Preliminary Texts

৷৷শ্রীঃ৷৷
৷৷তত্ত্বোপদেশঃ৷৷
তত্ত্বংপদার্থশুদ্ধ্যর্থং গুরুঃ শিষ্যং বচোব্রবীত্৷
বাক্যে তত্ত্বমসীত্যত্র ত্বংপদার্থং বিবেচয৷৷1৷৷

ন ত্বং দেহোসি দৃশ্যত্বাদুপজাত্যাদিমত্ত্বতঃ৷
ভৌতিকত্বাদশুদ্ধত্বাদনিত্যত্ত্বাত্তথৈব চ৷৷2৷৷

অদৃশ্যো রূপহীনস্ত্বং জাতিহীনোপ্যভৌতিকঃ৷
শুদ্ধনিত্যোসি দৃগ্রূপো ঘটো যদ্বন্ন দৃগ্ভবেত্৷৷3৷৷

ন ভবানিন্দ্রিযাণ্যেষাং করণত্বেন যা শ্রুতিঃ৷
প্রেরকস্ত্বং পৃথক্তেভ্যো ন কর্তা করণং ভবেত্৷৷4৷৷

নানৈতান্যেকরূপস্ত্বং ভিন্নস্তেভ্যঃ কুতঃ শ্রৃণু৷
ন চৈকেন্দ্রিযরূপস্ত্বং সর্বত্রাহংপ্রতীতিতঃ৷৷5৷৷

ন তেষাং সমুদাযোসি তেষামন্যতমস্য চ৷
বিনাশেপ্যাত্মধীস্তাবদস্তি স্যান্নৈবমন্যথা৷৷6৷৷

প্রত্যেকমপি তান্যাত্মা নৈব তত্র নযং শ্রৃণু৷
নানাস্বামিকদেহোযং নশ্যেদ্ভিন্নমতাশ্রযঃ৷৷7৷৷

নানাত্মাভিমতং নৈব বিরুদ্ধবিষযত্বতঃ৷
স্বাম্যৈক্যে তু ব্যবস্থা স্যাদেকপার্থিবদেশবত্৷৷8৷৷

ন মনস্ত্বং ন বা প্রাণো জডত্বাদেব চৈতযোঃ৷
গতমন্যত্র মে চিত্তমিত্যন্যত্বানুভূতিতঃ৷৷9৷৷

ক্ষত্তৃড্ভ্যাং পীডিতঃ প্রাণো মমাযং চেতি ভেদতঃ৷
তযোর্দ্রষ্টা পৃথক্তাভ্যাং ঘটদ্রষ্টা ঘটাদ্যথা৷৷10৷৷

সুপ্তৌ লীনাস্তি যা বোধে সর্বং ব্যাপ্নোতি দেহকম্৷
চিচ্ছাযযা চ সবদ্ধা ন সা বুদ্ধির্ভবান্দ্বিজ৷৷11৷৷

নানারূপবতী বোধে সুপ্তৌ লীনাতিচঞ্চলা৷
যতো দৃগেকরূপস্ত্ব পৃথক্তস্য প্রকাশকঃ৷৷12৷৷

সুপ্তৌ দেহাদ্যভাবেপি সাক্ষী তেষাং ভবান্যতঃ৷
স্বানুভূতিস্বরূপত্বান্নান্যস্তস্যাস্তি ভাসকঃ৷৷13৷৷

প্রমাণং বোধযন্তং তং বোধং মানেন যে জনাঃ৷
বুভুত্স্যন্তে ত এধোভির্দগ্ধুং বাঞ্ছন্তি পাবকম্৷৷14৷৷

বিশ্বমাত্মানুভবতি তেনাসৌ নানুভূযতে৷
বিশ্বং প্রকাশযত্যাত্মা তেনাসৌ ন প্রকাশ্যতে৷৷15৷৷

ঈদৃশং তাদৃশং নৈতন্ন পরোক্ষং সদেব যত্৷
তদ্ব্রহ্ম ত্বং ন দেহাদিদৃশ্যরূপোসি সর্বদৃক্৷৷16৷৷

ইদংত্বেনৈব যদ্ভাতি সর্বং তচ্চ নিষিধ্যতে৷
অবাচ্যতত্ত্বমনিদং ন বেদ্যং স্বপ্রকাশতঃ৷৷17৷৷

সত্যং জ্ঞানমনন্তং চ ব্রহ্মলক্ষণমুচ্যতে৷
সত্যত্বাজ্জ্ঞানরূপত্বাদনন্তত্বাত্ত্বমেব হি৷৷18৷৷

সতি দেহাদ্যুপাধৌ স্যাজ্জীবস্তস্য নিযামকঃ৷
ঈশ্বরঃ শক্ত্যুপাধিত্বাদ্দ্বযোর্বাধে স্বযংপ্রভঃ৷৷19৷৷

অপেক্ষ্যতেখিলৈর্মানৈর্ন যন্মানমপেক্ষতে৷
বেদবাক্যং প্রমাণং তদ্ব্রহ্মাত্মাবগতৌ মতম্৷৷20৷৷

অতো হি তত্ত্বমস্যাদিবেদবাক্যং প্রমাণতঃ৷
ব্রহ্মণোস্তি যযা যুক্ত্যা সাস্মাভিঃ সংপ্রকীর্ত্যতে৷৷21৷৷

শোধিতে ত্বংপদার্থে হি তত্ত্বমস্যাদি চিন্তিতম্৷
সংভবেন্নান্যথা তস্মাচ্ছোধনং কৃতমাদিতঃ৷৷22৷৷

দেহেন্দ্রিযাদিধর্মান্যঃ স্বাত্মন্যারোপযন্মৃষা৷
কর্তৃত্বাদ্যভিমানী চ বাচ্যার্থস্ত্বংপদস্য সঃ৷৷23৷৷

দেহেন্দ্রিযাদিসাক্ষী যস্তেভ্যো ভাতি বিলক্ষণঃ৷
স্বযং বোধস্বরূপত্বাল্লক্ষ্যার্থস্ত্বংপদস্য সঃ৷৷24৷৷

বেদান্তবাক্যসংবেদ্যবিশ্বাতীতাক্ষরাদ্বযম্৷
বিশুদ্ধং যত্স্বসংবেদ্যং লক্ষ্যার্থস্তত্পদস্য সঃ৷৷25৷৷

সামানাধিকরণ্যং হি পদযোস্তত্ত্বমোর্দ্বযোঃ৷
সংবন্ধস্তেন বেদান্তৈর্ব্রহ্মৈক্যং প্রতিপাদ্যতে৷৷26৷৷

ভিন্নপ্রবৃত্তিহেতুত্বে পদযোরেকবস্তুনি৷
বৃত্তিত্বং যত্তথৈবৈক্যং বিভক্ত্যন্তকযোস্তযোঃ৷৷27৷৷

সামানাধিকরণ্যং তত্সংপ্রদাযিভিরীরিতম্৷
তথা পদার্থযোরেব বিশেষণবিশেষ্যতা৷৷28৷৷

অযং সঃ সোযমিতিবত্সংবন্ধো ভবতি দ্বযোঃ৷
প্রত্যক্ত্বং সদ্বিতীযত্বং পরোক্ষত্বং চ পূর্ণতা৷৷29৷৷

পরস্পরবিরুদ্ধং স্যাত্ততো ভবতি লক্ষণা৷৷
লক্ষ্যলক্ষণসংবন্ধঃ পদার্থপ্রত্যগাত্মনোঃ৷৷30৷৷

মানান্তরোপরোধাচ্চ মুখ্যার্থস্যাপরিগ্রহে৷
মুখ্যার্থস্যাবিনাভূতে প্রবৃত্তির্লক্ষণোচ্যতে৷৷31৷৷

ত্রিবিধা লক্ষণা জ্ঞেযা জহত্যজহতী তথা৷
অন্যোভযাত্মিকা জ্ঞেযা তত্রাদ্যা নৈব সংভবেত্৷৷32৷৷

বাচ্যার্থমখিলং ত্যক্ত্বা বৃত্তিঃ স্যাদ্যা তদন্বিতে৷
গঙ্গাযাং ঘোষ ইতিবজ্জহতী লক্ষণা হি সা৷৷33৷৷

বাচ্যার্থস্যৈকদেশস্য প্রকৃতে ত্যাগ ইষ্যতে৷
জহতী সংভবেন্নৈব সংপ্রদাযবিরোধত৷৷34৷৷

বাচ্যার্থমপরিত্যজ্য বৃত্তিরন্যার্থকে তু যা৷
কথিতেযমজহতী শোণোযং ধাবতীতিবত্৷৷35৷৷

ন সংভবতি সাপ্যত্র বাচ্যার্থেতিবিরোধতঃ৷
বিরোধাংশপরিত্যাগো দৃশ্যতে প্রকৃতে যতঃ৷৷36৷৷

বাচ্যার্থস্যৈকদেশং চ পরিত্যজ্যৈকদেশকম্৷
যা বোধযতি সা জ্ঞেযা তৃতীযা ভাগলক্ষণা৷৷37৷৷

সোযং বিপ্র ইদং বাক্যং বোধযত্যাদিতস্তথা৷
তত্কালত্ববিশিষ্টং চ তথৈতত্কালসংযুতম্৷৷38৷৷

অতস্তযোর্বিরুদ্ধং তত্তত্কালত্বাদিধর্মকম্৷
ত্যক্ত্বা বাক্যং যথা বিপ্রপিণ্ডং বোধযতীরিতম্৷৷39৷৷

তথৈব প্রকৃতে তত্ত্বমসীত্যত্র শ্রুতৌ শৃণু৷
প্রত্যক্ত্বাদীন্পরিত্যজ্য জীবধর্মাংস্ত্বমঃপদাত্৷৷40৷৷

সর্বজ্ঞত্বপরোক্ষাদীন্পরিত্যজ্য ততঃপদাত্৷
শুদ্ধং কূটস্থমদ্বৈতং বোধযত্যাদরাত্পরম্৷৷41৷৷

তত্ত্বমোঃ পদযোরৈক্যমেব তত্ত্বমসীত্যলম্৷
ইত্থমৈক্যাববোধেন সম্যগ্জ্ঞানং দৃঢং নযৈঃ৷৷42৷৷

অহং ব্রহ্মেতি বিজ্ঞানং যস্য শোকং তরত্যসৌ৷
আত্মা প্রকাশমানোপি মহাবাক্যৈস্তথৈকতা৷৷43৷৷

তত্ত্বমোর্বোধ্যতেথাপি পৌর্বাপর্যানুসারতঃ৷
তথাপি শক্যতে নৈব শ্রীগুরোঃ করুণাং বিনা৷৷44৷৷

অপরোক্ষযিতুং লোকে মূঢৈঃ পণ্ডিতমানিভিঃ৷
অন্তঃকরণসংশুদ্ধৌ স্বযং জ্ঞানং প্রকাশতে৷৷45৷৷

বেদবাক্যৈরতঃ কিং স্যাদ্গুরুণেতি ন সাংপ্রতম্৷
আচার্যবান্পুরুষো হি বেদেত্যেবং শ্রুতির্জগৌ৷৷46৷৷

অনাদাবিহ সংসারে বোধকো গুরুরেব হি৷
অতো ব্রহ্মাত্মবস্ত্বৈক্যং জ্ঞাত্বা দৃশ্যমসত্তযা৷৷47৷৷

অদ্বৈতে ব্রহ্মণি স্থেযং প্রত্যগ্ব্রহ্মাত্মনা সদা৷
তত্প্রত্যক্ষাত্পরিজ্ঞাতমদ্বৈতব্রহ্মচিদ্ধনম্৷৷48৷৷

প্রতিপাদ্যং তদেবাত্র বেদান্তৈর্ন দ্বযং জডম্৷
সুখরূপং চিদদ্বৈতং দুঃখরূপমসজ্জডম্৷৷49৷৷

বেদান্তৈস্তদ্দ্বযং সম্যঙ্নির্ণীতং বস্তুতো নযাত্৷
অদ্বৈতমেব সত্যং ত্বং বিদ্ধি দ্বৈতমসত্সদা৷৷50৷৷

শুদ্ধে কথমশুদ্ধঃ স্যাদ্দৃশ্যং মাযামযং ততঃ৷
শুক্তৌ রূপ্যং মৃষা যদ্বত্তথা বিশ্বং পরাত্মনি৷৷51৷৷

বিদ্যতে ন স্বতঃ সত্ত্বং নাসতঃ সত্ত্বমস্তি বা৷
বাধ্যত্বান্নৈব সদ্দ্বৈতং নাসত্প্রত্যক্ষভানতঃ৷৷52৷৷

সদসন্ন বিরুদ্ধত্বাদতোনির্বাচ্যমেব তত্৷
যঃ পূর্বমেক এবাসীত্সৃষ্ট্বা পশ্চাদিদং জগত্৷৷53৷৷

প্রবিষ্টো জীবরূপেণ স এবাত্মা ভবান্পরঃ৷
সচ্চিদানন্দ এব ত্বং বিস্মৃত্যাত্মতযা পরম্৷৷54৷৷

জীবভাবমনুপ্রাপ্তঃ স এবাত্মাসি বোধতঃ৷
অদ্বযানন্দচিন্মাত্রঃ শুদ্ধঃ সাম্রাজ্যমাগতঃ৷৷55৷৷

কর্তৃত্বাদীনি যান্যাসংস্ত্বযি ব্রহ্মাদ্বযে পরে৷
তানীদানীং বিচার্য ত্বং কিংস্বরূপাণি বস্তুতঃ৷৷56৷৷

অত্রৈব শ্রৃণু বৃত্তান্তমপূর্বং শ্রুতিভাষিতম্৷
কশ্চিদ্গান্ধারদেশীযো মহারত্নবিভূষিতঃ৷৷57৷৷

স্বগৃহে স্বাঙ্গণে সুপ্তঃ প্রমত্তঃ সন্কদাচন৷
রাত্রৌ চৌরঃ সমাগত্য ভূষণানাং প্রলোভিতঃ৷৷58৷৷

বদ্ধ্বা দেশান্তরং চৌরৈর্নীতঃ সন্গহনে বনে৷
ভূষণান্যপহৃত্যাপি বদ্ধাক্ষকরপাদকঃ৷৷59৷৷

নিক্ষিপ্তো বিপিনেতীব কুশকণ্টকবৃশ্চিকৈঃ৷
ব্যালব্যাঘ্রাদিভিশ্চৈব সংকুলে তরুসংকটে৷৷60৷৷

ব্যালাদিদুষ্টসত্ত্বেভ্যো মহারণ্যে ভযাতুরঃ৷৷
শিলাকণ্টকদর্ভাদ্যৈর্দেহস্য প্রতিকূলকৈঃ৷৷61৷৷

ক্রিযমাণে বিলুঠনে বিশীর্ণাঙ্গোসমর্থকঃ৷
ক্ষুত্তৃডাতপবায্বগ্ন্যাদিভিস্তপ্তোতিতাপকৈঃ৷৷62৷৷

বন্ধমুক্তৌ তথা দেশপ্রাপ্তাবেব সুদুঃখধীঃ৷
দদৃশে কংচিদাক্রোশন্নৈকং তত্রৈব তস্থিবান্৷৷63৷৷

তথা রাগাদিভির্বর্গৈঃ শত্রুভির্দুঃখদাযিভিঃ৷
চৌরৈর্দেহাভিমানাদ্যৈঃ স্বানন্দধনহারিভিঃ৷৷64৷৷

ব্রহ্মানন্দে প্রমত্তঃ স্বাজ্ঞাননিদ্রাবশীকৃতঃ৷
বদ্ধস্ত্বং বন্ধনৈর্ভোগতৃষ্ণাজ্বরাদিভির্দৃঢম্৷৷65৷৷

অদ্বযানন্দরূপাত্ত্বাং প্রচ্যাব্যাতীব ধূর্তকৈঃ৷
দূরনীতোসি দেহেষু সংসারারণ্যভূমিষু৷৷66৷৷

সর্বদুঃখনিদানেষু শরীরাদিত্রযেষু চ৷
নানাযোনিষু কর্মান্ধবাসনানির্মিতাসু চ৷৷67৷৷

প্রবেশিতোসি সৃষ্টোসি বদ্ধঃ স্বানন্দদৃষ্টিতঃ৷
অনাদিকালমারভ্য দুঃখং চানুভবন্সদা৷৷68৷৷

জন্মমৃত্যুজরাদোষনরকাদিপরম্পরাম্৷৷
নিরন্তরং বিষণ্ণোনুভবন্নত্যন্তশোকবান্৷৷69৷৷

অবিদ্যাভূতবন্ধস্য নিবৃত্তৌ দুঃখদস্য চ৷
স্বরূপানন্দসংপ্রাপ্তৌ সত্যোপাযং ন লব্ধবান্৷৷70৷৷

যথা গান্ধারদেশীযশ্চিরং দৈবাদ্দযালুভিঃ৷
কৈশ্চিত্পান্থৈঃ পরিপ্রাপ্তৈর্মুক্তদৃষ্ট্যাদিবন্ধনঃ৷৷71৷৷

সঃ স্বস্থৈরুপদিষ্টশ্চ পণ্ডিতো নিশ্চিতাত্মকঃ৷
গ্রামাদ্গ্রামান্তরং গচ্ছেন্মেধাবী মার্গতত্পরঃ৷৷72৷৷

গত্বা গান্ধারদেশং স স্বগৃহং প্রাপ্য পূর্ববত্৷
বান্ধবৈঃ সংপরিষ্বক্তঃ সুখী ভূত্বা স্থিতোভবত্৷৷73৷৷

ত্বমপ্যেবমনেকেষু দুঃখদাযিষু জন্মসু৷
ভ্রান্তো দৈবাচ্ছুভে মার্গে জাতশ্রদ্ধঃ সুকর্মকৃত্৷৷74৷৷

বর্ণাশ্রমাচারপরোবাপ্তপুণ্যমহোদযঃ৷
ঈশ্বরানুগ্রহাল্লব্ধো ব্রহ্মবিদ্গুরুসত্তমঃ৷৷75৷৷

বিধিবত্কৃতসংন্যাসো বিবেকাদিযুতঃ সুধীঃ৷
প্রাপ্তো ব্রহ্মোপদেশোদ্য বৈরাগ্যাভ্যাসতঃ পরম্৷৷76৷৷

পণ্ডিতস্তত্র মেধাবী যুক্ত্যা বস্তু বিচারযন্৷
নিদিধ্যাসনসংপন্নঃ প্রাপ্তো হি ত্বং পরং পদম্৷৷77৷৷

অতো ব্রহ্মাত্মবিজ্ঞানমুপদিষ্টং যথাবিধি৷
মযাচার্যেণ তে ধীর সম্যক্তত্র প্রযত্নবান্৷৷78৷৷

ভূত্বা বিমুক্তবন্ধস্ত্বং ছিন্নদ্বৈতাত্মসংশযঃ৷
নির্দ্বন্দ্বো নিঃস্পৃহো ভূত্বা বিচরস্ব যথাসুখম্৷৷79৷৷

বস্তুতো নিষ্প্রপঞ্চোসি নিত্যমুক্তঃ স্বভাবতঃ৷
ন তে বন্ধবিমোক্ষৌ স্তঃ কল্পিতৌ তৌ যতস্ত্বযি৷৷80৷৷

ন নিরোধো ন চোত্পত্তির্ন বদ্ধো ন চ সাধকঃ৷
ন মুমুক্ষুর্ন বৈ মুক্ত ইত্যেষা পরমার্থতা৷৷81৷৷

শ্রুতিসিদ্ধান্তসারোযং তথৈব ত্বং স্বযা ধিযা৷
সংবিচার্য নিদিধ্যাস্য নিজানন্দাত্মকং পরম্৷৷82৷৷

সাক্ষাত্কৃত্বা পরিচ্ছিন্নাদ্বৈতব্রহ্মাক্ষরং স্বযম্৷
জীবন্নেব বিনির্মুক্তো বিশ্রান্তঃ শান্তিমাশ্রয৷৷83৷৷

বিচারণীযা বেদান্তা বন্দনীযো গুরুঃ সদা৷
গুরূণাং বচনং পথ্যং দর্শনং সেবনং নৃণাম্৷৷84৷৷

গুরুর্ব্রহ্ম স্বযং সাক্ষাত্সেব্যো বন্দ্যো মুমুক্ষুভিঃ৷
নোদ্বেজনীয এবাযং কৃতজ্ঞেন বিবেকিনা৷৷85৷৷

যাবদাযুস্ত্বযা বন্দ্যো বেদান্তো গুরুরীশ্বরঃ৷
মনসা কর্মণা বাচা শ্রুতিরেবৈষ নিশ্চযঃ৷৷86৷৷

ভাবাদ্বৈতং সদা কুর্যাত্ক্রিযাদ্বৈতং ন কর্হিচিত্৷
অদ্বৈতং ত্রিষু লোকেষু নাদ্বৈতং গুরুণা সহ৷৷87৷৷


ইতি শ্রীমত্পরমহংসপরিব্রাজকাচার্যস্য শ্রীগোবিন্দভগ-

বত্পূজ্যপাদশিষ্যস্য শ্রীমচ্ছংকরভগবতঃ কৃতৌ

তত্ত্বোপদেশঃ সংপূর্ণঃ৷৷