ಯಸ್ಯೈಕಾಂಶಾದಿತ್ಥಮಶೇಷಂ ಜಗದೇತ-

ತ್ಪ್ರಾದುರ್ಭೂತಂ ಯೇನ ಪಿನದ್ಧಂ ಪುನರಿತ್ಥಮ್.

ಯೇನ ವ್ಯಾಪ್ತಂ ಯೇನ ವಿಬುದ್ಧಂ ಸುಖದುಃಖೈ-
ಸ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷2৷৷

ಯಸ್ಮಾದನ್ಯನ್ನಾಸ್ತ್ಯಪಿ ನೈವಂ ಪರಮಾರ್ಥಂ

ದೃಶ್ಯಾದನ್ಯೋ ನಿರ್ವಿಷಯಜ್ಞಾನಮಯತ್ವಾತ್.

ಜ್ಞಾತೃಜ್ಞಾನಜ್ಞೇಯವಿಹೀನೋಪಿ ಸದಾ ಜ್ಞ-
ಸ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷4৷৷

ಪ್ರಾಣಾನಾಯಮ್ಯೋಮಿತಿ ಚಿತ್ತಂ ಹೃದಿ ರುಧ್ವಾ

ನಾನ್ಯತ್ಸ್ಮೃತ್ವಾ ತತ್ಪುನರತ್ರೈವ ವಿಲಾಪ್ಯ.

ಕ್ಷೀಣೇ ಚಿತ್ತೇ ಭಾದೃಶಿರಸ್ಮೀತಿ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷6৷৷

ಮಾತ್ರಾತೀತಂ ಸ್ವಾತ್ಮವಿಕಾಸಾತ್ಮವಿಬೋಧಂ

ಜ್ಞೇಯಾತೀತಂ ಜ್ಞಾನಮಯಂ ಹೃದ್ಯುಪಲಭ್ಯ.

ಭಾವಗ್ರಾಹ್ಯಾನನ್ದಮನನ್ಯಂ ಚ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷8৷৷

ಯದ್ಯದ್ವೇದ್ಯಂ ತತ್ತದಹಂ ನೇತಿ ವಿಹಾಯ

ಸ್ವಾತ್ಮಜ್ಯೋತಿರ್ಜ್ಞಾನಮಾನನ್ದಮವಾಪ್ಯ.

ತಸ್ಮಿನ್ನಸ್ಮೀತ್ಯಾತ್ಮವಿದೋ ಯಂ ವಿದುರೀಶಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷10৷৷

ಸರ್ವತ್ರಾಸ್ತೇ ಸರ್ವಶರೀರೀ ನ ಚ ಸರ್ವಃ

ಸರ್ವಂ ವೇತ್ತ್ಯೇವೇಹ ನ ಯಂ ವೇತ್ತಿ ಚ ಸರ್ವಃ.

ಸರ್ವತ್ರಾನ್ತರ್ಯಾಮಿತಯೇತ್ಥಂ ಯಮಯನ್ಯ-
ಸ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷12৷৷

ಸರ್ವತ್ರೈಕಃ ಪಶ್ಯತಿ ಜಿಘ್ರತ್ಯಥ ಭುಙ್ಕ್ತೇ

ಸ್ಪ್ರಷ್ಟಾ ಶ್ರೋತಾ ಬುಧ್ಯತಿ ಚೇತ್ಯಾಹುರಿಮಂ ಯಮ್.

ಸಾಕ್ಷೀ ಚಾಸ್ತೇ ಕರ್ತುಷು ಪಶ್ಯನ್ನಿತಿ ಚಾನ್ಯೇ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷14৷৷

ಜಾಗ್ರದ್ದೃಷ್ಟ್ವಾ ಸ್ಥೂಲಪದಾರ್ಥಾನಥ ಮಾಯಾಂ

ದೃಷ್ಟ್ವಾ ಸ್ವಪ್ನೇಥಾಪಿ ಸುಷುಪ್ತೌ ಸುಖನಿದ್ರಾಮ್.

ಇತ್ಯಾತ್ಮಾನಂ ವೀಕ್ಷ್ಯ ಮುದಾಸ್ತೇ ಚ ತುರೀಯೇ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷16৷৷

ಬ್ರಹ್ಮಾ ವಿಷ್ಣೂ ರೂದ್ರಹುತಾಶೌ ರವಿಚನ್ದ್ರಾ-

ವಿನ್ದ್ರೋ ವಾಯುರ್ಯಜ್ಞ ಇತೀತ್ಥಂ ಪರಿಕಲ್ಪ್ಯ.

ಏಕಂ ಸನ್ತಂ ಯಂ ಬಹುಧಾಹುರ್ಮತಿಭೇದಾ-
ತ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷18৷৷

ಕೋಶಾನೇತಾನ್ಪಞ್ಚ ರಸಾದೀನತಿಹಾಯ

ಬ್ರಹ್ಮಾಸ್ಮೀತಿ ಸ್ವಾತ್ಮನಿ ನಿಶ್ಚಿತ್ಯ ದೃಶಿಸ್ಥಮ್.

ಪಿತ್ರಾ ಶಿಷ್ಟೋ ವೇದ ಭೃಗುರ್ಯಂ ಯಜುರನ್ತೇ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷20৷৷

ಸೃಷ್ಟ್ವಾ ಸರ್ವಂ ಸ್ವಾತ್ಮತಯೈವೇತ್ಥಮತರ್ಕ್ಯಂ

ವ್ಯಾಪ್ಯಾಥಾನ್ತಃ ಕೃತ್ಸ್ನಮಿದಂ ಸೃಷ್ಟಮಶೇಷಮ್.

ಸಞ್ಚ ತ್ಯಞ್ಚಾಭೂತ್ಪರಮಾತ್ಮಾ ಸ ಯ ಏಕ-
ಸ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷22৷৷

ಶ್ರದ್ಧಾಭಕ್ತಿಧ್ಯಾನಶಮಾದ್ಯೈರ್ಯತಮಾನೈ-

ರ್ಜ್ಞಾತುಂ ಶಕ್ಯೋ ದೇವ ಇಹೈವಾಶು ಯ ಈಶಃ.

ದುರ್ವಿಜ್ಞೇಯೋ ಜನ್ಮಶತೈಶ್ಚಾಪಿ ವಿನಾ ತೈ-
ಸ್ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷24৷৷

ದೃಷ್ಟ್ವಾ ಗೀತಾಸ್ವಕ್ಷರತತ್ತ್ವಂ ವಿಧಿನಾಜಂ

ಭಕ್ತ್ಯಾ ಗುರ್ವ್ಯಾ ಲಭ್ಯ ಹೃದಿಸ್ಥಂ ದೃಶಿಮಾತ್ರಮ್.

ಧ್ಯಾತ್ವಾ ತಸ್ಮಿನ್ನಸ್ಮ್ಯಹಮಿತ್ಯತ್ರ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷26৷৷

ಯುಕ್ತ್ಯಾಲೋಡ್ಯ ವ್ಯಾಸವಚಾಂಸ್ಯತ್ರ ಹಿ ಲಭ್ಯಃ

ಕ್ಷೇತ್ರಕ್ಷೇತ್ರಜ್ಞಾನ್ತರವಿದ್ಭಿಃ ಪುರುಷಾಖ್ಯಃ.

ಯೋಹಂ ಸೋಸೌ ಸೋಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷28৷৷

ದ್ವನ್ದ್ವೈಕತ್ವಂ ಯಞ್ಚ ಮಧುಬ್ರಾಹ್ಮಣವಾಕ್ಯೈಃ

ಕೃತ್ವಾ ಶಕ್ರೋಪಾಸನಮಾಸಾದ್ಯ ವಿಭೂತ್ಯಾ.

ಯೋಸ್ರೌ ಸೋಹಂ ಸೋಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷30৷৷

ವಿಜ್ಞಾನಾಂಶೋ ಯಸ್ಯ ಸತಃ ಶಕ್ತ್ಯಧಿರೂಢೋ

ಬುದ್ಧಿರ್ಬುಧ್ಯತ್ಯತ್ರ ಬಹಿರ್ಬೋಧ್ಯಪದಾರ್ಥಾನ್.

ನೈವಾನ್ತಃಸ್ಥಂ ಬುಧ್ಯತಿ ಯಂ ಬೋಧಯಿತಾರಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷32৷৷

ಕೋ ಹ್ಯೇವಾನ್ಯಾದಾತ್ಮನಿ ನ ಸ್ಯಾದಯಮೇಷ

ಹ್ಯೇವಾನನ್ದಃ ಪ್ರಾಣಿತಿ ಚಾಪಾನಿತಿ ಚೇತಿ.

ಇತ್ಯಸ್ತಿತ್ವಂ ವಕ್ತ್ಯುಪಪತ್ತ್ಯಾ ಶ್ರುತಿರೇಷಾ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷34৷৷

ನಾಹಂ ಪ್ರಾಣೋ ನೈವ ಶರೀರಂ ನ ಮನೋಹಂ

ನಾಹಂ ಬುದ್ಧಿರ್ನಾಹಮಹಂಕಾರಧಿಯೌ ಚ.

ಯೋತ್ರ ಜ್ಞಾಂಶಃ ಸೋಸ್ಮ್ಯಹಮೇವೇತಿ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷36৷৷

ಮೂರ್ತಾಮೂರ್ತೇ ಪೂರ್ವಮಹೋಹ್ಯಾಥ ಸಮಾಧೌ

ದೃಶ್ಯಂ ಸರ್ವಂ ನೇತಿ ಚ ನೇತೀತಿ ವಿಹಾಯ.

ಚೈತನ್ಯಾಂಶೇ ಸ್ವಾತ್ಮನಿ ಸನ್ತಂ ಚ ವಿದುರ್ಯಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷38৷৷

ತಾವತ್ಸರ್ವಂ ಸತ್ಯಮಿವಾಭಾತಿ ಯದೇತ-

ದ್ಯಾವತ್ಸೋಸ್ಮೀತ್ಯಾತ್ಮನಿ ಯೋ ಜ್ಞೋ ನ ಹಿ ದೃಷ್ಟಃ.

ದೃಷ್ಟೇ ಯಸ್ಮಿನ್ಸರ್ವಮಸತ್ಯಂ ಭವತೀದಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷40৷৷

ಯಂ ವಿಜ್ಞಾನಜ್ಯೋತಿಷಮಾದ್ಯಂ ಸುವಿಭಾನ್ತಂ

ಹೃದ್ಯರ್ಕೇನ್ದ್ವಗ್ನ್ಯೋಕಸಮೀಡ್ಯಂ ತಟಿದಾಭಮ್.

ಭಕ್ತ್ಯಾರಾಧ್ಯೇಹೈವ ವಿಶನ್ತ್ಯಾತ್ಮನಿ ಸನ್ತಂ
ತಂ ಸಂಸಾರಧ್ವಾನ್ತವಿನಾಶಂ ಹರಿಮೀಡೇ৷৷42৷৷