ऋषिरभिहितो वसिष्ठ

श्छन्दोऽनुष्टुप्च देवता रुद्रः।

त्र्यम्बकपदादिका स्या
न्मनुनैव षडङ्गक्लृप्तिरथ कथिता।।30.2।।

प्राक्प्रत्यग्याम्यसौम्ये शिरसि च वदनोरोगलांसेषु नाभौ

हृद्देशे पृष्ठकुक्ष्योरथ शिवगुदयोरूरुमूलान्तयोश्च।

जान्वोस्तद्दृत्तयुग्मस्तनतटयुगपार्श्वेषु पत्पाणिनासा
शीर्षेष्वप्यूर्ध्वतोऽर्णैर्न्यसतु पुनरधस्तोऽपि मन्त्री तथोर्ध्वम्।।30.4।।

वर्णान्न्यस्य शिरोभ्रू

दृग्वक्त्रकगलहृदुदरगुह्यषु।

ऊर्वोर्जान्वोः पदयोः
पदैश्च मनुवित्क्रमेण विन्यस्येत्।।30.6।।

अच्छस्वच्छारविन्दस्थितिरुभयकराङ्कस्थितं पूर्णकुम्भं

द्वाभ्यां वेदाक्षमाले निजकरकमलाभ्यां घटौ नित्यपूर्णौ।

द्वाभ्यां तौ च स्रवन्तौ शिरसि शशिकलाबन्धुरे प्लावयन्तौ
देहं देवो दधानः प्रदिशतु विशदाकल्पजालः श्रियं वः।।30.8।।

अङ्गैराद्यार्काद्यैः

पुनरावृतिरष्टभिर्द्वितीया स्यात्।

मन्त्रार्णशक्तिभिः स्युः
पुनश्चतस्रो दिशापवज्राद्यैः।।30.10।।

रमा राका प्रभा ज्योत्स्ना पूर्णोषा पूरणी सुधा।
विश्वा विद्या सुधा प्रह्वा सारा संध्या शिवा निशा।।30.12।।

द्वात्रिंशदिति निर्दिष्टाः शक्तयोऽनुष्टुभः क्रमात्।
शिवानुभावतो नित्यं जगदाप्याययन्ति याः।।30.14।।

प्रजपेल्लक्षायत्या

द्रव्यैर्जुहुयाज्जपावसाने च।

बिल्वपलाशौ खदिरो
वटतिलसिद्धार्थदौग्धदुग्धानि।।30.16।।

भवति नरः सिद्धमनु

र्मन्त्रेण च सर्वकर्मकर्ता स्यात्।

बिल्वैरयुतं हुत्वा
महतीं लक्ष्मीमवाप्नुयाद्विप्रः।।30.18।।

न्यग्रोधायुतहोमा

द्धनधान्यसमृद्धिमेति नचिरेण।

अयुतं तिलैः प्रजुह्व
न्नपमृत्योः पाप्मनो विमुक्तः स्यात्।।30.20।।

दुग्धहुतात्कान्तिः स्या

त्परकृत्या नश्यति श्रियं लभते।

दधिदोमतोऽन्नवान्स्या
त्संवननकरं च तं वदन्ति बुधाः।।30.22।।

निजजन्मदिने पयोन्धसा वा

शतवीर्यत्रितयैः पयोघृताक्तैः।

जुहुयाच्च शतं सविंशतिं यः
स लभेदायुररोगतां चिराय।।30.24।।

स्नात्वार्काभिमुखोऽम्भसि स्थित इमं मन्त्रं सहस्रं जपे

दायुष्यं प्रतिपर्व दुग्धहविषा होमो महाश्रीप्रदः।

लाजाभिर्निजवाञ्छिताय हवनात्कन्याशु संदीयते
स्वाद्वक्तस्तनजद्रुमैश्च हवनात्सर्वान्वशे स्थापयेत्।।30.26।।

एभिस्त्रिभिर्मनुवरैस्तु शताक्षराख्यो

मन्त्रोऽभिकाङ्घितफलाप्तिदकामधेनुः।

प्रोक्तो हिताय जगतां मुनिभिः कृपार्द्र
चित्तैर्यथोक्तमथ संग्रहतो वदामि।।30.28।।

नयनं पञ्चदशार्णैः

ससप्तभिर्दशभिरस्त्रमङ्गविधिः।

विन्यासं च मनूनां
मन्त्रज्ञः पूर्ववत्क्रमात्कुर्यात्।।30.30।।

लक्षायतो जपविधिः

शताक्षरस्याथ होमविधिरुक्तः।

अयुतावधिको द्रव्यं
दौग्धान्नं सर्पिषा समायुक्तम्।।30.32।।

पञ्चम्यावृतिरुक्ता

त्रैष्टुभवज्जागतादिभिस्तदनु।

स्याच्चरमादिभिरावृति
चतुष्कमुक्तं दशम्यथेन्द्राद्यैः।।30.34।।

दुग्धाक्तैर्जुहुयात्सहस्रममृताकाण्डैस्तु दीर्घायुषे

दूर्वाणां त्रितयैस्तथा घृतपयःसिक्तैर्घृतेनैव वा।

लक्ष्म्यै कोकनदैश्च शोणरुचिभिस्त्रिस्वादुयुक्तैस्तथा
रक्तैरुत्पलकैस्तदह्नि विकचैर्बैल्वप्रसूनैरपि।।30.36।।

शतं शतं प्रातरतन्द्रितोद्यतो

जपेद्द्विजो मन्त्रमिमं शताक्षरम्।

अरोगजुष्टं बहुलेन्दिरायुतं
शतं स जीवेच्छरदां सुखेन सः।।30.38।।

प्रणवव्याहृत्याद्या व्याहृतितारान्तिका च मन्त्री च।
जप्त्वा शताक्षरी स्यादिहपरलोकप्रसिद्धये दिनशः।।30.40।।

शताक्षरमनोरयं क्रम उदीरितः संग्रहा

द्भजेदमुमतन्द्रितो दिनश एव मन्त्री रहः।

अभीष्टफलसिद्धये सुयशसे च दीर्घायुषे
ऽप्यशेषजनरञ्जनाय चिरमिन्दिरावाप्तये।।30.42।।

ऋषिरपि संवननोऽस्या

नुष्टुप्च त्रिष्टुबुच्यते च्छन्दः।

संवादाद्यः प्रोक्तः
संज्ञानाद्यश्च देवता वह्निः।।30.44।।

धवलनलिनराजच्चन्द्रमध्ये निषण्णं

करविलसितपाशं साङ्कुशं साभयं च।

सवरदममलेन्दुक्षीरगौरं त्रिणेत्रं
प्रणमत सुरवक्त्रं मङ्क्षु संवादयन्त्रम्।।30.46।।

यजेत्पुराङ्गैश्च तदर्चनाविधौ

पुनर्द्वितीयावरणेऽग्निमूर्तिभिः।

अनन्तरं च त्रिदिवेश्वरादिभिः
क्रमेण वह्निं विधिनेति पूजयेत्।।30.48।।

पायसेन मधुरत्रयभाजा

विप्रराजतरुजैः कुसुमैर्वा।

सर्पिषा स्तनजवृक्षसमिद्भि
र्वाञ्छितार्थविधये प्रजुहोतु।।30.50।।

तद्वदृचं प्रतियोज्य

त्रिष्टुप्पादांश्च पूर्वसंख्येन।

जुहुयात्सर्पिःसिक्तं
पायसमचिरेण कार्यसमवाप्त्यै।।30.52।।

अक्षरपादात्ित्रष्टु

ब्युक्तैः सूक्तैस्तु पूर्वसंख्येन।

जुहुयात्समाजरूपं
संवादयितुं प्रतर्पयेद्वाग्भिः।।30.54।।

ऋग्वारुणी ध्रुवा स्वाद्या या सा त्रिष्टुब्निगद्यते।
ऋषिर्वसिष्ठस्त्रिष्टुप्च च्छन्दो वारीशदवता।।30.56।।

अङ्गुल्यग्रससंधिपायुशिवसंज्ञाधारनाभिष्वथो

कुक्षौ पृष्ठहृदोरुरोजगलदोःसंध्यग्रवक्त्रेषु च।

गण्डघ्राणविलोचनश्रवणयुग्भ्रूमध्यमध्येषु के
सर्वाङ्गेषु तथा न्यसेद्विशदधीर्वर्णैः समर्थैः क्रमात्।।30.58।।

अङ्गैरष्टभिरहिपै

र्दिशाधिपैः समभिपूज्य वारीशम्।

कलशैः पुनरभिषिञ्चे
त्परमगुरुर्मन्त्रजापिनं शिष्यम्।।30.60।।

ऋगियमृणमोचनी स्या

ज्जपैर्हुतैस्तर्पणैश्च मन्त्रविदः।

संप्राप्तदुर्गतेरपि
सद्यो हृद्यां च संवहेल्लक्ष्मीम्।।30.62।।

वैतससमिदयुतहुता

द्वृष्टिमकालेऽपि वितनुते वरुणः।

गव्यक्षीरसमेता
त्ित्रदिनकृताद्दिनमुखेषु मुदितमनाः।।30.64।।

पाशाबद्धं वैरिण

मङ्कुशसंप्रोतमम्बुधेः पारे।

ध्यायन्परे क्षिपन्तं
वरुणं जुहुयाच्च वा तथा प्रजपेत्।।30.66।।

दौग्धान्नैर्भृगुवारे

घृतसंसिक्तैः कृतश्च हवनविधिः।

ऋणमोक्षदश्च विविधो
पद्रवशमकृद्रमाकरः प्रोक्तः।।30.68।।

शालीघृतसंसिक्ताः

सरिदन्तरतो जुहोतु परसेनाम्।

संस्तम्भयितुं त्रिदिनं
सुमना मन्त्री चतुःशतावृत्त्या।।30.70।।।

बहुना किमनेन मन्त्रिमुख्यो

मनुनाशु प्रतिसाधयेदभीष्टम्।

हवनक्रिययाथ तर्पणैर्वा
सजपैः पाशभृतो महामहिम्नः।।30.72।।

लवणाम्भसि चेत्याद्या द्वितीया लवणे इति।
दहेति च तृतीया स्यात्सदग्ध्वेति चतुर्थ्यपि।।30.74।।

चिट्यक्षरैः षडङ्गं वा प्रणवाद्यैर्निगद्यते।
पञ्चभिश्च त्रिभिरपि पञ्चभिः पञ्च चाक्षरैः।।30.76।।

अरुणोऽरुणपङ्कजसंनिहितः

स्रुवशक्तिवराभययुक्तकरः।

अमितार्चिरजात्तगतिर्विलस
न्नयनत्रितयोऽवतु वो दहनः।।30.78।।

करकमलविराजच्चक्रशङ्खातिशूला

परिलसितकिरीटा पातितानेकदैत्या।

त्रिणयनलसिताङ्गी तिग्मरश्मिप्रकाशा
पवनसखनिभाङ्गी पातु कात्यायनी वः।।30.80।।

खेटासिमुसलतोमर

कपालशक्तीः सपाशसृणि दधती।

दंष्ट्रोग्रा सिंहस्था
৷৷.रात्रिकालिका ध्येया।।30.82।।

दशांशेन हुनेत्सिद्ध्यै हविषा घृतसंयुजा।
एवं कृते प्रयोगार्हो मन्त्री भूयान्न चान्यथा।।30.84।।

आरभ्य कर्मकृन्मन्त्री तृतीयां कृष्णपक्षजाम्।
संदीक्षितो भवेत्पूते मन्दिरे मन्त्रजापवान्।।30.86।।

एतां साध्यर्क्षवृक्षेण शालिपिष्टेन चापराम्।
चक्रीकरमृदा चान्यां मधूच्छिष्टेन चेतराम्।।30.88।।

उक्तानां दारवीं कुण्डे खनेन्मन्त्राभिमन्त्रिताम्।
विष्टरां विष्टरस्याधः पादस्थाने च मृन्मयीम्।।30.90।।

रक्तमाल्याम्बरो मन्त्री कृतरक्तानुलेपनः।
सम्यक्कृतलिपिन्यासप्राणायामादिकः शुचिः।।30.92।।

आलोड्य गुडमध्वाज्यैर्विस्पष्टावयवामथ।
तेन पुत्तलिकां मन्त्री चार्वङ्गीं कारयेत्सुधीः।।30.94।।

ऋक्पञ्चकं पञ्चविंशत्संख्यं प्रतिकृतिं स्पृशन्।
जपित्वाङ्गीनि विन्यस्येत्स्वाङ्गप्रतिकृतावपि।।30.96।।

सकण्ठहृदयोरोजकुक्षिनाभिकटीषु च।
मेढ्रपायूरुजान्वाख्यजङ्घाङ्घ्रिषु च विन्यसेत्।।30.98।।

अङ्गुष्ठसंधिप्रपदजङ्घाजानूरुपायुषु।
सलिङ्गनाभिजठरहृदयेषु स्तनद्वये।।30.100।।

उपलिप्याथ कुण्डं तद्बहिर्गोमयवारिणा।
साध्यसंमुख आसीन आदध्याद्धव्यवाहनम्।।30.102।।

देवतां प्रतिपाद्यार्घ्यं दत्त्वा कार्यार्थसिद्धये।
उपतिष्ठेद्धुतस्यादावन्ते मन्त्रैरितीरितैः।।30.104।।

जातवेदो महादेव तप्तजाम्बूनदप्रभ।
स्वाहपते विश्वमक्ष लवणं दह शत्रुहन्।।30.106।।

तमोमयि महादेवि महादेवस्य सुव्रते।
स्त्रिया मे पुरुषं गत्वा वशमानय देहि मे।।30.108।।

नमस्ते दह शत्रुं मे वशमानय चण्डिके।
शाकंभरि महादेवि शरणं मे भवानघे।।30.110।।

शूलादिशक्तिवज्राद्यैरुत्कृत्योत्कृत्य मारय।
महादेवि महाकालि रक्षात्मानं कुमारिके।।30.112।।

साध्यं संस्मृत्य शितधीर्जुहुयात्सप्तसंख्यया।
दक्षिणं चरणं पूर्वं ततो दक्षार्धकं पुनः।।30.114।।

सप्तमं वामपादं स्यादन्यापि स्याद्धुतक्रिया।
सप्त सप्त विभागो वा क्रमादङ्गेषु सप्तसु।।30.116।।

द्वितीयो दक्षिणकरस्तृतीयः शिर उच्यते।
वामबाहुश्चतुर्थस्तु मध्यादूर्ध्वं तु पञ्चकम्।।30.118।।

अर्चयित्वा दण्डदीर्घं प्रणमेद्धव्यवाहनम्।
सकर्षस्वर्णयुक्ताङ्गां शोणां दद्यात्सतर्णकाम्।।30.120।।

एवं कृतेन मन्त्रीष्टं लभते होमकर्मणा।
अथ वा मारणाकाङ्क्षी साध्यवामाङ्घ्रिपांसुभिः।।30.122।।

वराहपारावतयोः पुरीषेण समन्वितैः।
एतैश्च संमिश्रयतु लोणं पूर्वोक्तसंख्यकम्।।30.124।।

पूर्वोक्ताभिः पुत्तलीभिः कुण्डे दक्षिणदिङ्मुखे।
दुर्गां वा भद्रकालीं वा प्रतिपद्य यथेरिताम्।।30.126।।

समापयेद्दक्षपादं विकारेणायसो वशी।
त्रिसप्ताहप्रयोगेण मारयेद्रिपुमात्मनः।।30.128।।

विमुक्तपापो भूत्वा तु स पुनर्विहरेत्सुखम्।
यां कल्पयन्त्यपामार्गराजीघृतहवींषि च।।30.130।।

इति लवणमनोर्विधानमेवं

प्रणिगदितं विधिवत्प्रयोगभिन्नम्।

विधिममुमथ साधु संप्रयुञ्ज्या
द्व्रजति फलं निजवाञ्छितं चिराय।।30.132।।

नारीनरान्वा नगरं नृपान्वा

ग्रामं जनान्वा मनसोऽनुकूलान्।

वशीकरोत्येव हुतक्रियेयं
चिराय नैवात्र विचारणीयम्।।30.134।।

निक्षिप्य हृदये किंचित्कीटान्तां संस्पृशन्पुनः।
प्राणार्पणेन यत्कार्यं क्षिप्रं कुर्याद्विचक्षणः।।30.136।।

तत्र भूतास्तु तन्मात्राशब्दाद्यं श्रवणादिकम्।
धातून्मनश्च बुद्धिं च संक्षिपेदप्यहंक्रियाम्।।30.138।।

प्रवेशयेच्च पुत्तल्यां पुनस्तेनैव वर्त्मना।
प्राणप्रतिष्ठामन्त्रेण लब्धप्राणादिकां तथा।।30.140।।

हृत्पद्ममध्यस्थिततन्तुजालै

रेकैकमेकोत्पतितैः क्रमेण।

निश्वासमात्रेण सुखं प्रविष्टा
स्तत्प्राणमार्गेण हरेद्द्विरेफान्।।30.142।।