Preliminary Texts

৷৷শ্রীঃ৷৷
৷৷স্বাত্মনিরূপণম্৷৷
শ্রীগুরুচরণদ্বন্দ্বং বন্দেহং মথিতদুঃসহদ্বন্দ্বম্৷
ভ্রান্তিগ্রহোপশান্তিং পাংসুমযং যস্য ভসিতমাতনুতে৷৷1.1৷৷

দেশিকবরং দযালুং বন্দেহং নিহতনিখিলসংদেহম্৷
যচ্চরণদ্বযমদ্বযমনুভবমুপদিশতি তত্পদস্যার্থম্৷৷1.2৷৷

সংসারদাবপাবকসংতপ্তঃ সকলসাধনোপেতঃ৷
স্বাত্মনিরূপণনিপুণৈর্বাক্যৈঃ শিষ্যঃ প্রবোধ্যতে গুরুণা৷৷1.3৷৷

অস্তি স্বযমিত্যস্মিন্নর্থে কস্যাস্তি সংশযঃ পুংসঃ৷
অত্রাপি সংশযশ্চেত্সংশযিতা যঃ স এব ভবসি ত্বম্৷৷1.4৷৷

নাহমিতি বেত্তি যোসৌ সত্যং ব্রহ্মৈব বেত্তি নাস্তীতি৷
অহমস্মীতি বিজানন্ব্রহ্মৈবাসৌ স্বযং বিজানাতি৷৷1.5৷৷

ব্রহ্ম ত্বমেব তস্মান্নাহং ব্রহ্মেতি মোহমাত্রমিদম্৷
মোহেন ভবতি ভেদঃ ক্লেশাঃ সর্বে ভবন্তি তন্মূলাঃ৷৷1.6৷৷

ন ক্লেশপঞ্চকমিদং ভজতে কৃতকোশপঞ্চকবিবেকঃ৷
অত এব পঞ্চ কোশান্কুশলধিযঃ সংততং বিচিন্বন্তি৷৷1.7৷৷

অন্নপ্রাণমনোমযবিজ্ঞানানংদপংচকোশানাম্৷
একৈকান্তরভাজাং ভজতি বিবেকাত্প্রকাশতামাত্মা৷৷1.8৷৷

বপুরিদমন্নমযাখ্যঃ কোশো নাত্মা জডো ঘটপ্রাযঃ৷
প্রাগুত্পত্তেঃ পশ্চাত্তদভাবস্যাপি দৃশ্যমানত্বাত্৷৷1.9৷৷

কোশঃ প্রাণমযোযং বাযুবিশেষো বপুষ্যবচ্ছিন্নঃ৷
অস্য কথমাত্মতা স্যাত্ক্ষুত্তৃষ্ণাভ্যামুপেযুষঃ পীডাম্৷৷1.10৷৷

কুরুতে বপুষ্যহংতাং গেহাদৌ যঃ করোতি মমতাং চ৷
রাগদ্বেষবিধেযো নাসাবাত্মা মনোমযঃ কোশঃ৷৷1.11৷৷

সুপ্তৌ স্বযং বিলীনা বোধে ব্যাপ্তা কলেবরং সকলম্৷
বিজ্ঞানশব্দবাচ্যা চিত্প্রতিবিম্বো ন বুদ্ধিরপ্যাত্মা৷৷1.12৷৷

সুপ্তিগতৈঃ সুখলেশৈরভিমনুতে যঃ সুখী ভবামীতি৷
আনন্দকোশনামা সোহংকারঃ কথং ভবেদাত্মা৷৷1.13৷৷

যঃ স্ফুরতি বিম্বভূতঃ স ভবেদানন্দ এব সকলাত্মা৷
প্রাগূর্ধ্বমপি চ সত্ত্বাদবিকারিত্বাদবাধ্যমানত্বাত্৷৷1.14৷৷

অন্নমযাদেরস্মাদপরং যদি নানুভূযতে কিংচিত্৷
অনুভবিতান্নমযাদেরস্তীত্যস্মিন্ন কশ্চিদপলাপঃ৷৷1.15৷৷

স্বযমেবানুভবত্বাদ্যদ্যপ্যেতস্য নানুভাব্যত্বম্৷
সকৃদপ্যভাবশঙ্কা ন ভবেদ্বোধস্বরূপসত্তাযাঃ৷৷1.16৷৷

অনুভবতি বিশ্বমাত্মা বিশ্বেনাসৌ ন চানুভূযেত৷
ন খলু প্রকাশ্যতেসৌ বিশ্বমশেষং প্রকাশযন্ভানুঃ৷৷1.17৷৷

তদিদং তাদৃশমীদৃশমেতাবত্তাবদিতি চ যন্ন ভবেত্৷
ব্রহ্ম তদিত্যবধেযং নো চেদ্বিষযো ভবেত্পরোক্ষং চ৷৷1.18৷৷

ইদমিদমিতি প্রতীতে বস্তুনি সর্বত্র বাধ্যমানেপি৷
অনিদমবাধ্যং তত্ত্বং সত্ত্বাদেতস্য ন চ পরোক্ষত্বম্৷৷1.19৷৷

নাবেদ্যমপি পরোক্ষং ভবতি ব্রহ্ম স্বযংপ্রকাশত্বাত্৷
সত্যং জ্ঞানমনন্তং ব্রহ্মেত্যেতস্য লক্ষণং প্রথতে৷৷1.20৷৷

সতি কোশশক্ত্যুপাধৌ সংভবতস্তস্য জীবতেশ্বরতে৷
নো চেত্তযোরভাবাদ্বিগতবিশেষং বিভাতি নিজরূপম্৷৷1.21৷৷

সতি সকলদৃশ্যবাধে ন কিমপ্যস্তীতি লোকসিদ্ধং চেত্৷
যন্ন কিমপীতি সিদ্ধং ব্রহ্ম তদেবেতি বেদতঃ সিদ্ধম্৷৷1.22৷৷

এবং মতিরহিতানাং তত্ত্বমসীত্যাদিবাক্যচিন্তনযা৷
প্রতিভাত্যেষ পরোক্ষবদাত্মা প্রত্যক্প্রকাশমানোপি৷৷1.23৷৷

তস্মাত্পদার্থশোধনপূর্বং বাক্যস্য চিন্তযন্নর্থম্৷
দেশিকদযাপ্রভাবাদপরোক্ষযতি ক্ষণেন চাত্মানম্৷৷1.24৷৷

দেহেন্দ্রিযাদিধর্মানাত্মন্যারোপযন্নভেদেন৷
কর্তৃত্বাদ্যভিমানী বোধঃ স্যাত্ত্বংপদস্য বাচ্যোর্থঃ৷৷1.25৷৷

দেহস্য চেন্দ্রিযাণাং সাক্ষী তেভ্যো বিলক্ষণত্বেন৷
প্রতিভাতি যোববোধঃ প্রোক্তোসৌ ত্বংপদস্য লক্ষ্যোর্থঃ৷৷1.26৷৷

বেদাবসানবাচা সংবেদ্যং সকলজগদুপাদানম্৷
সর্বজ্ঞতাদ্যুপেতং চৈতন্যং তত্পদস্য বাচ্যোর্থঃ৷৷1.27৷৷

বিবিধোপাধিবিমুক্তং বিশ্বাতীতং বিশুদ্ধমদ্বৈতম্৷
অক্ষরমনুভববেদ্যং চৈতন্যং তত্পদস্য লক্ষ্যোর্থঃ৷৷1.28৷৷

সামানাধিকরণ্যং তদনু বিশেষণবিশেষ্যতা চেতি৷
অথ লক্ষ্যলক্ষকত্বং ভবতি পদার্থাত্মনাং চ সংবন্ধঃ৷৷1.29৷৷

একত্র বৃত্তিরর্থে শব্দানাং ভিন্নবৃত্তিহেতূনাম্৷
সামানাধিকরণ্যং ভবতীত্যেবং বদন্তি লাক্ষণিকাঃ৷৷1.30৷৷

প্রত্যক্ত্বপরোক্ষত্বে পরিপূর্ণত্বং চ সদ্বিতীযত্বম্৷
ইতরেতরং বিরুদ্ধং তত ইহ ভবিতব্যমেব লক্ষণযা৷৷1.31৷৷

মানান্তরোপরোধান্মুখ্যার্থস্যাপরিগ্রহে জাতে৷
মুখ্যাবিনাকৃতের্থে যা বৃত্তিঃ সৈব লক্ষণা প্রোক্তা৷৷1.32৷৷

নিখিলমপি বাচ্যমর্থং ত্যক্ত্বা বৃত্তিস্তদন্বিতেন্যার্থে৷
জহতীতি লক্ষণা স্যাদ্গঙ্গাযাং ঘোষবদিহ ন গ্রাহ্যা৷৷1.33৷৷

বাচ্যার্থমত্যজন্ত্যা যস্যা বৃত্তেঃ প্রবৃত্তিরন্যার্থে৷
ইযমজহতীতি কথিতা শোণো ধাবতিবদত্র ন গ্রাহ্যা৷৷1.34৷৷

জহদজহতীতি সা স্যাদ্যা বাচ্যার্থৈকদেশমপহায৷
বোধযতি চৈকদেশং সোযং দ্বিজ ইতিবদাশ্রযেদেনাম্৷৷1.35৷৷

সো়যং দ্বিজ ইতি বাক্যং ত্যক্ত্বা প্রত্যক্পরোক্ষদেশাদ্যম্৷
দ্বিজমাত্রলক্ষকত্বাত্কথযত্যৈক্যং পদার্থযোরুভযোঃ৷৷1.36৷৷

তদ্বত্তত্ত্বমসীতি ত্যক্ত্বা প্রত্যক্পরোক্ষতাদীনি৷
চিদ্বস্তু লক্ষযিত্বা বোধযতি স্পষ্টমসিপদেনৈক্যম্৷৷1.37৷৷

ইত্থং বোধিতমর্থং মহতা বাক্যেন দর্শিতৈক্যেন৷
অহমিত্যপরোক্ষযতাং বেদো বেদযতি বীতশোকত্বম্৷৷1.38৷৷

প্রাযঃ প্রবর্তকত্বং বিধিবচসাং লোকবেদযোর্দৃষ্টম্৷
সিদ্ধং বোধযতোর্থং কথমিব তদ্ভবতি তত্ত্বমস্যাদেঃ৷৷1.39৷৷

বিধিরেব ন প্রবৃত্তিং জনযত্যভিলষিতবস্তুবোধোপি৷
রাজা যাতি সুতোভূদিতি বোধেন প্রবর্ততে লোকঃ৷৷1.40৷৷

ঐক্যপরৈঃ শ্রুতিবাক্যৈরাত্মা শশ্বত্প্রকাশ্যমানোপি৷
দেশিকদযাবিহীনৈরপরোক্ষযিতুং ন শক্যতে পুরুষৈঃ৷৷1.41৷৷

বিরহিতকাম্যনিষিদ্ধো বিহিতানুষ্ঠাননির্মলস্বান্তঃ৷
ভজতি নিজমেব বোধং গুরুণা কিমিতি ত্বযা ন মন্তব্যম্৷৷1.42৷৷

কর্মভিরেব ন বোধঃ প্রভবতি গুরুণা বিনা দযানিধিনা৷
আচার্যবান্হি পুরুষো বেদেত্যর্থস্য বেদসিদ্ধত্বাত্৷৷1.43৷৷

বেদোনাদিতযা বা যদ্বা পরমেশ্বরপ্রণীততযা৷
ভবতি পরমং প্রমাণং বাধো নাস্তি স্বতশ্চ পরতো বা৷৷1.44৷৷

নাপেক্ষতে যদন্যদ্যদপেক্ষন্তেখিলানি মানানি৷
বাক্যং তন্নিগমানাং মানং ব্রহ্মাদ্যতীন্দ্রিযাবগতৌ৷৷1.45৷৷

মানং প্রবোধযন্তং বোধং মানেন যে বুভুত্সন্তে৷
এধোভিরেব দহনং দগ্ধুং বাঞ্ছন্তি তে মহাত্মানঃ৷৷1.46৷৷

বেদোনাদিরমুষ্য ব্যঞ্জক ঈশঃ স্বযংপ্রকাশাত্মা৷
তদভিব্যক্তিমুদীক্ষ্য প্রোক্তোসৌ সূরিভিঃ প্রমাণমিতি৷৷1.47৷৷

রূপাণামবলোকে চক্ষুরিবান্যন্ন কারণং দৃষ্টম্৷
তদ্বদদৃষ্টাবগতৌ বেদবদন্যো ন বেদকো হেতুঃ৷৷1.48৷৷

নিগমেষু নিশ্চিতার্থং তন্ত্রে কশ্চিদ্যদি প্রকাশযতি৷
তদিদমনুবাদমাত্রং প্রামাণ্যং তস্য সিধ্যতি ন কিংচিত্৷৷1.49৷৷

অংশদ্বযবতি নিগমে সাধযতি দ্বৈতমেব কোপ্যংশঃ৷
অদ্বৈতমেব বস্তু প্রতিপাদযতি প্রসিদ্ধমপরোংশঃ৷৷1.50৷৷

অদ্বৈতমেব সত্যং তস্মিন্দ্বৈতং ন সত্যমধ্যস্তম্৷
রজতমিব শুক্তিকাযাং মৃগতৃষ্ণাযামিবোদকস্ফুরণম্৷৷1.51৷৷

আরোপিতং যদি স্যাদদ্বৈতং বস্ত্ববস্তুনি দ্বৈতে৷
তদযুক্তমেব যস্মাত্সত্যেধ্যাসো ভবত্যসত্যানাম্৷৷1.52৷৷

যদ্যারোপণমুভযোস্তদ্ব্যতিরিক্তস্য কস্যচিদভাবাত্৷
আরোপণং ন শূন্যে তস্মাদদ্বৈতসত্যতা গ্রাহ্যা৷৷1.53৷৷

প্রত্যক্ষাদ্যনবগতং শ্রুত্যা প্রতিপাদনীযমদ্বৈতম্৷
দ্বৈতং ন প্রতিপাদ্যং তস্য স্বত এব লোকসিদ্ধত্বাত্৷৷1.54৷৷

অদ্বৈতং সুখরূপং দুঃসহদুঃখং সদা ভবেদ্দ্বৈতম্৷
যত্র প্রযোজনং স্যাত্প্রতিপাদযতি শ্রুতিস্তদেবাসৌ৷৷1.55৷৷

নিগমগিরা প্রতিপাদ্যং বস্তু যদানন্দরূপমদ্বৈতম্৷
স্বাভাবিকং স্বরূপং জীবত্বং তস্য কেচন ব্রুবতে৷৷1.56৷৷

স্বাভাবিকং যদি স্যাজ্জীবত্বং তস্য বিশদবিজ্ঞপ্তেঃ৷
সকৃদপি ন তদ্বিনাশং গচ্ছেদুষ্ণপ্রকাশবদ্বহ্নেঃ৷৷1.57৷৷

যদ্বদযো রসবিদ্ধং কাঞ্চনতাং যাতি তদ্বদেবাসৌ৷
জীবঃ সাধনশক্ত্যা পরতাং যাতীতি কেচিদিচ্ছন্তি৷৷1.58৷৷

তদিদং ভবতি ন যুক্তং গতবতি তস্মিংশ্চিরেণ রসবীর্যে৷
প্রতিপদ্যতে প্রণাশং হৈমো বর্ণোপ্যযঃসমারূঢঃ৷৷1.59৷৷

জীবত্বমপি তথেদং বহুবিধসুখদুঃখলক্ষণোপেতম্৷
গতমিব সাধনশক্ত্যা প্রতিভাত্যেব প্রযাতি ন বিনাশম্৷৷1.60৷৷

তস্মাত্স্বতো যদি স্যাজ্জীবঃ সততং স এব জীবঃ স্যাত্৷
এবং যদি পরমাত্মা পরমাত্মৈবাযমিতি ভবেদ্যুক্তম্৷৷1.61৷৷

যদি বা পরেণ সাম্যং জীবশ্চেদ্ভজতি সাধনবলেন৷
কালেন তদপি কিযতা নশ্যত্যেবেতি নিশ্চিতং সকলৈঃ৷৷1.62৷৷

তস্মাত্পরং স্বকীযং দেহং মোহাত্মকং চ সংসারম্৷
স্বজ্ঞানেন গ্রসিত্বা পূর্ণঃ স্বযমেব শিষ্যতে নান্যত্৷৷1.63৷৷

সত্যং জ্ঞানমনন্তং প্রকৃতং পরমাত্মরূপমদ্বৈতম্৷
অববোধযন্তি নিখিলাঃ শ্রুতযঃ স্মৃতিভিঃ সমং সমস্তাভিঃ৷৷1.64৷৷

অদ্বৈতবোধকানাং নিখিলানাং নিগমবাক্যজালানাম্৷
বাক্যান্তরাণি সকলান্যভিধীযন্তেস্য শেষভূতানি৷৷1.65৷৷

যস্মিন্মিহিরবদুদিতে তিমিরবদপযান্তি কর্তৃতাদীনি৷
জ্ঞানং বিরহিতভেদং কথমিব তদ্ভবতি তত্ত্বমস্যাদেঃ৷৷1.66৷৷

কর্মপ্রকরণনিষ্ঠং জ্ঞানং কর্মাঙ্গমিষ্যতে প্রাজ্ঞৈঃ৷
ভিন্নপ্রকরণভাজঃ কর্মাঙ্গত্বং কথং ভবেজ্জ্ঞপ্তেঃ৷৷1.67৷৷

অধিকারিবিষযভেদৌ কর্মজ্ঞানাত্মকাবুভৌ কাণ্ডৌ৷
এবং সতি কথমনযোরঙ্গাঙ্গিত্বং পরস্পরং ঘটতে৷৷1.68৷৷

জ্ঞানং কর্মণি ন স্যাজ্জ্ঞানে কর্মেদমপি তথা ন স্যাত্৷
তত্কথমনযোরুভযোস্তপনতমোবত্সমুচ্চযো ঘটতে৷৷1.69৷৷

তস্মান্মোহনিবৃত্তৌ জ্ঞানং ন সহাযমন্যদর্থযতে৷
যদ্বদ্ধনতরতিমিরপ্রকরপরিধ্বংসনে সহস্রাংশুঃ৷৷1.70৷৷

জ্ঞানং তদেবমমলং সাক্ষী বিশ্বস্য ভবতি পরমাত্মা৷
সংবধ্যতে ন ধর্মৈঃ সাক্ষী তৈরেব সচ্চিদানন্দঃ৷৷1.71৷৷

রজ্জ্বাদেরুরগাদ্যৈঃ সংবন্ধবদস্য দৃশ্যসংবন্ধঃ৷
সততমসঙ্গোযমিতি শ্রুতিরপ্যমুমর্থমেব সাধযতি৷৷1.72৷৷

কর্তৃ চ কর্ম চ যস্য স্ফুরতি ব্রহ্মেব তন্ন জানাতি৷
যস্য ন কর্তৃ ন কর্ম স্ফুটতরমযমেব বেদিতুং ক্রমতে৷৷1.73৷৷

কর্তৃত্বাদিকমেতন্মাযাশক্ত্যা প্রপদ্যতে নিখিলম্৷
ইতি কেচিদাহুরেষা ভ্রান্তির্ব্রহ্মাতিরেকতো নান্যত্৷৷1.74৷৷

তস্মিন্ব্রহ্মণি বিদিতে বিশ্বমশেষং ভবেদিদং বিদিতম্৷
কারণমৃদি বিদিতাযাং ঘটকরকাদ্যা যথাবগম্যন্তে৷৷1.75৷৷

তদিদং কারণমেকং বিগতবিশেষং বিশুদ্ধচিদ্রূপম্৷
তস্মাত্সদেকরূপান্মাযোপহিতাদভূদিদং বিশ্বম্৷৷1.76৷৷

কারণমসদিতি কেচিত্কথযন্ত্যসতো ভবেন্ন কারণতা৷
অঙ্কুরজননী শক্তিঃ সতি খলু বীজে সমীক্ষ্যতে সকলৈঃ৷৷1.77৷৷

কারণমসদিতি কথযন্বন্ধ্যাপুত্রেণ নির্বহেত্কার্যম্৷
কিং চ মৃগতৃষ্ণিকাম্ভঃ পীত্বোদন্যাং মহীযসীং শমযেত্৷৷1.78৷৷

যস্মান্ন সোযমসতো বাদঃ সংভবতি শাস্ত্রযুক্তিভ্যাম্৷
তস্মাত্সদেব তত্ত্বং সর্বেষাং ভবতি কারণং জগতাম্৷৷1.79৷৷

জগদাকারতযাপি প্রথতে গুরুশিষ্যবিগ্রহতযাপি৷
ব্রহ্মাকারতযাপি প্রতিভাতীদং পরাত্পরং তত্ত্বম্৷৷1.80৷৷

সত্যং জগদিতি ভানং সংসৃতযে স্যাদপক্বচিত্তানাম্৷
তস্মাদসত্যমেতন্নিখিলং প্রতিপাদযন্তি নিগমান্তাঃ৷৷1.81৷৷

পরিপক্বমানসানাং পুরুষবরাণাং পুরাতনৈঃ সুকৃতৈঃ৷
ব্রহ্মৈবেদং সর্বং জগদিতি ভূযঃ প্রবোধযত্যেষঃ৷৷1.82৷৷

অনবগতকাঞ্চনানাং ভূষণধীরেব ভূষণে হৈমে৷
এবমবিবেকভাজাং জগতি জনানাং ন তাত্ত্বিকী ধিষণা৷৷1.83৷৷

অহমালম্বনসিদ্ধং কস্য পরোক্ষং ভবেদিদং ব্রহ্ম৷
তদপি বিচারবিহীনৈরপরোক্ষযিতুং ন শক্যতে মুগ্ধৈঃ৷৷1.84৷৷

অহমিদমিতি চ মতিভ্যাং সততং ব্যবহরতি সর্বলোকোপি৷
প্রথমা প্রতীচি চরমা নিবসতি বপুরিন্দ্রিযাদিবাহ্যার্থে৷৷1.85৷৷

বপুরিন্দ্রিযাদিবিষযে যাহংবুদ্ধির্মহত্যসৌ ভ্রান্তিঃ৷
তদ্বুদ্ধিরতস্মিন্নিত্যধ্যাসত্বেন শাস্যমানত্বাত্৷৷1.86৷৷

তস্মাদশেষসাক্ষী পরমাত্মৈবাহমর্থ ইত্যুচিতম্৷
অজডবদেব জডোযং সত্সংবন্ধাদ্ভবত্যহংকারঃ৷৷1.87৷৷

তস্মাত্সর্বশরীরেষ্বহমহমিত্যেব ভাসতে স্পষ্টঃ৷
যঃ প্রত্যযো বিশুদ্ধস্তস্য ব্রহ্মৈব ভবতি মুখ্যোর্থঃ৷৷1.88৷৷

গোশব্দার্থো গোত্বং তদপি ব্যক্তিঃ প্রতীযতের্থতযা৷
অহমর্থঃ পরমাত্মা তদ্বদ্ভ্রান্ত্যা ভবত্যহংকারঃ৷৷1.89৷৷

দগ্ধৃত্বাদিকমযসঃ পাবকসঙ্গেন ভাসতে যদ্বত্৷
তদ্বচ্চেতনসঙ্গাদহমি প্রতিভান্তি কর্তৃতাদীনি৷৷1.90৷৷

দেহেন্দ্রিযাদিদৃশ্যব্যতিরিক্তং বিমলমতুলমদ্বৈতম্৷
অহমর্থ ইতি বিদিত্বা তদ্ব্যতিরিক্তং ন কল্পযেত্কিংচিত্৷৷1.91৷৷

যদ্বত্সুখদুঃখানামবযবভেদাদনেকতা দেহে৷
তদ্বদিহাসতি ভেদেপ্যনুভববৈবিধ্যমাত্মনামেষাম্৷৷1.92৷৷

কিমিদং কিমস্য রূপং কথমিদমাসীদমুষ্য কো হেতুঃ৷
ইতি ন কদাপি বিচিন্ত্যং চিন্ত্যং মাযেতি ধীমতা বিশ্বম্৷৷1.93৷৷

দন্তিনি দারুবিকারে দারু তিরোভবতি সোপি তত্রৈব৷
জগতি তথা পরমাত্মা পরমাত্মন্যপি জগত্তিরোধত্তে৷৷1.94৷৷

আত্মমযে মহতি পটে বিবিধজগচ্চিত্রমাত্মনা লিখিতম্৷
স্বযমেব কেবলমসৌ পশ্যন্প্রমুদং প্রযাতি পরমাত্মা৷৷1.95৷৷

চিন্মাত্রমমলমক্ষযমদ্বযমানন্দমনুভবারূঢম্৷
ব্রহ্মৈবাস্তি তদন্যন্ন কিমপ্যস্তীতি নিশ্চযো বিদুষাম্৷৷1.96৷৷

ব্যবহারস্য দশেযং বিদ্যাবিদ্যেতি ভেদপরিভাষা৷
নাস্ত্যেব তত্ত্বদৃষ্ট্যা তত্ত্বং ব্রহ্মৈব নান্যদস্ত্যস্মাত্৷৷1.97৷৷

অস্ত্যন্যদিতি মতং চেত্তদপি ব্রহ্মৈতদস্তিতারূপম্৷
ব্যতিরিক্তমস্তিতাযা নাস্তিতযা শূন্যমেব তত্সিদ্ধম্৷৷1.98৷৷

তত্ত্বাববোধশক্ত্যা সুস্থিতযা বাধিতাপি সা মাযা৷
আদেহপাতমেষামাভাত্যাত্মানমপি নিজং বিদুষাম্৷৷1.99৷৷

এষ বিশেষো বিদুষাং পশ্যন্তোপি প্রপঞ্চসংসারম্৷
পৃথগাত্মনো ন কিংচিত্পশ্যেযুঃ সকলনিগমনির্ণীতাত্৷৷1.100৷৷

কিং চিন্ত্যং কিমচিন্ত্যং কিং কথনীযং কিমপ্যকথনীযম্৷
কিং কৃত্যং কিমকৃত্যং নিখিলং ব্রহ্মেতি জানতাং বিদুষাম্৷৷1.101৷৷

নিখিলং দৃশ্যবিশেষং দৃগ্রূপত্বেন পশ্যতাং বিদুষাম্৷
বন্ধো নাপি ন মুক্তির্ন পরাত্মত্বং ন চাপি জীবত্বম্৷৷1.102৷৷

অসকৃদনুচিন্তিতানামব্যাহততরনিজোপদেশানাম্৷
প্রামাণ্যপরমসীম্নাং নিগমনমিদমেব নিখিলনিগমানাম্৷৷1.103৷৷

ইতি বোধিতঃ স গুরুণা শিষ্যো হৃষ্টঃ প্রণম্য তং পদযোঃ৷
স্বানুভবসিদ্ধমর্থং স্বযমেবান্তর্বিচারযামাস৷৷1.104৷৷

অজরোহমক্ষরোহং প্রাজ্ঞোহং প্রত্যগাত্মবোধোহম্৷
পরমানন্দমযোহং পরমশিবোহং ভবামি পরিপূর্ণঃ৷৷1.105৷৷

আদ্যোহমাত্মভাজামাত্মানন্দানুভূতিরসিকোহম্৷
আবালগোপমখিলৈরহমিত্যনুভূযমানমহিমাহম্৷৷1.106৷৷

ইহপরসুখবিমুখোহং নিজসুখবোধানুভূতিভরিতোহম্৷
ইতিমতিদূরতরোহং ভাবেতরসুখনিষক্তচিত্তোহম্৷৷1.107৷৷

ঈশোহমীশ্বরাণামীর্ষ্যাদ্বেষানুষঙ্গরহিতোহম্৷
ঈক্ষণবিষযমতীনামীপ্সিতপুরুষার্থসাধনপরোহম্৷৷1.108৷৷

উদযোহমেব জগতামুপনিষদুদ্যানকৃতবিহারোহম্৷
উদ্বেলশোকসাগরবাডবমুখহব্যবাহনার্চিরহম্৷৷1.109৷৷

ঊর্জস্বলনিজবিভবৈরূর্ধ্বমধস্তির্যগশ্নুবানোহম্৷
ঊহাপোহবিচারৈরুররীকৃতবত্প্রতীযমানোহম্৷৷1.110৷৷

ঋষিরহমৃষ্যগণোহং দৃষ্টিরহং দৃশ্যমানমহমেব৷
ঋদ্ধিরহং বৃদ্ধিরহং তৃপ্তিরহং তৃপ্তিদীপদীপ্তিরহম্৷৷1.111৷৷

একোহমেতদীদৃশমেবমিতিস্ফুরিতভেদরহিতোহম্৷
এষ্টব্যোহমনীহৈরন্তঃ সুকৃতানুভূতিভূতোহম্৷৷1.112৷৷

ঐক্যাবভাসকোহং বাক্যপরিজ্ঞানপাবনমতীনাম্৷
ঐশমহমেব তত্ত্বং নৈশতমঃপ্রাযমোহমিহিরোহম্৷৷1.113৷৷

ওজোহমোষধীনামোতপ্রোতাযমানভুবনোহম্৷
ওংকারসারসোল্লসদাত্মসুখামোদমত্তভৃঙ্গোহম্৷৷1.114৷৷

ঔষধমহমশুভানামৌপাধিকধর্মজালরহিতোহম্৷
ঔদার্যাতিশযোহং বিবিধচতুর্বর্গবিতরণপরোহম্৷৷1.115৷৷

অঙ্কুশমহমখিলানাং মহত্তযা মত্তবারণেন্দ্রাণাম্৷
অম্বরমিব বিমলোহং শম্বররিপুজাতবিকৃতিরহিতোহম্৷৷1.116৷৷

অস্তবিকল্পমতীনামস্খলদুপদেশগম্যমানোহম্৷
অস্থিরসুখবিমুখোহং সুস্থিরসুখবোধসংপদুচিতোহম্৷৷1.117৷৷

করুণারসভরিতোহং কবলিতকমলাসনাদিলোকোহম্৷
কলুষাকৃতিবিধুরোহং কল্মষসুকৃতোপলেপরহিতোহম্৷৷1.118৷৷

খানামগোচরোহং খাতীতোহং খপুষ্পভবগোহম্৷
খলজনদুরাসদোহং খণ্ডজ্ঞানাপনোদনপরোহম্৷৷1.119৷৷

গলিতদ্বৈতকথোহং দেহীভবদখিলমূলহৃদযোহম্৷
গন্তব্যোহমনীহৈর্গত্যাগতিরহিতপূর্ণবোধোহম্৷৷1.120৷৷

ঘনতরবিমোহতিমিরপ্রকরপ্রধ্বংসভানুনিকরোহম্৷
ঘটিকাবাসররজনীবত্সরযুগকল্পকালভেদোহম্৷৷1.121৷৷

চরদচরদাত্মকোহং চতুরমতিশ্লাঘনীযচরিতোহম্৷
চপলজনদুর্গমোহং চঞ্চলভবজলধিপারদেশোহম্৷৷1.122৷৷

ছন্দঃসিন্ধুনিগূঢজ্ঞানসুখাস্বাদমোদমানোহম্৷
ছলপদবিহিতমতীনাং ছন্নোহং শান্তিমার্গগম্যোহম্৷৷1.123৷৷

জলজাসনাদিগোচরপঞ্চমহাভূতমূলভূতোহম্৷
জগদানন্দকরোহং জন্মজরামরণরোগরহিতোহম্৷৷1.124৷৷

ঝংকৃতিহুংকৃতিশিঞ্জিতবৃংহিতমুখবিবিধনাদভেদোহম্৷
ঝটিতিঘটিতাত্মবেদনদীপপরিস্ফুরিতহৃদযভবনোহম্৷৷1.125৷৷

জ্ঞানমহং জ্ঞেযমহং জ্ঞাতাহং জ্ঞানসাধনগণোহম্৷
জ্ঞাতৃজ্ঞানজ্ঞেযবিনাকৃতমস্তিত্বমাত্রমেবাহম্৷৷1.126৷৷

তত্ত্বাতীতপদোহং তনুরহমস্মীতি ভাবরহিতোহম্৷
তামসদুরধিগমোহং তত্ত্বংপদবোধবোধ্যহৃদযোহম্৷৷1.127৷৷

দৈবতদৈত্যনিশাচরমানবতির্যঙ্মহীধরাদিরহম্৷
দেহেন্দ্রিযরহিতোহং দক্ষিণপূর্বাদিদিগ্বিভাগোহম্৷৷1.128৷৷

ধর্মাধর্মমযোহং ধর্মাধর্মাদিবন্ধরহিতোহম্৷
ধার্মিকজনসুলভোহং ধন্যোহং ধাতুরাদিভূতোহম্৷৷1.129৷৷

নামাদিবিরহিতোহং নরকস্বর্গাপবর্গরহিতোহম্৷
নাদান্তবেদিতোহং নানাবিধনিখিলনিগমসারোহম্৷৷1.130৷৷

পরজীবভেদবাধকপরমার্থজ্ঞানশুদ্ধচিত্তোহম্৷
প্রকৃতিরহং বিকৃতিরহং পরিণতিরহমস্মি ভাগধেযানাম্৷৷1.131৷৷

ফণধরভূধরবারণবিগ্রহবিধৃতপ্রপঞ্চসারোহম্৷
ফালতলোদিতলোচনপাবকপরিভূতপঞ্চবাণোহম্৷৷1.132৷৷

বদ্ধো ভবামি নাহং বন্ধান্মুক্তস্তথাপি নৈবাহম্৷
বোধ্যো ভবামি নাহং বোধোহং নৈব বোধকো নাহম্৷৷1.133৷৷

ভক্তিরহং ভজনমহং ভুক্তিরহং ভুক্তিমুক্তিরহমেব৷
ভূতানুশাসনোহং ভূতভবদ্ভব্যমূলভূতোহম্৷৷1.134৷৷

মান্যোহমস্মি মহতাং মন্দমতীনামমাননীযোহম্৷
মদরাগমানমোহিতমানসদুর্বাসনাদুরাপোহম্৷৷1.135৷৷

যজনযজমানযাজকযাগমযোহং যমাদিরহিতোহম্৷
যমবরুণযক্ষবাসবরাক্ষসমরুদীশবহ্নিরূপোহম্৷৷1.136৷৷

রক্ষাবিধানশিক্ষাবীক্ষিতলীলাবলোকমহিমাহম্৷
রজনীদিবসবিরামস্ফুরদনুভূতিপ্রমাণসিদ্ধোহম্৷৷1.137৷৷

লক্ষণলক্ষ্যমযোহং লাক্ষণিকোহং লযাদিরহিতোহম্৷
লাভালাভমযোহং লব্ধব্যানামলভ্যমানোহম্৷৷1.138৷৷

বর্ণাশ্রমরহিতোহং বর্ণমযোহং বরেণ্যগণ্যোহম্৷
বাচামগোচরোহং বচসামর্থেন গম্যমানোহম্৷৷1.139৷৷

শমদমবিরহিতমনসাং শাস্ত্রশতৈরপ্যগম্যমানোহম্৷
শরণমহমেব বিদুষাং শকলীকৃতবিবিধসংশযগণোহম্৷৷1.140৷৷

ষড্ভাববিরহিতোহং ষড্গুণরহিতোহমহিতরহিতোহম্৷
ষট্কোশবিরহিতোহং ষট্ত্রিশত্তত্ত্বজালরহিতোহম্৷৷1.141৷৷

সংবিত্সুখাত্মকোহং সমাধিসংকল্পকল্পবৃক্ষোহম্৷
সংসারবিরহিতোহং সাক্ষাত্কারোহমাত্মবিদ্যাযাঃ৷৷1.142৷৷

হব্যমহং কব্যমহং হেযোপাদেযভাবশূন্যোহম্৷
হরিরহমস্মি হরোহং বিধিরহমেবাস্মি কারণং তেষাম্৷৷1.143৷৷

ক্ষালিতকলুষভযোহং ক্ষপিতভবক্লেশজালহৃদযোহম্৷
ক্ষান্তাদ্যক্ষরসুঘটিতবিবিধব্যবহারমূলমহমেব৷৷1.144৷৷

বহুভিঃ কিমেভিরুক্তৈরহমেবেদং চরাচরং বিশ্বম্৷
শীকরফেনতরঙ্গাঃ সিন্ধোরপরাণি ন খলু বস্তূনি৷৷1.145৷৷

শরণং ন ভবতি জননী ন পিতা ন সুতা ন সোদরা নান্যে৷
পরমং শরণমিদং স্যাচ্চরণং মম মূর্ধ্নি দেশিকন্যস্তম্৷৷1.146৷৷

আস্তে দেশিকচরণং নিরবধিরাস্তে তদীক্ষণে করুণা৷
আস্তে কিমপি তদুক্তং কিমতঃ পরমস্তি জন্মসাফল্যম্৷৷1.147৷৷

কারুণ্যসারসান্দ্রাঃ কাঙ্ক্ষিতবরদানকল্পকবিশেষাঃ৷
শ্রীগুরুচরণকটাক্ষাঃ শিশিরাঃ শমযন্তি চিত্তসংতাপম্৷৷1.148৷৷

কবলিতচঞ্চলচেতোগুরুতরমণ্ডূকজাতপরিতোষা৷
শেতে হৃদযগুহাযাং চিরতরমেকৈব চিন্মযী ভুজগী৷৷1.149৷৷

মযি সুখবোধপযোধৌ মহতি ব্রহ্মাণ্ডবুদ্বুদসহস্রম্৷
মাযামযেন মরুতা ভূত্বা ভূত্বা পুনস্তিরোধত্তে৷৷1.150৷৷

গুরুকরুণযৈব নাবা প্রাক্তনভাগ্যানুকূলমারুতযা৷
দুঃসহদুঃখতরঙ্গৈস্তুঙ্গঃ সংসারসাগরস্তীর্ণঃ৷৷1.151৷৷

সতি তমসি মোহরূপে বিশ্বমপশ্যং তদেতদিত্যখিলম্৷
উদিতবতি বোধভানৌ কিমপি ন পশ্যামি কিং ন্বিদং চিত্রম্৷৷1.152৷৷

ইত্যাত্মবোধলাভং মুহুরনুচিন্ত্যং প্রমোদমানেন৷
প্রারব্ধকর্মণোন্তে পরং পদং প্রাপ্যতে হি কৈবল্যম্৷৷1.153৷৷

মোহান্ধকারহরণং সংসারোদ্বেলসাগরোত্তরণম্৷
স্বাত্মনিরূপণমেতত্প্রকরণমন্তর্বিচিন্ত্যতাং সদ্ভিঃ৷৷1.154৷৷


ইতি শ্রীমত্পরমহংসপরিব্রাজকাচার্যস্য

শ্রীগোবিন্দভগবত্পূজ্যপাদশিষ্যস্য

শ্রীমচ্ছংকরভগবতঃ কৃতৌ

স্বাত্মনিরূপণং সংপূর্ণম্৷৷