ভগবন্কিমুপাদেযং গুরুবচনং হেযমপি চ কিমকার্যম্৷
কো গুরুরধিগততত্ত্বঃ শিষ্যহিতাযোদ্যতঃ সততম্৷৷2৷৷

কঃ পথ্যতরো ধর্মঃ কঃ শুচিরিহ যস্য মানসং শুদ্ধম্৷
কঃ পণ্ডিতো বিবেকী কিং বিষমবধীরণা গুরুষু৷৷4৷৷

মদিরেব মোহজনকঃ কঃ স্নেহঃ কে চ দস্যবো বিষযাঃ৷
কা ভববল্লী তৃষ্ণা কো বৈরী যস্ত্বনুদ্যোগঃ৷৷6৷৷

পাতুং কর্ণাঞ্জলিভিঃ কিমমৃতমিহ যুজ্যতে সদুপদেশঃ৷
কিং গুরুতাযা মূলং যদেতদপ্রার্থনং নাম৷৷8৷৷

কিং জীবিতমনবদ্যং কিং জাড্যং পাঠতোপ্যনভ্যাসঃ৷
কো জাগর্তি বিবেকী কা নিদ্রা মূঢতা জন্তোঃ৷৷10৷৷

কো নরকঃ পরবশতা কিং সৌখ্যং সর্বসঙ্গবিরতির্যা৷
কিং সত্যং ভূতহিতং প্রিযং চ কিং প্রাণিনামসবঃ৷৷12৷৷

কিং মরণং মূর্খত্বং কিং চানর্ঘং যদবসরে দত্তম্৷
আমরণাত্কিং শল্যং প্রচ্ছন্নং যত্কৃতং পাপম্৷৷14৷৷

কাহর্নিশমনুচিন্ত্যা সংসারাসারতা ন তু প্রমদা৷
কা প্রেযসী বিধেযা করুণা দীনেষু সজ্জনে মৈত্রী৷৷16৷৷

কঃ সাধুঃ সদ্বৃত্তঃ কমধমমাচক্ষতে ত্বসদ্বৃত্তম্৷
কেন জিতং জগদেতত্সত্যতিতিক্ষাবতা পুংসা৷৷18৷৷

কস্য বশে প্রাণিগণঃ সত্যপ্রিযভাষিণো বিনীতস্য৷
ক্ব স্থাতব্যং ন্যায্যে পথি দৃষ্টাদৃষ্টলাভাঢ্যে৷৷20৷৷

কিং দানমনাকাঙ্ক্ষং কিং মিত্রং যো নিবারযতি পাপাত্৷
কোলংকারঃ শীলং কিং বাচাং মণ্ডনং সত্যম্৷৷22৷৷

চিন্তামণিরিব দুর্লভমিহ কিং কথযামি তচ্চতুর্ভদ্রম্৷
কিং তদ্বদন্তি ভূযো বিধূততমসা বিশেষেণ৷৷24৷৷

কিং শোচ্যং কার্পণ্যং সতি বিভবে কিং প্রশস্তমৌদার্যম্৷
কঃ পূজ্যো বিদ্বদ্ভিঃ স্বভাবতঃ সর্বদা বিনীতো যঃ৷৷26৷৷

বিদ্বন্মনোহরা কা সত্কবিতা বোধবনিতা চ৷
কং ন স্পৃশতি বিপত্তিঃ প্রবৃদ্ধবচনানুবর্তিনং দান্তম্৷৷28৷৷

কুত্র বিধেযো বাসঃ সজ্জননিকটেথবা কাশ্যাম্৷
কঃ পরিহার্যো দেশঃ পিশুনযুতো লুব্ধভূপশ্চ৷৷30৷৷

কিং লঘুতাযা মূলং প্রাকৃতপুরুষেষু যা যা়চ্ঞা৷
রামাদপি কঃ শূরঃ স্মরশরনিহতো ন যশ্চলতি৷৷32৷৷

কঃ পঙ্গুরিহ প্রথিতো ব্রজতি চ যো বার্ধকে তীর্থম্৷
কিং তীর্থমপি চ মুখ্যং চিত্তমলং যন্নিবর্তযতি৷৷34৷৷

কিং সংপাদ্যং মনুজৈর্বিদ্যা বিত্তং বলং যশঃ পুণ্যম্৷
কঃ সর্বগুণবিনাশী লোভঃ শত্রুশ্চ কঃ কামঃ৷৷36৷৷

প্রাণাদপি কো রম্যঃ কুলধর্মঃ সাধুসঙ্গশ্চ৷
কা সংরক্ষ্যা কীর্তিঃ পতিব্রতা নৈজবুদ্ধিশ্চ৷৷38৷৷

কিং শস্ত্রং সর্বেষাং যুক্তির্মাতা চ কা ধেনুঃ৷
কিং নু বলং যদ্ধৈর্যং কো মৃত্যুর্যদবধানরহিতত্বম্৷৷40৷৷

কা দুর্লভা নরাণাং হরিভক্তিঃ পাতকং চ কিং হিংসা৷
কো হি ভগবত্প্রিযঃ স্যাদ্যোন্যং নোদ্বেজযেদনুদ্বিগ্নঃ৷৷42৷৷

সংভাবিতস্য মরণাদধিকং কিং দুর্যশো ভবতি৷
লোকে সুখী ভবেত্কো ধনবান্ধনমপি চ কিং যতশ্চেষ্টম্৷৷44৷৷

কো বর্ধতে বিনীতঃ কো বা হীযেত যো দৃপ্তঃ৷
কো ন প্রত্যেতব্যো ব্রূতে যশ্চানৃতং শশ্বত্৷৷46৷৷

সাধুবলং কিং দৈবং কঃ সাধুঃ সর্বদা তুষ্টঃ৷
দৈবং কিং যত্সুকৃতং কঃ সুকৃতী শ্লাঘ্যতে চ যঃ সদ্ভিঃ৷৷48৷৷

কস্য ক্রিযা হি সফলা যঃ পুনরাচারবাঞ্শিষ্টঃ৷
কঃ শিষ্টো যো বেদপ্রমাণবান্কো হতঃ ক্রিযাভ্রষ্টঃ৷৷50৷৷

কিং ভাগ্যং দেহবতামারোগ্যং কঃ ফলী কৃষিকৃত্৷
কস্য ন পাপং জপতঃ কঃ পূর্ণো যঃ প্রজাবান্স্যাত্৷৷52৷৷

কা চ পরদেবতোক্তা চিচ্ছক্তিঃ কো জগত্ভর্তা৷
সূর্যঃ সর্বেষাং কো জীবনহেতুঃ স পর্জন্যঃ৷৷54৷৷

মুক্তিং লভেত কস্মাদ্মুকুন্দভক্তের্মুকুন্দঃ কঃ৷
যস্তারযেদবিদ্যাং কা চাবিদ্যা যদাত্মনোস্ফূর্তিঃ৷৷56৷৷

কো মাযী পরমেশঃ ক ইন্দ্রজালাযতে প্রপঞ্চোযম্৷
কঃ স্বপ্ননিভো জাগ্রদ্ব্যবহারঃ সত্যমপি চ কিং ব্রহ্ম৷৷58৷৷

কিং পারমার্থিকং স্যাদদ্বৈতং চাজ্ঞতা কুতোনাদিঃ৷
বপুষশ্চ পোষকং কিং প্রারব্ধং চান্নদাযি কিং চাযুঃ৷৷60৷৷

প্রত্যক্ষদেবতা কা মাতা পূজ্যো গুরুশ্চ কস্তাতঃ৷
কঃ সর্বদেবতাত্মা বিদ্যাকর্মান্বিতো বিপ্রঃ৷৷62৷৷

কিং জন্ম বিষযসঙ্গঃ কিমুত্তরং জন্ম পুত্রঃ স্যাত্৷
কোপরিহার্যো মৃত্যুঃ কুত্র পদং বিন্যসেচ্চ দৃক্পূতে৷৷64৷৷

ফলমপি ভগবদ্ভক্তেঃ কিং তল্লোকস্বরূপসাক্ষাত্ত্বম্৷
মোক্ষশ্চ কো হ্যবিদ্যাস্তমযঃ কঃ সর্ববেদভূরথ চোম্৷৷66৷৷