നമ്രാങ്ഗാണാം ഭക്തിമതാം യഃ പുരുഷാര്ഥാ-

ന്ദത്വാ ക്ഷിപ്രം ഹന്തി ച തത്സര്വവിപത്തീഃ.

പാദാമ്ഭോജാധസ്തനിതാപസ്മൃതിമീശം
തം പ്രത്യഞ്ചം ദക്ഷിണവക്ത്രം കലയാമി৷৷2৷৷

ഭദ്രാരൂഢം ഭദ്രദമാരാധയിതൃാം

ഭക്തിശ്രദ്ധാപൂര്വകമീശം പ്രണമന്തി.

ആദിത്യാ യം വാഞ്ഛിതസിദ്ധ്യൈ കരുണാബ്ധിം
തം പ്രത്യഞ്ചം ദക്ഷിണവക്ത്രം കലയാമി৷৷4৷৷

വക്ത്രം ധന്യാഃ സംസൃതിവാര്ധേരതിമാത്രാ-

ദ്ഭീതാഃ സന്തഃ പൂര്ണശശാങ്കദ്യുതി യസ്യ.

സേവന്തേധ്യാസീനമനന്തം വടമൂലം
തം പ്രത്യഞ്ചം ദക്ഷിണവക്ത്രം കലയാമി৷৷6৷৷

ദധ്യാജ്യാദിദ്രവ്യകകര്മാണ്യഖിലാനി

ത്യക്ത്വാ കാങ്ക്ഷാം കര്മഫലേഷ്വത്ര കരോതി.

യജ്ജിജ്ഞാസാം രൂപഫലാര്ഥീ ക്ഷിതിദേവ-
സ്തം പ്രത്യഞ്ചം ദക്ഷിണവക്ത്രം കലയാമി৷৷8৷৷

ണാനേത്യേവം യന്മനുമധ്യസ്ഥിതവര്ണാ-

ന്ഭക്താഃ കാലേ വര്ണഗൃഹീത്യൈ പ്രജപന്തഃ.

മോദന്തേ സംപ്രാപ്തസമസ്തശ്രുതിതന്ത്രാ-
സ്തം പ്രത്യഞ്ചം ദക്ഷിണവക്ത്രം കലയാമി৷৷10৷৷

തപ്തസ്വര്ണച്ഛായജടാജൂടകടാഹ-

പ്രോദ്യദ്വീചീവല്ലിവിരാജത്സുരസിന്ധുമ്.

നിത്യം സൂക്ഷ്മം നിത്യനിരസ്താഖിലദോഷം
തം പ്രത്യഞ്ചം ദക്ഷിണവക്ത്രം കലയാമി৷৷12৷৷

മത്തോ മാരോ യസ്യ ലലാടാക്ഷിഭവാഗ്നി-

സ്ഫൂര്ജത്കീലപ്രോഷിതഭസ്മീകൃതദേഹഃ.

തദ്ഭസ്മാസീദ്യസ്യ സുജാതഃ പടവാസ-
സ്തം പ്രത്യ്ചം ദക്ഷിണവക്ത്രം കലയാമി৷৷14৷৷

മേധാവീ സ്യാദിന്ദുവതംസം ധൃതവീണം

കര്പൂരാഭം പുസ്തകഹസ്തം കമലാക്ഷമ്.

ചിത്തേ ധ്യായന്യസ്യ വപുര്ദ്രാങ്നിമിഷാര്ധം
തം പ്രത്യഞ്ചം ദക്ഷിണവക്ത്രം കലയാമി৷৷16৷৷

പ്രത്യാഹാരപ്രാണനിരോധാദിസമര്ഥൈ-

ര്ഭക്തൈര്ദാന്തൈഃ സംയതചിത്തൈര്യതമാനൈഃ.

സ്വാത്മത്വേന ജ്ഞായത ഏവ ത്വരയാ യ-
സ്തം പ്രത്യഞ്ചം ദക്ഷിണവക്ത്രം കലയാമി৷৷18৷৷

പ്രജ്ഞാമാത്രം പ്രാപിതസംബിന്നിജഭക്തം

പ്രാണാക്ഷാദേഃ പ്രേരയിതാരം പ്രണവാര്ഥമ്.

പ്രാഹുഃ പ്രാജ്ഞാ യം വിദിതാനുശ്രവതത്ത്വാ-
സ്തം പ്രത്യഞ്ചം ദക്ഷിണവക്ത്രം കലയാമി৷৷20৷৷

ഛന്നേവിദ്യാരൂപപടേനൈവ ച വിശ്വം

യത്രാധ്യസ്തം ജീവപരേശത്വമപീദമ്.

ഭാനോര്ഭാനുഷ്വമ്ബുവദസ്താഖിലഭേദം
തം പ്രത്യഞ്ചം ദക്ഷിണവക്ത്രം കലയാമി৷৷22৷৷

ഹാ ഹേത്യേവം വിസ്മയമീയുര്മുനിമുഖ്യാ

ജ്ഞാതേ യസ്മിന്സ്വാത്മതയാനാത്മവിമോഹഃ.

പ്രത്യഗ്ഭൂതേ ബ്രഹ്മണി യാതഃ കഥമിത്ഥം
തം പ്രത്യഞ്ചം ദക്ഷിണവക്ത്രം കലയാമി৷৷24৷৷