनुपमां नक्षत्रमालां गले।

केयूराणि भुजेषु रत्नवलयश्रेणीं करेषु क्त्रमा
त्ताटङ्के तव कर्णयोर्विनिदधे शीर्षे च चूडामणिम्।।19।।

मातः फालतले तवातिविमले काश्मीरकस्तूरिका

कर्पूरागरुभिः करोमि तिलकं देहेऽङ्गरागं ततः।

वक्षोजादिषु यक्षकर्दमरसं सिक्त्वा च पुष्पद्रवं
पादौ चन्दनलेपनादिभिरहं संपूजयामि क्रमात्।।21।।

जननि चम्पकतैलमिदं पुरो

मृगमदोपयुतं पटवासकम्।

सुरभिगन्धमिदं च चतुःसमं
सपदि सर्वमिदं परिगृह्यताम्।।23।।

मन्दारकुन्दकरवीरलवङ्गपुष्पै

स्त्वां देवि संततमहं परिपूजयामि।

जातीजपावकुलचम्पककेतकादि
नानाविधानि कुसुमानि च तेऽर्पयामि।।25।।

पारिजातशतपत्रपाटलै

र्मल्लिकावकुलचम्पकादिभिः।

अम्बुजैः सुकुसुमैश्च सादरं
पूजयामि जगदम्ब ते वपुः।।27।।

रत्नालंकृतहेमपात्रनिहितैर्गोसर्पिषा लोडितै

र्दीपैर्दीर्घतरान्धकारभिदुरैर्बालार्ककोटिप्रभैः।

आताम्रज्वलदुज्ज्वलप्रविलसद्रत्नप्रदीपैस्तथा
मातस्त्वामहमादरादनुदिनं नीराजयाम्युच्चकैः।।29।।

सापूपसूपदधिदुग्धसिताघृतानि

सुस्वादुभक्तपरमान्नपुरःसराणि।

शाकोल्लसन्मरिचिजीरकबाह्लिकानि
भक्ष्याणि भुङ्क्ष्व जगदम्ब मयार्पितानि।।31।।

उष्णोदकैः पाणियुगं मुखं च

प्रक्षाल्य मातः कलधौतपात्रे।

कर्पूरमिश्रेण सकुङ्कुमेन
हस्तौ समुद्वर्तय चन्दनेन।।33।।

जम्ब्वाम्ररम्भाफलसंयुतानि

द्राक्षाफलक्षौद्रसमन्वितानि।

सनारिकेलानि सदाडिमानि
फलानि ते देवि समर्पयामि।।35।।

कर्पूरेण युतैर्लवङ्गसहितैस्तक्कोलचूर्णान्वितैः

सुस्वादुक्रमुकैः सगौरखदिरैः सुस्निग्धजातीफलैः।

मातः कैतकपत्रपाण्डुरुचिभिस्ताम्बूलवल्लीदलैः
सानन्दं मुखमण्डनार्थमतुलं ताम्बूलमङ्गीकुरु।।37।।

ताम्बूलनिर्जितसुतप्तसुवर्णवर्णं

स्वर्णाक्तपूगफलमौक्तिकचूर्णयुक्तम्।

सौवर्णपात्रनिहितं खदिरेण सार्धं
ताम्बूलमम्ब वदनाम्बुरुहे गृहाण।।39।।

सविनयमथ दत्वा जानुयुग्मं धरण्यां

सपदि शिरसि धृत्वा पात्रमारार्तिकस्य।

मुखकमलसमीपे तेऽम्ब सार्थं त्रिवारं
भ्रमयति मयि भूयात्ते कृपार्द्रः कटाक्षः।।41।।

मातः काञ्चनदण्डमण्डितमिदं पूर्णेन्दुबिम्बप्रभं

नानारत्नविशोभिहेमकलशं लोकत्रयाह्लादकम्।

भास्वन्मौक्तिकजालिकापरिवृतं प्रीत्यात्महस्ते धृतं
छत्रं ते परिकल्पयामि शिरसि त्वष्ट्रा स्वयं निर्मितम्।।43।।

मार्ताण्डमण्डलनिभो जगदम्ब योऽयं

भक्त्या मया मणिमयो मुकुरोऽर्पितस्ते।

पूर्णेन्दुबिम्बरुचिरं वदनं स्वकीय
मस्मिन्विलोकय विलोलविलोचने त्वम्।।45।।

प्रियगतिरतितुङ्गो रत्नपल्याणयुक्तः

कनकमयविभूषः स्निग्धगम्भीरघोषः।

भगवति कलितोऽयं वाहनार्थं मया ते
तुरगशतसमेतो वायुवेगस्तुरंगः।।47।।

द्रुततरतुरगैर्विराजमानं

मणिमयचक्रचतुष्टयेन युक्तम्।

कनकमयममुं वितानवन्तं
भगवति ते हि रथं समर्पयामि।।49।।

परिघीकृतसप्तसागरं

बहुसंपत्सहितं मयाम्ब ते विपुलम्।

प्रबलं धरणीतलाभिधं
दृढदुर्गं निखिलं समर्पयामि।।51।।

भ्रमरलुलितलोलकुन्तलाली

विगलितमाल्यविकीर्णरङ्गभूमिः।

इयमतिरुचिरा नटी नटन्ती
तव हृदये मुदमातनोतु मातः।।53।।

भ्रमदलिकुलतुल्यालोलधम्मिल्लभाराः

स्मितमुखकमलोद्यद्दिव्यलावण्यपूराः।

अनुपमितसुवेषा वारयोषा नटन्ति
परभृतकलकण्ठ्यो देवि दैन्यं धुनोतु।।55।।

विपञ्चीषु सप्तस्वरान्वादयन्त्य

स्तव द्वारि गायन्ति गन्धर्वकन्याः।

क्षणं सावधानेन चित्तेन मातः
समाकर्णय त्वं मया प्रार्थितासि।।57।।

तव देवि गुणानुवर्णने

चतुरा नो चतुराननादयः।

तदिहैकमुखेषु जन्तुषु
स्तवनं कस्तव कर्तुमीश्वरः।।59।।

रक्तोत्पलारक्तलताप्रभाभ्यां ध्वजोर्ध्वरेखाकुलिशाङ्किताभ्याम्।
अशेषबृन्दारकवन्दिताभ्यां नमो भवानीपदपङ्कजाभ्याम्।।61।।

अथ मणिमयमञ्चकाभिरामे

कनकमयवितानराजमाने।

प्रसरदगरुधूपधूपितेऽस्मि
न्भगवति भवनेऽस्तु ते निवासः।।63।।

तव देवि सरोजचिह्नयोः पदयोर्निर्जितपद्मरागयोः।
अतिरक्ततरैरलक्तकैः पुनरुक्तां रचयामि रक्तताम्।।65।।

क्षणमथ जगदम्ब मञ्चकेऽस्मि

न्मृदुतलतूलिकया विराजमाने।

अतिरहसि मुदा शिवेन सार्धं
सुखशयनं कुरु तत्र मां स्मरन्ती।।67।।

एषा भक्त्या तव विरचिता या मया देवि पूजा

स्वीकृत्यैनां सपदि सकलान्मेऽपराधान्क्षमस्व।

न्यूनं यत्तत्तव करुणया पूर्णतामेतु सद्यः
सानन्दं मे हृदयकमले तेऽस्तु नित्यं निवासः।।69।।

पूजामिमां पठेन्नित्यं पूजां कर्तुमनीश्वरः।
पूजाफलमवाप्नोति वाञ्छितार्थं च विन्दति।।71।।