Preliminary Texts

৷৷শ্রীঃ৷৷
৷৷নির্বাণষট্কম্৷৷
মনোবুদ্ধ্যহংকারচিত্তানি নাহং

ন কর্ণং ন জিহ্বা ন চ ঘ্রাণনেত্রে৷

ন চ ব্যোম ভূমির্ন তেজো ন বাযু-
শ্চিদানন্দরূপঃ শিবোহং শিবোহম্৷৷1৷৷

ন চ প্রাণসংজ্ঞো ন বৈ পঞ্চবাযু-

র্ন বা সপ্তধাতুর্ন বা পঞ্চকোশঃ৷

ন বাক্পাণিপাদৌ ন চোপস্থপাযূ
চিদানন্দরূপঃ শিবোহং শিবোহম্৷৷2৷৷

ন মে দ্বেষরাগৌ ন মে লোভমোহৌ

মদো নৈব মে নৈব মাত্সর্যভাবঃ৷

ন ধর্মো ন চার্থো ন কামো ন মোক্ষ-
শ্চিদানন্দরূপঃ শিবোহং শিবোহম্৷৷3৷৷

ন পুণ্যং ন পাপং ন সৌখ্যং ন দুঃখং

ন মন্ত্রো ন তীর্থং ন বেদা ন যজ্ঞাঃ৷

অহং ভোজনং নৈব ভোজ্যং ন ভোক্তা
চিদানন্দরূপঃ শিবোহং শিবোহম্৷৷4৷৷

ন মৃত্যুর্ন শঙ্কা ন মে জাতিভেদঃ

পিতা নৈব মে নৈব মাতা চ জন্ম৷

ন বন্ধুর্ন মিত্রং গুরুর্নৈব শিষ্য-
শ্চিদানন্দরূপঃ শিবোহং শিবোহম্৷৷5৷৷

অহং নির্বিকল্পো নিরাকাররূপো

বিভুত্বাচ্চ সর্বত্র সর্বেন্দ্রিযাণাম্৷

ন চাসংগতং নৈব মুক্তির্ন বন্ধ-
শ্চিদানন্দরূপঃ শিবোহং শিবোহম্৷৷6৷৷


ইতি শ্রীমত্পরমহংসপরিব্রাজকাচার্যস্য

শ্রীগোবিন্দভগবত্পূজ্যপাদশিষ্যস্য

শ্রীমচ্ছংকরভগবতঃ কৃতৌ

নির্বাণষট্কং সংপূর্ণম্৷৷