अद्राक्षमक्षीणदयानिधान

माचार्यमाद्यं वटमूलभागे।

मौनेन मन्दस्मितभूषितेन
महर्षिलोकस्य तमो नुदन्तम्।।2।।

अपारकारुण्यसुधातरङ्गै

रपाङ्गपातैरवलोकयन्तम्।

कठोरसंसारनिदाघतप्ता
न्मुनीनहं नौमि गुरुं गुरूणाम्।।4।।

कलाभिरिन्दोरिव कल्पिताङ्गं

मुक्ताकलापैरिव बद्धमूर्तिम्।

आलोकये देशिकमप्रमेय
मनाद्यविद्यातिमिरप्रभातम्।।6।।

युवापि यः सन्नुपदेष्टुमीष्टे।
प्रणौमि तं प्राक्तनपुण्यजालै
राचार्यमाश्चर्यगुणाधिवासम्।।8।।

आलेपवन्तं मदनाङ्गभूत्या

शार्दूलकृत्त्या परिधानवन्तम्।

आलोकये कंचन देशिकेन्द्र
मज्ञानवाराकरबाडबाग्निम्।।10।।

उपासते यं मुनयः शुकाद्या

निराशिषो निर्ममताधिवासाः।

तं दक्षिणामूर्तितनुं महेश
मुपास्महे मोहमहार्तिशान्त्यै।।12।।

अगौरनेत्रैरललाटनेत्रै

रशान्तवेषैरभुजंगभूषैः।

अबोधमुद्रैरनपास्तनिद्रै
रपूरकामैरमरैरलं नः।।14।।

मुदिताय मुग्धशशिनावतंसिने

भसितावलेपरमणीयमूर्तये।

जगदिन्द्रजालरचनापटीयसे
महसे नमोऽस्तु वटमूलवासिने।।16।।

उपासकानां त्वमुमासहायः

पूर्णेन्दुभावं प्रकटीकरोषि।

यदद्य ते दर्शनमात्रतो मे
द्रवत्यहो मानसचन्द्रकान्तः।।18।।