Devotional Hyms - Devi





৷৷śrīḥ৷৷

৷৷saundaryalaharī৷৷
śivaḥ śaktyā yuktō yadi bhavati śaktaḥ prabhavituṅ

na cēdēvaṅ dēvō na khalu kuśalaḥ spanditumapi.

atastvāmārādhyāṅ hariharaviriñcādibhirapi
praṇantuṅ stōtuṅ vā kathamakṛtapuṇyaḥ prabhavati৷৷1৷৷

tanīyāṅsaṅ pāṅsuṅ tava caraṇapaṅkēruhabhavaṅ

viriñciḥ saṅcinvanviracayati lōkānavikalam.

vahatyēnaṅ śauriḥ kathamapi sahasrēṇa śirasāṅ
haraḥ saṅkṣudyainaṅ bhajati bhasitōddhūlanavidhim৷৷2৷৷

avidyānāmantastimiramihiradvīpanagarī

jaḍānāṅ caitanyastabakamakarandasrutijharī.

daridrāṇāṅ cintāmaṇiguṇanikā janmajaladhau
nimagnānāṅ daṅṣṭrā muraripuvarāhasya bhavati৷৷3৷৷

tvadanyaḥ pāṇibhyāmabhayavaradō daivatagaṇa-

stvamēkā naivāsi prakaṭitavarābhītyabhinayā.

bhayāttrātuṅ dātuṅ phalamapi ca vāñchāsamadhikaṅ
śaraṇyē lōkānāṅ tava hi caraṇāvēva nipuṇau৷৷4৷৷

haristvāmārādhya praṇatajanasaubhāgyajananīṅ

purā nārī bhūtvā puraripumapi kṣōbhamanayat.

smarō.pi tvāṅ natvā ratinayanalēhyēna vapuṣā
munīnāmapyantaḥ prabhavati hi mōhāya mahatām৷৷5৷৷

dhanuḥ pauṣpaṅ maurvī madhukaramayī pañca viśikhā

vasantaḥ sāmantō malayamarudāyōdhanarathaḥ.

tathāpyēkaḥ sarvaṅ himagirisutē kāmapi kṛpā-
mapāṅgāttē labdhvā jagadidamanaṅgō vijayatē৷৷6৷৷

kvaṇatkāñcīdāmā karikalabhakumbhastananatā

parikṣīṇā madhyē pariṇataśaraccandravadanā.

dhanurbāṇānpāśaṅ sṛṇimapi dadhānā karatalaiḥ
purastādāstāṅ naḥ puramathiturāhōpuruṣikā৷৷7৷৷

sudhāsindhōrmadhyē suraviṭapivāṭīparivṛtē

maṇidvīpē nīpōpavanavati cintāmaṇigṛhē.

śivākārē mañcē paramaśivaparyaṅkanilayāṅ
bhajanti tvāṅ dhanyāḥ katicana cidānandalaharīm৷৷8৷৷

mahīṅ mūlādhārē kamapi maṇipūrē hutavahaṅ

sthitaṅ svādhiṣṭhānē hṛdi marutamākāśamupari.

manō.pi bhrūmadhyē sakalamapi bhittvā kulapathaṅ
sahasrārē padmē saha rahasi patyā viharasē৷৷9৷৷

sudhādhārāsāraiścaraṇayugalāntarvigalitaiḥ

prapañcaṅ siñcantī punarapi rasāmnāyamahasaḥ.

avāpya svāṅ bhūmiṅ bhujaganibhamadhyuṣṭavalayaṅ
svamātmānaṅ kṛtvā svapiṣi kulakuṇḍē kuhariṇi৷৷10৷৷

caturbhiḥ śrīkaṇṭhaiḥ śivayuvatibhiḥ pañcabhirapi

prabhinnābhiḥ śaṅbhōrnavabhirapi mūlaprakṛtibhiḥ.

catuścatvāriṅśadvasudalakalāśratrivalaya-
trirēkhābhiḥ sārdhaṅ tava śaraṇakōṇāḥ pariṇatāḥ৷৷11৷৷

tvadīyaṅ saundaryaṅ tuhinagirikanyē tulayituṅ

kavīndrāḥ kalpantē kathamapi viriñciprabhṛtayaḥ.

yadālōkautsukyādamaralalanā yānti manasā
tapōbhirduṣprāpāmapi giriśasāyujyapadavīm৷৷12৷৷

naraṅ varṣīyāṅsaṅ nayanavirasaṅ narmasu jaḍaṅ

tavāpāṅgālōkē patitamanudhāvanti śataśaḥ.

galadvēṇībandhāḥ kucakalaśavisrastasicayā
haṭhāttruṭyatkāñcyō vigalitadukūlā yuvatayaḥ৷৷13৷৷

kṣitau ṣaṭpañcāśaddvisamadhikapañcāśadudakē

hutāśē dvāṣaṣṭiścaturaghikapañcāśadanilē.

divi dviḥṣaṭtriṅśanmanasi ca catuḥṣaṣṭiriti yē
mayūkhāstēṣāmapyupari tava pādāmbujayugam৷৷14৷৷

śarajjyōtsnāśuddhāṅ śaśiyutajaṭājūṭamakuṭāṅ

varatrāsatrāṇasphaṭikaghaṭikāpustakakarām.

sakṛnna tvā natvā kathamiva satāṅ saṅnidadhatē
madhukṣīradrākṣāmadhurimadhurīṇāḥ phaṇitayaḥ৷৷15৷৷

kavīndrāṇāṅ cētaḥkamalavanabālātaparuciṅ

bhajantē yē santaḥ katicidaruṇāmēva bhavatīm.

viriñciprēyasyāstaruṇataraśṛṅgāralaharī-
gabhīrābhirvāgbhirvidadhati satāṅ rañjanamamī৷৷16৷৷

savitrībhirvācāṅ śaśimaṇiśilābhaṅgarucibhi-

rvaśinyādyābhistvāṅ saha janani saṅcintayati yaḥ.

sa kartā kāvyānāṅ bhavati mahatāṅ bhaṅgirucibhi-
rvacōbhirvāgdēvīvadanakamalāmōdamadhuraiḥ৷৷17৷৷

tanucchāyābhistē taruṇataraṇiśrīsaraṇibhi-

rdivaṅ sarvāmurvīmaruṇimani magnāṅ smarati yaḥ.

bhavantyasya trasyadvanahariṇaśālīnanayanāḥ
sahōrvaśyā vaśyāḥ kati kati na gīrvāṇagaṇikāḥ৷৷18৷৷

mukhaṅ binduṅ kṛtvā kucayugamadhastasya tadadhō

harārdhaṅ dhyāyēdyō haramahiṣi tē manmathakalām.

sa sadyaḥ saṅkṣōbhaṅ nayati vanitā ityatilaghu
trilōkīmapyāśu bhramayati ravīndustanayugām৷৷19৷৷

kirantīmaṅgēbhyaḥ kiraṇanikurumbāmṛtarasaṅ

hṛdi tvāmādhattē himakaraśilāmūrtimiva yaḥ.

sa sarpāṇāṅ darpaṅ śamayati śakuntādhipa iva
jvarapluṣṭāndṛṣṭyā sukhayati sudhādhārasirayā৷৷20৷৷

taṭillēkhātanvīṅ tapanaśaśivaiśvānaramayīṅ

niṣaṇṇāṅ ṣaṇṇāmapyupari kamalānāṅ tava kalām.

mahāpadmāṭavyāṅ mṛditamalamāyēna manasā
mahāntaḥ paśyantō dadhati paramāhlādalaharīm৷৷21৷৷

bhavāni tvaṅ dāsē mayi vitara dṛṣṭiṅ sakaruṇā-

miti stōtuṅ vāñchankathayati bhavāni tvamiti yaḥ.

tadaiva tvaṅ tasmai diśasi nijasāyujyapadavīṅ
mukundabrahmēndrasphuṭamakuṭanīrājitapadām৷৷22৷৷

tvayā hṛtvā vāmaṅ vapuraparitṛptēna manasā

śarīrārdhaṅ śaṅbhōraparamapi śaṅkē hṛtamabhūt.

yadētattvadrūpaṅ sakalamaruṇābhaṅ trinayanaṅ
kucābhyāmānamraṅ kuṭilaśaśicūḍālamakuṭam৷৷23৷৷

jagatsūtē dhātā hariravati rudraḥ kṣapayatē

tiraskurvannētatsvamapi vapurīśastirayati.

sadāpūrvaḥ sarvaṅ tadidamanugṛhṇāti ca śiva-
stavājñāmālambya kṣaṇacalitayōrbhrūlatikayōḥ৷৷24৷৷

trayāṇāṅ dēvānāṅ triguṇajanitānāṅ tava śivē

bhavētpūjā pūjā tava caraṇayōryā viracitā.

tathāhi tvatpādōdvahanamaṇipīṭhasya nikaṭē
sthitā hyētē śaśvanmukulitakarōttaṅsamakuṭāḥ৷৷25৷৷

viriñciḥ pañcatvaṅ vrajati harirāpnōti viratiṅ

vināśaṅ kīnāśō bhajati dhanadō yāti nidhanam.

vitandrī māhēndrī vitatirapi saṅmīlitadṛśā
mahāsaṅhārē.sminviharati sati tvatpatirasau৷৷26৷৷

japō jalpaḥ śilpaṅ sakalamapi mudrāviracanā

gatiḥ prādakṣiṇyakramaṇamaśanādyāhutividhiḥ.

praṇāmaḥ saṅvēśaḥ sukhamakhilamātmārpaṇadṛśā
saparyāparyāyastava bhavatu yanmē vilasitam৷৷27৷৷

sudhāmapyāsvādya pratibhayajarāmṛtyuhariṇīṅ

vipadyantē viśvē vidhiśatamakhādyā diviṣadaḥ.

karālaṅ yatkṣvēlaṅ kabalitavataḥ kālakalanā
na śaṅbhōstanmūlaṅ tava janani tāṭaṅkamahimā৷৷28৷৷

kirīṭaṅ vairiñcaṅ parihara puraḥ kaiṭabhabhidaḥ

kaṭhōrē kōṭīrē skhalasi jahi jambhārimakuṭam.

praṇamrēṣvētēṣu prasabhamupayātasya bhavanaṅ
bhavasyābhyutthānē tava parijanōktirvijayatē৷৷29৷৷

svadēhōdbhūtābhirghṛṇibhiraṇimādyābhirabhitō

niṣēvyē nityē tvāmahamiti sadā bhāvayati yaḥ.

kimāścaryaṅ tasya nninayanasamṛddhiṅ tṛṇayatō
mahāsaṅvartāgnirviracayati nīrājanavidhim৷৷30৷৷

catuḥṣaṣṭyā tantraiḥ sakalamatisandhāya bhuvanaṅ

sthitastattatsiddhiprasavaparatantraiḥ paśupatiḥ.

punastvannirbandhādakhilapuruṣārthaikaghaṭanā-
svatantraṅ tē tantraṅ kṣititalamavātītaradidam৷৷31৷৷

śivaḥ śaktiḥ kāmaḥ kṣitiratha raviḥ śītakiraṇaḥ

smarō haṅsaḥ śakrastadanu ca parāmāraharayaḥ.

amī hṛllēkhābhistisṛbhiravasānēṣu ghaṭitā
bhajantē varṇāstē tava janani nāmāvayavatām৷৷32৷৷

smaraṅ yōniṅ lakṣmīṅ tritayamidamādau tava manō-

rnidhāyaikē nityē niravadhimahābhōgarasikāḥ.

bhajanti tvāṅ cintāmaṇiguṇanibaddhākṣavalayāḥ
śivāgnau juhvantaḥ surabhighṛtadhārāhutiśataiḥ৷৷33৷৷

śarīraṅ tvaṅ śaṅbhōḥ śaśimihiravakṣōruhayugaṅ

tavātmānaṅ manyē bhagavati navātmānamanagham.

ataḥ śēṣaḥ śēṣītyayamubhayasādhāraṇatayā
sthitaḥ saṅbandhō vāṅ samarasaparānandaparayōḥ৷৷34৷৷

manastvaṅ vyōma tvaṅ marudasi marutsārathirasi

tvamāpastvaṅ bhūmistvayi pariṇatāyāṅ na hi param.

tvamēva svātmānaṅ pariṇamayituṅ viśvavapuṣā
cidānandākāraṅ śivayuvati bhāvēna bibhṛṣē৷৷35৷৷

tavājñācakrasthaṅ tapanaśaśikōṭidyutidharaṅ

paraṅ śaṅbhuṅ vandē parimilitapāśrvaṅ paracitā.

yamārādhyanbhaktyā raviśaśiśucīnāmaviṣayē
nirālōkē.lōkē nivasati hi bhālōkabhuvanē৷৷36৷৷

viśuddhau tē śuddhasphaṭikaviśadaṅ vyōmajanakaṅ

śivaṅ sēvē dēvīmapi śivasamānavyavasitām.

yayōḥ kāntyā yāntyāḥ śaśikiraṇasārūpyasaraṇē-
rvidhūtāntardhvāntā vilasati cakōrīva jagatī৷৷37৷৷

samunmīlatsaṅvitkamalamakarandaikarasikaṅ

bhajē haṅsadvandvaṅ kimapi mahatāṅ mānasacaram.

yadālāpādaṣṭādaśaguṇitavidyāpariṇati-
ryadādattē dōṣādguṇamakhilamadbhyaḥ paya iva৷৷38৷৷

tava svādhiṣṭhānē hutavahamadhiṣṭhāya nirataṅ

tamīḍē saṅvartaṅ janani mahatīṅ tāṅ ca samayām.

yadālōkē lōkāndahati mahati krōdhakalitē
dayārdrā yā dṛṣṭiḥ śiśiramupacāraṅ racayati৷৷39৷৷

taṭittvantaṅ śaktyā timiraparipanthisphuraṇayā

sphurannānāratnābharaṇapariṇaddhēndradhanuṣam.

tava śyāmaṅ mēghaṅ kamapi maṇipūraikaśaraṇaṅ
niṣēvē varṣantaṅ haramihirataptaṅ tribhuvanam৷৷40৷৷

tavādhārē mūlē saha samayayā lāsyaparayā

navātmānaṅ manyē navarasamahātāṇḍavanaṭam.

ubhābhyāmētābhyāmudayavidhimuddiśya dayayā
sanāthābhyāṅ jajñē janakajananīmajjagadidam৷৷41৷৷

gatairmāṇikyatvaṅ gaganamaṇibhiḥ sāndraghaṭitaṅ

kirīṭaṅ tē haimaṅ himagirisutē kīrtayati yaḥ.

sa nīḍēyacchāyācchuraṇaśabalaṅ candraśakalaṅ
dhanuḥ śaunāsīraṅ kimiti na nibadhnāti dhiṣaṇām৷৷42৷৷

dhunōtu dhvāntaṅ nastulitadalitēndīvaravanaṅ

ghanasnigdhaślakṣṇaṅ cikuranikurumbaṅ tava śivē.

yadīyaṅ saurabhyaṅ sahajamupalabdhuṅ sumanasō
vasantyasminmanyē valamathanavāṭīviṭapinām৷৷43৷৷

tanōtu kṣēmaṅ nastava vadanasaundaryalaharī-

parīvāhaḥ srōtaḥsaraṇiriva sīmantasaraṇiḥ.

ba(?)hantī sindūraṅ prabalakabarībhāratimira-
dviṣāṅ bṛndairbandīkṛtamiva navīnārkakiraṇam৷৷44৷৷

arālaiḥ svābhāvyādalikalabhasaśrībhiralakaiḥ

parītaṅ tē vaktraṅ parihasati paṅkēruharucim.

darasmērē yasmindaśanarucikiñjalkarucirē
sugandhau mādyanti smaradahanacakṣurmadhulihaḥ৷৷45৷৷

lalāṭaṅ lāvaṇyadyutivimalamābhāti tava ya-

ddvitīyaṅ tanmanyē makuṭaghaṭitaṅ candraśakalam.

viparyāsanyāsādubhayamapi saṅbhūya ca mithaḥ
sudhālēpasyūtiḥ pariṇamati rākāhimakaraḥ৷৷46৷৷

bhruvau bhugnē kiṅcidbhuvanabhayabhaṅgavyasanini

tvadīyē nētrābhyāṅ madhukararucibhyāṅ dhṛtaguṇam.

dhanurmanyē savyētarakaragṛhītaṅ ratipatēḥ
prakōṣṭhē muṣṭau ca sthagayati nigūḍhāntaramumē৷৷47৷৷

ahaḥ sūtē savyaṅ tava nayanamarkātmakatayā

triyāmāṅ vāmaṅ tē sṛjati rajanīnāyakatayā.

tṛtīyā tē dṛṣṭirdaradalitahēmāmbujaruciḥ
samādhattē sandhyāṅ divasaniśayōrantaracarīm৷৷48৷৷

viśālā kalyāṇī sphuṭarucirayōdhyā kuvalayaiḥ

kṛpādhārādhārā kimapi madhurābhōgavatikā.

avantī dṛṣṭistē bahunagaravistāravijayā
dhruvaṅ tattannāmavyavaharaṇayōgyā vijayatē৷৷49৷৷

kavīnāṅ saṅdarbhastabakamakarandaikarasikaṅ

kaṭākṣavyākṣēpabhramarakalabhau karṇayugalam.

amuñcantau dṛṣṭvā tava navarasāsvādataralā-
vasūyāsaṅsargādalikanayanaṅ kiṅcidaruṇam৷৷50৷৷

śivē śrṛṅgārārdrā taditarajanē kutsanaparā

sarōṣā gaṅgāyāṅ giriśacaritē vismayavatī.

harāhibhyō bhītā sarasiruhasaubhāgyajananī
sakhīṣu smērā tē mayi janani dṛṣṭiḥ sakaruṇā৷৷51৷৷

gatē karṇābhyarṇaṅ garuta iva pakṣmāṇi dadhatī

purāṅ bhēttuśicattapraśamarasavidrāvaṇaphalē.

imē nētrē gōtrādharapatikulōttaṅsakalikē
tavākarṇākṛṣṭasmaraśaravilāsaṅ kalayataḥ৷৷52৷৷

vibhaktatraivarṇyaṅ vyatikaritalīlāñjanatayā

vibhāti tvannētratritayamidamīśānadayitē.

punaḥ sraṣṭuṅ dēvāndruhiṇaharirudrānuparatā-
nrajaḥ sattvaṅ bibhrattama iti guṇānāṅ trayamiva৷৷53৷৷

pavitrīkartuṅ naḥ paśupatiparādhīnahṛdayē

dayāmitrairnētrairaruṇadhavalaśyāmarucibhiḥ.

nadaḥ śōṇō gaṅgā tapanatanayēti dhruvamamuṅ
trayāṇāṅ tīrthānāmupanayasi saṅbhēdamanagham৷৷54৷৷

nimēṣōnmēṣābhyāṅ pralayamudayaṅ yāti jagatī

tavētyāhuḥ santō dharaṇidhararājanyatanayē.

tvadunmēṣājjātaṅ jagadidamaśēṣaṅ pralayataḥ
paritrātuṅ śaṅkē parihṛtanimēṣāstava dṛśaḥ৷৷55৷৷

tavāparṇē karṇējapanayanapaiśunyacakitā

nilīyantē tōyē niyatamanimēṣāḥ śapharikāḥ.

iyaṅ ca śrīrbaddhacchadapuṭakavāṭaṅ kuvalayaṅ
jahāti pratyūṣē niśi ca vighaṭayya praviśati৷৷56৷৷

dṛśā drāghīyasyā daradalitanīlōtpalarucā

davīyāṅsaṅ dīnaṅ snapaya kṛpayā māmapi śivē.

anēnāyaṅ dhanyō bhavati na ca tē hāniriyatā
vanē vā harmyē vā samakaranipātō himakaraḥ৷৷57৷৷

arālaṅ tē pālīyugalamagarājanyatanayē

na kēṣāmādhattē kusumaśarakōdaṇḍakutukam.

tiraścīnō yatra śravaṇapathamullaṅghya vilasa-
nnapāṅgavyāsaṅgō diśati śarasaṅdhānadhiṣaṇām৷৷58৷৷

sphuradgaṇḍābhōgapratiphalitāṭaṅkayugalaṅ

catuścakraṅ manyē tava sukhamidaṅ manmatharatham.

yamāruhya druhyatyavanirathamarkēnducaraṇaṅ
mahāvīrō māraḥ pramathapatayē sajjitavatē৷৷59৷৷

sarasvatyāḥ sūktīramṛtalaharīkauśalaharīḥ

pibantyāḥ śarvāṇi śravaṇaculukābhyāmaviralam.

camatkāraślāghācalitaśirasaḥ kuṇḍalagaṇō
jhaṇatkāraistāraiḥ prativacanamācaṣṭa iva tē৷৷60৷৷

asau nāsāvaṅśastuhinagirivaṅśadhvajapaṭi

tvadīyō nēdīyaḥ phalatu phalamasmākamucitam.

vahatyantarmuktāḥ śiśirakaraniśvāsagalitaṅ
samṛddhyā yattāsāṅ bahirapi ca muktāmaṇidharaḥ৷৷61৷৷

prakṛtyā raktāyāstava sudati dantacchadarucēḥ

pravakṣyē sādṛśyaṅ janayatu phalaṅ vidrumalatā.

na bimbaṅ tadbimbapratiphalanarāgāruṇitaṅ
tulāmadhyārōḍhuṅ kathamiva vilajjēta kalayā৷৷62৷৷

smitajyōtsnājālaṅ tava vadanacandrasya pibatāṅ

cakōrāṇāmāsīdatirasatayā cañcujaḍimā.

atastē śītāṅśōramṛtalaharīmāmlarucayaḥ
pibanti svacchandaṅ niśiniśi bhṛśaṅ kāñjikadhiyā৷৷63৷৷

aviśrāntaṅ patyurguṇagaṇakathāmrēḍanajapā

japāpuṣpacchāyā tava janani jihvā jayati sā.

yadagrāsīnāyāḥ sphaṭikadṛṣadacchacchavimayī
sarasvatyā mūrtiḥ pariṇamati māṇikyavapuṣā৷৷64৷৷

raṇē jitvā daityānapahṛtaśirastraiḥ kavacibhi-

rnivṛttaiścaṇḍāṅśatripuraharanirmālyavimukhaiḥ.

viśākhēndrōpēndraiḥ śaśiviśadakarpūraśakalā
vilīyantē mātastava vadanatāmbūlakabalāḥ৷৷65৷৷

vipañcyā gāyantī vividhamapadānaṅ paśupatē-

stvayārabdhē vaktuṅ calitaśirasā sādhuvacanē.

tadīyairmādhuryairapalapitatantrīkalaravāṅ
nijāṅ vīṇāṅ vāṇī niculayati cōlēna nibhṛtam৷৷66৷৷

karāgrēṇa spṛṣṭaṅ tuhinagiriṇā vatsalatayā

girīśēnōdastaṅ muhuradharapānākulatayā.

karagrāhyaṅ śaṅbhōrmukhamukuravṛntaṅ girisutē
kathaṅkāraṅ brūmastava cubukamaupamyarahitam৷৷67৷৷

bhujāślēṣānnityaṅ puradamayituḥ kaṇṭakavatī

tava grīvā dhattē mukhakamalanālaśriyamiyam.

svataḥ śvētā kālāgurubahulajambālamalinā
mṛṇālīlālityaṅ vahati yadadhō hāralatikā৷৷68৷৷

galē rēkhāstisrō gatigamakagītaikanipuṇē

vivāhavyānaddhapraguṇaguṇasaṅkhyāpratibhuvaḥ.

virājantē nānāvidhamadhurarāgākarabhuvāṅ
trayāṇāṅ grāmāṇāṅ sthitiniyamasīmāna iva tē৷৷69৷৷

mṛṇālīmṛdvīnāṅ tava bhujalatānāṅ catasṛṇāṅ

caturbhiḥ saundaryaṅ sarasijabhavaḥ stauti vadanaiḥ.

nakhēbhyaḥ saṅtrasyanprathamamathanādandhakaripō-
ścuturṇāṅ śīrṣāṇāṅ samamabhayahastārpaṇadhiyā৷৷70৷৷

nakhānāmudyōtairnavanalinarāgaṅ vihasatāṅ

karāṇāṅ tē kāntiṅ kathaya kathayāmaḥ kathamumē.

kayācidvā sāmyaṅ bhajatu kalayā hanta kamalaṅ
yadi krīḍallakṣmīcaraṇatalalākṣārasacaṇam৷৷71৷৷

samaṅ dēvi skandadvipavadanapītaṅ stanayugaṅ

tavēdaṅ naḥ khēdaṅ haratu satataṅ prasnutamukham.

yadālōkyāśaṅkākulitahṛdayō hāsajanakaḥ
svakumbhau hērambaḥ parimṛśati hastēna jhaḍiti৷৷72৷৷

amū tē vakṣōjāvamṛtarasamāṇikyakutupau

na saṅdēhaspandō nagapatipatākē manasi naḥ.

pibantau tau yasmādaviditavadhūsaṅgarasikau
kumārāvadyāpi dviradavadanakrauñcadalanau৷৷73৷৷

vahatyamba stambēramadanujakumbhaprakṛtibhiḥ

samārabdhāṅ muktāmaṇibhiramalāṅ hāralatikām.

kucābhōgō bimbādhararucibhirantaḥ śabalitāṅ
pratāpavyāmiśrāṅ puradamayituḥ kīrtimiva tē৷৷74৷৷

tava stanyaṅ manyē dharaṇidharakanyē hṛdayataḥ

payaḥpārāvāraḥ parivahati sārasvatamiva.

dayāvatyā dattaṅ draviḍaśiśurāsvādya tava ya-
tkavīnāṅ prauḍhānāmajani kamanīyaḥ kavayitā৷৷75৷৷

harakrōdhajvālāvalibhiravalīḍhēna vapuṣā

gabhīrē tē nābhīsarasi kṛtasaṅgō manasijaḥ.

samuttasthau tasmādacalatanayē dhūmalatikā
janastāṅ jānītē tava janani rōmāvaliriti৷৷76৷৷

yadētatkālindītanutarataraṅgākṛti śivē

kṛśē madhyē kiṅcijjanani tava yadbhāti sudhiyām.

vimardādanyōnyaṅ kucakalaśayōrantaragataṅ
tanūbhūtaṅ vyōma praviśadiva nābhiṅ kuhariṇīm৷৷77৷৷

sthirō gaṅgāvartaḥ stanamukularōmāvalilatā-

kalāvālaṅ kuṇḍaṅ kusumaśaratējōhutabhujaḥ.

ratērlīlāgāraṅ kimapi tava nābhirgirisutē
biladvāraṅ siddhērgiriśanayanānāṅ vijayatē৷৷78৷৷

nisargakṣīṇasya stanataṭabharēṇa klamajuṣō

namanmūrtērnārītilaka śanakaistruṭyata iva.

ciraṅ tē madhyasya truṭitataṭinītīrataruṇā
samāvasthāsthēmnō bhavatu kuśalaṅ śailatanayē৷৷79৷৷

kucau sadyaḥ svidyattaṭaghaṭitakūrpāsabhidurau

kaṣantau dōrmūlē kanakakalaśābhau kalayatā.

tava trātuṅ bhaṅgādalamiti valagnaṅ tanubhuvā
tridhā naddhaṅ dēvi trivali lavalīvallibhiriva৷৷80৷৷

gurutvaṅ vistāraṅ kṣitidharapatiḥ pārvati nijā-

nnitambādācchidya tvayi haraṇarūpēṇa nidadhē.

atastē vistīrṇō gururayamaśēṣāṅ vasumatīṅ
nitambaprāgbhāraḥ sthagayati laghutvaṅ nayati ca৷৷81৷৷

karīndrāṇāṅ śuṇḍānkanakakadalīkāṇḍapaṭalī-

mubhābhyāmūrubhyāmubhayamapi nirjitya bhavati.

suvṛttābhyāṅ patyuḥ praṇatikaṭhinābhyāṅ girisutē
vidhijñē jānubhyāṅ vibudhakarikumbhadvayamasi৷৷82৷৷

parājētuṅ rudraṅ dviguṇaśaragarbhau girisutē

niṣaṅgau jaṅghē tē viṣamaviśikhō bāḍhamakṛta.

yadagnē dṛśyantē daśaśaraphalāḥ pādayugalī-
nakhāgracchahmānaḥ suramakuṭaśāṇaikaniśitāḥ৷৷83৷৷

śrutīnāṅ mūrdhānō dadhati tava yau śēkharatayā

mamāpyētau mātaḥ śirasi dayayā dhēhi caraṇau.

yayōḥ pādyaṅ pāthaḥ paśupatijaṭājūṭataṭinī
yayōrlākṣālakṣmīraruṇaharicūḍāmaṇiruciḥ৷৷84৷৷

namōvākaṅ brūmō nayanaramaṇīyāya padayō-

stavāsmai dvandvāya sphuṭarucirasālaktakavatē.

asūyatyatyantaṅ yadabhihananāya spṛhayatē
paśūnāmīśānaḥ pramadavanakaṅkēlitaravē৷৷85৷৷

mṛṣā kṛtvā gōtraskhalanamatha vailakṣyanamitaṅ

lalāṭē bhartāraṅ caraṇakamalē tāḍayati tē.

cirādantaḥśalyaṅ dahanakṛtamunmūlitavatā
tulākōṭikvāṇaiḥ kilikilitamīśānaripuṇā৷৷86৷৷

himānīhantavyaṅ himagirinivāsaikacaturau

niśāyāṅ nidrāṇaṅ niśi caramabhāgē ca viśadau.

varaṅ lakṣmīpātraṅ śriyamatisṛjantau samayināṅ
sarōjaṅ tvatpādau janani jayataśicatramiha kim৷৷87৷৷

padaṅ tē kīrtīnāṅ prapadamapadaṅ dēvi vipadāṅ

kathaṅ nītaṅ sadbhiḥ kaṭhinakamaṭhīkarparatulām.

kathaṅ vā bāhubhyāmupayamanakālē purabhidā
yadādāya nyastaṅ dṛṣadi dayamānēna manasā৷৷88৷৷

nakhairnākastrīṇāṅ karakamalasaṅkōcaśaśibhi-

starūṇāṅ divyānāṅ hasata iva tē caṇḍi caraṇau.

phalāni svaḥsthēbhyaḥ kisalayakarāgrēṇa dadatāṅ
daridrēbhyō bhadrāṅ śriyamaniśamahnāya dadatau৷৷89৷৷

dadānē dīnēbhyaḥ śriyamaniśamāśānusadṛśī-

mamandaṅ saundaryaprakaramakarandaṅ vikirati.

tavāsminmandārastabakasubhagē yātu caraṇē
nimajjanmajjīvaḥ karaṇacaraṇaḥ ṣaṭcaraṇatām৷৷90৷৷

padanyāsakrīḍāparicayamivārabdhumanasaḥ

skhalantastē khēlaṅ bhavanakalahaṅsā na jahati.

atastēṣāṅ śikṣāṅ subhagamaṇimañjīraraṇita-
cchalādācakṣāṇaṅ caraṇakamalaṅ cārucaritē৷৷91৷৷

gatāstē mañcatvaṅ druhiṇaharirudrēśvarabhṛtaḥ

śivaḥ svacchacchāyāghaṭitakapaṭapracchadapaṭaḥ.

tvadīyānāṅ bhāsāṅ pratiphalanarāgāruṇatayā
śarīrī śrṛṅgārō rasa iva dṛśāṅ dōgdhi kutukam৷৷92৷৷

arālā kēśēṣu prakṛtisaralā mandahasitē

śirīṣābhā cittē dṛṣadupalaśōbhā kucataṭē.

bhṛśaṅ tanvī madhyē pṛthururasijārōhaviṣayē
jagattrātuṅ śaṅbhōrjayati karuṇā kācidaruṇā৷৷93৷৷

kalaṅkaḥ kastūrī rajanikarabimbaṅ jalamayaṅ

kalābhiḥ karpūrairmarakatakaraṇḍaṅ nibiḍitam.

atastvadbhōgēna pratidinamidaṅ riktakuharaṅ
vidhirbhūyō bhūyō nibiḍayati nūnaṅ tava kṛtē৷৷94৷৷

purārātērantaḥpuramasi tatastvaccaraṇayōḥ

saparyāmaryādā taralakaraṇānāmasulabhā.

tathā hyētē nītāḥ śatamakhamukhāḥ siddhimatulāṅ
tava dvārōpāntasthitibhiraṇimādyābhiramarāḥ৷৷95৷৷

kalatraṅ vaidhātraṅ katikati bhajantē na kavayaḥ

śriyō dēvyāḥ kō vā na bhavati patiḥ kairapi dhanaiḥ.

mahādēvaṅ hitvā tava sati satīnāmacaramē
kucābhyāmāsaṅgaḥ kuravakatarōrapyasulabhaḥ৷৷96৷৷

girāmāhurdēvīṅ druhiṇagṛhiṇīmāgamavidō

harēḥ patnīṅ padmāṅ harasahacarīmadritanayām.

turīyā kāpi tvaṅ duradhigamaniḥsīmamahimā
mahāmāyā viśvaṅ bhramayasi parabrahmamahiṣi৷৷97৷৷

kadā kālē mātaḥ kathaya kalitālaktakarasaṅ

pibēyaṅ vidyārthī tava caraṇanirṇējanajalam.

prakṛtyā mūkānāmapi ca kavitākāraṇatayā
kadā dhattē vāṇīmukhakamalatāmbūlarasatām৷৷98৷৷

sarasvatyā lakṣmyā vidhiharisapatnō viharatē

ratēḥ pātivratyaṅ śithilayati ramyēṇa vapuṣā.

ciraṅ jīvannēva kṣapitapaśupāśavyatikaraḥ
parānandābhikhyaṅ rasayati rasaṅ tvadbhajanavān৷৷99৷৷

pradīpajvālābhirdivasakaranīrājanavidhiḥ

sudhāsūtēścandrōpalajalalavairarghyaracanā.

svakīyairambhōbhiḥ salilanidhisauhityakaraṇaṅ
tvadīyābhirvāgbhistava janani vācāṅ stutiriyam৷৷100৷৷


iti śrīmatparamahaṅsaparivrājakācāryasya

śrīgōvindabhagavatpūjyapādaśiṣyasya

śrīmacchaṅkarabhagavataḥ kṛtau

saundaryalaharī saṅpūrṇā৷৷