Devotional Hyms - Vishnu

।।શ્રીઃ।।

શ્રિયાશ્લિષ્ટો વિષ્ણુઃ સ્થિરચરગુરૂર્વેદવિષયો

ધિયાં સાક્ષી શુદ્ધો હરિરસુરહન્તાબ્જનયનઃ।

ગદી શઙ્ખી ચક્ત્રી વિમલવનમાલી સ્થિરરૂચિઃ
શરણ્યો લોકેશો મમ ભવતુ કૃષ્ણોક્ષિવિષયઃ।।1।।

યતઃ સર્વં જાતં વિયદનિલમુખ્યં જગદિદં

સ્થિતૌ નિઃશેષં યોવતિ નિજસુખાંશેન મધુહા।

લયે સર્વં સ્વસ્મિન્હરતિ કલયા યસ્તુ સ વિભુઃ
શરણ્યો લોકેશો મમ ભવતુ કૃષ્ણોક્ષિવિષયઃ।।2।।

અસૂનાયમ્યાદૌ યમનિયમમુખ્યૈઃ સુકરણૈ-

ર્નિરૂદ્ધયેદં ચિત્તં હૃદિ વિલયમાનીય સકલમ્।

યમીડ્યં પશ્યન્તિ પ્રવરમતયો માયિનમસૌ
શરણ્યો લોકેશો મમ ભવતુ કૃષ્ણોક્ષિવિષયઃ।।3।।

પૃથિવ્યાં તિષ્ઠન્યો યમયતિ મહીં વેદ ન ધરા

યમિત્યાદૌ વેદો વદતિ જગતામીશમમલમ્।

નિયન્તારં ધ્યેયં મુનિસુરનૃણાં મોક્ષદમસૌ
શરણ્યો લોકેશો મમ ભવતુ કૃષ્ણોક્ષિવિષયઃ।।4।।

મહેન્દ્રાદિર્દેવો જયતિ દિતિજાન્યસ્ય બલતો

ન કસ્ય સ્વાતન્ત્ર્યં ક્વચિદપિ કૃતૌ યત્કૃતિમૃતે।

બલારાતેર્ગર્વં પરિહરતિ યોસૌ વિજયિનઃ
શરણ્યો લોકેશો મમ ભવતુ કૃષ્ણોક્ષિવિષયઃ।।5।।

વિના યસ્ય ધ્યાનં વ્રજતિ પશુતાં સૂકરમુખાં

વિના યર્ય જ્ઞાનં જનિમૃતિભયં યાતિ જનતા।

વિના યર્ય સ્મૃત્યા કૃમિશતજનિં યાતિ સ વિભુઃ
શરણ્યો લોકેશો મમ ભવતુ કૃષ્ણોક્ષિવિષયઃ।।6।।

નરાતઙ્કોટ્ટઙ્કઃ શરણશરણો ભ્રાન્તિહરણો

ઘનશ્યામો વામો વ્રજશિશુવયસ્યોર્જુનસખઃ।

સ્વયંભૂર્ભૂતાનાં જનક ઉચિતાચારસુખદઃ
શરણ્યો લોકેશો મમ ભવતુ કૃષ્ણોક્ષિવિષયઃ।।7।।

યદા ધર્મગ્લાનિર્ભવતિ જગતાં ક્ષોભકરણી

તદા લોકસ્વામી પ્રકટિતવપુઃ સેતુધૃદજઃ।

સતાં ધાતા સ્વચ્છો નિગમગણગીતો વ્રજપતિઃ
શરણ્યો લોકેશો મમ ભવતુ કૃષ્ણોક્ષિવિષયઃ।।8।।


ઇતિ શ્રીમત્પરમહંસપરિવ્રાજકાચાર્યસ્ય

શ્રીગોવિન્દભગવત્પૂજ્યપાદશિષ્યસ્ય

શ્રીમચ્છંકરભગવતઃ કૃતૌ

કૃષ્ણાષ્ટકં સંપૂર્ણમ્।।