Preliminary Texts

৷৷শ্রীঃ৷৷
৷৷ধন্যাষ্টকম্৷৷
তজ্জ্ঞানং প্রশমকরং যদিন্দ্রিযাণাং

তজ্জ্ঞেযং যদুপনিষত্সুনিশ্চিতার্থম্৷

তে ধন্যা ভুবি পরমার্থনিশ্চিতেহাঃ
শেষাস্তু ভ্রমনিলযে পরিভ্রমন্তঃ৷৷1৷৷

আদৌ বিজিত্য বিষযান্মদমোহরাগ-

দ্বেষাদিশত্রুগণমাহৃতযোগরাজ্যাঃ৷

জ্ঞাত্বা মতং সমনুভূয পরাত্মবিদ্যা-
কান্তাসুখং বনগৃহে বিচরন্তি ধন্যাঃ৷৷2৷৷

ত্যক্ত্বা গৃহে রতিমধোগতিহেতুভূতা-

মাত্মেচ্ছযৌপনিষদর্থরসং পিবন্তঃ৷

বীতস্পৃহা বিষযভোগপদে বিরক্তা
ধন্যাশ্চরন্তি বিজনেষু বিরক্তসঙ্গাঃ৷৷3৷৷

ত্যক্ত্বা মমাহমিতি বন্ধকরে পদে দ্বে

মানাবমানসদৃশাঃ সমদর্শিনশ্চ৷

কর্তারমন্যমবগম্য তদর্পিতানি
কুর্বন্তি কর্মপরিপাকফলানি ধন্যাঃ৷৷4৷৷

ত্যক্ত্বৈষণাত্রযমবেক্ষিতমোক্ষমার্গা

ভৈক্ষামৃতেন পরিকল্পিতদেহযাত্রাঃ৷

জ্যোতিঃ পরাত্পরতরং পরমাত্মসংজ্ঞং
ধন্যা দ্বিজা রহসি হৃদ্যবলোকযন্তি৷৷5৷৷

নাসন্ন সন্ন সদসন্ন মহন্ন চাণু

ন স্ত্রী পুমান্ন চ নপুংসকমেকবীজম্৷

যৈর্ব্রহ্ম তত্সমনুপাসিতমেকচিত্তৈ-
র্ধন্যা বিরেজুরিতরে ভবপাশবদ্ধাঃ৷৷6৷৷

অজ্ঞানপঙ্কপরিমগ্নমপেতসারং

দুঃখালযং মরণজন্মজরাবসক্তম্৷

সংসারবন্ধনমনিত্যমবেক্ষ্য ধন্যা
জ্ঞানাসিনা তদবশীর্য বিনিশ্চযন্তি৷৷7৷৷

শান্তৈরনন্যমতিভির্মধুরস্বভাবৈ-

রেকত্বনিশ্চিতমনোভিরপেতমোহৈঃ৷

সাকং বনেষু বিদিতাত্মপদস্বরূপং
তদ্বস্তু সম্যগনিশং বিমৃশন্তি ধন্যাঃ৷৷8৷৷


ইতি শ্রীমত্পরমহংসপরিব্রাজকাচার্যস্য

শ্রীগোবিন্দভগবত্পূজ্যপাদশিষ্যস্য

শ্রীমচ্ছংকরভগবতঃ কৃতৌ

ধন্যাষ্টকং সংপূর্ণম্৷৷