Devotional Hyms - Vishnu

।।શ્રીઃ।।

હૃદમ્ભોજે કૃષ્ણઃ સજલજલદશ્યામલતનુઃ

સરોજાક્ષઃ સ્રગ્વી મકુટકટકાદ્યાભરણવાન્।

શરદ્રાકાનાથપ્રતિમવદનઃ શ્રીમુરલિકાં
વહન્ધ્યેયો ગોપીગણપરિવૃતઃ કુઙ્કુમચિતઃ।।1।।

પયોમ્ભોધેર્દ્વીપાન્મમ હૃદયમાયાહિ ભગવ-

ન્મણિવ્રાતભ્રાજત્કનકવરપીઠં ભજ હરે।

સુચિહ્નૌ તે પાદૌ યદુકુલજ નેનેજ્મિ સુજલૈ-
ર્ગૃહાણેદં દૂર્વાફલજલવદર્ધ્યં મુરરિપો।।2।।

ત્વમાચામોપેન્દ્ર ત્રિદશસરિદમ્ભોતિશિશિરં

ભજસ્વેમં પઞ્ચામૃતફલરસાપ્લાવમઘહન્।

દ્યુનદ્યાઃ કાલિન્દ્યા અપિ કનકકુમ્ભસ્થિતમિદં
જલં તેન સ્નાનં કુરુ કુરુ કુરુષ્વાચમનકમ્।।3।।

તટિદ્વર્ણે વસ્ત્રં ભજ વિજયકાન્તાધિહરણ

પ્રલમ્બારિભ્રાતર્મૃદુલમુવીતં કુરુ ગલે।

લલાટે પાટીરં મૃગમદયુતં ધારય હરે
ગૃહાણેદં માલ્યં શતદલતુલસ્યાદિરચિતમ્।।4।।

દશાઙ્ગં ધૂપં સદ્વરદ ચરણાગ્રેર્પિતમિદં

મુખં દીપેનેન્દુપ્રભવિરજસં દેવ કલયે।

ઇમૌ પાણી વાણીપતિનુત સકર્પૂરરજસા
વિશોધ્યાગ્રે દત્તં સલિલમિદમાચામ નૃહરે।।5।।

સદા તૃપ્તાન્નં ષડ્રસવદખિલવ્યઞ્જનયુતં

સુવર્ણામત્રે ગોઘૃતચષકયુક્તે સ્થિતમિદમ્।

યશોદાસૂનો તત્પરમદયયાશાન સખિભિઃ
પ્રસાદં વાઞ્છદ્ભિઃ સહ તદનુ નીરં પિબ વિભો।।6।।

સચૂર્ણં તામ્બૂલં મુખશુચિકરં ભક્ષય હરે

ફલં સ્વાદુ પ્રીત્યા પરિમલવદાસ્વાદય ચિરમ્।

સપર્યાપર્યાહ્યૈ કનકમણિજાતં સ્થિતમિદં
પ્રદીપૈરારાર્તિ જલધિતનયાશ્લિષ્ટ રચયે।।7।।

વિજાતીયૈઃ પુષ્પૈરતિસુરભિભિર્બિલ્વતુલસી-

યુતૈશ્ચૈમં પુષ્પાઞ્જલિમજિત તે મૂર્ધ્નિ નિદધે।

તવ પ્રાદક્ષિણ્યક્ત્રમણમઘવિધ્વંસિ રચિતં
ચતુર્વારં વિષ્ણો જનિપથગતેશ્ચાન્તવિદુષા।।8।।

નમસ્કારોષ્ટાઙ્ગઃ સકલદુરિતધ્વંસનપટુઃ

કૃતં નૃત્યં ગીતં સ્તુતિરપિ રમાકાન્ત ત ઇયમ્।

તવ પ્રીત્યૈ ભૂયાદહમપિ ચ દાસસ્તવ વિભો
કૃતં છિદ્રં પૂર્ણં કુરુ કુરુ નમસ્તેસ્તુ ભગવન્।।9।।

સદા સેવ્યઃ કૃષ્ણઃ સજલઘનનીલઃ કરતલે

દધાનો દધ્યન્નં તદનુ નવનીતં મુરલિકામ્।

કદાચિત્કાન્તાનાં કુચકલશપત્રાલિરચના-
સમાસક્તઃ સ્નિગ્ધૈઃ સહ શિશુવિહારં વિરચયન્।।10।।


ઇતિ શ્રીમત્પરમહંસપરિવ્રાજકાચાર્યસ્ય

શ્રીગોવિન્દભગવત્પૂજ્યપાદશિષ્યસ્ય

શ્રીમચ્છંકરભગવતઃ કૃતૌ
ભગવન્માનસપૂજા સંપૂર્ણા।।