Devotional Hyms - Vishnu

।।શ્રીઃ।।

મહાયોગપીઠે તટે ભીમરથ્યા

વરં પુણ્ડરીકાય દાતું મુનીન્દ્રૈઃ।

સમાગત્ય તિષ્ઠન્તમાનન્દકન્દં
પરબ્રહ્મલિઙ્ગં ભજે પાણ્ડુરઙ્ગમ્।।1।।

તટિદ્વાસસં નીલમેઘાવભાસં

રમામન્દિરં સુન્દરં ચિત્પ્રકાશમ્।

વરં ત્વિષ્ટકાયાં સમન્યસ્તપાદં
પરબ્રહ્મલિઙ્ગં ભજે પાણ્ડુરઙ્ગમ્।।2।।

પ્રમાણં ભવાબ્ધેરિદં મામકાનાં

નિતમ્બઃ કરાભ્યાં ધૃતો યેન તસ્માત્।

વિધાતુર્વસત્યૈ ધૃતો નાભિકોશઃ
પરબ્રહ્મલિઙ્ગં ભજે પાણ્ડુરઙ્ગમ્।।3।।

સ્ફુરત્કૌસ્તુભાલંકૃતં કણ્ઠદેશે

શ્રિયા જુષ્ટકેયૂરકં શ્રીનિવાસમ્।

શિવં શન્તમીડ્યં વરં લોકપાલં
પરબ્રહ્મલિઙ્ગં ભજે પાણ્ડુરઙ્ગમ્।।4।।

શરઞ્ચન્દ્રબિમ્બાનનં ચારુહાસં

લસત્કુણ્ડલાક્રાન્તગણ્ડસ્થલાન્તમ્।

જપારાગબિમ્બાધરં કઞ્જનેત્રં
પરબ્રહ્મલિઙ્ગં ભજે પાણ્ડુરઙ્ગમ્।।5।।

કિરીટોજ્જ્વલત્સર્વદિક્પ્રાન્તભાગં

સુરૈરર્ચિતં દિવ્યરત્નૈરનર્ઘૈઃ।

ત્રિભઙ્ગાકૃતિં બર્હમાલ્યાવતંસં
પરબ્રહ્મલિઙ્ગં ભજે પાણ્ડુરઙ્ગમ્।।6।।

વિભું વેણુનાદં ચરન્તં દુરન્તં

સ્વયં લીલયા ગોપવેષં દધાનમ્।

ગવાં બૃન્દકાનન્દદં ચારુહાસં
પરબ્રહ્મલિઙ્ગં ભજે પાણ્ડુરઙ્ગમ્।।7।।

અજં રુક્મિણીપ્રાણસંજીવનં તં

પરં ધામ કૈવલ્યમેકં તુરીયમ્।

પ્રસન્નં પ્રપન્નાર્તિહં દેવદેવં
પરબ્રહ્મલિઙ્ગં ભજે પાણ્ડુરઙ્ગમ્।।8।।

સ્તવં પાણ્ડુરઙ્ગસ્ય વૈ પુણ્યદં યે

પઠન્ત્યેકચિત્તેન ભક્ત્યા ચ નિત્યમ્।

ભવામ્ભોનિધિં તે વિતીર્ત્વાન્તકાલે
હરેરાલયં શાશ્વતં પ્રાપ્નુવન્તિ।।9।।


ઇતિ શ્રીમત્પરમહંસપરિવ્રાજકાચાર્યસ્ય

શ્રીગોવિન્દભગવત્પૂજ્યપાદશિષ્યસ્ય

શ્રીમચ્છંકરભગવતઃ કૃતૌ

પાણ્ડુરઙ્ગાષ્ટકં સંપૂર્ણમ્।।