വ്യാപ്തം ഹാടകവിഗ്രഹൈര്ജലചരൈരാരൂഢദേവവ്രജൈഃ

പോതൈരാകുലിതാന്തരം മണിധരൈര്ഭൂമീധരൈര്ഭൂഷിതമ്.

ആരക്താമൃതസിന്ധുമുദ്ധുരചലദ്വീചീചയവ്യാകുല-
വ്യോമാനം പരിചിന്ത്യ സംതതമഹോ ചേതഃ കൃതാര്ഥീഭവ৷৷2৷৷

ജാതീചമ്പകപാടലാദിസുമനഃസൌരഭ്യസംഭാവിതം

ഹ്രീംകാരധ്വനികണ്ഠകോകിലകുഹൂപ്രോല്ലാസിചൂതദ്രുമമ്.

ആവിര്ഭൂതസുഗന്ധിചന്ദനവനം ദൃഷ്ടിപ്രിയം നന്ദനം
ചഞ്ചച്ചഞ്ചലചഞ്ചരീകചടുലം ചേതശ്ിചരം ചിന്തയ৷৷4৷৷

രമ്യദ്വാരപുരപ്രചാരതമസാം സംഹാരകാരിപ്രഭ

സ്ഫൂര്ജത്തോരണഭാരഹാരകമഹാവിസ്താരഹാരദ്യുതേ.

ക്ഷോണീമണ്ഡലഹേമഹാരവിലസത്സംസാരപാരപ്രദ
പ്രോദ്യദ്ഭക്തമനോവിഹാര കനകപ്രാകാര തുഭ്യം നമഃ৷৷6৷৷

ക്വാപി പ്രോദ്ഭടപദ്മരാഗകിരണവ്രാതേന സംധ്യായിതം

കുത്രാപി സ്ഫുടവിസ്ഫുരന്മരകതദ്യുത്യാ തമിസ്രായിതമ്.

മധ്യാലമ്ബിവിശാലമൌക്തികരുചാ ജ്യോത്സ്നായിതം കുത്രചി-
ന്മാതഃ ശ്രീമണിമന്ദിരം തവ സദാ വന്ദാമഹേ സുന്ദരമ്৷৷8৷৷

മണിസദനസമുദ്യത്കാന്തിധാരാനുരക്തേ

വിയതി ചരമസംധ്യാശങ്കിനോ ഭാനുരഥ്യാഃ.

ശിഥിലിതഗതകുപ്യത്സൂതഹുംകാരനാദൈഃ
കഥമപി മണിഗേഹാദുച്ചകൈരുച്ചലന്തി৷৷10৷৷

വിദൂരമുക്തവാഹനൈര്വിനമ്രമൌലിമണ്ഡലൈ-

ര്നിബദ്ധഹസ്തസംപുടൈഃ പ്രയത്നസംയതേന്ദ്രിയൈഃ.

വിരിഞ്ചിവിഷ്ണുശംകരാദിഭിര്മുദാ തവാമ്ബികേ
പ്രതീക്ഷ്യമാണനിര്ഗമോ വിഭാതി രത്നമണ്ഡപഃ৷৷12৷৷

പ്രവേശനിര്ഗമാകുലൈഃ സ്വകൃത്യരക്തമാനസൈ-

ര്ബഹിഃസ്ഥിതാമരാവലീവിധീയമാനഭക്തിഭിഃ.

വിചിത്രവസ്ത്രഭൂഷണൈരുപേതമങ്ഗനാജനൈഃ
സദാ കരോതു മങ്ഗലം മമേഹ രത്നമണ്ഡപഃ৷৷14৷৷

ഇന്ദ്രാദീംശ്ച ദിഗീശ്വരാന്സഹപരീവാരാനഥോ സായുധാ-

ന്യോഷിദ്രൂപധരാന്സ്വദിക്ഷു നിഹിതാന്സംചിന്ത്യ ഹൃത്പങ്കജേ.

ശങ്ഖേ ശ്രീവസുധാരയാ വസുമതീയുക്തം ച പദ്മം സ്മര-
ന്കാമം നൌമി രതിപ്രിയം സഹചരം പ്രീത്യാ വസന്തം ഭജേ৷৷16৷৷

കസ്തൂരികാശ്യാമലകോമലാങ്ഗീം

കാദമ്ബരീപാനമദാലസാങ്ഗീമ്.

വാമസ്തനാലിങ്ഗിതരത്നവീണാം
മാതങ്ഗകന്യാം മനസാ സ്മരാമി৷৷18৷৷

പ്രമത്തവാരുണീരസൈര്വിഘൂര്ണമാനലോചനാഃ

പ്രചണ്ഡദൈത്യസൂദനാഃ പ്രവിഷ്ടഭക്തമാനസാഃ.

ഉപോഢകജ്ജലച്ഛവിച്ഛടാവിരാജിവിഗ്രഹാഃ
കപാലശൂലധാരിണീഃ സ്തുവേ ത്വദീയദൂതികാഃ৷৷20৷৷

ആസ്തീര്ണാരുണകമ്ബലാസനയുതം പുഷ്പോപഹാരാന്വിതം

ദീപ്താനേകമണിപ്രദീപസുഭഗം രാജദ്വിതാനോത്തമമ്.

ധൂപോദ്ഗാരിസുഗന്ധിസംഭ്രമമിലദ്ഭൃങ്ഗാവലീഗുഞ്ജിതം
കല്യാണം വിതനോതു മേനവരതം ശ്രീമണ്ഡപാഭ്യന്തരമ്৷৷22৷৷

സര്വാങ്ഗസ്ഥിതിരമ്യരൂപരുചിരാം പ്രാതഃ സമഭ്യുത്ഥിതാം

ജൃമ്ഭാമഞ്ജുമുഖാമ്ബുജാം മധുമദവ്യാഘൂര്ണദക്ഷിത്രയാമ്.

സേവായാതസമസ്തസംനിധിസഖീഃ സംമാനയന്തീം ദൃശാ
സംപശ്യന്പരദേവതാം പരമഹോ മന്യേ കൃതാര്ഥം ജനുഃ৷৷24৷৷

പാദ്യം തേ പരികല്പയാമി പദയോരര്ഘ്യം തഥാ ഹസ്തയോഃ

സൌധീഭിര്മധുപര്കമമ്ബ മധുരം ധാരാഭിരാസ്വാദയ.

തോയേനാചമനം വിധേഹി ശുചിനാ ഗാങ്ഗേന മത്കല്പിതം
സാഷ്ടാങ്ഗം പ്രണിപാതമീശദയിതേ ദൃഷ്ട്യാ കൃതാര്ഥീ കുരു৷৷26৷৷

നിധേഹി മണിപാദുകോപരി പദാമ്ബുജം മജ്ജനാ-

ലയം വ്രജ ശനൈഃ സഖീകൃതകരാമ്ബുജാലമ്ബനമ്.

മഹേശി കരുണാനിധേ തവ ദൃഗന്തപാതോത്സുകാ-
ന്വിലോകയ മനാഗമൂനുഭയസംസ്ഥിതാന്ദൈവതാന്৷৷28৷৷

കനകകലശജാലസ്ഫാടികസ്നാനപീഠാ-

ദ്യുപകരണവിശാലം ഗന്ധമത്താലിമാലമ്.

സ്ഫുരദരുണവിതാനം മഞ്ജുഗന്ധര്വഗാനം
പരമശിവമഹേലേ മജ്ജനാഗാരമേഹി৷৷30৷৷

തത്ര സ്ഫാടികപീഠമേത്യ ശനകൈരുത്താരിതാലംകൃതി-

ര്നീചൈരുജ്ഝിതകഞ്ചുകോപരിഹിതാരക്തോത്തരീയാമ്ബരാ.

വേണീബന്ധമപാസ്യ കങ്കതികയാ കേശപ്രസാദം മനാ-
ക്കുര്വാണാ പരദേവതാ ഭഗവതീ ചിത്തേ മമ ദ്യോതതാമ്৷৷32৷৷

കൃതപരികരബന്ധാസ്തുങ്ഗപീനസ്തനാഢ്യാ

മണിനിവഹനിബദ്ധാ ഹേമകുമ്ഭീര്ദധാനാഃ.

സുരഭിസലിലനിര്യദ്ഗന്ധലുബ്ധാലിമാലാഃ
സവിനയമുപതസ്ഥുഃ സര്വതഃ സ്നാനദാസ്യഃ৷৷34৷৷

പ്രത്യങ്ഗം പരിമാര്ജയാമി ശുചിനാ വസ്ത്രേണ സംപ്രോ്ഛനം

കുര്വേ കേശകലാപമായതതരം ധൂപോത്തമൈര്ധൂപിതമ്.

ആലീബൃന്ദവിനിര്മിതാം യവനികാമാസ്ഥാപ്യ രത്നപ്രഭം
ഭക്തത്രാണപരേ മഹേശഗൃഹിണി സ്നാനാമ്ബരം മുച്യതാമ്৷৷36৷৷

വിലുലിതചികുരേണ ച്ഛാദിതാംസപ്രദേശേ

മണിനികരവിരാജത്പാദുകാന്യസ്തപാദേ.

സുലലിതമവലമ്ബ്യ ദ്രാക്സഖീമംസദേശേ
ഗിരിശഗൃഹിണി ഭൂഷാമണ്ടപായ പ്രയാഹി৷৷38৷৷

സ്നിഗ്ധം കങ്കതികാമുഖേന ശനകൈഃ സംശോധ്യ കേശോത്കരം

സീമന്തം വിരചയ്യ ചാരൂ വിമലം സിന്ദൂരരേഖാന്വിതമ്.

മുക്താഭിര്ഗ്രഥിതാലകാം മണിചിതൈഃ സൌവര്ണസൂത്രൈഃ സ്ഫുടം
പ്രാന്തേ മൌക്തികഗുച്ഛകോപലതികാം ഗ്രഥ്നാമി വേണീമിമാമ്৷৷40৷৷

ത്വാമാശ്രയദ്ഭിഃ കബരീതമിസ്രൈ-

ര്ബന്ദീകൃതം ദ്രാഗിവ ഭാനുബിമ്ബമ്.

മഡാനി ചൂഡാമണിമാദധാനം
വന്ദാമഹേ താവകമുത്തമാങ്ഗമ്৷৷42৷৷

മീനാമ്ഭോരുഹഖഞ്ജരീടസുഷമാവിസ്താരവിസ്മാരകേ

കുര്വാണേ കില കാമവൈരിമനസഃ കംദര്പബാണപ്രഭാമ്.

മാധ്വീപാനമദാരുണേതിചപലേ ദീര്ഘേ ദൃഗമ്ഭോരുഹേ
ദേവി സ്വര്ണശലാകയോര്ജിതമിദം ദിവ്യാഞ്ജനം ദീയതാമ്৷৷44৷৷

ഉഡുകൃതപരിവേഷസ്പര്ധയാ ശീതഭാനോ-

രിവ വിരചിതദേഹദ്വന്ദ്വമാദിത്യബിമ്ബമ്.

അരുണമണിസമുദ്യത്പ്രാന്തവിഭ്രാജിമുക്തം
ശ്രവസി പരിനിധേഹി സ്വര്ണതാടങ്കയുഗ്മമ്৷৷46৷৷

നാനാദേശസമുത്ഥിതൈര്മണിഗണപ്രോദ്യത്പ്രഭാമണ്ഡല-

വ്യാപ്തൈരാഭരണൈര്വിരാജിതഗലാം മുക്താച്ഛടാലംകൃതാമ്.

മധ്യസ്ഥാരുണരത്നകാന്തിരുചിരാം പ്രാന്തസ്ഥമുക്താഫല-
വ്രാതാമമ്ബ ചതുഷ്കികാം പരശിവേ വക്ഷഃസ്ഥലേ സ്ഥാപയ৷৷48৷৷

കരസരസിജനാലേ വിസ്ഫുരത്കാന്തിജാലേ

വിലസദമലശോഭേ ചഞ്ചദീശാക്ഷിലോഭേ.

വിവിധമണിമയൂഖോദ്ഭാസിതം ദേവി ദുര്ഗേ
കനകകടകയുഗ്മം ബാഹുയുഗ്മേ നിധേഹി৷৷50৷৷

വിതതനിജമയൂഖൈര്നിര്മിതാമിന്ദ്രനീലൈ-

ര്വിജിതകമലനാലാലീനമത്താലിമാലാമ്.

മണിഗണഖചിതാഭ്യാം കങ്കണാഭ്യാമുപേതാം
കലയ വലയരാജീം ഹസ്തമൂലേ മഹേശി৷৷52৷৷

ആലവാലമിവ പുഷ്പധന്വനാ

ബാലവിദ്രുമലതാസു നിര്മിതമ്.

അങ്ഗുലീഷു വിനിധീയതാം ശനൈ-
രങ്ഗുലീയകമിദം മദര്പിതമ്৷৷54৷৷

വ്യാലമ്ബമാനവരമൌക്തികഗുച്ഛശോഭി

വിഭ്രാജിഹാടകപുടദ്വയരോചമാനമ്.

ഹേമ്നാ വിനിര്മിതമനേകമണിപ്രബന്ധം
നീവീനിബന്ധനഗുണം വിനിവേദയാമി৷৷56৷৷

നിബദ്ധശിതിപട്ടകപ്രവരഗുച്ഛസംശോഭിതാം

കലക്വണിതമഞ്ജുലാം ഗിരിശചിത്തസംമോഹനീമ്.

അമന്ദമണിമണ്ഡലീവിമലകാന്തികിമ്മീരിതാം
നിധേഹി പദപങ്കജേ കനകഘുങ്ഘുരൂമമ്ബികേ৷৷58৷৷

പദാമ്ബുജമുപാസിതും പരിഗതേന ശീതാംശുനാ

കൃതാം തനുപരമ്പരാമിവ ദിനാന്തരാഗാരുണാമ്.

മഹേശി നവയാവകദ്രവഭരേണ ശോണീകൃതാം
നമാമി നഖമണ്ഡലീം ചരണപങ്കജസ്ഥാം തവ৷৷60৷৷

ഗൃഹാണ പരമാമൃതം കനകപാത്രസംസ്ഥാപിതം

സമര്പയ മുഖാമ്ബുജേ വിമലവീടികാമമ്ബികേ.

വിലോകയ മുഖാമ്ബുജം മുകുരമണ്ഡലേ നിര്മലേ
നിധേഹി മണിപാദുകോപരി പദാമ്ബുജം സുന്ദരി৷৷62৷৷

ചലന്ത്യാമമ്ബായാം പ്രചലതി സമസ്തേ പരിജനേ

സവേഗം സംയാതേ കനകലതികാലംകൃതിഭരേ.

സമന്താദുത്താലസ്ഫുരിതപദസംപാതജനിതൈ-
ര്ഝണത്കാരൈസ്താരൈര്ഝണഝണിതമാസീന്മണിഗൃഹമ്৷৷64৷৷

വേധാഃ പാദതലേ പതയയമസൌ വിഷ്ണുര്നമത്യഗ്രതഃ

ശംഭുര്ദേഹി ദൃഗഞ്ചലം സുരപതിം ദൂരസ്ഥമാലോകയ.

ഇത്യേവം പരിചാരികാഭിരുദിതേ സംമാനനാം കുര്വതീ
ദൃഗ്ദ്വന്ദ്വേന യഥോചിതം ഭഗവതീ ഭൂയാദ്വിഭൂത്യൈ മമ৷৷66৷৷

അഗ്രേ കേചന പാശ്ര്വയോഃ കതിപയേ പൃഷ്ഠേ പരേ പ്രസ്ഥിതാ

ആകാശേ സമവസ്ഥിതാഃ കതിപയേ ദിക്ഷു സ്ഥിതാശ്ചാപരേ.

സംമര്ദം ശനകൈരപാസ്യ പുരതോ ദണ്ഡപ്രണാമാന്മുഹുഃ
കുര്വാണാഃ കതിചിത്സുരാ ഗിരിസുതേ ദൃക്പാതമിച്ഛന്തി തേ৷৷68৷৷

കസ്മൈചിത്സുചിരാദുപാസിതമഹാമന്ത്രൌഘസിദ്ധിം ക്രമാ-

ദേകസ്മൈ ഭവനിഃസ്പൃഹായ പരമാനന്ദസ്വരൂപാം ഗതിമ്.

അന്യസ്മൈ വിഷയാനുരക്തമനസേ ദീനായ ദുഃഖാപഹം
ദ്രവ്യം ദ്വാരസമാശ്രിതായ ദദതീം വന്ദാമഹേ സുന്ദരീമ്৷৷70৷৷

തവ ദഹനസദൃക്ഷൈരീക്ഷണൈരേവ ചക്ഷു-

ര്നിഖിലപശുജനാനാം ഭീഷയദ്ഭീഷണാസ്യമ്.

കൃതവസതി പരേശപ്രേയസി ദ്വാരി നിത്യം
ശരഭമിഥുനമുച്ചൈര്ഭക്തിയുക്തോ നതോസ്മി৷৷72৷৷

സ്വസ്ഥാനസ്ഥിതദേവതാഗണവൃതേ ബിന്ദൌ മുദാ സ്ഥാപിതം

നാനാരത്നവിരാജിഹേമവിലസത്കാന്തിച്ഛടാദുര്ദിനമ്.

ചഞ്ചത്കൌസുമതൂലികാസനയുതം കാമേശ്വരാധിഷ്ഠിതം
നിത്യാനന്ദനിദാനമമ്ബ സതതം വന്ദേ ച സിംഹാസനമ്৷৷74৷৷

കര്പൂരാദികവസ്തുജാതമഖിലം സൌവര്ണഭൃങ്ഗാരകം

താമ്ബൂലസ്യ കരണ്ഡകം മണിമയം ചൈലാഞ്ചലം ദര്പണമ്.

വിസ്ഫൂര്ജന്മണിപാദുകേ ച ദധതീഃ സിംഹാസനസ്യാഭിത-
സ്തിഷ്ഠന്തീഃ പരിചാരികാസ്തവ സദാ വന്ദാമഹേ സുന്ദരി৷৷76৷৷

പ്രാന്തസ്ഫുരദ്വിമലമൌക്തികഗുച്ഛജാലം

ചഞ്ചന്മഹാമണിവിചിത്രിതഹേമദണ്ഡമ്.

ഉദ്യത്സഹസ്രകരമണ്ഡലചാരു ഹേമ-
ച്ഛത്രം മഹേശമഹിലേ വിനിവേശയാമി৷৷78৷৷

സംതുഷ്ടാം പരമാമൃതേന വിലസത്കാമേശ്വരാങ്കസ്ഥിതാം

പുഷ്പൌഘൈരഭിപൂജിതാം ഭഗവതീം ത്വാം വന്ദമാനാ മുദാ.

സ്ഫൂര്ജത്താവകദേഹരശ്മികലനാപ്രാപ്തസ്വരൂപാഭിദാഃ
ശ്രീചക്രാവരണസ്ഥിതാഃ സവിനയം വന്ദാമഹേ ദേവതാഃ৷৷80

ത്രിപുരാസുധാര്ണവാസന-

മാരഭ്യ ത്രിപുരമാലിനീ യാവത്.

ആവരണാഷ്ടകസംസ്ഥിത-
മാസനഷട്കം നമാമി പരമേശി৷৷82৷৷

ഉഡ്യാനജാലംധരകാമരൂപ-

പീഠാനിമാന്പൂര്ണഗിരിപ്രസക്താന്.

ത്രികോണദക്ഷാഗ്രിമസവ്യഭാഗ-
മധ്യസ്ഥിതാന്സിദ്ധികരാന്നമാമി৷৷84৷৷

താരാനാഥകലാപ്രവേശനിഗമവ്യാജാദ്ഗതാസുപ്രഥം

ത്രൈലോക്യേ തിഥിഷു പ്രവര്തിതകലാകാഷ്ഠാദികാലക്രമമ്.

രത്നാലംകൃതിചിത്രവസ്ത്രലലിതം കാമേശ്വരീപൂര്വകം
നിത്യാഷോഡശകം നമാമി ലസിതം ചക്രാത്മനോരന്തരേ৷৷86৷৷

ഹൃദയമഥ ശിരഃ ശിഖാഖിലാദ്യേ

കവചമഥോ നയനത്രയം ച ദേവി.

മുനിജനപരിചിന്തിതം തഥാസ്ത്രം
സ്ഫുരതു സദാ ഹൃദയേ ഷഡങ്ഗമേതത്৷৷88৷৷

സര്വാശാപരിപൂരകേ വസുദലദ്വന്ദ്വേന വിഭ്രാജിതേ

വിസ്ഫൂര്ജന്ത്രിപുരേശ്വരീനിവസതൌ ചക്രേ സ്ഥിതാ നിത്യശഃ.

കാമാകര്ഷണികാദയോ മണിഗണഭ്രാജിഷ്ണുദിവ്യാമ്ബരാ
യോഗിന്യഃ പ്രദിശന്തു കാങ്ക്ഷിതഫലം വിഖ്യാതഗുപ്താഭിധാഃ৷৷90৷৷

ലസദ്യുഗദൃശാരകേ സ്ഫുരതി സര്വസൌഭാഗ്യദേ

ശുഭാഭരണഭൂഷിതത്രിപുരവാസിനീമന്ദിരേ.

സ്ഥിതാ ദധതു മങ്ഗലം സുഭഗസര്വസംക്ഷോഭിണീ-
മുഖാഃ സകലസിദ്ധയോ വിദിതസംപ്രദായാഭിധാഃ৷৷92৷৷

അന്തഃശോഭിദശാരകേതിലലിതേ സര്വാദിരക്ഷാകരേ

മാലിന്യാ ത്രിപുരാദ്യയാ വിരചിതാവാസേ സ്ഥിതം നിത്യശഃ.

നാനാരത്നവിഭൂഷണം മണിഗണഭ്രാജിഷ്ണു ദിവ്യാമ്ബരം
സര്വജ്ഞാദികശക്തിബൃന്ദമനിശം വന്ദേ നിഗര്ഭാഭിധമ്৷৷94৷৷

ചൂതാശോകവികാസികേതകരജഃ പ്രോദ്ഭാസിനീലാമ്ബുജ-

പ്രസ്ഫൂര്ജന്നവമല്ലികാസമുദിതൈഃ പുഷ്പൈഃ ശരാന്ിനര്മിതാന്.

രമ്യം പുഷ്പശരാസനം സുലലിതം പാശം തഥാ ചാങ്കുശം
വന്ദേ താവകമായുധം പരശിവേ ചക്രാന്തരാലേ സ്ഥിതമ്৷৷96৷৷

സര്വാനന്ദമയേ സമസ്തജഗതാമാകാങ്ക്ഷിതേ ബൈന്ദവേ

ഭൈരവ്യാ ത്രിപുരാദ്യയാ വിരചിതാവാസേ സ്ഥിതാ സുന്ദരീ.

ആനന്ദോല്ലസിതേക്ഷണാ മണിഗണഭ്രാജിഷ്ണുഭൂഷാമ്ബരാ
വിസ്ഫൂര്ജദ്വദനാ പരാപരരഹഃ സാ പാതു മാം യോഗിനീ৷৷98৷৷

വൈരമുദ്ധതമപാസ്യ ശംഭുനാ

മസ്തകേ വിനിഹിതം കലാച്ഛലാത്.

ഗന്ധലുബ്ധമധുപാശ്രിതം സദാ
കേതകീകുസുമമര്പയാമി തേ৷৷100৷৷

അഗരുബഹലധൂപാജസ്രസൌരഭ്യരമ്യാം

മരകതമണിരാജീരാജിഹാരിസ്നഭാമ്.

ദിശി വിദിശി വിസര്പദ്ഗന്ധലുബ്ധാലിമാലാം
വകുലകുസുമമാലാം കണ്ഠപീഠേര്പയാമി৷৷102৷৷

ധൂപം തേഗരുസംഭവം ഭഗവതി പ്രോല്ലാസിഗന്ധോദ്ധുരം

ദീപം ചൈവ നിവേദയാമി മഹസാ ഹാര്ദാന്ധകാരച്ഛിദമ്.

രത്നസ്വര്ണവിനിര്മിതേഷു പരിതഃ പാത്രേഷു സംസ്ഥാപിതം
നൈവേദ്യം വിനിവേദയാമി പരമാനന്ദാത്മികേ സുന്ദരി৷৷104৷৷

ശിമ്ബീസൂരണശാകബിമ്ബബൃഹതീകൂശ്മാണ്ഡകോശാതകീ-

വൃന്താകാനി പടോലകാനി മൃദുനാ സംസാധിതാന്യഗ്നിനാ.

സംപന്നാനി ച വേസവാരവിസരൈര്ദിവ്യാനി ഭക്ത്യാ കൃതാ-
ന്യഗ്രേ തേ വിനിവേദയാമി ഗിരിജേ സൌവര്ണപാത്രവ്രജേ৷৷106৷৷

സിതയാഞ്ചിതലഡ്ഡുകവ്രജാ-

ന്മൃദുപൂപാന്മൃദുലാശ്ച പൂരികാഃ.

പരമാന്നമിദം ച പാര്വതി
പ്രണയേന പ്രതിപാദയാമി തേ৷৷108৷৷

അഗ്രേ തേ വിനിവേദ്യ സര്വമമിതം നൈവേദ്യമങ്ഗീകൃതം

ജ്ഞാത്വാ തത്ത്വചതുഷ്ടയം പ്രഥമതോ മന്യേ സുതൃപ്താം തതഃ.

ദേവീം ത്വാം പരിശിഷ്ടമമ്ബ കനകാമത്രേഷു സംസ്ഥാപിതം
ശക്തിഭ്യഃ സമുപാഹാരാമി സകലം ദേവേശി ശംഭുപ്രിയേ৷৷110৷৷

പങ്ക്ത്യോപവിഷ്ടാന്പരിതസ്തു ചക്രം

ശക്ത്യാ സ്വയാലിങ്കിതവാമഭാഗാന്.

സര്വോപചാരൈഃ പരിപൂജ്യ ഭക്ത്യാ
തവാമ്ബികേ പാരിഷദാന്നമാമി৷৷112৷৷

ദൃശ്യതേ തവ മുഖാമ്ബുജം ശിവേ

ശ്രൂയതേ സ്ഫുടമനാഹതധ്വനിഃ.

അര്ചനേ തവ ഗിരാമഗോചരേ
ന പ്രയാതി വിഷയാന്തരം മനഃ৷৷114৷৷

ചക്ഷുഃ പശ്യതു നേഹ കിംചന പരം ഘ്രാണം ന വാ ജിഘ്രതു

ശ്രോത്രം ഹന്ത ശ്രൃണോതു ന ത്വഗപി ന സ്പര്ശം സമാലമ്ബതാമ്.

ജിഹ്വാ വേത്തു ന വാ രസം മമ പരം യുഷ്മത്സ്വരൂപാമൃതേ
നിത്യാനന്ദവിഘൂര്ണമാനനയനേ നിത്യം മനോ മജ്ജതു৷৷116৷৷

ഗണാധിനാഥം വടുകം ച യോഗിനീഃ

ക്ഷേത്രാധിനാഥം ച വിദിക്ചതുഷ്ടയേ.

സര്വോപചാരൈഃ പരിപൂജ്യ ഭക്തിതോ
നിവേദയാമോ ബലിമുക്തയുക്തിഭിഃ৷৷118৷৷

താമ്ബൂലം വിനിവേദയാമി വിലസത്കര്പൂരകസ്തൂരികാ-

ജാതീപൂഗലവങ്ഗചൂര്ണഖദിരൈര്ഭക്ത്യാ സമുല്ലാസിതമ്.

സ്ഫൂര്ജദ്രത്നസമുദ്ഗകപ്രണിഹിതം സൌവര്ണപാത്രേ സ്ഥിതൈ-
ര്ദീപൈരുജ്ജ്വലമന്നചൂര്ണരചിതൈരാരാര്തികം ഗൃഹ്യതാമ്৷৷120৷৷

താമ്ബൂലോദ്ഭാസിവക്ത്രൈസ്ത്വദമലവദനാലോകനോല്ലാസിനേത്രൈ-

ശ്ചക്രസ്ഥൈഃ ശക്തിസംഘൈഃ പരിഹൃതവിഷയാസങ്ഗമാകര്ണ്യമാനമ്.

ഗീതജ്ഞാഭിഃ പ്രകാമം മധുരസമധുരം വാദിതം കിംനരീഭി-
ര്വീണാഝംകാരനാദം കലയ പരശിവാനന്ദസംധാനഹേതോഃ৷৷122৷৷

യഥേപ്സിതമനോഗതപ്രകടിതോപചാരാര്ചിതാം

നിജാവരണദേവതാഗണവൃതാം സുരേശസ്ഥിതാമ്.

കൃതാഞ്ജലിപുടോ മുഹുഃ കലിതഭൂമിരഷ്ടാങ്ഗകൈ-
ര്നമാമി ഭഗവത്യഹം ത്രിപുരസുന്ദരി ത്രാഹി മാമ്৷৷124৷৷

ക്വാഹം മന്ദമതിഃ ക്വ ചേദമഖിലൈരേകാന്തഭക്തൈഃ സ്തുതം

ധ്യാതം ദേവി തഥാപി തേ സ്വമനസാ ശ്രീപാദുകാപൂജനമ്.

കാദാചിത്കമദീയചിന്തനവിധൌ സംതുഷ്ടയാ ശര്മദം
സ്തോത്രം ദേവതയാ തയാ പ്രകടിതം മന്യേ മദീയാനനേ৷৷126৷৷