യസ്യ പ്രാഹുഃ സ്വരൂപം സകലദിവിഷദാം സാരസര്വസ്വയോഗം

യസ്യേഷുഃ ശാര്ങ്ഗധന്വാ സമജനി ജഗതാം രക്ഷണേ ജാഗരൂകഃ.

മൌര്വീ ദര്വീകരാണാമപി ച പരിബൃഢഃ പൂസ്ത്രയീ സാ ച ലക്ഷ്യം
സോവ്യാദവ്യാജമസ്മാനശിവഭിദനിശം നാകിനാം ശ്രീപിനാകഃ৷৷2৷৷

കാലാരാതേഃ കരാഗ്രേ കൃതവസതിരുരഃശാണശാതോ രിപൂണാം

കാലേ കാലേ കുലാദ്രിപ്രവരതനയയാ കല്പിതസ്നേഹലേപഃ.

പായാന്നഃ പാവകാര്ചിഃപ്രസരസഖമുഖഃ പാപഹന്താ നിതാന്തം
ശൂലഃ ശ്രീപാദസേവാഭജനരസജുഷാം പാലനൈകാന്തശീലഃ৷৷4৷৷

കണ്ഠപ്രാന്താവസജ്ജത്കനകമയമഹാഘണ്ടികാഘോരഘോഷൈഃ

കണ്ഠാരാവൈരകുണ്ഠൈരപി ഭരിതജഗച്ചക്രവാലാന്തരാലഃ.

ചണ്ഡഃ പ്രോദ്ദണ്ഡശ്രൃങ്ഗഃ കകുദകബലിതോത്തുങ്ഗകൈലാസശ്രൃങ്ഗഃ
കണ്ഠേകാലസ്യ വാഹഃ ശമയതു ശമലം ശാശ്വതഃ ശാക്വരേന്ദ്രഃ৷৷6৷৷

യഃ പുണ്യൈര്ദേവതാനാം സമജനി ശിവയോഃ ശ്ലാഘ്യവീര്യൈകമത്യാ-

ദ്യന്നാമ്നി ശ്രൂയമാണേ ദിതിജഭടഘടാ ഭീതിഭാരം ഭജന്തേ.

ഭൂയാത്സോയം വിഭൂത്യൈ നിശിതശരശിഖാപാടിതക്രൌഞ്ചശൈലഃ
സംസാരാഗാധകൂപോദരപതിതസമുത്താരകസ്താരകാരിഃ৷৷8৷৷

അമ്ഭോജാഭ്യാം ച രമ്ഭാരഥചരണലതാദ്വന്ദ്വകുമ്ഭീന്ദ്രകുമ്ഭൈ-

ര്ബിമ്ബേനേന്ദോശ്ച കമ്ബോരുപരി വിലസതാ വിദ്രുമേണോത്പലാഭ്യാമ്.

അമ്ഭോദേനാപി സംഭാവിതമുപജനിതാഡമ്ബരം ശമ്ബരാരേഃ
ശംഭോഃ സംഭോഗയോഗ്യം കിമപി ധനമിദം സംഭവേത്സംപദേ നഃ৷৷10৷৷

നൃത്താരമ്ഭേഷു ഹസ്താഹതമുരജധിമിദ്ധികൃതൈരത്യുദാരൈ-

ശ്ിചത്താനന്ദം വിധത്തേ സദസി ഭഗവതഃ സംതതം യഃ സ നന്ദീ.

ചണ്ഡീശാദ്യാസ്തഥാന്യേ ചതുരഗുണഗണപ്രീണിതസ്വാമിസത്കാ-
രോത്കര്ഷോദ്യത്പ്രസാദാഃ പ്രമഥപരിബൃഢാഃ പാന്തു സംതോഷിണോ നഃ৷৷12৷৷

സ്തമ്ഭൈര്ജമ്ഭാരിരത്നപ്രവരവിരചിതൈഃ സംഭൃതോപാന്തഭാഗം

ശുമ്ഭത്സോപാനമാര്ഗം ശുചിമണിനിചയൈര്ഗുമ്ഭിതാനല്പശില്പമ്.

കുമ്ഭൈഃ സംപൂര്ണശോഭം ശിരസി സുഘടിതൈഃ ശാതകുമ്ഭൈരപങ്കൈഃ
ശംഭോഃ സംഭാവനീയം സകലമുനിജനൈഃ സ്വസ്തിദം സ്യാത്സദോ നഃ৷৷14৷৷

ആസീനസ്യാധിപീഠം ത്രിജഗദധിപതേരങ്ഘ്രിപീഠാനുഷക്തൌ

പാഥോജാഭോഗഭാജൌ പരിമൃദുലതലോല്ലാസിപദ്മാദിരേഖൌ.

പാതാം പാദാവുഭൌ തൌ നമദമരകിരീടോല്ലസച്ചാരുഹീര-
ശ്രേണീശോണായമാനോന്നതനഖദശകോദ്ഭാസമാനൌ സമാനൌ৷৷16৷৷

അങ്ഗേ ശൃങ്ഗാരയോനേഃ സപദി ശലഭതാം നേത്രവഹ്നൌ പ്രയാതേ

ശത്രോരുദ്ധൃത്യ തസ്മാദിഷുധിയുഗമധോ ന്യസ്തമഗ്രേ കിമേതത്.

ശങ്കാമിത്ഥം നതാനാമമരപരിഷദാമന്തരങ്കൂരയത്ത-
ത്സംഘാതം ചാരു ജങ്ഘായുഗമഖിലപതേരംഹസാം സംഹരേന്നഃ৷৷18৷৷

ആമുക്താനര്ഘരത്നപ്രകരകരപരിഷ്വക്തകല്യാണകാഞ്ചീ-

ദാമ്നാ ബദ്ധേന ദുഗ്ധദ്യുതിനിചയമുഷാ ചീനപട്ടാമ്ബരേണ.

സംവീതേ ശൈലകന്യാസുചരിതപരിപാകായമാണേ നിതമ്ബേ
നിത്യം നര്നര്തു ചിത്തം മമ നിഖിലജഗത്സ്വാമിനഃ സോമമൌലേഃ৷৷20৷৷

നാഭീചക്രാലവാലാന്നവനവസുഷമാദോഹദശ്രീപരീതാ-

ദുദ്ഗച്ഛന്തീ പുരസ്താദുദരപഥമതിക്രമ്യ വക്ഷഃ പ്രയാന്തീ.

ശ്യാമാ കാമാഗമാര്ഥപ്രകഥനലിപിവദ്ഭാസതേ യാ നികാമം
സാ മാ സോമാര്ധമൌലേഃ സുഖയതു സതതം രോമവല്ലീമതല്ലീ৷৷22৷৷

വാമാങ്കേ വിസ്ഫുരന്ത്യാ കരതലവിലസച്ചാരുരക്തോത്പലായാഃ

കാന്തായാ വാമവക്ഷോരുഹഭരശിഖരോന്മര്ദനവ്യഗ്രമേകമ്.

അന്യാംസ്ത്രീനപ്യുദാരാന്വരപരശുമൃഗാലംകൃതാനിന്ദുമൌലേ-
ര്ബാഹൂനാബദ്ധഹേമാങ്ഗദമണികടകാനന്തരാലോകയാമഃ৷৷24৷৷

ഹൃദ്യൈരദ്രീന്ദ്രകന്യാമൃദുദശനപദൈര്മുദ്രിതോ വിദ്രുമശ്രീ-

രുദ്ദ്യോതന്ത്യാ നിതാന്തം ധവലധവലയാ മിശ്രിതോ ദന്തകാന്ത്യാ.

മുക്താമാണിക്യജാലവ്യതികരസദൃശാ തേജസാ ഭാസമാനഃ
സദ്യോജാതസ്യ ദദ്യാദധരമണിരസൌ സംപദാം സംചയം നഃ৷৷26৷৷

അത്യന്തം ഭാസമാനേ രുചിരതരരുചാം സംഗമാത്സന്മണീനാ-

മുദ്യച്ചണ്ഡാംശുധാമപ്രസരനിരസനസ്പഷ്ടദൃഷ്ടാപദാനേ.

ഭൂയാസ്താം ഭൂതയേ നഃ കരിവരജയിനഃ കര്ണപാശാവലമ്ബേ
ഭക്താലീഭാലസജ്ജജ്ജനിമരണലിപേഃ കുണ്ഡലേ കുണ്ഡലേ തേ৷৷28৷৷

വാമം വാമാങ്കഗായാ വദനസരസിജേ വ്യാവലദ്വല്ലഭായാ

വ്യാനമ്രേഷ്വന്യദന്യത്പുനരലികഭവം വീതനിഃശേഷരൌക്ഷ്യമ്.

ഭൂയോ ഭൂയോപി മോദാന്നിപതദതിദയാശീതലം ചൂതബാണേ
ദക്ഷാരേരീക്ഷണാനാം ത്രയമപഹരതാദാശു താപത്രയം നഃ৷৷30.

സ്വാമിന്ഗങ്ഗാമിവാങ്ഗീകുരു തവ ശിരസാ മാമപീത്യര്ഥയന്തീം

ധന്യാം കന്യാം ഖരാംശോഃ ശിരസി വഹതി കിം ന്വേഷ കാരുണ്യശാലീ.

ഇത്ഥം ശങ്കാം ജനാനാം ജനയദതിഘനം കൈശികം കാലമേഘ-
ച്ഛായം ഭൂയാദുദാരം ത്രിപുരവിജയിനഃ ശ്രേയസേ ഭൂയസേ നഃ৷৷32৷৷

വക്രാകാരഃ കലങ്കീ ജഡതനുരഹമപ്യങ്ഘ്രിസേവാനുഭാവാ-

ദുത്തംസത്വം പ്രയാതഃ സുലഭതരഘൃണാസ്യന്ദിനശ്ചന്ദ്രമൌലേഃ.

തത്സേവന്താം ജനൌഘാഃ ശിവമിതി നിജയാവസ്ഥയൈവ ബ്രുവാണം
വന്ദേ ദേവസ്യ ശംഭോര്മുകുടസുഘടിതം മുഗ്ധപീയൂഷഭാനുമ്৷৷34৷৷

ദിവ്യാകല്പോജ്ജ്വലാനാം ശിവഗിരിസുതയോഃ പാശ്ര്വയോരാശ്രിതാനാം

രുദ്രാണീസത്സഖീനാം മദതരലകടാക്ഷാഞ്ചലൈരഞ്ചിതാനാമ്.

ഉദ്വേല്ലദ്ബാഹുവല്ലീവിലസനസമയേ ചാമരാന്ദോലനീനാ-
മുദ്ഭൂതഃ കങ്കണാലീവലയകലകലോ വാരയേദാപദോ നഃ৷৷36৷৷

സ്ഥാനപ്രാപ്ത്യാ സ്വരാണാം കിമപി വിശദതാം വ്യഞ്ജയന്മഞ്ജുവീണാ-

സ്വാനാവച്ഛിന്നതാലക്രമമമൃതമിവാസ്വാദ്യമാനം ശിവാഭ്യാമ്.

നാനാരാഗാതിഹൃദ്യം നവരസമധുരസ്തോത്രജാതാനുവിദ്ധം
ഗാനം വീണാമഹര്ഷേഃ കലമതിലലിതം കര്ണപൂരായതാം നഃ৷৷38৷৷

ദേവേഭ്യോ ദാനവേഭ്യഃ പിതൃമുനിപരിഷത്സിദ്ധവിദ്യാധരേഭ്യഃ

സാധ്യേഭ്യശ്ചാരണേഭ്യോ മനുജപശുപതജ്ജാതികീടാദികേഭ്യഃ.

ശ്രീകൈലാസപ്രരൂഢാസ്തൃണവിടപിമുഖാശ്ചാപി യേ സന്തി തേഭ്യഃ
സര്വേഭ്യോ നിര്വിചാരം നതിമുപരചയേ ശര്വപാദാശ്രയേഭ്യഃ৷৷40৷৷