Preliminary Texts

।।श्रीः।।
।।धन्याष्टकम्।।
तज्ज्ञानं प्रशमकरं यदिन्द्रियाणां

तज्ज्ञेयं यदुपनिषत्सुनिश्चितार्थम्।

ते धन्या भुवि परमार्थनिश्चितेहाः
शेषास्तु भ्रमनिलये परिभ्रमन्तः।।1।।

आदौ विजित्य विषयान्मदमोहराग

द्वेषादिशत्रुगणमाहृतयोगराज्याः।

ज्ञात्वा मतं समनुभूय परात्मविद्या
कान्तासुखं वनगृहे विचरन्ति धन्याः।।2।।

त्यक्त्वा गृहे रतिमधोगतिहेतुभूता

मात्मेच्छयौपनिषदर्थरसं पिबन्तः।

वीतस्पृहा विषयभोगपदे विरक्ता
धन्याश्चरन्ति विजनेषु विरक्तसङ्गाः।।3।।

त्यक्त्वा ममाहमिति बन्धकरे पदे द्वे

मानावमानसदृशाः समदर्शिनश्च।

कर्तारमन्यमवगम्य तदर्पितानि
कुर्वन्ति कर्मपरिपाकफलानि धन्याः।।4।।

त्यक्त्वैषणात्रयमवेक्षितमोक्षमार्गा

भैक्षामृतेन परिकल्पितदेहयात्राः।

ज्योतिः परात्परतरं परमात्मसंज्ञं
धन्या द्विजा रहसि हृद्यवलोकयन्ति।।5।।

नासन्न सन्न सदसन्न महन्न चाणु

न स्त्री पुमान्न च नपुंसकमेकबीजम्।

यैर्ब्रह्म तत्समनुपासितमेकचित्तै
र्धन्या विरेजुरितरे भवपाशबद्धाः।।6।।

अज्ञानपङ्कपरिमग्नमपेतसारं

दुःखालयं मरणजन्मजरावसक्तम्।

संसारबन्धनमनित्यमवेक्ष्य धन्या
ज्ञानासिना तदवशीर्य विनिश्चयन्ति।।7।।

शान्तैरनन्यमतिभिर्मधुरस्वभावै

रेकत्वनिश्चितमनोभिरपेतमोहैः।

साकं वनेषु विदितात्मपदस्वरूपं
तद्वस्तु सम्यगनिशं विमृशन्ति धन्याः।।8।।


इति श्रीमत्परमहंसपरिव्राजकाचार्यस्य

श्रीगोविन्दभगवत्पूज्यपादशिष्यस्य

श्रीमच्छंकरभगवतः कृतौ

धन्याष्टकं संपूर्णम्।।