Devotional Hyms - Shiva


৷৷ശ്രീഃ৷৷

৷৷ശ്രീമൃത്യുംജയമാനസികപൂജാസ്തോത്രമ്৷৷
കൈലാസേ കമനീയരത്നഖചിതേ കല്പദ്രുമൂലേ സ്ഥിതം

കര്പൂരസ്ഫടികേന്ദുസുന്ദരതനും കാത്യായനീസേവിതമ്.

ഗങ്ഗാതുങ്ഗതരങ്ഗരഞ്ജിതജടാഭാരം കൃപാസാഗരം
കണ്ഠാലംകൃതശേഷഭൂഷണമമും മൃത്യുംജയം ഭാവയേ৷৷1৷৷

ആഗത്യ മൃത്യുംജയ ചന്ദ്രമൌലേ

വ്യാഘ്രാജിനാലംകൃത ശൂലപാണേ.

സ്വഭക്തസംരക്ഷണകാമധേനോ
പ്രസീദ വിശ്വേശ്വര പാര്വതീശ৷৷2৷৷

ഭാസ്വന്മൌക്തികതോരണേ മരകതസ്തമ്ഭായുതാലംകൃതേ

സൌധേ ധൂപസുവാസിതേ മണിമയേ മാണിക്യദീപാഞ്ചിതേ.

ബ്രഹ്മേന്ദ്രാമരയോഗിപുംഗവഗണൈര്യുക്തേ ച കല്പദ്രുമൈഃ
ശ്രീമൃത്യുംജയ സുസ്ഥിരോ ഭവ വിഭോ മാണിക്യസിംഹാസനേ৷৷3৷৷

മന്ദാരമല്ലകരവീരമാധവീ-

പുംനാഗനീലോത്പലചമ്പകാന്വിതൈഃ.

കര്പൂരപാടീരസുവാസിതൈര്ജലൈ-
രാധത്സ്വ മൃത്യുംജയ പാദ്യമുത്തമമ്৷৷4৷৷

സുഗന്ധപുഷ്പപ്രകരൈഃ സുവാസിതൈ-

ര്വിയന്നദീശീതലവാരിഭിഃ ശുഭൈഃ.

ത്രിലോകനാഥാര്തിഹരാര്ഘ്യമാദരാ-
ദ്ഗൃഹാണ മൃത്യുംജയ സര്വവന്ദിത৷৷5৷৷

ഹിമാമ്ബുവാസിതൈസ്തോയൈഃ ശീതലൈരതിപാവനൈഃ.
മൃത്യുംജയ മഹാദേവ ശുദ്ധാചമനമാചര৷৷6৷৷

ഗുഡദധിസഹിതം മധുപ്രകീര്ണം

സുഘൃതസമന്വിതധേനുദുഗ്ധയുക്തമ്.

ശുഭകര മധുപര്കമാഹര ത്വം
ത്രിനയന മൃത്യുഹര ത്രിലോകവന്ദ്യ৷৷7৷৷

പഞ്ചാസ്ത്ര ശാന്ത പഞ്ചാസ്യ പഞ്ചപാതകസംഹര.
പഞ്ചാമൃതസ്നാനമിദം കുരു മൃത്യുംജയ പ്രഭോ৷৷8৷৷

ജഗത്ത്രയീഖ്യാത സമസ്തതീര്ഥ-

സമാഹൃതൈഃ കല്മഷഹാരിഭിശ്ച.

സ്നാനം സുതോയൈഃ സമുദാചര ത്വം
മൃത്യുംജയാനന്തഗുണാഭിരാമ৷৷9৷৷

ആനീതേനാതിശുഭ്രേണ കൌശേയേനാമരദ്രുമാത്.
മാര്ജയാമി ജടാഭാരം ശിവ മൃത്യുംജയ പ്രഭോ৷৷10৷৷

നാനാഹേമവിചിത്രാണി ചീരചീനാമ്ബരാണി ച.
വിവിധാനി ച ദിവ്യാനി മൃത്യുംജയ സുധാരയ ৷৷11৷৷

വിശുദ്ധമുക്താഫലജാലരമ്യം

മനോഹരം കാഞ്ചനഹേമസൂത്രമ്.

യജ്ഞോപവീതം പരമം പവിത്ര-
മാധത്സ്വ മൃത്യുംജയ ഭക്തിഗമ്യ৷৷12৷৷

ശ്രീഗന്ധം ഘനസാരകുങ്കുമയുതം കസ്തൂരികാപൂരിതം

കാലേയേന ഹിമാമ്ബുനാ വിരചിതം മന്ദാരസംവാസിതമ്.

ദിവ്യം ദേവമനോഹരം മണിമയേ പാത്രേ സമാരോപിതം
സര്വാങ്ഗേഷു വിലേപയാമി സതതം മൃത്യുംജയ ശ്രീവിഭോ৷৷13৷৷

അക്ഷതൈര്ധവലൈര്ദിവ്യൈഃ സമ്യക്തിലസമന്വിതൈഃ.
മൃത്യുംജയ മഹാദേവ പൂജയാമി വൃഷധ്വജ৷৷14৷৷

ചമ്പകപങ്കജകുരവക-

കുന്ദൈഃ കരവീരമല്ലികാകുസുമൈഃ.

വിസ്താരയ നിജമകുടം
മൃത്യുംജയ പുണ്ഡരീകനയനാപ്ത৷৷15৷৷

മാണിക്യപാദുകാദ്വന്ദ്വേ മൌനിഹൃത്പദ്മമന്ദിരേ.
പാദൌ സത്പദ്മസദൃശൌ മൃത്യുംജയ നിവേശയ৷৷16৷৷

മാണിക്യകേയൂരകിരീടഹാരൈഃ

കാഞ്ചീമണിസ്ഥാപിതകുണ്ഡലൈശ്ച.

മഞ്ജീരമുഖ്യാഭരണൈര്മനോജ്ഞൈ-
രങ്ഗാനി മൃത്യുംജയ ഭൂഷയാമി৷৷17৷৷

ഗജവദനസ്കന്ദധൃതേ-

നാതിസ്വച്ഛേന ചാമരയുഗേന.

ഗലദലകാനനപദ്മം
മൃത്യുംജയ ഭാവയാമി ഹൃത്പദ്മേ৷৷18৷৷

മുക്താതപത്രം ശശികോടിശുഭ്രം

ശുഭപ്രദം കാഞ്ചനദണ്ഡയുക്തമ്.

മാണിക്യസംസ്ഥാപിതഹേമകുമ്ഭം
സുരേശ മൃത്യുംജയ തേര്പയാമി৷৷19৷৷

മണിമുകുരേ നിഷ്പടലേ

ത്രിജഗദ്ഗാഢാന്ധകാരസപ്താശ്വേ.

കംദര്പകോടിസദൃശം
മൃത്യുംജയ പശ്യ വദനമാത്മീയമ്৷৷20৷৷

കര്പൂരചൂര്ണം കപിലാജ്യപൂതം

ദാസ്യാമി കാലേയസമന്വിതൈശ്ച.

സമുദ്ഭവം പാവനഗന്ധധൂപിതം
മൃത്യുംജയാങ്ഗം പരികല്പയാമി৷৷21৷৷

വര്തിത്രയോപേതമഖണ്ഡദീപ്ത്യാ

തമോഹരം ബാഹ്യമഥാന്തരം ച.

സാജ്യം സമസ്താമരവര്ഗഹൃദ്യം
സുരേശ മൃത്യുംജയ വംശദീപമ്৷৷22৷৷

രാജാന്നം മധുരാന്വിതം ച മൃദുലം മാണിക്യപാത്രേ സ്ഥിതം

ഹിങ്ഗൂജീരകസന്മരീചിമിലിതൈഃ ശാകൈരനേകൈഃ ശുഭൈഃ.

ശാകം സമ്യഗപൂപസൂപസഹിതം സദ്യോഘൃതേനാപ്ലുതം
ശ്രീമൃത്യുംജയ പാര്വതീപ്രിയ വിഭോ സാപോശനം ഭുജ്യതാമ്৷৷23৷৷

കൂശ്മാണ്ഡവാര്താകപടോലികാനാം

ഫലാനി രമ്യാണി ച കാരവല്ല്യാ.

സുപാകയുക്താനി സസൌരഭാണി
ശ്രീകണ്ഠ മൃത്യുംജയ ഭക്ഷയേശ৷৷24৷৷

ശീതലം മധുരം സ്വച്ഛം പാവനം വാസിതം ലഘു.
മധ്യേ സ്വീകുരു പാനീയം ശിവ മൃത്യുംജയ പ്രഭോ৷৷25৷৷

ശര്കരാമിലിതം സ്നിഗ്ധം ദുഗ്ധാന്നം ഗോഘൃതാന്വിതമ്.
കദലീഫലസംമിശ്രം ഭുജ്യതാം മൃത്യുസംഹര৷৷26৷৷

കേവലമതിമാധുര്യം

ദുഗ്ധൈഃ സ്നിഗ്ധൈശ്ച ശര്കരാമിലിതൈഃ.

ഏലാമരീചിമിലിതം
മൃത്യുംജയ ദേവ ഭുങ്ക്ഷ്വ പരമാന്നമ്৷৷27৷৷

രമ്ഭാചൂതകപിത്ഥകണ്ടകഫലൈര്ദ്രാക്ഷാരസസ്വാദുമ-

ത്ഖര്ജൂരൈര്മധുരേക്ഷുഖണ്ഡശകലൈഃ സന്നാരികേലാമ്ബുഭിഃ.

കര്പൂരേണ സുവാസിതൈര്ഗുഡജലൈര്മാധുര്യയുക്തൈര്വിഭോ
ശ്രീമൃത്യുംജയ പൂരയ ത്രിഭുവനാധാരം വിശാലോദരമ്৷৷28৷৷

മനോജ്ഞരമ്ഭാവനഖണ്ഡഖണ്ഡിതാ-

ന്രുചിപ്രദാന്സര്ഷപജീരകാംശ്ച.

സസൌരഭാന്സൈന്ധവസേവിതാംശ്ച
ഗൃഹാണ മൃത്യുംജയ ലോകവന്ദ്യ৷৷29৷৷

ഹിങ്ഗൂജീരകസഹിതം

വിമലാമലകം കപിത്ഥമതിമധുരമ്.

ബിസഖണ്ഡാല്ലവണയുതാ-
ന്മൃത്യുംജയ തേര്പയാമി ജഗദീശ৷৷30৷৷

ഏലാശുണ്ഠീസഹീതം

ദധ്യന്നം ചാരുഹേമപാത്രസ്ഥമ്.

അമൃതപ്രതിനിധിമാഢ്യം
മൃത്യുംജയ ഭുജ്യതാം ത്രിലോകേശ৷৷31৷৷

ജമ്ബീരനീരാഞ്ചിതശൃങ്ഗബേരം

മനോഹരാനമ്ലശലാടുഖണ്ഡാന്.

മൃദൂപദംശാന്സഹസോപഭുങ്ക്ഷ്വ
മൃത്യുംജയ ശ്രീകരുണാസമുദ്ര৷৷32৷৷

നാഗരരാമഠയുക്തം

സുലലിതജമ്ബീരനീരസംപൂര്ണമ്.

മഥിതം സൈന്ധവസഹിതം
പിബ ഹര മൃത്യുംജയ ക്രതുധ്വംസിന്৷৷33৷৷

മന്ദാരഹേമാമ്ബുജഗന്ധയുക്തൈ-

ര്മന്ദാകിനീനിര്മലപുണ്യതോയൈഃ.

ഗൃഹാണ മൃത്യുംജയ പൂര്ണകാമ
ശ്രീമത്പരാപോശനമഭ്രകേശ৷৷34৷৷

ഗഗനധുനീവിമലജലൈ-

ര്മൃത്യുംജയ പദ്മരാഗപാത്രഗതൈഃ.

മൃഗമദചന്ദനപൂര്ണം
പ്രക്ഷാലയ ചാരു ഹസ്തപദയുഗ്മമ്৷৷35৷৷

പുംനാഗമല്ലികാകുന്ദവാസിതൈര്ജാഹ്നവീജലൈഃ.
മൃത്യുംജയ മഹാദേവ പുനരാചമനം കുരു৷৷36৷৷

മൌക്തികചൂര്ണസമേതൈ-

ര്മൃഗമദഘനസാരവാസിതൈഃ പൂഗൈഃ.

പര്ണൈഃ സ്വര്ണസമാനൈ-
ര്മൃത്യുംജയ തേര്പയാമി താമ്ബൂലമ്৷৷37৷৷

നീരാജനം നിര്മലദീപ്തിമദ്ഭി-

ര്ദീപാങ്കുരൈരുജ്ജ്വലമുച്ഛ്രിതൈശ്ച.

ഘണ്ടാനിനാദേന സമര്പയാമി
മൃത്യുംജയായ ത്രിപുരാന്തകായ৷৷38৷৷

വിരിഞ്ചിമുഖ്യാമരബൃന്ദവന്ദിതേ

സരോജമത്സ്യാങ്കിതചക്രചിഹ്നിതേ.

ദദാമി മൃത്യുംജയ പാദപങ്കജേ
ഫണീന്ദ്രഭൂഷേ പുനരര്ഘ്യമീശ്വര৷৷39৷৷

പുംനാഗനീലോത്പലകുന്ദജാജീ-

മന്ദാരമല്ലീകരവീരപങ്കജൈഃ.

പുഷ്പാഞ്ജലിം ബില്വദലൈസ്തുലസ്യാ
മൃത്യുംജയാങ്ഘ്രൌ വിനിവേശയാമി৷৷40৷৷

പദേ പദേ സര്വതമോനികൃന്തനം

പദേ പദേ സര്വശുഭപ്രദായകമ്.

പ്രദക്ഷിണം ഭക്്തിയുതേന ചേതസാ
കരോമി മൃത്യുംജയ രക്ഷ രക്ഷ മാമ്৷৷41৷৷

നമോ ഗൌരീശായ സ്ഫടികധവലാങ്ഗായ ച നമോ

നമോ ലോകേശായ സ്തുതവിബുധലോകായ ച നമഃ.

നമഃ ശ്രീകണ്ഠായ ക്ഷപിതപുരദൈത്യായ ച നമോ
നമഃ ഫാലാക്ഷായ സ്മരമദവിനാശായ ച നമഃ৷৷42৷৷

സംസാരേ ജനിതാപരോഗസഹിതേ താപത്രയാക്രന്ദിതേ

നിത്യം പുത്രകലത്രവിത്തവിലസത്പാശൈര്നിബദ്ധം ദൃഢമ്.

ഗര്വാന്ധം ബഹുപാപവര്ഗസഹിതം കാരുണ്യദൃഷ്ട്യാ വിഭോ
ശ്രീമൃത്യുംജയ പാര്വതീപ്രിയ സദാ മാം പാഹി സര്വേശ്വര৷৷43৷৷

സൌധേ രത്നമയേ നവോത്പലദലാകീര്ണേ ച തല്പാന്തരേ

കൌശേയേന മനോഹരേണ ധവലേനാച്ഛാദിതേ സര്വശഃ.

കര്പൂരാഞ്ചിതദീപദീപ്തിമിലിതേ രമ്യോപധാനദ്വയേ
പാര്വത്യാഃ കരപദ്മലാലിതപദം മൃത്യുംജയം ഭാവയേ৷৷44৷৷

ചതുശ്ചത്വാരിംശദ്വിലസദുപചാരൈരഭിമതൈ-

ര്മനഃപദ്മേ ഭക്ത്യാ ബഹിരപി ച പൂജാം ശുഭകരീമ്.

കരോതി പ്രത്യൂഷേ നിശി ദിവസമധ്യേപി ച പുമാ-
ന്പ്രയാതി ശ്രീമൃത്യുംജയപദമനേകാദ്ഭുതപദമ്৷৷45৷৷

പ്രാതര്ലിങ്ഗമുമാപതേരഹരഹഃ സംദര്ശനാത്സ്വര്ഗദം

മധ്യാഹ്നേ ഹയമേധതുല്യഫലദം സായംതനേ മോക്ഷദമ്.

ഭാനോരസ്തമയേ പ്രദോഷസമയേ പഞ്ചാക്ഷരാരാധനം
തത്കാലത്രയതുല്യമിഷ്ടഫലദം സദ്യോനവദ്യം ദൃഢമ്৷৷46৷৷


ഇതി ശ്രീമത്പരമഹംസപരിവ്രാജകാചാര്യസ്യ

ശ്രീഗോവിന്ദഭഗവത്പൂജ്യപാദശിഷ്യസ്യ

ശ്രീമച്ഛംകരഭഗവതഃ കൃതൌ

ശ്രീമൃത്യുംജയമാനസികപൂജാസ്തോത്രം സംപൂര്ണമ്৷৷