ବ୍ଯାପ୍ତଂ ହାଟକବିଗ୍ରହୈର୍ଜଲଚରୈରାରୂଢଦେବବ୍ରଜୈଃ

ପୋତୈରାକୁଲିତାନ୍ତରଂ ମଣିଧରୈର୍ଭୂମୀଧରୈର୍ଭୂଷିତମ୍|

ଆରକ୍ତାମୃତସିନ୍ଧୁମୁଦ୍ଧୁରଚଲଦ୍ବୀଚୀଚଯବ୍ଯାକୁଲ-
ବ୍ଯୋମାନଂ ପରିଚିନ୍ତ୍ଯ ସଂତତମହୋ ଚେତଃ କୃତାର୍ଥୀଭବ||2||

ଜାତୀଚମ୍ପକପାଟଲାଦିସୁମନଃସୌରଭ୍ଯସଂଭାବିତଂ

ହ୍ରୀଂକାରଧ୍ବନିକଣ୍ଠକୋକିଲକୁହୂପ୍ରୋଲ୍ଲାସିଚୂତଦ୍ରୁମମ୍|

ଆବିର୍ଭୂତସୁଗନ୍ଧିଚନ୍ଦନବନଂ ଦୃଷ୍ଟିପ୍ରିଯଂ ନନ୍ଦନଂ
ଚଞ୍ଚଚ୍ଚଞ୍ଚଲଚଞ୍ଚରୀକଚଟୁଲଂ ଚେତଶ୍ିଚରଂ ଚିନ୍ତଯ||4||

ରମ୍ଯଦ୍ବାରପୁରପ୍ରଚାରତମସାଂ ସଂହାରକାରିପ୍ରଭ

ସ୍ଫୂର୍ଜତ୍ତୋରଣଭାରହାରକମହାବିସ୍ତାରହାରଦ୍ଯୁତେ|

କ୍ଷୋଣୀମଣ୍ଡଲହେମହାରବିଲସତ୍ସଂସାରପାରପ୍ରଦ
ପ୍ରୋଦ୍ଯଦ୍ଭକ୍ତମନୋବିହାର କନକପ୍ରାକାର ତୁଭ୍ଯଂ ନମଃ||6||

କ୍ବାପି ପ୍ରୋଦ୍ଭଟପଦ୍ମରାଗକିରଣବ୍ରାତେନ ସଂଧ୍ଯାଯିତଂ

କୁତ୍ରାପି ସ୍ଫୁଟବିସ୍ଫୁରନ୍ମରକତଦ୍ଯୁତ୍ଯା ତମିସ୍ରାଯିତମ୍|

ମଧ୍ଯାଲମ୍ବିବିଶାଲମୌକ୍ତିକରୁଚା ଜ୍ଯୋତ୍ସ୍ନାଯିତଂ କୁତ୍ରଚି-
ନ୍ମାତଃ ଶ୍ରୀମଣିମନ୍ଦିରଂ ତବ ସଦା ବନ୍ଦାମହେ ସୁନ୍ଦରମ୍||8||

ମଣିସଦନସମୁଦ୍ଯତ୍କାନ୍ତିଧାରାନୁରକ୍ତେ

ବିଯତି ଚରମସଂଧ୍ଯାଶଙ୍କିନୋ ଭାନୁରଥ୍ଯାଃ|

ଶିଥିଲିତଗତକୁପ୍ଯତ୍ସୂତହୁଂକାରନାଦୈଃ
କଥମପି ମଣିଗେହାଦୁଚ୍ଚକୈରୁଚ୍ଚଲନ୍ତି||10||

ବିଦୂରମୁକ୍ତବାହନୈର୍ବିନମ୍ରମୌଲିମଣ୍ଡଲୈ-

ର୍ନିବଦ୍ଧହସ୍ତସଂପୁଟୈଃ ପ୍ରଯତ୍ନସଂଯତେନ୍ଦ୍ରିଯୈଃ|

ବିରିଞ୍ଚିବିଷ୍ଣୁଶଂକରାଦିଭିର୍ମୁଦା ତବାମ୍ବିକେ
ପ୍ରତୀକ୍ଷ୍ଯମାଣନିର୍ଗମୋ ବିଭାତି ରତ୍ନମଣ୍ଡପଃ||12||

ପ୍ରବେଶନିର୍ଗମାକୁଲୈଃ ସ୍ବକୃତ୍ଯରକ୍ତମାନସୈ-

ର୍ବହିଃସ୍ଥିତାମରାବଲୀବିଧୀଯମାନଭକ୍ତିଭିଃ|

ବିଚିତ୍ରବସ୍ତ୍ରଭୂଷଣୈରୁପେତମଙ୍ଗନାଜନୈଃ
ସଦା କରୋତୁ ମଙ୍ଗଲଂ ମମେହ ରତ୍ନମଣ୍ଡପଃ||14||

ଇନ୍ଦ୍ରାଦୀଂଶ୍ଚ ଦିଗୀଶ୍ବରାନ୍ସହପରୀବାରାନଥୋ ସାଯୁଧା-

ନ୍ଯୋଷିଦ୍ରୂପଧରାନ୍ସ୍ବଦିକ୍ଷୁ ନିହିତାନ୍ସଂଚିନ୍ତ୍ଯ ହୃତ୍ପଙ୍କଜେ|

ଶଙ୍ଖେ ଶ୍ରୀବସୁଧାରଯା ବସୁମତୀଯୁକ୍ତଂ ଚ ପଦ୍ମଂ ସ୍ମର-
ନ୍କାମଂ ନୌମି ରତିପ୍ରିଯଂ ସହଚରଂ ପ୍ରୀତ୍ଯା ବସନ୍ତଂ ଭଜେ||16||

କସ୍ତୂରିକାଶ୍ଯାମଲକୋମଲାଙ୍ଗୀଂ

କାଦମ୍ବରୀପାନମଦାଲସାଙ୍ଗୀମ୍|

ବାମସ୍ତନାଲିଙ୍ଗିତରତ୍ନବୀଣାଂ
ମାତଙ୍ଗକନ୍ଯାଂ ମନସା ସ୍ମରାମି||18||

ପ୍ରମତ୍ତବାରୁଣୀରସୈର୍ବିଘୂର୍ଣମାନଲୋଚନାଃ

ପ୍ରଚଣ୍ଡଦୈତ୍ଯସୂଦନାଃ ପ୍ରବିଷ୍ଟଭକ୍ତମାନସାଃ|

ଉପୋଢକଜ୍ଜଲଚ୍ଛବିଚ୍ଛଟାବିରାଜିବିଗ୍ରହାଃ
କପାଲଶୂଲଧାରିଣୀଃ ସ୍ତୁବେ ତ୍ବଦୀଯଦୂତିକାଃ||20||

ଆସ୍ତୀର୍ଣାରୁଣକମ୍ବଲାସନଯୁତଂ ପୁଷ୍ପୋପହାରାନ୍ବିତଂ

ଦୀପ୍ତାନେକମଣିପ୍ରଦୀପସୁଭଗଂ ରାଜଦ୍ବିତାନୋତ୍ତମମ୍|

ଧୂପୋଦ୍ଗାରିସୁଗନ୍ଧିସଂଭ୍ରମମିଲଦ୍ଭୃଙ୍ଗାବଲୀଗୁଞ୍ଜିତଂ
କଲ୍ଯାଣଂ ବିତନୋତୁ ମେନବରତଂ ଶ୍ରୀମଣ୍ଡପାଭ୍ଯନ୍ତରମ୍||22||

ସର୍ବାଙ୍ଗସ୍ଥିତିରମ୍ଯରୂପରୁଚିରାଂ ପ୍ରାତଃ ସମଭ୍ଯୁତ୍ଥିତାଂ

ଜୃମ୍ଭାମଞ୍ଜୁମୁଖାମ୍ବୁଜାଂ ମଧୁମଦବ୍ଯାଘୂର୍ଣଦକ୍ଷିତ୍ରଯାମ୍|

ସେବାଯାତସମସ୍ତସଂନିଧିସଖୀଃ ସଂମାନଯନ୍ତୀଂ ଦୃଶା
ସଂପଶ୍ଯନ୍ପରଦେବତାଂ ପରମହୋ ମନ୍ଯେ କୃତାର୍ଥଂ ଜନୁଃ||24||

ପାଦ୍ଯଂ ତେ ପରିକଲ୍ପଯାମି ପଦଯୋରର୍ଘ୍ଯଂ ତଥା ହସ୍ତଯୋଃ

ସୌଧୀଭିର୍ମଧୁପର୍କମମ୍ବ ମଧୁରଂ ଧାରାଭିରାସ୍ବାଦଯ|

ତୋଯେନାଚମନଂ ବିଧେହି ଶୁଚିନା ଗାଙ୍ଗେନ ମତ୍କଲ୍ପିତଂ
ସାଷ୍ଟାଙ୍ଗଂ ପ୍ରଣିପାତମୀଶଦଯିତେ ଦୃଷ୍ଟ୍ଯା କୃତାର୍ଥୀ କୁରୁ||26||

ନିଧେହି ମଣିପାଦୁକୋପରି ପଦାମ୍ବୁଜଂ ମଜ୍ଜନା-

ଲଯଂ ବ୍ରଜ ଶନୈଃ ସଖୀକୃତକରାମ୍ବୁଜାଲମ୍ବନମ୍|

ମହେଶି କରୁଣାନିଧେ ତବ ଦୃଗନ୍ତପାତୋତ୍ସୁକା-
ନ୍ବିଲୋକଯ ମନାଗମୂନୁଭଯସଂସ୍ଥିତାନ୍ଦୈବତାନ୍||28||

କନକକଲଶଜାଲସ୍ଫାଟିକସ୍ନାନପୀଠା-

ଦ୍ଯୁପକରଣବିଶାଲଂ ଗନ୍ଧମତ୍ତାଲିମାଲମ୍|

ସ୍ଫୁରଦରୁଣବିତାନଂ ମଞ୍ଜୁଗନ୍ଧର୍ବଗାନଂ
ପରମଶିବମହେଲେ ମଜ୍ଜନାଗାରମେହି||30||

ତତ୍ର ସ୍ଫାଟିକପୀଠମେତ୍ଯ ଶନକୈରୁତ୍ତାରିତାଲଂକୃତି-

ର୍ନୀଚୈରୁଜ୍ଝିତକଞ୍ଚୁକୋପରିହିତାରକ୍ତୋତ୍ତରୀଯାମ୍ବରା|

ବେଣୀବନ୍ଧମପାସ୍ଯ କଙ୍କତିକଯା କେଶପ୍ରସାଦଂ ମନା-
କ୍କୁର୍ବାଣା ପରଦେବତା ଭଗବତୀ ଚିତ୍ତେ ମମ ଦ୍ଯୋତତାମ୍||32||

କୃତପରିକରବନ୍ଧାସ୍ତୁଙ୍ଗପୀନସ୍ତନାଢ୍ଯା

ମଣିନିବହନିବଦ୍ଧା ହେମକୁମ୍ଭୀର୍ଦଧାନାଃ|

ସୁରଭିସଲିଲନିର୍ଯଦ୍ଗନ୍ଧଲୁବ୍ଧାଲିମାଲାଃ
ସବିନଯମୁପତସ୍ଥୁଃ ସର୍ବତଃ ସ୍ନାନଦାସ୍ଯଃ||34||

ପ୍ରତ୍ଯଙ୍ଗଂ ପରିମାର୍ଜଯାମି ଶୁଚିନା ବସ୍ତ୍ରେଣ ସଂପ୍ରୋ଼ଞ୍ଛନଂ

କୁର୍ବେ କେଶକଲାପମାଯତତରଂ ଧୂପୋତ୍ତମୈର୍ଧୂପିତମ୍|

ଆଲୀବୃନ୍ଦବିନିର୍ମିତାଂ ଯବନିକାମାସ୍ଥାପ୍ଯ ରତ୍ନପ୍ରଭଂ
ଭକ୍ତତ୍ରାଣପରେ ମହେଶଗୃହିଣି ସ୍ନାନାମ୍ବରଂ ମୁଚ୍ଯତାମ୍||36||

ବିଲୁଲିତଚିକୁରେଣ ଚ୍ଛାଦିତାଂସପ୍ରଦେଶେ

ମଣିନିକରବିରାଜତ୍ପାଦୁକାନ୍ଯସ୍ତପାଦେ|

ସୁଲଲିତମବଲମ୍ବ୍ଯ ଦ୍ରାକ୍ସଖୀମଂସଦେଶେ
ଗିରିଶଗୃହିଣି ଭୂଷାମଣ୍ଟପାଯ ପ୍ରଯାହି||38||

ସ୍ନିଗ୍ଧଂ କଙ୍କତିକାମୁଖେନ ଶନକୈଃ ସଂଶୋଧ୍ଯ କେଶୋତ୍କରଂ

ସୀମନ୍ତଂ ବିରଚଯ୍ଯ ଚାରୂ ବିମଲଂ ସିନ୍ଦୂରରେଖାନ୍ବିତମ୍|

ମୁକ୍ତାଭିର୍ଗ୍ରଥିତାଲକାଂ ମଣିଚିତୈଃ ସୌବର୍ଣସୂତ୍ରୈଃ ସ୍ଫୁଟଂ
ପ୍ରାନ୍ତେ ମୌକ୍ତିକଗୁଚ୍ଛକୋପଲତିକାଂ ଗ୍ରଥ୍ନାମି ବେଣୀମିମାମ୍||40||

ତ୍ବାମାଶ୍ରଯଦ୍ଭିଃ କବରୀତମିସ୍ରୈ-

ର୍ବନ୍ଦୀକୃତଂ ଦ୍ରାଗିବ ଭାନୁବିମ୍ବମ୍|

ମ଼ୃଡାନି ଚୂଡାମଣିମାଦଧାନଂ
ବନ୍ଦାମହେ ତାବକମୁତ୍ତମାଙ୍ଗମ୍||42||

ମୀନାମ୍ଭୋରୁହଖଞ୍ଜରୀଟସୁଷମାବିସ୍ତାରବିସ୍ମାରକେ

କୁର୍ବାଣେ କିଲ କାମବୈରିମନସଃ କଂଦର୍ପବାଣପ୍ରଭାମ୍|

ମାଧ୍ବୀପାନମଦାରୁଣେତିଚପଲେ ଦୀର୍ଘେ ଦୃଗମ୍ଭୋରୁହେ
ଦେବି ସ୍ବର୍ଣଶଲାକଯୋର୍ଜିତମିଦଂ ଦିବ୍ଯାଞ୍ଜନଂ ଦୀଯତାମ୍||44||

ଉଡୁକୃତପରିବେଷସ୍ପର୍ଧଯା ଶୀତଭାନୋ-

ରିବ ବିରଚିତଦେହଦ୍ବନ୍ଦ୍ବମାଦିତ୍ଯବିମ୍ବମ୍|

ଅରୁଣମଣିସମୁଦ୍ଯତ୍ପ୍ରାନ୍ତବିଭ୍ରାଜିମୁକ୍ତଂ
ଶ୍ରବସି ପରିନିଧେହି ସ୍ବର୍ଣତାଟଙ୍କଯୁଗ୍ମମ୍||46||

ନାନାଦେଶସମୁତ୍ଥିତୈର୍ମଣିଗଣପ୍ରୋଦ୍ଯତ୍ପ୍ରଭାମଣ୍ଡଲ-

ବ୍ଯାପ୍ତୈରାଭରଣୈର୍ବିରାଜିତଗଲାଂ ମୁକ୍ତାଚ୍ଛଟାଲଂକୃତାମ୍|

ମଧ୍ଯସ୍ଥାରୁଣରତ୍ନକାନ୍ତିରୁଚିରାଂ ପ୍ରାନ୍ତସ୍ଥମୁକ୍ତାଫଲ-
ବ୍ରାତାମମ୍ବ ଚତୁଷ୍କିକାଂ ପରଶିବେ ବକ୍ଷଃସ୍ଥଲେ ସ୍ଥାପଯ||48||

କରସରସିଜନାଲେ ବିସ୍ଫୁରତ୍କାନ୍ତିଜାଲେ

ବିଲସଦମଲଶୋଭେ ଚଞ୍ଚଦୀଶାକ୍ଷିଲୋଭେ|

ବିବିଧମଣିମଯୂଖୋଦ୍ଭାସିତଂ ଦେବି ଦୁର୍ଗେ
କନକକଟକଯୁଗ୍ମଂ ବାହୁଯୁଗ୍ମେ ନିଧେହି||50||

ବିତତନିଜମଯୂଖୈର୍ନିର୍ମିତାମିନ୍ଦ୍ରନୀଲୈ-

ର୍ବିଜିତକମଲନାଲାଲୀନମତ୍ତାଲିମାଲାମ୍|

ମଣିଗଣଖଚିତାଭ୍ଯାଂ କଙ୍କଣାଭ୍ଯାମୁପେତାଂ
କଲଯ ବଲଯରାଜୀଂ ହସ୍ତମୂଲେ ମହେଶି||52||

ଆଲବାଲମିବ ପୁଷ୍ପଧନ୍ବନା

ବାଲବିଦ୍ରୁମଲତାସୁ ନିର୍ମିତମ୍|

ଅଙ୍ଗୁଲୀଷୁ ବିନିଧୀଯତାଂ ଶନୈ-
ରଙ୍ଗୁଲୀଯକମିଦଂ ମଦର୍ପିତମ୍||54||

ବ୍ଯାଲମ୍ବମାନବରମୌକ୍ତିକଗୁଚ୍ଛଶୋଭି

ବିଭ୍ରାଜିହାଟକପୁଟଦ୍ବଯରୋଚମାନମ୍|

ହେମ୍ନା ବିନିର୍ମିତମନେକମଣିପ୍ରବନ୍ଧଂ
ନୀବୀନିବନ୍ଧନଗୁଣଂ ବିନିବେଦଯାମି||56||

ନିବଦ୍ଧଶିତିପଟ୍ଟକପ୍ରବରଗୁଚ୍ଛସଂଶୋଭିତାଂ

କଲକ୍ବଣିତମଞ୍ଜୁଲାଂ ଗିରିଶଚିତ୍ତସଂମୋହନୀମ୍|

ଅମନ୍ଦମଣିମଣ୍ଡଲୀବିମଲକାନ୍ତିକିମ୍ମୀରିତାଂ
ନିଧେହି ପଦପଙ୍କଜେ କନକଘୁଙ୍ଘୁରୂମମ୍ବିକେ||58||

ପଦାମ୍ବୁଜମୁପାସିତୁଂ ପରିଗତେନ ଶୀତାଂଶୁନା

କୃତାଂ ତନୁପରମ୍ପରାମିବ ଦିନାନ୍ତରାଗାରୁଣାମ୍|

ମହେଶି ନବଯାବକଦ୍ରବଭରେଣ ଶୋଣୀକୃତାଂ
ନମାମି ନଖମଣ୍ଡଲୀଂ ଚରଣପଙ୍କଜସ୍ଥାଂ ତବ||60||

ଗୃହାଣ ପରମାମୃତଂ କନକପାତ୍ରସଂସ୍ଥାପିତଂ

ସମର୍ପଯ ମୁଖାମ୍ବୁଜେ ବିମଲବୀଟିକାମମ୍ବିକେ|

ବିଲୋକଯ ମୁଖାମ୍ବୁଜଂ ମୁକୁରମଣ୍ଡଲେ ନିର୍ମଲେ
ନିଧେହି ମଣିପାଦୁକୋପରି ପଦାମ୍ବୁଜଂ ସୁନ୍ଦରି||62||

ଚଲନ୍ତ୍ଯାମମ୍ବାଯାଂ ପ୍ରଚଲତି ସମସ୍ତେ ପରିଜନେ

ସବେଗଂ ସଂଯାତେ କନକଲତିକାଲଂକୃତିଭରେ|

ସମନ୍ତାଦୁତ୍ତାଲସ୍ଫୁରିତପଦସଂପାତଜନିତୈ-
ର୍ଝଣତ୍କାରୈସ୍ତାରୈର୍ଝଣଝଣିତମାସୀନ୍ମଣିଗୃହମ୍||64||

ବେଧାଃ ପାଦତଲେ ପତଯଯମସୌ ବିଷ୍ଣୁର୍ନମତ୍ଯଗ୍ରତଃ

ଶଂଭୁର୍ଦେହି ଦୃଗଞ୍ଚଲଂ ସୁରପତିଂ ଦୂରସ୍ଥମାଲୋକଯ|

ଇତ୍ଯେବଂ ପରିଚାରିକାଭିରୁଦିତେ ସଂମାନନାଂ କୁର୍ବତୀ
ଦୃଗ୍ଦ୍ବନ୍ଦ୍ବେନ ଯଥୋଚିତଂ ଭଗବତୀ ଭୂଯାଦ୍ବିଭୂତ୍ଯୈ ମମ||66||

ଅଗ୍ରେ କେଚନ ପାଶ୍ର୍ବଯୋଃ କତିପଯେ ପୃଷ୍ଠେ ପରେ ପ୍ରସ୍ଥିତା

ଆକାଶେ ସମବସ୍ଥିତାଃ କତିପଯେ ଦିକ୍ଷୁ ସ୍ଥିତାଶ୍ଚାପରେ|

ସଂମର୍ଦଂ ଶନକୈରପାସ୍ଯ ପୁରତୋ ଦଣ୍ଡପ୍ରଣାମାନ୍ମୁହୁଃ
କୁର୍ବାଣାଃ କତିଚିତ୍ସୁରା ଗିରିସୁତେ ଦୃକ୍ପାତମିଚ୍ଛନ୍ତି ତେ||68||

କସ୍ମୈଚିତ୍ସୁଚିରାଦୁପାସିତମହାମନ୍ତ୍ରୌଘସିଦ୍ଧିଂ କ୍ରମା-

ଦେକସ୍ମୈ ଭବନିଃସ୍ପୃହାଯ ପରମାନନ୍ଦସ୍ବରୂପାଂ ଗତିମ୍|

ଅନ୍ଯସ୍ମୈ ବିଷଯାନୁରକ୍ତମନସେ ଦୀନାଯ ଦୁଃଖାପହଂ
ଦ୍ରବ୍ଯଂ ଦ୍ବାରସମାଶ୍ରିତାଯ ଦଦତୀଂ ବନ୍ଦାମହେ ସୁନ୍ଦରୀମ୍||70||

ତବ ଦହନସଦୃକ୍ଷୈରୀକ୍ଷଣୈରେବ ଚକ୍ଷୁ-

ର୍ନିଖିଲପଶୁଜନାନାଂ ଭୀଷଯଦ୍ଭୀଷଣାସ୍ଯମ୍|

କୃତବସତି ପରେଶପ୍ରେଯସି ଦ୍ବାରି ନିତ୍ଯଂ
ଶରଭମିଥୁନମୁଚ୍ଚୈର୍ଭକ୍ତିଯୁକ୍ତୋ ନତୋସ୍ମି||72||

ସ୍ବସ୍ଥାନସ୍ଥିତଦେବତାଗଣବୃତେ ବିନ୍ଦୌ ମୁଦା ସ୍ଥାପିତଂ

ନାନାରତ୍ନବିରାଜିହେମବିଲସତ୍କାନ୍ତିଚ୍ଛଟାଦୁର୍ଦିନମ୍|

ଚଞ୍ଚତ୍କୌସୁମତୂଲିକାସନଯୁତଂ କାମେଶ୍ବରାଧିଷ୍ଠିତଂ
ନିତ୍ଯାନନ୍ଦନିଦାନମମ୍ବ ସତତଂ ବନ୍ଦେ ଚ ସିଂହାସନମ୍||74||

କର୍ପୂରାଦିକବସ୍ତୁଜାତମଖିଲଂ ସୌବର୍ଣଭୃଙ୍ଗାରକଂ

ତାମ୍ବୂଲସ୍ଯ କରଣ୍ଡକଂ ମଣିମଯଂ ଚୈଲାଞ୍ଚଲଂ ଦର୍ପଣମ୍|

ବିସ୍ଫୂର୍ଜନ୍ମଣିପାଦୁକେ ଚ ଦଧତୀଃ ସିଂହାସନସ୍ଯାଭିତ-
ସ୍ତିଷ୍ଠନ୍ତୀଃ ପରିଚାରିକାସ୍ତବ ସଦା ବନ୍ଦାମହେ ସୁନ୍ଦରି||76||

ପ୍ରାନ୍ତସ୍ଫୁରଦ୍ବିମଲମୌକ୍ତିକଗୁଚ୍ଛଜାଲଂ

ଚଞ୍ଚନ୍ମହାମଣିବିଚିତ୍ରିତହେମଦଣ୍ଡମ୍|

ଉଦ୍ଯତ୍ସହସ୍ରକରମଣ୍ଡଲଚାରୁ ହେମ-
ଚ୍ଛତ୍ରଂ ମହେଶମହିଲେ ବିନିବେଶଯାମି||78||

ସଂତୁଷ୍ଟାଂ ପରମାମୃତେନ ବିଲସତ୍କାମେଶ୍ବରାଙ୍କସ୍ଥିତାଂ

ପୁଷ୍ପୌଘୈରଭିପୂଜିତାଂ ଭଗବତୀଂ ତ୍ବାଂ ବନ୍ଦମାନା ମୁଦା|

ସ୍ଫୂର୍ଜତ୍ତାବକଦେହରଶ୍ମିକଲନାପ୍ରାପ୍ତସ୍ବରୂପାଭିଦାଃ
ଶ୍ରୀଚକ୍ରାବରଣସ୍ଥିତାଃ ସବିନଯଂ ବନ୍ଦାମହେ ଦେବତାଃ||80

ତ୍ରିପୁରାସୁଧାର୍ଣବାସନ-

ମାରଭ୍ଯ ତ୍ରିପୁରମାଲିନୀ ଯାବତ୍|

ଆବରଣାଷ୍ଟକସଂସ୍ଥିତ-
ମାସନଷଟ୍କଂ ନମାମି ପରମେଶି||82||

ଉଡ୍ଯାନଜାଲଂଧରକାମରୂପ-

ପୀଠାନିମାନ୍ପୂର୍ଣଗିରିପ୍ରସକ୍ତାନ୍|

ତ୍ରିକୋଣଦକ୍ଷାଗ୍ରିମସବ୍ଯଭାଗ-
ମଧ୍ଯସ୍ଥିତାନ୍ସିଦ୍ଧିକରାନ୍ନମାମି||84||

ତାରାନାଥକଲାପ୍ରବେଶନିଗମବ୍ଯାଜାଦ୍ଗତାସୁପ୍ରଥଂ

ତ୍ରୈଲୋକ୍ଯେ ତିଥିଷୁ ପ୍ରବର୍ତିତକଲାକାଷ୍ଠାଦିକାଲକ୍ରମମ୍|

ରତ୍ନାଲଂକୃତିଚିତ୍ରବସ୍ତ୍ରଲଲିତଂ କାମେଶ୍ବରୀପୂର୍ବକଂ
ନିତ୍ଯାଷୋଡଶକଂ ନମାମି ଲସିତଂ ଚକ୍ରାତ୍ମନୋରନ୍ତରେ||86||

ହୃଦଯମଥ ଶିରଃ ଶିଖାଖିଲାଦ୍ଯେ

କବଚମଥୋ ନଯନତ୍ରଯଂ ଚ ଦେବି|

ମୁନିଜନପରିଚିନ୍ତିତଂ ତଥାସ୍ତ୍ରଂ
ସ୍ଫୁରତୁ ସଦା ହୃଦଯେ ଷଡଙ୍ଗମେତତ୍||88||

ସର୍ବାଶାପରିପୂରକେ ବସୁଦଲଦ୍ବନ୍ଦ୍ବେନ ବିଭ୍ରାଜିତେ

ବିସ୍ଫୂର୍ଜନ୍ତ୍ରିପୁରେଶ୍ବରୀନିବସତୌ ଚକ୍ରେ ସ୍ଥିତା ନିତ୍ଯଶଃ|

କାମାକର୍ଷଣିକାଦଯୋ ମଣିଗଣଭ୍ରାଜିଷ୍ଣୁଦିବ୍ଯାମ୍ବରା
ଯୋଗିନ୍ଯଃ ପ୍ରଦିଶନ୍ତୁ କାଙ୍କ୍ଷିତଫଲଂ ବିଖ୍ଯାତଗୁପ୍ତାଭିଧାଃ||90||

ଲସଦ୍ଯୁଗଦୃଶାରକେ ସ୍ଫୁରତି ସର୍ବସୌଭାଗ୍ଯଦେ

ଶୁଭାଭରଣଭୂଷିତତ୍ରିପୁରବାସିନୀମନ୍ଦିରେ|

ସ୍ଥିତା ଦଧତୁ ମଙ୍ଗଲଂ ସୁଭଗସର୍ବସଂକ୍ଷୋଭିଣୀ-
ମୁଖାଃ ସକଲସିଦ୍ଧଯୋ ବିଦିତସଂପ୍ରଦାଯାଭିଧାଃ||92||

ଅନ୍ତଃଶୋଭିଦଶାରକେତିଲଲିତେ ସର୍ବାଦିରକ୍ଷାକରେ

ମାଲିନ୍ଯା ତ୍ରିପୁରାଦ୍ଯଯା ବିରଚିତାବାସେ ସ୍ଥିତଂ ନିତ୍ଯଶଃ|

ନାନାରତ୍ନବିଭୂଷଣଂ ମଣିଗଣଭ୍ରାଜିଷ୍ଣୁ ଦିବ୍ଯାମ୍ବରଂ
ସର୍ବଜ୍ଞାଦିକଶକ୍ତିବୃନ୍ଦମନିଶଂ ବନ୍ଦେ ନିଗର୍ଭାଭିଧମ୍||94||

ଚୂତାଶୋକବିକାସିକେତକରଜଃ ପ୍ରୋଦ୍ଭାସିନୀଲାମ୍ବୁଜ-

ପ୍ରସ୍ଫୂର୍ଜନ୍ନବମଲ୍ଲିକାସମୁଦିତୈଃ ପୁଷ୍ପୈଃ ଶରାନ୍ିନର୍ମିତାନ୍|

ରମ୍ଯଂ ପୁଷ୍ପଶରାସନଂ ସୁଲଲିତଂ ପାଶଂ ତଥା ଚାଙ୍କୁଶଂ
ବନ୍ଦେ ତାବକମାଯୁଧଂ ପରଶିବେ ଚକ୍ରାନ୍ତରାଲେ ସ୍ଥିତମ୍||96||

ସର୍ବାନନ୍ଦମଯେ ସମସ୍ତଜଗତାମାକାଙ୍କ୍ଷିତେ ବୈନ୍ଦବେ

ଭୈରବ୍ଯା ତ୍ରିପୁରାଦ୍ଯଯା ବିରଚିତାବାସେ ସ୍ଥିତା ସୁନ୍ଦରୀ|

ଆନନ୍ଦୋଲ୍ଲସିତେକ୍ଷଣା ମଣିଗଣଭ୍ରାଜିଷ୍ଣୁଭୂଷାମ୍ବରା
ବିସ୍ଫୂର୍ଜଦ୍ବଦନା ପରାପରରହଃ ସା ପାତୁ ମାଂ ଯୋଗିନୀ||98||

ବୈରମୁଦ୍ଧତମପାସ୍ଯ ଶଂଭୁନା

ମସ୍ତକେ ବିନିହିତଂ କଲାଚ୍ଛଲାତ୍|

ଗନ୍ଧଲୁବ୍ଧମଧୁପାଶ୍ରିତଂ ସଦା
କେତକୀକୁସୁମମର୍ପଯାମି ତେ||100||

ଅଗରୁବହଲଧୂପାଜସ୍ରସୌରଭ୍ଯରମ୍ଯାଂ

ମରକତମଣିରାଜୀରାଜିହାରିସ୍ନଭାମ୍|

ଦିଶି ବିଦିଶି ବିସର୍ପଦ୍ଗନ୍ଧଲୁବ୍ଧାଲିମାଲାଂ
ବକୁଲକୁସୁମମାଲାଂ କଣ୍ଠପୀଠେର୍ପଯାମି||102||

ଧୂପଂ ତେଗରୁସଂଭବଂ ଭଗବତି ପ୍ରୋଲ୍ଲାସିଗନ୍ଧୋଦ୍ଧୁରଂ

ଦୀପଂ ଚୈବ ନିବେଦଯାମି ମହସା ହାର୍ଦାନ୍ଧକାରଚ୍ଛିଦମ୍|

ରତ୍ନସ୍ବର୍ଣବିନିର୍ମିତେଷୁ ପରିତଃ ପାତ୍ରେଷୁ ସଂସ୍ଥାପିତଂ
ନୈବେଦ୍ଯଂ ବିନିବେଦଯାମି ପରମାନନ୍ଦାତ୍ମିକେ ସୁନ୍ଦରି||104||

ଶିମ୍ବୀସୂରଣଶାକବିମ୍ବବୃହତୀକୂଶ୍ମାଣ୍ଡକୋଶାତକୀ-

ବୃନ୍ତାକାନି ପଟୋଲକାନି ମୃଦୁନା ସଂସାଧିତାନ୍ଯଗ୍ନିନା|

ସଂପନ୍ନାନି ଚ ବେସବାରବିସରୈର୍ଦିବ୍ଯାନି ଭକ୍ତ୍ଯା କୃତା-
ନ୍ଯଗ୍ରେ ତେ ବିନିବେଦଯାମି ଗିରିଜେ ସୌବର୍ଣପାତ୍ରବ୍ରଜେ||106||

ସିତଯାଞ୍ଚିତଲଡ୍ଡୁକବ୍ରଜା-

ନ୍ମୃଦୁପୂପାନ୍ମୃଦୁଲାଶ୍ଚ ପୂରିକାଃ|

ପରମାନ୍ନମିଦଂ ଚ ପାର୍ବତି
ପ୍ରଣଯେନ ପ୍ରତିପାଦଯାମି ତେ||108||

ଅଗ୍ରେ ତେ ବିନିବେଦ୍ଯ ସର୍ବମମିତଂ ନୈବେଦ୍ଯମଙ୍ଗୀକୃତଂ

ଜ୍ଞାତ୍ବା ତତ୍ତ୍ବଚତୁଷ୍ଟଯଂ ପ୍ରଥମତୋ ମନ୍ଯେ ସୁତୃପ୍ତାଂ ତତଃ|

ଦେବୀଂ ତ୍ବାଂ ପରିଶିଷ୍ଟମମ୍ବ କନକାମତ୍ରେଷୁ ସଂସ୍ଥାପିତଂ
ଶକ୍ତିଭ୍ଯଃ ସମୁପାହାରାମି ସକଲଂ ଦେବେଶି ଶଂଭୁପ୍ରିଯେ||110||

ପଙ୍କ୍ତ୍ଯୋପବିଷ୍ଟାନ୍ପରିତସ୍ତୁ ଚକ୍ରଂ

ଶକ୍ତ୍ଯା ସ୍ବଯାଲିଙ୍କିତବାମଭାଗାନ୍|

ସର୍ବୋପଚାରୈଃ ପରିପୂଜ୍ଯ ଭକ୍ତ୍ଯା
ତବାମ୍ବିକେ ପାରିଷଦାନ୍ନମାମି||112||

ଦୃଶ୍ଯତେ ତବ ମୁଖାମ୍ବୁଜଂ ଶିବେ

ଶ୍ରୂଯତେ ସ୍ଫୁଟମନାହତଧ୍ବନିଃ|

ଅର୍ଚନେ ତବ ଗିରାମଗୋଚରେ
ନ ପ୍ରଯାତି ବିଷଯାନ୍ତରଂ ମନଃ||114||

ଚକ୍ଷୁଃ ପଶ୍ଯତୁ ନେହ କିଂଚନ ପରଂ ଘ୍ରାଣଂ ନ ବା ଜିଘ୍ରତୁ

ଶ୍ରୋତ୍ରଂ ହନ୍ତ ଶ୍ରୃଣୋତୁ ନ ତ୍ବଗପି ନ ସ୍ପର୍ଶଂ ସମାଲମ୍ବତାମ୍|

ଜିହ୍ବା ବେତ୍ତୁ ନ ବା ରସଂ ମମ ପରଂ ଯୁଷ୍ମତ୍ସ୍ବରୂପାମୃତେ
ନିତ୍ଯାନନ୍ଦବିଘୂର୍ଣମାନନଯନେ ନିତ୍ଯଂ ମନୋ ମଜ୍ଜତୁ||116||

ଗଣାଧିନାଥଂ ବଟୁକଂ ଚ ଯୋଗିନୀଃ

କ୍ଷେତ୍ରାଧିନାଥଂ ଚ ବିଦିକ୍ଚତୁଷ୍ଟଯେ|

ସର୍ବୋପଚାରୈଃ ପରିପୂଜ୍ଯ ଭକ୍ତିତୋ
ନିବେଦଯାମୋ ବଲିମୁକ୍ତଯୁକ୍ତିଭିଃ||118||

ତାମ୍ବୂଲଂ ବିନିବେଦଯାମି ବିଲସତ୍କର୍ପୂରକସ୍ତୂରିକା-

ଜାତୀପୂଗଲବଙ୍ଗଚୂର୍ଣଖଦିରୈର୍ଭକ୍ତ୍ଯା ସମୁଲ୍ଲାସିତମ୍|

ସ୍ଫୂର୍ଜଦ୍ରତ୍ନସମୁଦ୍ଗକପ୍ରଣିହିତଂ ସୌବର୍ଣପାତ୍ରେ ସ୍ଥିତୈ-
ର୍ଦୀପୈରୁଜ୍ଜ୍ବଲମନ୍ନଚୂର୍ଣରଚିତୈରାରାର୍ତିକଂ ଗୃହ୍ଯତାମ୍||120||

ତାମ୍ବୂଲୋଦ୍ଭାସିବକ୍ତ୍ରୈସ୍ତ୍ବଦମଲବଦନାଲୋକନୋଲ୍ଲାସିନେତ୍ରୈ-

ଶ୍ଚକ୍ରସ୍ଥୈଃ ଶକ୍ତିସଂଘୈଃ ପରିହୃତବିଷଯାସଙ୍ଗମାକର୍ଣ୍ଯମାନମ୍|

ଗୀତଜ୍ଞାଭିଃ ପ୍ରକାମଂ ମଧୁରସମଧୁରଂ ବାଦିତଂ କିଂନରୀଭି-
ର୍ବୀଣାଝଂକାରନାଦଂ କଲଯ ପରଶିବାନନ୍ଦସଂଧାନହେତୋଃ||122||

ଯଥେପ୍ସିତମନୋଗତପ୍ରକଟିତୋପଚାରାର୍ଚିତାଂ

ନିଜାବରଣଦେବତାଗଣବୃତାଂ ସୁରେଶସ୍ଥିତାମ୍|

କୃତାଞ୍ଜଲିପୁଟୋ ମୁହୁଃ କଲିତଭୂମିରଷ୍ଟାଙ୍ଗକୈ-
ର୍ନମାମି ଭଗବତ୍ଯହଂ ତ୍ରିପୁରସୁନ୍ଦରି ତ୍ରାହି ମାମ୍||124||

କ୍ବାହଂ ମନ୍ଦମତିଃ କ୍ବ ଚେଦମଖିଲୈରେକାନ୍ତଭକ୍ତୈଃ ସ୍ତୁତଂ

ଧ୍ଯାତଂ ଦେବି ତଥାପି ତେ ସ୍ବମନସା ଶ୍ରୀପାଦୁକାପୂଜନମ୍|

କାଦାଚିତ୍କମଦୀଯଚିନ୍ତନବିଧୌ ସଂତୁଷ୍ଟଯା ଶର୍ମଦଂ
ସ୍ତୋତ୍ରଂ ଦେବତଯା ତଯା ପ୍ରକଟିତଂ ମନ୍ଯେ ମଦୀଯାନନେ||126||