Preliminary Texts

৷৷শ্রীঃ৷৷
৷৷উপদেশপঞ্চকম্৷৷
বেদো নিত্যমধীযতাং তদুদিতং কর্ম স্বনুষ্ঠীযতাং

তেনেশস্য বিধীযতামপচিতিঃ কাম্যে মতিস্ত্যজ্যতাম্৷

পাপৌঘঃ পরিধূযতাং ভবসুখে দোষোনুসংধীযতা-
মাত্মেচ্ছা ব্যবসীযতাং নিজগৃহাত্তূর্ণং বিনির্গম্যতাম্৷৷1৷৷

সঙ্গঃ সত্সু বিধীযতাং ভগবতো ভক্তির্দৃঢাধীযতাং

শান্ত্যাদিঃ পরিচীযতাং দৃঢতরং কর্মাশু সংত্যজ্যতাম্৷

সদ্বিদ্বানুপসৃপ্যতাং প্রতিদিনং তত্পাদুকা সেব্যতাং
ব্রহ্মৈকাক্ষরমর্থ্যতাং শ্রুতিশিরোবাক্যং সমাকর্ণ্যতাম্৷৷2৷৷

বাক্যার্থশ্চ বিচার্যতাং শ্রুতিশিরঃপক্ষঃ সমাশ্রীযতাং

দুস্তর্কাত্সুবিরম্যতাং শ্রুতিমতস্তর্কোনুসংধীযতাম্৷

ব্রহ্মাস্মীতি বিভাব্যতামহরহর্গর্বঃ পরিত্যজ্যতাং
দেহেহংমতিরুজ্ঝ্যতাং বুধজনৈর্বাদঃ পরিত্যজ্যতাম্৷৷3৷৷

ক্ষুদ্ব্যাধিশ্চ চিকিত্স্যতাং প্রতিদিনং ভিক্ষৌষধং ভুজ্যতাং

স্বাদ্বন্নং ন তু যাচ্যতাং বিধিবশাত্প্রাপ্তেন সংতুষ্যতাম্৷

শীতোষ্ণাদি বিষহ্যতাং ন তু বৃথা বাক্যং সমুচ্চার্যতা-
মৌদাসীন্যমভীপ্স্যতাং জনকৃপানৈষ্ঠুর্যমুত্সৃজ্যতাম্৷৷4৷৷

একান্তে সুখমাস্যতাং পরতরে চেতঃ সমাধীযতাং

পূর্ণাত্মা সুসমীক্ষ্যতাং জগদিদং তদ্বাধিতং দৃশ্যতাম্৷

প্রাক্কর্ম প্রবিলাপ্যতাং চিতিবলান্নাপ্যুত্তরৈঃ শ্লিষ্যতাং
প্রারব্ধং ত্বিহ ভুজ্যতামথ পরব্রহ্মাত্মনা স্থীযতাম্৷৷5৷৷


ইতি শ্রীমত্পরমহংসপরিব্রাজকাচার্যস্য শ্রীগোবিন্দভগ-

বত্পূজ্যপাদশিষ্যস্য শ্রীমচ্ছংকরভগবতঃ কৃতৌ

উপদেশপঞ্চকং সংপূর্ণম্৷৷