వ్యాప్తం హాటకవిగ్రహైర్జలచరైరారూఢదేవవ్రజైః

పోతైరాకులితాన్తరం మణిధరైర్భూమీధరైర్భూషితమ్.

ఆరక్తామృతసిన్ధుముద్ధురచలద్వీచీచయవ్యాకుల-
వ్యోమానం పరిచిన్త్య సంతతమహో చేతః కృతార్థీభవ৷৷2৷৷

జాతీచమ్పకపాటలాదిసుమనఃసౌరభ్యసంభావితం

హ్రీంకారధ్వనికణ్ఠకోకిలకుహూప్రోల్లాసిచూతద్రుమమ్.

ఆవిర్భూతసుగన్ధిచన్దనవనం దృష్టిప్రియం నన్దనం
చఞ్చచ్చఞ్చలచఞ్చరీకచటులం చేతశ్ిచరం చిన్తయ৷৷4৷৷

రమ్యద్వారపురప్రచారతమసాం సంహారకారిప్రభ

స్ఫూర్జత్తోరణభారహారకమహావిస్తారహారద్యుతే.

క్షోణీమణ్డలహేమహారవిలసత్సంసారపారప్రద
ప్రోద్యద్భక్తమనోవిహార కనకప్రాకార తుభ్యం నమః৷৷6৷৷

క్వాపి ప్రోద్భటపద్మరాగకిరణవ్రాతేన సంధ్యాయితం

కుత్రాపి స్ఫుటవిస్ఫురన్మరకతద్యుత్యా తమిస్రాయితమ్.

మధ్యాలమ్బివిశాలమౌక్తికరుచా జ్యోత్స్నాయితం కుత్రచి-
న్మాతః శ్రీమణిమన్దిరం తవ సదా వన్దామహే సున్దరమ్৷৷8৷৷

మణిసదనసముద్యత్కాన్తిధారానురక్తే

వియతి చరమసంధ్యాశఙ్కినో భానురథ్యాః.

శిథిలితగతకుప్యత్సూతహుంకారనాదైః
కథమపి మణిగేహాదుచ్చకైరుచ్చలన్తి৷৷10৷৷

విదూరముక్తవాహనైర్వినమ్రమౌలిమణ్డలై-

ర్నిబద్ధహస్తసంపుటైః ప్రయత్నసంయతేన్ద్రియైః.

విరిఞ్చివిష్ణుశంకరాదిభిర్ముదా తవామ్బికే
ప్రతీక్ష్యమాణనిర్గమో విభాతి రత్నమణ్డపః৷৷12৷৷

ప్రవేశనిర్గమాకులైః స్వకృత్యరక్తమానసై-

ర్బహిఃస్థితామరావలీవిధీయమానభక్తిభిః.

విచిత్రవస్త్రభూషణైరుపేతమఙ్గనాజనైః
సదా కరోతు మఙ్గలం మమేహ రత్నమణ్డపః৷৷14৷৷

ఇన్ద్రాదీంశ్చ దిగీశ్వరాన్సహపరీవారానథో సాయుధా-

న్యోషిద్రూపధరాన్స్వదిక్షు నిహితాన్సంచిన్త్య హృత్పఙ్కజే.

శఙ్ఖే శ్రీవసుధారయా వసుమతీయుక్తం చ పద్మం స్మర-
న్కామం నౌమి రతిప్రియం సహచరం ప్రీత్యా వసన్తం భజే৷৷16৷৷

కస్తూరికాశ్యామలకోమలాఙ్గీం

కాదమ్బరీపానమదాలసాఙ్గీమ్.

వామస్తనాలిఙ్గితరత్నవీణాం
మాతఙ్గకన్యాం మనసా స్మరామి৷৷18৷৷

ప్రమత్తవారుణీరసైర్విఘూర్ణమానలోచనాః

ప్రచణ్డదైత్యసూదనాః ప్రవిష్టభక్తమానసాః.

ఉపోఢకజ్జలచ్ఛవిచ్ఛటావిరాజివిగ్రహాః
కపాలశూలధారిణీః స్తువే త్వదీయదూతికాః৷৷20৷৷

ఆస్తీర్ణారుణకమ్బలాసనయుతం పుష్పోపహారాన్వితం

దీప్తానేకమణిప్రదీపసుభగం రాజద్వితానోత్తమమ్.

ధూపోద్గారిసుగన్ధిసంభ్రమమిలద్భృఙ్గావలీగుఞ్జితం
కల్యాణం వితనోతు మేనవరతం శ్రీమణ్డపాభ్యన్తరమ్৷৷22৷৷

సర్వాఙ్గస్థితిరమ్యరూపరుచిరాం ప్రాతః సమభ్యుత్థితాం

జృమ్భామఞ్జుముఖామ్బుజాం మధుమదవ్యాఘూర్ణదక్షిత్రయామ్.

సేవాయాతసమస్తసంనిధిసఖీః సంమానయన్తీం దృశా
సంపశ్యన్పరదేవతాం పరమహో మన్యే కృతార్థం జనుః৷৷24৷৷

పాద్యం తే పరికల్పయామి పదయోరర్ఘ్యం తథా హస్తయోః

సౌధీభిర్మధుపర్కమమ్బ మధురం ధారాభిరాస్వాదయ.

తోయేనాచమనం విధేహి శుచినా గాఙ్గేన మత్కల్పితం
సాష్టాఙ్గం ప్రణిపాతమీశదయితే దృష్ట్యా కృతార్థీ కురు৷৷26৷৷

నిధేహి మణిపాదుకోపరి పదామ్బుజం మజ్జనా-

లయం వ్రజ శనైః సఖీకృతకరామ్బుజాలమ్బనమ్.

మహేశి కరుణానిధే తవ దృగన్తపాతోత్సుకా-
న్విలోకయ మనాగమూనుభయసంస్థితాన్దైవతాన్৷৷28৷৷

కనకకలశజాలస్ఫాటికస్నానపీఠా-

ద్యుపకరణవిశాలం గన్ధమత్తాలిమాలమ్.

స్ఫురదరుణవితానం మఞ్జుగన్ధర్వగానం
పరమశివమహేలే మజ్జనాగారమేహి৷৷30৷৷

తత్ర స్ఫాటికపీఠమేత్య శనకైరుత్తారితాలంకృతి-

ర్నీచైరుజ్ఝితకఞ్చుకోపరిహితారక్తోత్తరీయామ్బరా.

వేణీబన్ధమపాస్య కఙ్కతికయా కేశప్రసాదం మనా-
క్కుర్వాణా పరదేవతా భగవతీ చిత్తే మమ ద్యోతతామ్৷৷32৷৷

కృతపరికరబన్ధాస్తుఙ్గపీనస్తనాఢ్యా

మణినివహనిబద్ధా హేమకుమ్భీర్దధానాః.

సురభిసలిలనిర్యద్గన్ధలుబ్ధాలిమాలాః
సవినయముపతస్థుః సర్వతః స్నానదాస్యః৷৷34৷৷

ప్రత్యఙ్గం పరిమార్జయామి శుచినా వస్త్రేణ సంప్రో్ఛనం

కుర్వే కేశకలాపమాయతతరం ధూపోత్తమైర్ధూపితమ్.

ఆలీబృన్దవినిర్మితాం యవనికామాస్థాప్య రత్నప్రభం
భక్తత్రాణపరే మహేశగృహిణి స్నానామ్బరం ముచ్యతామ్৷৷36৷৷

విలులితచికురేణ చ్ఛాదితాంసప్రదేశే

మణినికరవిరాజత్పాదుకాన్యస్తపాదే.

సులలితమవలమ్బ్య ద్రాక్సఖీమంసదేశే
గిరిశగృహిణి భూషామణ్టపాయ ప్రయాహి৷৷38৷৷

స్నిగ్ధం కఙ్కతికాముఖేన శనకైః సంశోధ్య కేశోత్కరం

సీమన్తం విరచయ్య చారూ విమలం సిన్దూరరేఖాన్వితమ్.

ముక్తాభిర్గ్రథితాలకాం మణిచితైః సౌవర్ణసూత్రైః స్ఫుటం
ప్రాన్తే మౌక్తికగుచ్ఛకోపలతికాం గ్రథ్నామి వేణీమిమామ్৷৷40৷৷

త్వామాశ్రయద్భిః కబరీతమిస్రై-

ర్బన్దీకృతం ద్రాగివ భానుబిమ్బమ్.

మడాని చూడామణిమాదధానం
వన్దామహే తావకముత్తమాఙ్గమ్৷৷42৷৷

మీనామ్భోరుహఖఞ్జరీటసుషమావిస్తారవిస్మారకే

కుర్వాణే కిల కామవైరిమనసః కందర్పబాణప్రభామ్.

మాధ్వీపానమదారుణేతిచపలే దీర్ఘే దృగమ్భోరుహే
దేవి స్వర్ణశలాకయోర్జితమిదం దివ్యాఞ్జనం దీయతామ్৷৷44৷৷

ఉడుకృతపరివేషస్పర్ధయా శీతభానో-

రివ విరచితదేహద్వన్ద్వమాదిత్యబిమ్బమ్.

అరుణమణిసముద్యత్ప్రాన్తవిభ్రాజిముక్తం
శ్రవసి పరినిధేహి స్వర్ణతాటఙ్కయుగ్మమ్৷৷46৷৷

నానాదేశసముత్థితైర్మణిగణప్రోద్యత్ప్రభామణ్డల-

వ్యాప్తైరాభరణైర్విరాజితగలాం ముక్తాచ్ఛటాలంకృతామ్.

మధ్యస్థారుణరత్నకాన్తిరుచిరాం ప్రాన్తస్థముక్తాఫల-
వ్రాతామమ్బ చతుష్కికాం పరశివే వక్షఃస్థలే స్థాపయ৷৷48৷৷

కరసరసిజనాలే విస్ఫురత్కాన్తిజాలే

విలసదమలశోభే చఞ్చదీశాక్షిలోభే.

వివిధమణిమయూఖోద్భాసితం దేవి దుర్గే
కనకకటకయుగ్మం బాహుయుగ్మే నిధేహి৷৷50৷৷

వితతనిజమయూఖైర్నిర్మితామిన్ద్రనీలై-

ర్విజితకమలనాలాలీనమత్తాలిమాలామ్.

మణిగణఖచితాభ్యాం కఙ్కణాభ్యాముపేతాం
కలయ వలయరాజీం హస్తమూలే మహేశి৷৷52৷৷

ఆలవాలమివ పుష్పధన్వనా

బాలవిద్రుమలతాసు నిర్మితమ్.

అఙ్గులీషు వినిధీయతాం శనై-
రఙ్గులీయకమిదం మదర్పితమ్৷৷54৷৷

వ్యాలమ్బమానవరమౌక్తికగుచ్ఛశోభి

విభ్రాజిహాటకపుటద్వయరోచమానమ్.

హేమ్నా వినిర్మితమనేకమణిప్రబన్ధం
నీవీనిబన్ధనగుణం వినివేదయామి৷৷56৷৷

నిబద్ధశితిపట్టకప్రవరగుచ్ఛసంశోభితాం

కలక్వణితమఞ్జులాం గిరిశచిత్తసంమోహనీమ్.

అమన్దమణిమణ్డలీవిమలకాన్తికిమ్మీరితాం
నిధేహి పదపఙ్కజే కనకఘుఙ్ఘురూమమ్బికే৷৷58৷৷

పదామ్బుజముపాసితుం పరిగతేన శీతాంశునా

కృతాం తనుపరమ్పరామివ దినాన్తరాగారుణామ్.

మహేశి నవయావకద్రవభరేణ శోణీకృతాం
నమామి నఖమణ్డలీం చరణపఙ్కజస్థాం తవ৷৷60৷৷

గృహాణ పరమామృతం కనకపాత్రసంస్థాపితం

సమర్పయ ముఖామ్బుజే విమలవీటికామమ్బికే.

విలోకయ ముఖామ్బుజం ముకురమణ్డలే నిర్మలే
నిధేహి మణిపాదుకోపరి పదామ్బుజం సున్దరి৷৷62৷৷

చలన్త్యామమ్బాయాం ప్రచలతి సమస్తే పరిజనే

సవేగం సంయాతే కనకలతికాలంకృతిభరే.

సమన్తాదుత్తాలస్ఫురితపదసంపాతజనితై-
ర్ఝణత్కారైస్తారైర్ఝణఝణితమాసీన్మణిగృహమ్৷৷64৷৷

వేధాః పాదతలే పతయయమసౌ విష్ణుర్నమత్యగ్రతః

శంభుర్దేహి దృగఞ్చలం సురపతిం దూరస్థమాలోకయ.

ఇత్యేవం పరిచారికాభిరుదితే సంమాననాం కుర్వతీ
దృగ్ద్వన్ద్వేన యథోచితం భగవతీ భూయాద్విభూత్యై మమ৷৷66৷৷

అగ్రే కేచన పాశ్ర్వయోః కతిపయే పృష్ఠే పరే ప్రస్థితా

ఆకాశే సమవస్థితాః కతిపయే దిక్షు స్థితాశ్చాపరే.

సంమర్దం శనకైరపాస్య పురతో దణ్డప్రణామాన్ముహుః
కుర్వాణాః కతిచిత్సురా గిరిసుతే దృక్పాతమిచ్ఛన్తి తే৷৷68৷৷

కస్మైచిత్సుచిరాదుపాసితమహామన్త్రౌఘసిద్ధిం క్రమా-

దేకస్మై భవనిఃస్పృహాయ పరమానన్దస్వరూపాం గతిమ్.

అన్యస్మై విషయానురక్తమనసే దీనాయ దుఃఖాపహం
ద్రవ్యం ద్వారసమాశ్రితాయ దదతీం వన్దామహే సున్దరీమ్৷৷70৷৷

తవ దహనసదృక్షైరీక్షణైరేవ చక్షు-

ర్నిఖిలపశుజనానాం భీషయద్భీషణాస్యమ్.

కృతవసతి పరేశప్రేయసి ద్వారి నిత్యం
శరభమిథునముచ్చైర్భక్తియుక్తో నతోస్మి৷৷72৷৷

స్వస్థానస్థితదేవతాగణవృతే బిన్దౌ ముదా స్థాపితం

నానారత్నవిరాజిహేమవిలసత్కాన్తిచ్ఛటాదుర్దినమ్.

చఞ్చత్కౌసుమతూలికాసనయుతం కామేశ్వరాధిష్ఠితం
నిత్యానన్దనిదానమమ్బ సతతం వన్దే చ సింహాసనమ్৷৷74৷৷

కర్పూరాదికవస్తుజాతమఖిలం సౌవర్ణభృఙ్గారకం

తామ్బూలస్య కరణ్డకం మణిమయం చైలాఞ్చలం దర్పణమ్.

విస్ఫూర్జన్మణిపాదుకే చ దధతీః సింహాసనస్యాభిత-
స్తిష్ఠన్తీః పరిచారికాస్తవ సదా వన్దామహే సున్దరి৷৷76৷৷

ప్రాన్తస్ఫురద్విమలమౌక్తికగుచ్ఛజాలం

చఞ్చన్మహామణివిచిత్రితహేమదణ్డమ్.

ఉద్యత్సహస్రకరమణ్డలచారు హేమ-
చ్ఛత్రం మహేశమహిలే వినివేశయామి৷৷78৷৷

సంతుష్టాం పరమామృతేన విలసత్కామేశ్వరాఙ్కస్థితాం

పుష్పౌఘైరభిపూజితాం భగవతీం త్వాం వన్దమానా ముదా.

స్ఫూర్జత్తావకదేహరశ్మికలనాప్రాప్తస్వరూపాభిదాః
శ్రీచక్రావరణస్థితాః సవినయం వన్దామహే దేవతాః৷৷80

త్రిపురాసుధార్ణవాసన-

మారభ్య త్రిపురమాలినీ యావత్.

ఆవరణాష్టకసంస్థిత-
మాసనషట్కం నమామి పరమేశి৷৷82৷৷

ఉడ్యానజాలంధరకామరూప-

పీఠానిమాన్పూర్ణగిరిప్రసక్తాన్.

త్రికోణదక్షాగ్రిమసవ్యభాగ-
మధ్యస్థితాన్సిద్ధికరాన్నమామి৷৷84৷৷

తారానాథకలాప్రవేశనిగమవ్యాజాద్గతాసుప్రథం

త్రైలోక్యే తిథిషు ప్రవర్తితకలాకాష్ఠాదికాలక్రమమ్.

రత్నాలంకృతిచిత్రవస్త్రలలితం కామేశ్వరీపూర్వకం
నిత్యాషోడశకం నమామి లసితం చక్రాత్మనోరన్తరే৷৷86৷৷

హృదయమథ శిరః శిఖాఖిలాద్యే

కవచమథో నయనత్రయం చ దేవి.

మునిజనపరిచిన్తితం తథాస్త్రం
స్ఫురతు సదా హృదయే షడఙ్గమేతత్৷৷88৷৷

సర్వాశాపరిపూరకే వసుదలద్వన్ద్వేన విభ్రాజితే

విస్ఫూర్జన్త్రిపురేశ్వరీనివసతౌ చక్రే స్థితా నిత్యశః.

కామాకర్షణికాదయో మణిగణభ్రాజిష్ణుదివ్యామ్బరా
యోగిన్యః ప్రదిశన్తు కాఙ్క్షితఫలం విఖ్యాతగుప్తాభిధాః৷৷90৷৷

లసద్యుగదృశారకే స్ఫురతి సర్వసౌభాగ్యదే

శుభాభరణభూషితత్రిపురవాసినీమన్దిరే.

స్థితా దధతు మఙ్గలం సుభగసర్వసంక్షోభిణీ-
ముఖాః సకలసిద్ధయో విదితసంప్రదాయాభిధాః৷৷92৷৷

అన్తఃశోభిదశారకేతిలలితే సర్వాదిరక్షాకరే

మాలిన్యా త్రిపురాద్యయా విరచితావాసే స్థితం నిత్యశః.

నానారత్నవిభూషణం మణిగణభ్రాజిష్ణు దివ్యామ్బరం
సర్వజ్ఞాదికశక్తిబృన్దమనిశం వన్దే నిగర్భాభిధమ్৷৷94৷৷

చూతాశోకవికాసికేతకరజః ప్రోద్భాసినీలామ్బుజ-

ప్రస్ఫూర్జన్నవమల్లికాసముదితైః పుష్పైః శరాన్ినర్మితాన్.

రమ్యం పుష్పశరాసనం సులలితం పాశం తథా చాఙ్కుశం
వన్దే తావకమాయుధం పరశివే చక్రాన్తరాలే స్థితమ్৷৷96৷৷

సర్వానన్దమయే సమస్తజగతామాకాఙ్క్షితే బైన్దవే

భైరవ్యా త్రిపురాద్యయా విరచితావాసే స్థితా సున్దరీ.

ఆనన్దోల్లసితేక్షణా మణిగణభ్రాజిష్ణుభూషామ్బరా
విస్ఫూర్జద్వదనా పరాపరరహః సా పాతు మాం యోగినీ৷৷98৷৷

వైరముద్ధతమపాస్య శంభునా

మస్తకే వినిహితం కలాచ్ఛలాత్.

గన్ధలుబ్ధమధుపాశ్రితం సదా
కేతకీకుసుమమర్పయామి తే৷৷100৷৷

అగరుబహలధూపాజస్రసౌరభ్యరమ్యాం

మరకతమణిరాజీరాజిహారిస్నభామ్.

దిశి విదిశి విసర్పద్గన్ధలుబ్ధాలిమాలాం
వకులకుసుమమాలాం కణ్ఠపీఠేర్పయామి৷৷102৷৷

ధూపం తేగరుసంభవం భగవతి ప్రోల్లాసిగన్ధోద్ధురం

దీపం చైవ నివేదయామి మహసా హార్దాన్ధకారచ్ఛిదమ్.

రత్నస్వర్ణవినిర్మితేషు పరితః పాత్రేషు సంస్థాపితం
నైవేద్యం వినివేదయామి పరమానన్దాత్మికే సున్దరి৷৷104৷৷

శిమ్బీసూరణశాకబిమ్బబృహతీకూశ్మాణ్డకోశాతకీ-

వృన్తాకాని పటోలకాని మృదునా సంసాధితాన్యగ్నినా.

సంపన్నాని చ వేసవారవిసరైర్దివ్యాని భక్త్యా కృతా-
న్యగ్రే తే వినివేదయామి గిరిజే సౌవర్ణపాత్రవ్రజే৷৷106৷৷

సితయాఞ్చితలడ్డుకవ్రజా-

న్మృదుపూపాన్మృదులాశ్చ పూరికాః.

పరమాన్నమిదం చ పార్వతి
ప్రణయేన ప్రతిపాదయామి తే৷৷108৷৷

అగ్రే తే వినివేద్య సర్వమమితం నైవేద్యమఙ్గీకృతం

జ్ఞాత్వా తత్త్వచతుష్టయం ప్రథమతో మన్యే సుతృప్తాం తతః.

దేవీం త్వాం పరిశిష్టమమ్బ కనకామత్రేషు సంస్థాపితం
శక్తిభ్యః సముపాహారామి సకలం దేవేశి శంభుప్రియే৷৷110৷৷

పఙ్క్త్యోపవిష్టాన్పరితస్తు చక్రం

శక్త్యా స్వయాలిఙ్కితవామభాగాన్.

సర్వోపచారైః పరిపూజ్య భక్త్యా
తవామ్బికే పారిషదాన్నమామి৷৷112৷৷

దృశ్యతే తవ ముఖామ్బుజం శివే

శ్రూయతే స్ఫుటమనాహతధ్వనిః.

అర్చనే తవ గిరామగోచరే
న ప్రయాతి విషయాన్తరం మనః৷৷114৷৷

చక్షుః పశ్యతు నేహ కించన పరం ఘ్రాణం న వా జిఘ్రతు

శ్రోత్రం హన్త శ్రృణోతు న త్వగపి న స్పర్శం సమాలమ్బతామ్.

జిహ్వా వేత్తు న వా రసం మమ పరం యుష్మత్స్వరూపామృతే
నిత్యానన్దవిఘూర్ణమాననయనే నిత్యం మనో మజ్జతు৷৷116৷৷

గణాధినాథం వటుకం చ యోగినీః

క్షేత్రాధినాథం చ విదిక్చతుష్టయే.

సర్వోపచారైః పరిపూజ్య భక్తితో
నివేదయామో బలిముక్తయుక్తిభిః৷৷118৷৷

తామ్బూలం వినివేదయామి విలసత్కర్పూరకస్తూరికా-

జాతీపూగలవఙ్గచూర్ణఖదిరైర్భక్త్యా సముల్లాసితమ్.

స్ఫూర్జద్రత్నసముద్గకప్రణిహితం సౌవర్ణపాత్రే స్థితై-
ర్దీపైరుజ్జ్వలమన్నచూర్ణరచితైరారార్తికం గృహ్యతామ్৷৷120৷৷

తామ్బూలోద్భాసివక్త్రైస్త్వదమలవదనాలోకనోల్లాసినేత్రై-

శ్చక్రస్థైః శక్తిసంఘైః పరిహృతవిషయాసఙ్గమాకర్ణ్యమానమ్.

గీతజ్ఞాభిః ప్రకామం మధురసమధురం వాదితం కింనరీభి-
ర్వీణాఝంకారనాదం కలయ పరశివానన్దసంధానహేతోః৷৷122৷৷

యథేప్సితమనోగతప్రకటితోపచారార్చితాం

నిజావరణదేవతాగణవృతాం సురేశస్థితామ్.

కృతాఞ్జలిపుటో ముహుః కలితభూమిరష్టాఙ్గకై-
ర్నమామి భగవత్యహం త్రిపురసున్దరి త్రాహి మామ్৷৷124৷৷

క్వాహం మన్దమతిః క్వ చేదమఖిలైరేకాన్తభక్తైః స్తుతం

ధ్యాతం దేవి తథాపి తే స్వమనసా శ్రీపాదుకాపూజనమ్.

కాదాచిత్కమదీయచిన్తనవిధౌ సంతుష్టయా శర్మదం
స్తోత్రం దేవతయా తయా ప్రకటితం మన్యే మదీయాననే৷৷126৷৷