न चापुत्रस्य लोकोऽस्ति पितरोऽधः पतन्ति च।
तस्मात्तु सकलोपायैर्यतेतापत्यसिद्धये।।33.2।।

अर्थिभ्योऽर्थमदातृ़णां विद्यमानेऽर्थसंचये।
अदत्त्वैवातिथिभ्योऽन्नं भोक्तृ़णां पापचेतसाम्।।33.4।।

इत्यादिदोषदुष्टानां पापानां गृहमेधिनाम्।
दुष्प्रतिग्रहदोषाद्वा जायते त्वनपत्यता।।33.6।।

पुत्राप्तये गृहस्थो

दीक्षाविधिना चतुर्दशीरात्रिम्।

सह पत्न्या गमयित्वा
कृत्वा पौर्वाह्णिकीः क्रियाः सर्वाः।।33.8।।

ततोऽग्निमाधाय चरुं च कृत्वा

संकल्प्य तद्दक्षिणमुत्तरं च।

भागं क्रमात्पैतृकदैविकं त
त्पित्र्यं तु पूर्वं जुहुयात्क्रमेण।।33.10।।

व्याहृतीभिरथ पक्वहोमतः

सर्वतः प्रतिजुहोतु सर्पिषा।

मातृवर्गगुरुतत्पितृद्वयं
पूर्ववत्समवदिष्य साधकः।।33.12।।

पक्वाहुतीनामपि वर्णसंख्यं

चतुर्गुणं चापि घृताहुतीनाम्।

हुत्वावदानद्वितयं च पुंस्त्री
भेदप्रभिन्नं हविषा करोतु।।33.14।।

पुरुषः पुरुषात्मकं प्रकृत्या

त्मकमन्याथ समाहितोपयुज्य।

अवदानयुगं क्रमान्मनस्वी
पुनराचम्य समर्चयेद्धुताशम्।।33.16।।

एकह्रासादन्यमब्दं द्विजाती

न्संभोज्यान्यं पूरयेदेकवृद्ध्या।

संपूर्यमाणादेवमेव त्रिकाब्दा
दर्वाक्पुत्रो जायते दैवशक्त्या।।33.18।।

समुनिसुरपितृभ्यो ब्रह्मचर्येण यज्ञै

स्त्रिविधमृणमपत्यैश्चैव संमोचयेद्यः।

श्रुतिवचनकृदस्मिन्वापि लोके परस्मि
न्निति स तु गृहमेधी पूज्यते साधुलोकैः।।33.20।।

अथो हिताय जगतां प्रथितं शितचेतसाम्।
अद्य संक्षिप्य वक्ष्यामि लक्षणं गुरुशिष्ययोः।।33.22।।

अग्रगण्यः समग्रज्ञो निग्रहानुग्रहक्षमः।
षड्वर्गविजयव्यग्रोऽनुग्रो विगतविग्रहः।।33.24।।

इष्टदोऽनिष्टसंहर्ता दृष्टादृष्टसुखावहः।
रतोऽविरतमर्चासु परं पुरमुरद्विषोः।।33.26।।

ऊहापोहविदव्यग्रो लोभमोहविवर्जितः।
अज्ञानुकम्प्यविज्ञातज्ञानो ज्ञातपरेङ्गितः।।33.28।।

व्याधिरप्रापितव्याधिः समाधिविधिसंयुतः।
श्रुतिधीरोऽतिधीरश्च वीरो वाक्यविशारदः।।33.30।।

असौ मृग्यश्च दृश्यश्च सेव्यश्चाभीष्टमिच्छता।
शिष्यस्तदावर्जनकृद्देहेन द्रविणेन च।।33.32।।

नित्यशः कायवाक्चित्तैस्त्रिद्व्येकाब्दादिकावधि।
परिचर्यापरः शिष्यः स्यात्सुसंयतमानसः।।33.34।।

अस्तेयवृत्तिमास्तिक्ययुक्तं मुक्तिकृतोद्यमम्।
अकल्मषं मृषाहीनमहीनद्रव्यमानसम्।।33.36।।

अधीतवेदं स्वाधीनमनाधिं व्याधिवर्जितम्।
तरुणं करुणावासं परितोषकरं गुरोः।।33.38।।

परोपकारनिरतं विरतं परदूषणे।
मातृवद्गुरुपत्नीं च भ्रातृवत्तत्सुतानपि।।33.40।।

अलसं मलसंक्लिन्नं क्लिष्टं क्लिष्टान्ववायजम्।
दम्भान्वितमगम्भीरं चण्डं पण्डितमानिनम्।।33.42।।

नृशंसमन्धं बधिरं पङ्गुं व्यङ्गममङ्गलम्।
अतिदीर्घमतिह्रस्वमतिस्थूलकृशात्मकम्।।33.44।।

लुब्धं त्वलब्धवैदग्ध्यं स्तब्धं लुब्धकबान्धवम्।
सुखिनं मुखरं दुर्गं दुर्मुखं मूकमानसम्।।33.46।।

स्वार्थकृत्यं प्रसक्तार्थं निरर्थारम्भणं शठम्।
ईदृग्विधं गुरुः शिष्यं न गृह्णीयात्कथंचन।।33.48।।

तथा शिष्यकृतो दोषो गुरुमेति न संशयः।
स्नेहाद्वा लोभतो वापि यो न गृह्णाति दीक्षया।।33.50।।

छायाज्ञापादुकोपानद्दण्डांश्च शयनासने।
यानं मनोगतं चान्यदन्तेवासी न लङ्घयेत्।।33.52।।

अग्राम्यधर्मं विण्मूत्रसर्गनिष्ठीवनादिकम्।
परित्यजेत्परिज्ञाता वमिं च गुरुमन्दिरे।।33.54।।

इष्टं वानिष्टमादिष्टं गुरुणा यत्तु गुर्वपि।
त्वरया परया कुर्याद्धिया सम्यगजिह्मया।।33.56।।

लोकोद्वेगकरी या च या च कर्मनिकृन्तनी।
स्थित्युच्छेदकरी या च तां गिरं नैव भाषयेत्।।33.58।।

इत्याचारपरः सम्यगाचार्यं यः समर्चयेत्।
कृतकृत्यः स वै शिष्यः परत्रेह च नन्दति।।33.60।।

इत्थं मूलप्रकृत्यक्षरविकृतिलिपिव्रातजातग्रहर्क्ष

क्षेत्राद्याबद्धभूतेन्द्रियगुणरविचन्द्राग्निसंप्रोतरूपैः।

मन्त्रैस्तद्देवताभिर्मुनिभिरपि जपध्यानहोमार्चनाभि
स्तन्त्रेऽस्मिन्यन्त्रभेदैरपि कमलज ते दर्शितोऽयं प्रपञ्चः।।33.62।।