त्रिगुणितसंज्ञे माया

लंकृतकोणे तयाभिवीते च।

या या विशेषक्लृप्ति
स्तां तामपि संग्रहेण समभिदधे।।32.2।।

पूर्णसुषुम्नारन्ध्रां

साध्यतनुं संस्मरञ्शिरसि बध्यात्।

तेनारोगी पुरुषः
प्रज्ञावान्दीर्घमायुराप्नोति।।32.4।।

तद्यन्त्रयुगं विलिखे

दभिविलिखितसाध्यसाधकाख्ययुतम्।

साध्यमधस्तात्कृत्वा
बद्ध्वात्र स्वपतु साधको नित्यम्।।32.6।।

साध्याख्यां शक्तिवह्नौ नरहरिमपि रन्ध्रत्रये च त्रिशक्तौ

कर्मालिख्याथ लोष्टे सततगमपि संस्थाप्य जप्त्वा स्वशक्त्या।

आगारे स्थापयित्वा नरमुदकनिधेश्चित्रपत्रे लिखित्वा
दीपाग्नौ तापयित्वा स्त्रियममलधियः सम्यगाकर्षयेयुः।।32.8।।

पाशाष्टाक्षरवीतशक्ति दहनप्रोल्लासिसाध्याह्वयं

शक्तिश्रीस्मरसंवृतं कुयुगरन्ध्राबद्धचिन्तामणि।

इत्थं षड्गुणितं विलिख्य जपितं मन्त्री दधानोऽसकृ
द्राज्ञां वामदृशां प्रियो भवति संग्रामे पुरे वा चिरम्।।32.10।।

द्वादशगुणिते शूले

नृसिंहबीजं नरेन्द्रपुरवीतम्।

पीतालिप्तं पुरलघु
धूपितमन्तःप्रबद्धकर्मयुतम्।।32.12।।

अलदलनिशाकुशीतै

र्मसृणे पट्टे विलिख्य यन्त्रमिदम्।

धेरस्थापनकर्म
प्रतिजप्तं प्राङ्गणे खनेन्मन्त्री।।32.14।।

तद्वद्धटार्गलाख्यं

यन्त्रं नीले विलिख्य पट्टवरे।

मेचकसाध्यप्रतिकृति
हृदये गुलिकां विधाय निक्षिप्य।।32.16।।

तामेवाथ प्रतिकृति

मग्नौ किंचित्प्रतापयेत्प्रजपन्।

शक्तिं पाशाङ्कुशमनु
साध्याह्वयदर्भितां समाहितधीः।।32.18।।

यन्त्रं तदेव लाक्षा

ताम्रावीतं निधाय कलशजले।

जप्त्वा भानुसहस्रक
मभिषिञ्चेद्रजतकाञ्चनाभ्यां च।।32.20।।

यन्त्रं तदेव विधिव

द्भित्तावालिख्य पूजयेद्दिनशः।

चोरारिभूतनागा
अपि तं देशं न वीक्षितुं शक्ताः।।32.22।।

मदजलविलिखितमेत

द्यन्त्रं जप्तं च मस्तके न्यस्तम्।

करिणीमपि मदयेद्द्रा
क्चण्डतरे का कथा करेणुवरे।।32.24।।

गजमृगमदकाश्मीरै

र्मन्त्रितमः सुरभिरोचनायुक्तैः।

विलिखेदलक्तकरसा
लुलितैर्यन्त्राणि सकलकार्यार्थी।।32.26।।

हृल्लेखाग्निस्थसाध्याह्वयमपि बहिरांक्रोंवृतं वह्निगेह

द्वन्द्वाश्रिस्वस्तिकाढ्यं प्रतिलिखतु दले यन्त्रजं नागवल्ल्याः।

जप्त्वा शक्तिं तु पाशाङ्कुशलिपिसहितां तापयेद्दीपवह्नौ
नक्तं भक्त्यानताङ्गी स्मरशरविवशा प्रेमलोलाभियाति।।32.28।।

शक्त्यन्तःस्थितसाध्यनाम परितो बीजैश्चतुर्भिः समा

बद्धं शक्तिमनोभवाङ्कुशलिपिप्रोंभिः समावेष्टितम्।

शाल्युत्थे प्रतिलिख्य पिष्टविकृतौ प्राणान्प्रतिष्ठाप्य च
त्रिस्वादौ परिभर्ज्य तत्समदतः साध्यो वशे तिष्ठति।।32.30।।

मृत्काराङ्गुलिकात्तया सकृकलासान्तर्वसायुक्तया

साध्यस्याङ्घ्रिरजोयुजा मृदुमृदा क्लृप्तस्य शक्तिं हृदि।

रूपस्याभिविलिख्य तद्विवरके साध्यं तदीरान्प्रति
ष्ठाप्याजल्प्य निखन्य तत्र दिनशो मेहेच्चिरं वश्यकृत्।।32.32।।

मायाहृदोरथान्ते

ब्रह्मश्रीराजितेऽक्षरान्प्रोक्त्वा।

राजयुतपूजितेऽर्णा
न्स जये विजये च गौरि गान्धारि।।32.34।।

मायाद्द्विठान्तिको मनु

रेकाधिकषष्टिवर्णकः प्रोक्तः।

ऋषिरस्याजोऽतिनिचृ
च्छन्दो गौरी च देवता प्रोक्ता।।32.36।।

असकलशशिराजन्मौलिराबद्धपाशा

ङ्कुशरुचिरकराब्जा बन्धुजीवारुणाङ्गी।

अमरनिकरवन्द्या त्रीक्षणा शोणलेपां
शुककुसुमयुता स्यात्संपदे पार्वती वः।।32.38।।

तिलतण्डुलकैर्लोणै

स्त्रिमधुरसिक्तैः फलैश्च मधुरतरैः।

साज्यैररुणकुवलयै
स्त्रिदिनं हवनक्रिया सुवश्यकरी।।32.40।।

वर्णादर्वाङ्मन्त्री

प्रयोजयेत्साध्यनामकर्मयुतम्।

प्रजपेद्वा हवनविधौ
वाच्छितसिद्धिप्रदस्तथा मन्त्रः।।32.42।।

वीप्स्य देविमहादेविपदं देवादिदेवि च।
प्रोक्त्वा सर्वजनस्येति मुखं मम वशं वदेत्।।32.44।।

दशभिः सप्तभिश्चैव चतुर्भिः करणाक्षरैः।
पञ्चभिः सप्तदशभिर्वर्णैरङ्गक्रिया मता।।32.46।।

मन्त्री सर्वजनस्थाने कुर्यात्साध्याह्वयान्मनोः।
प्रजपे हवने वाथ तथा तर्पणकर्मणि।।32.48।।

शक्तिं साध्यर्क्षवृक्षप्रतिकृति हृदि संलिख्य संस्थाप्य जीवं

जप्त्वा खन्याङ्कणेऽस्मिन्विधिवदनलमाधाय पुष्पैर्जपायाः।

देवीमन्त्रेण रात्रौ दशपरशतसंख्यैस्तु काचन्दनाक्तै
र्हुत्वा तां सप्तरात्रं सरिति निखनतादुत्तमं वश्यकर्म।।32.50।।

करणेन्द्रियरसधातु

द्वयवर्णैरङ्गमन्त्रपत्रपदैः।

द्व्ययुतजपावधिरेष
द्विसहस्रहुतं च सर्पिरन्नाभ्याम्।।32.52।।

नत्यादिभगवत्यन्ते माहेश्वरिपदं वदेत्।
अन्नपूर्णेऽग्निजायान्तो मन्त्रोऽन्नप्रदसंज्ञकः।।32.54।।

रुद्रताण्डवविलोकनलोलां

भद्रवक्त्रनयनां भवकान्ताम्।

अन्नदाननिरतां जननीं तां
चिन्तयञ्जपतु चित्रदुकूलाम्।।32.56।।

वित्तेशस्यान्तराले दशवटसमिधः सर्पिषाक्ता विविक्ता

होतव्या द्रव्यसिद्ध्यै कनकघटकरण्डात्तदोस्तुन्दिलोऽसौ।

हेमाभो रत्नदीप्तो दरकमलनिधिद्योतितो हेमपीठे
ध्येयो न्यग्रोधमूले हुतभुजि विदुषा वैश्वदेवावसाने।।32.58।।

भयाहारेन्दुयुक्सैव विदण्डाहस्पताक्षराः।
बालिस्थयोनिर्नत्यन्तो वसुवर्णो मनुर्मतः।।32.60।।

रत्नस्वर्णांशुकादीन्निजकरकमलाद्दक्षिणादाकिरन्तं

वासोराशौ निधायापरममरगुरुं पीतवस्त्रादिभूषम्।

ध्यायन्नासीनमप्यापणभुवि शतसंख्यं सविंशत्कमेवं
भीतापुष्पैर्घृताक्तैर्त्रिदिनमथ हुनेत्स्वर्णवस्त्रादिसिद्ध्यै।।32.62।।

शुक्रास्ये शुक्लपुष्पैर्हुतभुजि गुणशः सप्तशोऽप्येकविंश

द्वारं होतव्यमेषोऽप्यतिसितकुसुमालेपनो वामदोष्णा।

वासोरत्नादिकार्तस्वरमपि सततं साधकाय प्रयच्छ
न्ध्यातो व्याख्यानमुद्राकलितपरकरस्त्वापणालिन्दसंस्थः।।32.64।।

मुनिव्रातावीतं मुदितधियमम्भोदरुचिर

द्युतिं व्याख्यामुद्राकलनविलसद्दक्षिणकरम्।

परं जानौ कृत्वा दृढकलितकक्ष्ये कविवरं
समासीनं व्यासं स्मरत निरतं पुण्यचरितम्।।32.66।।

करचरणपार्श्वमूल

द्युलोंहरेबिन्दुदुंसरसनार्णाः।

अलिकाद्या वर्मास्त्र
द्विठान्तिको मनुरयं ध्रुवादिः स्यात्।।32.68।।

उत्तुङ्गादिः प्रचेता अपि दहनसमीरौ धराव्योमसंज्ञे

प्राक्प्रत्यग्दक्षसौम्यास्वध उपरि च दिक्षु प्रबन्धप्रभाः स्युः।

तन्मध्यस्थान्विपक्षादिकहरिरुरुदन्तीन्द्रनागान्सचोरा
न्हन्त्येतैर्मन्त्रिमुख्यो मनुविहितबलव्याकुलान्सद्य एव।।32.70।।

योनिर्वियत्सुनेत्रं

परमे वर्णांस्तथास्थिगं मेदः।

रक्तस्थदृग्द्विठान्त
स्ताराद्योऽयं मनुर्दशार्णयुतः।।32.72।।

अश्वारूढा कराग्रे नवकनकमयीं नेत्रयष्टिं दधाना

दक्षेऽन्येनानयन्ती स्फुरिततनुलतापाशबद्धां स्वसाध्याम्।

देवी नित्यप्रसन्नाननशशधरबिम्बा त्रिनेत्राभिरामा
दद्यादाद्यानवद्या प्रवरसुखफलप्राप्तिहृद्यां श्रियं वः।।32.74।।

हवनक्रिया सपदि वश्यकरी

मधुरावसेकपटुना पटुना।

सदृशो न कश्चन जगत्यपरो
मनुनामुनानयनकर्मविधौ।।32.76।।