त्रिमूर्तिसर्गाच्च पुराभवत्वा

त्त्रयीमयत्वाच्च पुरैव देव्याः।

लये त्रिलोक्या अपि पूरणत्वा
त्प्रायोऽम्बिकायास्त्रिपुरेति नाम।।8.2।।

वागैश्वर्यातिशयदतया वाग्भवं बीजमुक्तं

त्रैलोक्यक्षोभणवशताकृष्टिदं कामराजम्।

शाक्तं क्ष्वेलापहरणकविताकारकं मन्त्रमेत
त्प्रोक्तं धर्मद्रविणसुखमोक्षप्रदं साधकानाम्।।8.4।।

मूर्धनि गुह्यहृदोरपि

नेत्रत्रितये च कर्णयोरास्ये।

अंसद्वये च पृष्ठे
कूर्परयोर्नाभिमण्डले न्यस्येत्।।8.6।।

आताम्रार्कायुताभां कलितशशिकलारञ्जितप्तां त्रिणेत्रां

देवीं पूर्णेन्दुवक्त्रां विधृतजपपटीपुस्तकाभीत्यभीष्टाम्।

पीनोत्तुङ्गस्तनार्तां वलिलसितविलग्नामसृक्पङ्कराज
न्मुण्डस्रङ्मण्डिताङ्गीमरुणतरदुकूलानुलेपां नमामि।।8.8।।

प्राणायामैः पवित्रीकृततनुरथ मन्त्री निजाधारराज

द्योनिस्थां दिव्यरूपां प्रमुदितमनसाभ्यर्चयित्वोपचारैः।

आबद्ध्वा योनिमुद्रामपि निजगुदलिङ्गान्तरस्थां प्रदीप्तां
भूयो द्रव्यैः सुशुद्धैररुणरुचिभिरित्यारभेद्बाह्यपूजाम्।।8.10।।

वह्नेः पुरद्वितयवासवयोनिमध्य

संबद्धवह्निवरुणेशसमाश्रिताश्री।

देव्यर्चनाय विहितं मुनिभिः पुरैव
लोके सुदुर्लभमिदं नवयोनिचक्रम्।।8.12।।

प्राङ्मध्ययोन्योः पुनरन्तराले

संपूजयेत्प्राग्गुरुपादपङ्क्तिम्।

पराभिधानामपराह्वयां च
परापराख्यामपि वाग्भवादिम्।।8.14।।

सुभगा भगा भगान्ते

सर्पिणि भगमालिनी अनङ्गाह्वा।

तत्पूर्वकुसुमसंज्ञा
तदादिके चाथ मेखलामदने।।8.16।।

असिताङ्गाख्यो रुरुरपि

चण्डः क्रोधाह्वयस्तथोन्मत्तः।

सकपालिभीषणाख्यः
संहारश्चाष्टभैरवाः कथिताः।।8.18।।

अच्छाभः स्वच्छवेषो धरणिमयगृहे वाग्भवं लक्षमेकं

यो जप्यात्तद्दशांशं विहितहुतविधिर्मन्त्रजप्ताञ्जनादिः।

काव्यैर्नानार्थवृत्तैस्त्रिभुवनमखिलं पूरयेन्मन्त्रजापी
मारार्त्या विह्वलाभिः पुनरयमनिशं सेव्यते सुन्दरीभिः।।8.20।।

ससुरासुरसिद्धयक्ष

विद्याधरगन्धर्वभुजंगचारणानाम्।

प्रमदामदवेगतो विकीर्णा
भरणाः स्रस्तदुकूलकेशजालाः।।8.22।।

रोमाञ्चकञ्चुकितगात्रलताघनोद्य

दुत्तुङ्गपीनकुचकुम्भनिपीडिताङ्ग्यः।

औत्सुक्यभारपृथुवेपथुखेदसन्न
पादारविन्दचलनस्खलनाभियाताः।।8.24।।

मस्तकारचितदोर्द्वयाञ्जलि

प्राभृता हरिणशाबलोचनाः।

वाञ्छितार्थकरणोद्यताश्च त
द्दृष्टिपातमभि संनमन्ति ताः।।8.26।।

पलाशपुष्पैर्मधुरत्रयाक्तै

र्होमं विदध्यादयुतावधिं यः।

सरस्वतीमन्दिरमाशु भूया
त्सौभाग्यलक्ष्म्योश्च स मन्त्रजापी।।8.28।।

मालतीवकुलजैर्दलैर्दलै

श्चन्दनाम्भसि घने निमज्जितैः।

श्रीकरीकुसुमकैर्हुतक्रिया
सैव चासु कविताकरी मता।।8.30।।

मधुरत्रयेण सह विल्वजैः फलै

र्हवनक्रियाशु जनतानुरञ्जनी।

अपि सैव साधकसमृद्धिदायिनी
दिनशो विशिष्टकमलाकरी मता।।8.32।।

फुल्लैर्बिल्वप्रसूनैस्तदभिनवदलै रक्तवाराहिपुष्पैः

प्रत्यग्रैर्बन्धुजीवैररुणसरसिजैरुत्पलैः कैरवाह्वैः।

नन्द्यावर्तैः सकुन्दैर्नृपतरुकुसुमैः पाटलीनागपुष्पैः
स्वाद्वक्तैरिन्दिराप्त्यै जुहुत च दिनशः सर्पिषा पायसेन।।8.34।।

वह्ने(?)र्बिम्बद्वयपरिवृताधारसंस्थं समुद्य

द्बालार्काभं स्वरगणसमावेष्टितं वाग्भवाख्यम्।

वाण्या स्वीयाद्वदनकुहरात्संततं निःसरन्त्या
ध्यायेन्मन्त्री प्रततकिरणप्रावृतं दुःखशान्त्यै।।8.36।।

मूर्ध्नोऽथ द्वादशान्तोदितशशधरबिम्बस्थयोनौ स्फुरन्तं

संवीतं व्यापकार्णैर्धवलरुचि मकारस्थितं बीजमन्त्यम्।

ध्यात्वा सारस्वताच्छामृतजललुलितं दिव्यकाव्यादिकर्ता
नित्यं क्ष्वेलापमृत्युग्रहदुरितविकारान्निहन्त्याशु मन्त्री।।8.38।।

गुह्यस्थितं वा मदनस्य बीजं

जपारुणं रक्तसुधाः स्रवन्तम्।

विचिन्त्य तस्मिन्विनिवेश्य साध्यां
वशीकरोत्येव विदग्धलोकम्।।8.40।।

संक्षेपतो निगदिता त्रिपुराभिधाना

विद्या सजापहवना सविधानपूजा।

सोपासना च सकलाभ्युदयप्रसिद्ध्यै
वाणीरमाप्तिविधये जगतो हिताय।।8.42।।

मध्ये वद्यक्षरयोः

सदवदवाग्वक्षरा निचन्द्रयुगे।

प्रोक्ता दशाक्षरीयं
कण्वविराजौ च वागृषिप्रभवाः।।8.44।।

अमलकमलसंस्था लेखिनीपुस्तकोद्य

त्करयुगलसरोजा कुन्दमन्दारगौरा।

धृतशशधरखण्डोल्लासिकोटीरचूडा
भवतु भवभयानां भङ्गिनी भारती वः।।8.46।।

मातृकोक्तविधिनाक्षराम्बुजे

शक्तिभिश्च विनियुज्य पूर्ववत्।

पीठमन्त्रवचसा महेश्वरीं
पूजयेत्प्रथममङ्गमन्त्रकैः।।8.48।।

इति सिद्धमनुर्मनोजदूरो

नचिरादेव कविर्भवेन्मनस्वी।

जपहोमरतः सदावगच्छे
द्वनितां वागधिपेति गौरवेण।।8.50।।

हृदयद्वयसे स्थितोऽथ तोये

रविबिम्बे प्रतिपद्य वागधीशाम्।

जपतस्त्रिसहस्रसंख्यमर्वा
क्कविता मण्डलतो भवेत्प्रभूता।।8.52।।

चतुरङ्गुलजैः समित्प्रसूनै

र्जुहुयाद्यो मधुरत्रयावसिक्तैः।

मनुजः समवाप्य धीविलासा
नचिरात्काव्यकृतां भवेत्पुरोगः।।8.54।।

आद्यन्तप्रणवगशक्तिमध्यसंस्था

वाग्भूयो भवति सरस्वतीचडेन्ता।

नत्यन्तो मनुरयमीशसंख्यवर्णः
संप्रोक्तो भुवि भजमानपारिजातः।।8.56।।

हंसारूढा हरहसितहारेन्दुकुन्दावदाता

वाणी मन्दस्मितयुतमुखी मौलिबद्धेन्दुलेखा।

विद्या वीणामृतमयघटाक्षस्रगादीप्तहस्ता
शुभ्राब्जस्था भवदभिमतप्राप्तये भारती स्यात्।।8.58।।

पूजायां पार्श्वयुगे

ससंस्कृता प्राकृता च वाग्देव्याः।

केवलवाङ्मयरूपा
संपूज्याङ्गैश्च शक्तिभिस्तदनु।।8.60।।

इति निगदितो वागीश्वर्याः सहोमजपार्चना

विधिरनुदिनं मन्त्री त्वेनां भजन्परिमुच्यते।

सकलदुरितैर्मेधालक्ष्मीयशोभिरवाप्यते
परमपरमां भक्तिं प्राप्योभयत्र च मोदते।।8.62।।

अमलकमलाधिवासिनि

मनसो वैमल्यदायिनि मनोज्ञे।

सुन्दरगात्रि सुशीले
तव चरणाम्भोरुहं नमामि सदा।।8.64।।

त्वच्चरणाम्भोरुहयोः

प्रणामहीनः पुनर्द्विजातिरपि।

भूयादनेडमूक
स्त्वद्भक्तो भवति देवि सर्वज्ञः।।8.66।।

वर्णतनोऽमृतवर्णे

नियतमनिर्वर्णितेऽपि योगीन्द्रैः।

निर्णीतिकरणदूरे
वर्णयितुं देवि देहि सामर्थ्यम्।।8.68।।

पुस्तकजपवटहस्ते

वरदाभयचिह्नचारुबाहुलते।

कर्पूरामलदेहे
वागीश्वरि शोधयाशु मम चेतः।।8.70।।

विद्यारूपेऽविद्या

नाशिनि विद्योतितेऽन्तरात्मविदाम्।

गद्यैः सपद्यजातै
राद्यैर्मुनिभिः स्तुते प्रसीद मम।।8.72।।

वेदात्मिके निरुक्त

ज्योतिर्व्याकरणकल्पशिक्षाभिः।

सच्छन्दोभिः संतत
क्लृप्तषडङ्गेन्द्रिये प्रसीद मम।।8.74।।

बोधात्मिके बुधानां

हृदयाम्बुजचारुरङ्गनटनपरे।

भगवति भवभङ्गकरीं
भक्तिं भद्रार्थदे प्रसीद मम।।8.76।।