Preliminary Texts

।।श्रीः।।
।।दशश्लोकी।।
न भूमिर्न तोयं न तेजो न वायु

र्न खं नेन्द्रियं वा न तेषां समूहः।

अनेकान्तिकत्वात्सुषुप्त्येकसिद्ध
स्तदेकोऽवशिष्टः शिवः केवलोऽहम्।।1।।

न वर्णा न वर्णाश्रमाचारधर्मा

न मे धारणाध्यानयोगादयोऽपि।

अनात्माश्रयाहं ममाध्यासहाना
त्तदेकोऽवशिष्टः शिवः केवलोऽहम्।।2।।

न माता पिता वा न देवा न लोका

न वेदा न यज्ञा न तीर्थं ब्रुवन्ति।

सुषुप्तौ निरस्तातिशून्यात्मकत्वा
त्तदेकोऽवशिष्टः शिवः केवलोऽहम्।।3।।

न सांख्यं न शैवं न तत्पाञ्चरात्रं

न जैनं न मीमांसकादेर्मतं वा।

विशिष्टानुभूत्या विशुद्धात्मकत्वा
त्तदेकोऽवशिष्टः शिवः केवलोऽहम्।।4।।

न चोर्ध्वं न चाधो न चान्तर्न बाह्यं

न मध्यं न तिर्यङ् न पूर्वापरा दिक्।

वियद्व्यापकत्वादखण्डैकरूप
स्तदेकोऽवशिष्टः शिवः केवलोऽहम्।।5।।

न शुक्लं न कृष्णं न रक्तं न पीतं

न कुब्जं न पीनं न ह्रस्वं न दीर्घम्।

अरूपं तथा ज्योतिराकारकत्वा
त्तदेकोऽवशिष्टः शिवः केवलोऽहम्।।6।।

न शास्ता न शास्त्रं न शिष्यो न शिक्षा

न च त्वं न चाहं न चायं प्रपञ्चः।

स्वरूपावबोधो विकल्पासहिष्णु
स्तदेकोऽवशिष्टः शिवः केवलोऽहम्।।7।।

न जाग्रन्न मे स्वप्नको वा सुषुप्ति

र्न विश्वो न वा तैजसः प्राज्ञको वा।

अविद्यात्मकत्वात्त्रयाणां तुरीय
स्तदेकोऽवशिष्टः शिवः केवलोऽहम्।।8।।

अपि व्यापकत्वाद्धि तत्त्वप्रयोगा

त्स्वतः सिद्धभावादनन्याश्रयत्वात्।

जगत्तुच्छमेतत्समस्तं तदन्य
त्तदेकोऽवशिष्टः शिवः केवलोऽहम्।।9।।

न चैकं तदन्यद्द्वितीयं कुतः स्या

न्न वा केवलत्वं न चाकेवलत्वम्।

न शून्यं न चाशून्यमद्वैतकत्वा
त्कथं सर्ववेदान्तसिद्धं ब्रवीमि।।10।।


इति श्रीमत्परमहंसपरिव्राजकाचार्यस्य श्रीगोविन्द

भगवत्पूज्यपादशिष्यस्य श्रीमच्छंकरभगवतः कृतौ

दशश्लोकी समाप्ता।।