Devotional Hyms - Devi





||ଶ୍ରୀଃ||

||ସୌନ୍ଦର୍ଯଲହରୀ||
ଶିବଃ ଶକ୍ତ୍ଯା ଯୁକ୍ତୋ ଯଦି ଭବତି ଶକ୍ତଃ ପ୍ରଭବିତୁଂ

ନ ଚେଦେବଂ ଦେବୋ ନ ଖଲୁ କୁଶଲଃ ସ୍ପନ୍ଦିତୁମପି|

ଅତସ୍ତ୍ବାମାରାଧ୍ଯାଂ ହରିହରବିରିଞ୍ଚାଦିଭିରପି
ପ୍ରଣନ୍ତୁଂ ସ୍ତୋତୁଂ ବା କଥମକୃତପୁଣ୍ଯଃ ପ୍ରଭବତି||1||

ତନୀଯାଂସଂ ପାଂସୁଂ ତବ ଚରଣପଙ୍କେରୁହଭବଂ

ବିରିଞ୍ଚିଃ ସଂଚିନ୍ବନ୍ବିରଚଯତି ଲୋକାନବିକଲମ୍|

ବହତ୍ଯେନଂ ଶୌରିଃ କଥମପି ସହସ୍ରେଣ ଶିରସାଂ
ହରଃ ସଂକ୍ଷୁଦ୍ଯୈନଂ ଭଜତି ଭସିତୋଦ୍ଧୂଲନବିଧିମ୍||2||

ଅବିଦ୍ଯାନାମନ୍ତସ୍ତିମିରମିହିରଦ୍ବୀପନଗରୀ

ଜଡାନାଂ ଚୈତନ୍ଯସ୍ତବକମକରନ୍ଦସ୍ରୁତିଝରୀ|

ଦରିଦ୍ରାଣାଂ ଚିନ୍ତାମଣିଗୁଣନିକା ଜନ୍ମଜଲଧୌ
ନିମଗ୍ନାନାଂ ଦଂଷ୍ଟ୍ରା ମୁରରିପୁବରାହସ୍ଯ ଭବତି||3||

ତ୍ବଦନ୍ଯଃ ପାଣିଭ୍ଯାମଭଯବରଦୋ ଦୈବତଗଣ-

ସ୍ତ୍ବମେକା ନୈବାସି ପ୍ରକଟିତବରାଭୀତ୍ଯଭିନଯା|

ଭଯାତ୍ତ୍ରାତୁଂ ଦାତୁଂ ଫଲମପି ଚ ବାଞ୍ଛାସମଧିକଂ
ଶରଣ୍ଯେ ଲୋକାନାଂ ତବ ହି ଚରଣାବେବ ନିପୁଣୌ||4||

ହରିସ୍ତ୍ବାମାରାଧ୍ଯ ପ୍ରଣତଜନସୌଭାଗ୍ଯଜନନୀଂ

ପୁରା ନାରୀ ଭୂତ୍ବା ପୁରରିପୁମପି କ୍ଷୋଭମନଯତ୍|

ସ୍ମରୋପି ତ୍ବାଂ ନତ୍ବା ରତିନଯନଲେହ୍ଯେନ ବପୁଷା
ମୁନୀନାମପ୍ଯନ୍ତଃ ପ୍ରଭବତି ହି ମୋହାଯ ମହତାମ୍||5||

ଧନୁଃ ପୌଷ୍ପଂ ମୌର୍ବୀ ମଧୁକରମଯୀ ପଞ୍ଚ ବିଶିଖା

ବସନ୍ତଃ ସାମନ୍ତୋ ମଲଯମରୁଦାଯୋଧନରଥଃ|

ତଥାପ୍ଯେକଃ ସର୍ବଂ ହିମଗିରିସୁତେ କାମପି କୃପା-
ମପାଙ୍ଗାତ୍ତେ ଲବ୍ଧ୍ବା ଜଗଦିଦମନଙ୍ଗୋ ବିଜଯତେ||6||

କ୍ବଣତ୍କାଞ୍ଚୀଦାମା କରିକଲଭକୁମ୍ଭସ୍ତନନତା

ପରିକ୍ଷୀଣା ମଧ୍ଯେ ପରିଣତଶରଚ୍ଚନ୍ଦ୍ରବଦନା|

ଧନୁର୍ବାଣାନ୍ପାଶଂ ସୃଣିମପି ଦଧାନା କରତଲୈଃ
ପୁରସ୍ତାଦାସ୍ତାଂ ନଃ ପୁରମଥିତୁରାହୋପୁରୁଷିକା||7||

ସୁଧାସିନ୍ଧୋର୍ମଧ୍ଯେ ସୁରବିଟପିବାଟୀପରିବୃତେ

ମଣିଦ୍ବୀପେ ନୀପୋପବନବତି ଚିନ୍ତାମଣିଗୃହେ|

ଶିବାକାରେ ମଞ୍ଚେ ପରମଶିବପର୍ଯଙ୍କନିଲଯାଂ
ଭଜନ୍ତି ତ୍ବାଂ ଧନ୍ଯାଃ କତିଚନ ଚିଦାନନ୍ଦଲହରୀମ୍||8||

ମହୀଂ ମୂଲାଧାରେ କମପି ମଣିପୂରେ ହୁତବହଂ

ସ୍ଥିତଂ ସ୍ବାଧିଷ୍ଠାନେ ହୃଦି ମରୁତମାକାଶମୁପରି|

ମନୋପି ଭ୍ରୂମଧ୍ଯେ ସକଲମପି ଭିତ୍ତ୍ବା କୁଲପଥଂ
ସହସ୍ରାରେ ପଦ୍ମେ ସହ ରହସି ପତ୍ଯା ବିହରସେ||9||

ସୁଧାଧାରାସାରୈଶ୍ଚରଣଯୁଗଲାନ୍ତର୍ବିଗଲିତୈଃ

ପ୍ରପଞ୍ଚଂ ସିଞ୍ଚନ୍ତୀ ପୁନରପି ରସାମ୍ନାଯମହସଃ|

ଅବାପ୍ଯ ସ୍ବାଂ ଭୂମିଂ ଭୁଜଗନିଭମଧ୍ଯୁଷ୍ଟବଲଯଂ
ସ୍ବମାତ୍ମାନଂ କୃତ୍ବା ସ୍ବପିଷି କୁଲକୁଣ୍ଡେ କୁହରିଣି||10||

ଚତୁର୍ଭିଃ ଶ୍ରୀକଣ୍ଠୈଃ ଶିବଯୁବତିଭିଃ ପଞ୍ଚଭିରପି

ପ୍ରଭିନ୍ନାଭିଃ ଶଂଭୋର୍ନବଭିରପି ମୂଲପ୍ରକୃତିଭିଃ|

ଚତୁଶ୍ଚତ୍ବାରିଂଶଦ୍ବସୁଦଲକଲାଶ୍ରତ୍ରିବଲଯ-
ତ୍ରିରେଖାଭିଃ ସାର୍ଧଂ ତବ ଶରଣକୋଣାଃ ପରିଣତାଃ||11||

ତ୍ବଦୀଯଂ ସୌନ୍ଦର୍ଯଂ ତୁହିନଗିରିକନ୍ଯେ ତୁଲଯିତୁଂ

କବୀନ୍ଦ୍ରାଃ କଲ୍ପନ୍ତେ କଥମପି ବିରିଞ୍ଚିପ୍ରଭୃତଯଃ|

ଯଦାଲୋକୌତ୍ସୁକ୍ଯାଦମରଲଲନା ଯାନ୍ତି ମନସା
ତପୋଭିର୍ଦୁଷ୍ପ୍ରାପାମପି ଗିରିଶସାଯୁଜ୍ଯପଦବୀମ୍||12||

ନରଂ ବର୍ଷୀଯାଂସଂ ନଯନବିରସଂ ନର୍ମସୁ ଜଡଂ

ତବାପାଙ୍ଗାଲୋକେ ପତିତମନୁଧାବନ୍ତି ଶତଶଃ|

ଗଲଦ୍ବେଣୀବନ୍ଧାଃ କୁଚକଲଶବିସ୍ରସ୍ତସିଚଯା
ହଠାତ୍ତ୍ରୁଟ୍ଯତ୍କାଞ୍ଚ୍ଯୋ ବିଗଲିତଦୁକୂଲା ଯୁବତଯଃ||13||

କ୍ଷିତୌ ଷଟ୍ପଞ୍ଚାଶଦ୍ଦ୍ବିସମଧିକପଞ୍ଚାଶଦୁଦକେ

ହୁତାଶେ ଦ୍ବାଷଷ୍ଟିଶ୍ଚତୁରଘିକପଞ୍ଚାଶଦନିଲେ|

ଦିବି ଦ୍ବିଃଷଟ୍ତ୍ରିଂଶନ୍ମନସି ଚ ଚତୁଃଷଷ୍ଟିରିତି ଯେ
ମଯୂଖାସ୍ତେଷାମପ୍ଯୁପରି ତବ ପାଦାମ୍ବୁଜଯୁଗମ୍||14||

ଶରଜ୍ଜ୍ଯୋତ୍ସ୍ନାଶୁଦ୍ଧାଂ ଶଶିଯୁତଜଟାଜୂଟମକୁଟାଂ

ବରତ୍ରାସତ୍ରାଣସ୍ଫଟିକଘଟିକାପୁସ୍ତକକରାମ୍|

ସକୃନ୍ନ ତ୍ବା ନତ୍ବା କଥମିବ ସତାଂ ସଂନିଦଧତେ
ମଧୁକ୍ଷୀରଦ୍ରାକ୍ଷାମଧୁରିମଧୁରୀଣାଃ ଫଣିତଯଃ||15||

କବୀନ୍ଦ୍ରାଣାଂ ଚେତଃକମଲବନବାଲାତପରୁଚିଂ

ଭଜନ୍ତେ ଯେ ସନ୍ତଃ କତିଚିଦରୁଣାମେବ ଭବତୀମ୍|

ବିରିଞ୍ଚିପ୍ରେଯସ୍ଯାସ୍ତରୁଣତରଶୃଙ୍ଗାରଲହରୀ-
ଗଭୀରାଭିର୍ବାଗ୍ଭିର୍ବିଦଧତି ସତାଂ ରଞ୍ଜନମମୀ||16||

ସବିତ୍ରୀଭିର୍ବାଚାଂ ଶଶିମଣିଶିଲାଭଙ୍ଗରୁଚିଭି-

ର୍ବଶିନ୍ଯାଦ୍ଯାଭିସ୍ତ୍ବାଂ ସହ ଜନନି ସଂଚିନ୍ତଯତି ଯଃ|

ସ କର୍ତା କାବ୍ଯାନାଂ ଭବତି ମହତାଂ ଭଙ୍ଗିରୁଚିଭି-
ର୍ବଚୋଭିର୍ବାଗ୍ଦେବୀବଦନକମଲାମୋଦମଧୁରୈଃ||17||

ତନୁଚ୍ଛାଯାଭିସ୍ତେ ତରୁଣତରଣିଶ୍ରୀସରଣିଭି-

ର୍ଦିବଂ ସର୍ବାମୁର୍ବୀମରୁଣିମନି ମଗ୍ନାଂ ସ୍ମରତି ଯଃ|

ଭବନ୍ତ୍ଯସ୍ଯ ତ୍ରସ୍ଯଦ୍ବନହରିଣଶାଲୀନନଯନାଃ
ସହୋର୍ବଶ୍ଯା ବଶ୍ଯାଃ କତି କତି ନ ଗୀର୍ବାଣଗଣିକାଃ||18||

ମୁଖଂ ବିନ୍ଦୁଂ କୃତ୍ବା କୁଚଯୁଗମଧସ୍ତସ୍ଯ ତଦଧୋ

ହରାର୍ଧଂ ଧ୍ଯାଯେଦ୍ଯୋ ହରମହିଷି ତେ ମନ୍ମଥକଲାମ୍|

ସ ସଦ୍ଯଃ ସଂକ୍ଷୋଭଂ ନଯତି ବନିତା ଇତ୍ଯତିଲଘୁ
ତ୍ରିଲୋକୀମପ୍ଯାଶୁ ଭ୍ରମଯତି ରବୀନ୍ଦୁସ୍ତନଯୁଗାମ୍||19||

କିରନ୍ତୀମଙ୍ଗେଭ୍ଯଃ କିରଣନିକୁରୁମ୍ବାମୃତରସଂ

ହୃଦି ତ୍ବାମାଧତ୍ତେ ହିମକରଶିଲାମୂର୍ତିମିବ ଯଃ|

ସ ସର୍ପାଣାଂ ଦର୍ପଂ ଶମଯତି ଶକୁନ୍ତାଧିପ ଇବ
ଜ୍ବରପ୍ଲୁଷ୍ଟାନ୍ଦୃଷ୍ଟ୍ଯା ସୁଖଯତି ସୁଧାଧାରସିରଯା||20||

ତଟିଲ୍ଲେଖାତନ୍ବୀଂ ତପନଶଶିବୈଶ୍ବାନରମଯୀଂ

ନିଷଣ୍ଣାଂ ଷଣ୍ଣାମପ୍ଯୁପରି କମଲାନାଂ ତବ କଲାମ୍|

ମହାପଦ୍ମାଟବ୍ଯାଂ ମୃଦିତମଲମାଯେନ ମନସା
ମହାନ୍ତଃ ପଶ୍ଯନ୍ତୋ ଦଧତି ପରମାହ୍ଲାଦଲହରୀମ୍||21||

ଭବାନି ତ୍ବଂ ଦାସେ ମଯି ବିତର ଦୃଷ୍ଟିଂ ସକରୁଣା-

ମିତି ସ୍ତୋତୁଂ ବାଞ୍ଛନ୍କଥଯତି ଭବାନି ତ୍ବମିତି ଯଃ|

ତଦୈବ ତ୍ବଂ ତସ୍ମୈ ଦିଶସି ନିଜସାଯୁଜ୍ଯପଦବୀଂ
ମୁକୁନ୍ଦବ୍ରହ୍ମେନ୍ଦ୍ରସ୍ଫୁଟମକୁଟନୀରାଜିତପଦାମ୍||22||

ତ୍ବଯା ହୃତ୍ବା ବାମଂ ବପୁରପରିତୃପ୍ତେନ ମନସା

ଶରୀରାର୍ଧଂ ଶଂଭୋରପରମପି ଶଙ୍କେ ହୃତମଭୂତ୍|

ଯଦେତତ୍ତ୍ବଦ୍ରୂପଂ ସକଲମରୁଣାଭଂ ତ୍ରିନଯନଂ
କୁଚାଭ୍ଯାମାନମ୍ରଂ କୁଟିଲଶଶିଚୂଡାଲମକୁଟମ୍||23||

ଜଗତ୍ସୂତେ ଧାତା ହରିରବତି ରୁଦ୍ରଃ କ୍ଷପଯତେ

ତିରସ୍କୁର୍ବନ୍ନେତତ୍ସ୍ବମପି ବପୁରୀଶସ୍ତିରଯତି|

ସଦାପୂର୍ବଃ ସର୍ବଂ ତଦିଦମନୁଗୃହ୍ଣାତି ଚ ଶିବ-
ସ୍ତବାଜ୍ଞାମାଲମ୍ବ୍ଯ କ୍ଷଣଚଲିତଯୋର୍ଭ୍ରୂଲତିକଯୋଃ||24||

ତ୍ରଯାଣାଂ ଦେବାନାଂ ତ୍ରିଗୁଣଜନିତାନାଂ ତବ ଶିବେ

ଭବେତ୍ପୂଜା ପୂଜା ତବ ଚରଣଯୋର୍ଯା ବିରଚିତା|

ତଥାହି ତ୍ବତ୍ପାଦୋଦ୍ବହନମଣିପୀଠସ୍ଯ ନିକଟେ
ସ୍ଥିତା ହ୍ଯେତେ ଶଶ୍ବନ୍ମୁକୁଲିତକରୋତ୍ତଂସମକୁଟାଃ||25||

ବିରିଞ୍ଚିଃ ପଞ୍ଚତ୍ବଂ ବ୍ରଜତି ହରିରାପ୍ନୋତି ବିରତିଂ

ବିନାଶଂ କୀନାଶୋ ଭଜତି ଧନଦୋ ଯାତି ନିଧନମ୍|

ବିତନ୍ଦ୍ରୀ ମାହେନ୍ଦ୍ରୀ ବିତତିରପି ସଂମୀଲିତଦୃଶା
ମହାସଂହାରେସ୍ମିନ୍ବିହରତି ସତି ତ୍ବତ୍ପତିରସୌ||26||

ଜପୋ ଜଲ୍ପଃ ଶିଲ୍ପଂ ସକଲମପି ମୁଦ୍ରାବିରଚନା

ଗତିଃ ପ୍ରାଦକ୍ଷିଣ୍ଯକ୍ରମଣମଶନାଦ୍ଯାହୁତିବିଧିଃ|

ପ୍ରଣାମଃ ସଂବେଶଃ ସୁଖମଖିଲମାତ୍ମାର୍ପଣଦୃଶା
ସପର୍ଯାପର୍ଯାଯସ୍ତବ ଭବତୁ ଯନ୍ମେ ବିଲସିତମ୍||27||

ସୁଧାମପ୍ଯାସ୍ବାଦ୍ଯ ପ୍ରତିଭଯଜରାମୃତ୍ଯୁହରିଣୀଂ

ବିପଦ୍ଯନ୍ତେ ବିଶ୍ବେ ବିଧିଶତମଖାଦ୍ଯା ଦିବିଷଦଃ|

କରାଲଂ ଯତ୍କ୍ଷ୍ବେଲଂ କବଲିତବତଃ କାଲକଲନା
ନ ଶଂଭୋସ୍ତନ୍ମୂଲଂ ତବ ଜନନି ତାଟଙ୍କମହିମା||28||

କିରୀଟଂ ବୈରିଞ୍ଚଂ ପରିହର ପୁରଃ କୈଟଭଭିଦଃ

କଠୋରେ କୋଟୀରେ ସ୍ଖଲସି ଜହି ଜମ୍ଭାରିମକୁଟମ୍|

ପ୍ରଣମ୍ରେଷ୍ବେତେଷୁ ପ୍ରସଭମୁପଯାତସ୍ଯ ଭବନଂ
ଭବସ୍ଯାଭ୍ଯୁତ୍ଥାନେ ତବ ପରିଜନୋକ୍ତିର୍ବିଜଯତେ||29||

ସ୍ବଦେହୋଦ୍ଭୂତାଭିର୍ଘୃଣିଭିରଣିମାଦ୍ଯାଭିରଭିତୋ

ନିଷେବ୍ଯେ ନିତ୍ଯେ ତ୍ବାମହମିତି ସଦା ଭାବଯତି ଯଃ|

କିମାଶ୍ଚର୍ଯଂ ତସ୍ଯ ନ୍ନିନଯନସମୃଦ୍ଧିଂ ତୃଣଯତୋ
ମହାସଂବର୍ତାଗ୍ନିର୍ବିରଚଯତି ନୀରାଜନବିଧିମ୍||30||

ଚତୁଃଷଷ୍ଟ୍ଯା ତନ୍ତ୍ରୈଃ ସକଲମତିସନ୍ଧାଯ ଭୁବନଂ

ସ୍ଥିତସ୍ତତ୍ତତ୍ସିଦ୍ଧିପ୍ରସବପରତନ୍ତ୍ରୈଃ ପଶୁପତିଃ|

ପୁନସ୍ତ୍ବନ୍ନିର୍ବନ୍ଧାଦଖିଲପୁରୁଷାର୍ଥୈକଘଟନା-
ସ୍ବତନ୍ତ୍ରଂ ତେ ତନ୍ତ୍ରଂ କ୍ଷିତିତଲମବାତୀତରଦିଦମ୍||31||

ଶିବଃ ଶକ୍ତିଃ କାମଃ କ୍ଷିତିରଥ ରବିଃ ଶୀତକିରଣଃ

ସ୍ମରୋ ହଂସଃ ଶକ୍ରସ୍ତଦନୁ ଚ ପରାମାରହରଯଃ|

ଅମୀ ହୃଲ୍ଲେଖାଭିସ୍ତିସୃଭିରବସାନେଷୁ ଘଟିତା
ଭଜନ୍ତେ ବର୍ଣାସ୍ତେ ତବ ଜନନି ନାମାବଯବତାମ୍||32||

ସ୍ମରଂ ଯୋନିଂ ଲକ୍ଷ୍ମୀଂ ତ୍ରିତଯମିଦମାଦୌ ତବ ମନୋ-

ର୍ନିଧାଯୈକେ ନିତ୍ଯେ ନିରବଧିମହାଭୋଗରସିକାଃ|

ଭଜନ୍ତି ତ୍ବାଂ ଚିନ୍ତାମଣିଗୁଣନିବଦ୍ଧାକ୍ଷବଲଯାଃ
ଶିବାଗ୍ନୌ ଜୁହ୍ବନ୍ତଃ ସୁରଭିଘୃତଧାରାହୁତିଶତୈଃ||33||

ଶରୀରଂ ତ୍ବଂ ଶଂଭୋଃ ଶଶିମିହିରବକ୍ଷୋରୁହଯୁଗଂ

ତବାତ୍ମାନଂ ମନ୍ଯେ ଭଗବତି ନବାତ୍ମାନମନଘମ୍|

ଅତଃ ଶେଷଃ ଶେଷୀତ୍ଯଯମୁଭଯସାଧାରଣତଯା
ସ୍ଥିତଃ ସଂବନ୍ଧୋ ବାଂ ସମରସପରାନନ୍ଦପରଯୋଃ||34||

ମନସ୍ତ୍ବଂ ବ୍ଯୋମ ତ୍ବଂ ମରୁଦସି ମରୁତ୍ସାରଥିରସି

ତ୍ବମାପସ୍ତ୍ବଂ ଭୂମିସ୍ତ୍ବଯି ପରିଣତାଯାଂ ନ ହି ପରମ୍|

ତ୍ବମେବ ସ୍ବାତ୍ମାନଂ ପରିଣମଯିତୁଂ ବିଶ୍ବବପୁଷା
ଚିଦାନନ୍ଦାକାରଂ ଶିବଯୁବତି ଭାବେନ ବିଭୃଷେ||35||

ତବାଜ୍ଞାଚକ୍ରସ୍ଥଂ ତପନଶଶିକୋଟିଦ୍ଯୁତିଧରଂ

ପରଂ ଶଂଭୁଂ ବନ୍ଦେ ପରିମିଲିତପାଶ୍ର୍ବଂ ପରଚିତା|

ଯମାରାଧ୍ଯନ୍ଭକ୍ତ୍ଯା ରବିଶଶିଶୁଚୀନାମବିଷଯେ
ନିରାଲୋକେଲୋକେ ନିବସତି ହି ଭାଲୋକଭୁବନେ||36||

ବିଶୁଦ୍ଧୌ ତେ ଶୁଦ୍ଧସ୍ଫଟିକବିଶଦଂ ବ୍ଯୋମଜନକଂ

ଶିବଂ ସେବେ ଦେବୀମପି ଶିବସମାନବ୍ଯବସିତାମ୍|

ଯଯୋଃ କାନ୍ତ୍ଯା ଯାନ୍ତ୍ଯାଃ ଶଶିକିରଣସାରୂପ୍ଯସରଣେ-
ର୍ବିଧୂତାନ୍ତର୍ଧ୍ବାନ୍ତା ବିଲସତି ଚକୋରୀବ ଜଗତୀ||37||

ସମୁନ୍ମୀଲତ୍ସଂବିତ୍କମଲମକରନ୍ଦୈକରସିକଂ

ଭଜେ ହଂସଦ୍ବନ୍ଦ୍ବଂ କିମପି ମହତାଂ ମାନସଚରମ୍|

ଯଦାଲାପାଦଷ୍ଟାଦଶଗୁଣିତବିଦ୍ଯାପରିଣତି-
ର୍ଯଦାଦତ୍ତେ ଦୋଷାଦ୍ଗୁଣମଖିଲମଦ୍ଭ୍ଯଃ ପଯ ଇବ||38||

ତବ ସ୍ବାଧିଷ୍ଠାନେ ହୁତବହମଧିଷ୍ଠାଯ ନିରତଂ

ତମୀଡେ ସଂବର୍ତଂ ଜନନି ମହତୀଂ ତାଂ ଚ ସମଯାମ୍|

ଯଦାଲୋକେ ଲୋକାନ୍ଦହତି ମହତି କ୍ରୋଧକଲିତେ
ଦଯାର୍ଦ୍ରା ଯା ଦୃଷ୍ଟିଃ ଶିଶିରମୁପଚାରଂ ରଚଯତି||39||

ତଟିତ୍ତ୍ବନ୍ତଂ ଶକ୍ତ୍ଯା ତିମିରପରିପନ୍ଥିସ୍ଫୁରଣଯା

ସ୍ଫୁରନ୍ନାନାରତ୍ନାଭରଣପରିଣଦ୍ଧେନ୍ଦ୍ରଧନୁଷମ୍|

ତବ ଶ୍ଯାମଂ ମେଘଂ କମପି ମଣିପୂରୈକଶରଣଂ
ନିଷେବେ ବର୍ଷନ୍ତଂ ହରମିହିରତପ୍ତଂ ତ୍ରିଭୁବନମ୍||40||

ତବାଧାରେ ମୂଲେ ସହ ସମଯଯା ଲାସ୍ଯପରଯା

ନବାତ୍ମାନଂ ମନ୍ଯେ ନବରସମହାତାଣ୍ଡବନଟମ୍|

ଉଭାଭ୍ଯାମେତାଭ୍ଯାମୁଦଯବିଧିମୁଦ୍ଦିଶ୍ଯ ଦଯଯା
ସନାଥାଭ୍ଯାଂ ଜଜ୍ଞେ ଜନକଜନନୀମଜ୍ଜଗଦିଦମ୍||41||

ଗତୈର୍ମାଣିକ୍ଯତ୍ବଂ ଗଗନମଣିଭିଃ ସାନ୍ଦ୍ରଘଟିତଂ

କିରୀଟଂ ତେ ହୈମଂ ହିମଗିରିସୁତେ କୀର୍ତଯତି ଯଃ|

ସ ନୀଡେଯଚ୍ଛାଯାଚ୍ଛୁରଣଶବଲଂ ଚନ୍ଦ୍ରଶକଲଂ
ଧନୁଃ ଶୌନାସୀରଂ କିମିତି ନ ନିବଧ୍ନାତି ଧିଷଣାମ୍||42||

ଧୁନୋତୁ ଧ୍ବାନ୍ତଂ ନସ୍ତୁଲିତଦଲିତେନ୍ଦୀବରବନଂ

ଘନସ୍ନିଗ୍ଧଶ୍ଲକ୍ଷ୍ଣଂ ଚିକୁରନିକୁରୁମ୍ବଂ ତବ ଶିବେ|

ଯଦୀଯଂ ସୌରଭ୍ଯଂ ସହଜମୁପଲବ୍ଧୁଂ ସୁମନସୋ
ବସନ୍ତ୍ଯସ୍ମିନ୍ମନ୍ଯେ ବଲମଥନବାଟୀବିଟପିନାମ୍||43||

ତନୋତୁ କ୍ଷେମଂ ନସ୍ତବ ବଦନସୌନ୍ଦର୍ଯଲହରୀ-

ପରୀବାହଃ ସ୍ରୋତଃସରଣିରିବ ସୀମନ୍ତସରଣିଃ|

ବ(?)ହନ୍ତୀ ସିନ୍ଦୂରଂ ପ୍ରବଲକବରୀଭାରତିମିର-
ଦ୍ବିଷାଂ ବୃନ୍ଦୈର୍ବନ୍ଦୀକୃତମିବ ନବୀନାର୍କକିରଣମ୍||44||

ଅରାଲୈଃ ସ୍ବାଭାବ୍ଯାଦଲିକଲଭସଶ୍ରୀଭିରଲକୈଃ

ପରୀତଂ ତେ ବକ୍ତ୍ରଂ ପରିହସତି ପଙ୍କେରୁହରୁଚିମ୍|

ଦରସ୍ମେରେ ଯସ୍ମିନ୍ଦଶନରୁଚିକିଞ୍ଜଲ୍କରୁଚିରେ
ସୁଗନ୍ଧୌ ମାଦ୍ଯନ୍ତି ସ୍ମରଦହନଚକ୍ଷୁର୍ମଧୁଲିହଃ||45||

ଲଲାଟଂ ଲାବଣ୍ଯଦ୍ଯୁତିବିମଲମାଭାତି ତବ ଯ-

ଦ୍ଦ୍ବିତୀଯଂ ତନ୍ମନ୍ଯେ ମକୁଟଘଟିତଂ ଚନ୍ଦ୍ରଶକଲମ୍|

ବିପର୍ଯାସନ୍ଯାସାଦୁଭଯମପି ସଂଭୂଯ ଚ ମିଥଃ
ସୁଧାଲେପସ୍ଯୂତିଃ ପରିଣମତି ରାକାହିମକରଃ||46||

ଭ୍ରୁବୌ ଭୁଗ୍ନେ କିଂଚିଦ୍ଭୁବନଭଯଭଙ୍ଗବ୍ଯସନିନି

ତ୍ବଦୀଯେ ନେତ୍ରାଭ୍ଯାଂ ମଧୁକରରୁଚିଭ୍ଯାଂ ଧୃତଗୁଣମ୍|

ଧନୁର୍ମନ୍ଯେ ସବ୍ଯେତରକରଗୃହୀତଂ ରତିପତେଃ
ପ୍ରକୋଷ୍ଠେ ମୁଷ୍ଟୌ ଚ ସ୍ଥଗଯତି ନିଗୂଢାନ୍ତରମୁମେ||47||

ଅହଃ ସୂତେ ସବ୍ଯଂ ତବ ନଯନମର୍କାତ୍ମକତଯା

ତ୍ରିଯାମାଂ ବାମଂ ତେ ସୃଜତି ରଜନୀନାଯକତଯା|

ତୃତୀଯା ତେ ଦୃଷ୍ଟିର୍ଦରଦଲିତହେମାମ୍ବୁଜରୁଚିଃ
ସମାଧତ୍ତେ ସନ୍ଧ୍ଯାଂ ଦିବସନିଶଯୋରନ୍ତରଚରୀମ୍||48||

ବିଶାଲା କଲ୍ଯାଣୀ ସ୍ଫୁଟରୁଚିରଯୋଧ୍ଯା କୁବଲଯୈଃ

କୃପାଧାରାଧାରା କିମପି ମଧୁରାଭୋଗବତିକା|

ଅବନ୍ତୀ ଦୃଷ୍ଟିସ୍ତେ ବହୁନଗରବିସ୍ତାରବିଜଯା
ଧ୍ରୁବଂ ତତ୍ତନ୍ନାମବ୍ଯବହରଣଯୋଗ୍ଯା ବିଜଯତେ||49||

କବୀନାଂ ସଂଦର୍ଭସ୍ତବକମକରନ୍ଦୈକରସିକଂ

କଟାକ୍ଷବ୍ଯାକ୍ଷେପଭ୍ରମରକଲଭୌ କର୍ଣଯୁଗଲମ୍|

ଅମୁଞ୍ଚନ୍ତୌ ଦୃଷ୍ଟ୍ବା ତବ ନବରସାସ୍ବାଦତରଲା-
ବସୂଯାସଂସର୍ଗାଦଲିକନଯନଂ କିଂଚିଦରୁଣମ୍||50||

ଶିବେ ଶ୍ରୃଙ୍ଗାରାର୍ଦ୍ରା ତଦିତରଜନେ କୁତ୍ସନପରା

ସରୋଷା ଗଙ୍ଗାଯାଂ ଗିରିଶଚରିତେ ବିସ୍ମଯବତୀ|

ହରାହିଭ୍ଯୋ ଭୀତା ସରସିରୁହସୌଭାଗ୍ଯଜନନୀ
ସଖୀଷୁ ସ୍ମେରା ତେ ମଯି ଜନନି ଦୃଷ୍ଟିଃ ସକରୁଣା||51||

ଗତେ କର୍ଣାଭ୍ଯର୍ଣଂ ଗରୁତ ଇବ ପକ୍ଷ୍ମାଣି ଦଧତୀ

ପୁରାଂ ଭେତ୍ତୁଶ୍ିଚତ୍ତପ୍ରଶମରସବିଦ୍ରାବଣଫଲେ|

ଇମେ ନେତ୍ରେ ଗୋତ୍ରାଧରପତିକୁଲୋତ୍ତଂସକଲିକେ
ତବାକର୍ଣାକୃଷ୍ଟସ୍ମରଶରବିଲାସଂ କଲଯତଃ||52||

ବିଭକ୍ତତ୍ରୈବର୍ଣ୍ଯଂ ବ୍ଯତିକରିତଲୀଲାଞ୍ଜନତଯା

ବିଭାତି ତ୍ବନ୍ନେତ୍ରତ୍ରିତଯମିଦମୀଶାନଦଯିତେ|

ପୁନଃ ସ୍ରଷ୍ଟୁଂ ଦେବାନ୍ଦ୍ରୁହିଣହରିରୁଦ୍ରାନୁପରତା-
ନ୍ରଜଃ ସତ୍ତ୍ବଂ ବିଭ୍ରତ୍ତମ ଇତି ଗୁଣାନାଂ ତ୍ରଯମିବ||53||

ପବିତ୍ରୀକର୍ତୁଂ ନଃ ପଶୁପତିପରାଧୀନହୃଦଯେ

ଦଯାମିତ୍ରୈର୍ନେତ୍ରୈରରୁଣଧବଲଶ୍ଯାମରୁଚିଭିଃ|

ନଦଃ ଶୋଣୋ ଗଙ୍ଗା ତପନତନଯେତି ଧ୍ରୁବମମୁଂ
ତ୍ରଯାଣାଂ ତୀର୍ଥାନାମୁପନଯସି ସଂଭେଦମନଘମ୍||54||

ନିମେଷୋନ୍ମେଷାଭ୍ଯାଂ ପ୍ରଲଯମୁଦଯଂ ଯାତି ଜଗତୀ

ତବେତ୍ଯାହୁଃ ସନ୍ତୋ ଧରଣିଧରରାଜନ୍ଯତନଯେ|

ତ୍ବଦୁନ୍ମେଷାଜ୍ଜାତଂ ଜଗଦିଦମଶେଷଂ ପ୍ରଲଯତଃ
ପରିତ୍ରାତୁଂ ଶଙ୍କେ ପରିହୃତନିମେଷାସ୍ତବ ଦୃଶଃ||55||

ତବାପର୍ଣେ କର୍ଣେଜପନଯନପୈଶୁନ୍ଯଚକିତା

ନିଲୀଯନ୍ତେ ତୋଯେ ନିଯତମନିମେଷାଃ ଶଫରିକାଃ|

ଇଯଂ ଚ ଶ୍ରୀର୍ବଦ୍ଧଚ୍ଛଦପୁଟକବାଟଂ କୁବଲଯଂ
ଜହାତି ପ୍ରତ୍ଯୂଷେ ନିଶି ଚ ବିଘଟଯ୍ଯ ପ୍ରବିଶତି||56||

ଦୃଶା ଦ୍ରାଘୀଯସ୍ଯା ଦରଦଲିତନୀଲୋତ୍ପଲରୁଚା

ଦବୀଯାଂସଂ ଦୀନଂ ସ୍ନପଯ କୃପଯା ମାମପି ଶିବେ|

ଅନେନାଯଂ ଧନ୍ଯୋ ଭବତି ନ ଚ ତେ ହାନିରିଯତା
ବନେ ବା ହର୍ମ୍ଯେ ବା ସମକରନିପାତୋ ହିମକରଃ||57||

ଅରାଲଂ ତେ ପାଲୀଯୁଗଲମଗରାଜନ୍ଯତନଯେ

ନ କେଷାମାଧତ୍ତେ କୁସୁମଶରକୋଦଣ୍ଡକୁତୁକମ୍|

ତିରଶ୍ଚୀନୋ ଯତ୍ର ଶ୍ରବଣପଥମୁଲ୍ଲଙ୍ଘ୍ଯ ବିଲସ-
ନ୍ନପାଙ୍ଗବ୍ଯାସଙ୍ଗୋ ଦିଶତି ଶରସଂଧାନଧିଷଣାମ୍||58||

ସ୍ଫୁରଦ୍ଗଣ୍ଡାଭୋଗପ୍ରତିଫଲିତାଟଙ୍କଯୁଗଲଂ

ଚତୁଶ୍ଚକ୍ରଂ ମନ୍ଯେ ତବ ସୁଖମିଦଂ ମନ୍ମଥରଥମ୍|

ଯମାରୁହ୍ଯ ଦ୍ରୁହ୍ଯତ୍ଯବନିରଥମର୍କେନ୍ଦୁଚରଣଂ
ମହାବୀରୋ ମାରଃ ପ୍ରମଥପତଯେ ସଜ୍ଜିତବତେ||59||

ସରସ୍ବତ୍ଯାଃ ସୂକ୍ତୀରମୃତଲହରୀକୌଶଲହରୀଃ

ପିବନ୍ତ୍ଯାଃ ଶର୍ବାଣି ଶ୍ରବଣଚୁଲୁକାଭ୍ଯାମବିରଲମ୍|

ଚମତ୍କାରଶ୍ଲାଘାଚଲିତଶିରସଃ କୁଣ୍ଡଲଗଣୋ
ଝଣତ୍କାରୈସ୍ତାରୈଃ ପ୍ରତିବଚନମାଚଷ୍ଟ ଇବ ତେ||60||

ଅସୌ ନାସାବଂଶସ୍ତୁହିନଗିରିବଂଶଧ୍ବଜପଟି

ତ୍ବଦୀଯୋ ନେଦୀଯଃ ଫଲତୁ ଫଲମସ୍ମାକମୁଚିତମ୍|

ବହତ୍ଯନ୍ତର୍ମୁକ୍ତାଃ ଶିଶିରକରନିଶ୍ବାସଗଲିତଂ
ସମୃଦ୍ଧ୍ଯା ଯତ୍ତାସାଂ ବହିରପି ଚ ମୁକ୍ତାମଣିଧରଃ||61||

ପ୍ରକୃତ୍ଯା ରକ୍ତାଯାସ୍ତବ ସୁଦତି ଦନ୍ତଚ୍ଛଦରୁଚେଃ

ପ୍ରବକ୍ଷ୍ଯେ ସାଦୃଶ୍ଯଂ ଜନଯତୁ ଫଲଂ ବିଦ୍ରୁମଲତା|

ନ ବିମ୍ବଂ ତଦ୍ବିମ୍ବପ୍ରତିଫଲନରାଗାରୁଣିତଂ
ତୁଲାମଧ୍ଯାରୋଢୁଂ କଥମିବ ବିଲଜ୍ଜେତ କଲଯା||62||

ସ୍ମିତଜ୍ଯୋତ୍ସ୍ନାଜାଲଂ ତବ ବଦନଚନ୍ଦ୍ରସ୍ଯ ପିବତାଂ

ଚକୋରାଣାମାସୀଦତିରସତଯା ଚଞ୍ଚୁଜଡିମା|

ଅତସ୍ତେ ଶୀତାଂଶୋରମୃତଲହରୀମାମ୍ଲରୁଚଯଃ
ପିବନ୍ତି ସ୍ବଚ୍ଛନ୍ଦଂ ନିଶିନିଶି ଭୃଶଂ କାଞ୍ଜିକଧିଯା||63||

ଅବିଶ୍ରାନ୍ତଂ ପତ୍ଯୁର୍ଗୁଣଗଣକଥାମ୍ରେଡନଜପା

ଜପାପୁଷ୍ପଚ୍ଛାଯା ତବ ଜନନି ଜିହ୍ବା ଜଯତି ସା|

ଯଦଗ୍ରାସୀନାଯାଃ ସ୍ଫଟିକଦୃଷଦଚ୍ଛଚ୍ଛବିମଯୀ
ସରସ୍ବତ୍ଯା ମୂର୍ତିଃ ପରିଣମତି ମାଣିକ୍ଯବପୁଷା||64||

ରଣେ ଜିତ୍ବା ଦୈତ୍ଯାନପହୃତଶିରସ୍ତ୍ରୈଃ କବଚିଭି-

ର୍ନିବୃତ୍ତୈଶ୍ଚଣ୍ଡାଂଶତ୍ରିପୁରହରନିର୍ମାଲ୍ଯବିମୁଖୈଃ|

ବିଶାଖେନ୍ଦ୍ରୋପେନ୍ଦ୍ରୈଃ ଶଶିବିଶଦକର୍ପୂରଶକଲା
ବିଲୀଯନ୍ତେ ମାତସ୍ତବ ବଦନତାମ୍ବୂଲକବଲାଃ||65||

ବିପଞ୍ଚ୍ଯା ଗାଯନ୍ତୀ ବିବିଧମପଦାନଂ ପଶୁପତେ-

ସ୍ତ୍ବଯାରବ୍ଧେ ବକ୍ତୁଂ ଚଲିତଶିରସା ସାଧୁବଚନେ|

ତଦୀଯୈର୍ମାଧୁର୍ଯୈରପଲପିତତନ୍ତ୍ରୀକଲରବାଂ
ନିଜାଂ ବୀଣାଂ ବାଣୀ ନିଚୁଲଯତି ଚୋଲେନ ନିଭୃତମ୍||66||

କରାଗ୍ରେଣ ସ୍ପୃଷ୍ଟଂ ତୁହିନଗିରିଣା ବତ୍ସଲତଯା

ଗିରୀଶେନୋଦସ୍ତଂ ମୁହୁରଧରପାନାକୁଲତଯା|

କରଗ୍ରାହ୍ଯଂ ଶଂଭୋର୍ମୁଖମୁକୁରବୃନ୍ତଂ ଗିରିସୁତେ
କଥଂକାରଂ ବ୍ରୂମସ୍ତବ ଚୁବୁକମୌପମ୍ଯରହିତମ୍||67||

ଭୁଜାଶ୍ଲେଷାନ୍ନିତ୍ଯଂ ପୁରଦମଯିତୁଃ କଣ୍ଟକବତୀ

ତବ ଗ୍ରୀବା ଧତ୍ତେ ମୁଖକମଲନାଲଶ୍ରିଯମିଯମ୍|

ସ୍ବତଃ ଶ୍ବେତା କାଲାଗୁରୁବହୁଲଜମ୍ବାଲମଲିନା
ମୃଣାଲୀଲାଲିତ୍ଯଂ ବହତି ଯଦଧୋ ହାରଲତିକା||68||

ଗଲେ ରେଖାସ୍ତିସ୍ରୋ ଗତିଗମକଗୀତୈକନିପୁଣେ

ବିବାହବ୍ଯାନଦ୍ଧପ୍ରଗୁଣଗୁଣସଂଖ୍ଯାପ୍ରତିଭୁବଃ|

ବିରାଜନ୍ତେ ନାନାବିଧମଧୁରରାଗାକରଭୁବାଂ
ତ୍ରଯାଣାଂ ଗ୍ରାମାଣାଂ ସ୍ଥିତିନିଯମସୀମାନ ଇବ ତେ||69||

ମୃଣାଲୀମୃଦ୍ବୀନାଂ ତବ ଭୁଜଲତାନାଂ ଚତସୃଣାଂ

ଚତୁର୍ଭିଃ ସୌନ୍ଦର୍ଯଂ ସରସିଜଭବଃ ସ୍ତୌତି ବଦନୈଃ|

ନଖେଭ୍ଯଃ ସଂତ୍ରସ୍ଯନ୍ପ୍ରଥମମଥନାଦନ୍ଧକରିପୋ-
ଶ୍ଚୁତୁର୍ଣାଂ ଶୀର୍ଷାଣାଂ ସମମଭଯହସ୍ତାର୍ପଣଧିଯା||70||

ନଖାନାମୁଦ୍ଯୋତୈର୍ନବନଲିନରାଗଂ ବିହସତାଂ

କରାଣାଂ ତେ କାନ୍ତିଂ କଥଯ କଥଯାମଃ କଥମୁମେ|

କଯାଚିଦ୍ବା ସାମ୍ଯଂ ଭଜତୁ କଲଯା ହନ୍ତ କମଲଂ
ଯଦି କ୍ରୀଡଲ୍ଲକ୍ଷ୍ମୀଚରଣତଲଲାକ୍ଷାରସଚଣମ୍||71||

ସମଂ ଦେବି ସ୍କନ୍ଦଦ୍ବିପବଦନପୀତଂ ସ୍ତନଯୁଗଂ

ତବେଦଂ ନଃ ଖେଦଂ ହରତୁ ସତତଂ ପ୍ରସ୍ନୁତମୁଖମ୍|

ଯଦାଲୋକ୍ଯାଶଙ୍କାକୁଲିତହୃଦଯୋ ହାସଜନକଃ
ସ୍ବକୁମ୍ଭୌ ହେରମ୍ବଃ ପରିମୃଶତି ହସ୍ତେନ ଝଡିତି||72||

ଅମୂ ତେ ବକ୍ଷୋଜାବମୃତରସମାଣିକ୍ଯକୁତୁପୌ

ନ ସଂଦେହସ୍ପନ୍ଦୋ ନଗପତିପତାକେ ମନସି ନଃ|

ପିବନ୍ତୌ ତୌ ଯସ୍ମାଦବିଦିତବଧୂସଙ୍ଗରସିକୌ
କୁମାରାବଦ୍ଯାପି ଦ୍ବିରଦବଦନକ୍ରୌଞ୍ଚଦଲନୌ||73||

ବହତ୍ଯମ୍ବ ସ୍ତମ୍ବେରମଦନୁଜକୁମ୍ଭପ୍ରକୃତିଭିଃ

ସମାରବ୍ଧାଂ ମୁକ୍ତାମଣିଭିରମଲାଂ ହାରଲତିକାମ୍|

କୁଚାଭୋଗୋ ବିମ୍ବାଧରରୁଚିଭିରନ୍ତଃ ଶବଲିତାଂ
ପ୍ରତାପବ୍ଯାମିଶ୍ରାଂ ପୁରଦମଯିତୁଃ କୀର୍ତିମିବ ତେ||74||

ତବ ସ୍ତନ୍ଯଂ ମନ୍ଯେ ଧରଣିଧରକନ୍ଯେ ହୃଦଯତଃ

ପଯଃପାରାବାରଃ ପରିବହତି ସାରସ୍ବତମିବ|

ଦଯାବତ୍ଯା ଦତ୍ତଂ ଦ୍ରବିଡଶିଶୁରାସ୍ବାଦ୍ଯ ତବ ଯ-
ତ୍କବୀନାଂ ପ୍ରୌଢାନାମଜନି କମନୀଯଃ କବଯିତା||75||

ହରକ୍ରୋଧଜ୍ବାଲାବଲିଭିରବଲୀଢେନ ବପୁଷା

ଗଭୀରେ ତେ ନାଭୀସରସି କୃତସଙ୍ଗୋ ମନସିଜଃ|

ସମୁତ୍ତସ୍ଥୌ ତସ୍ମାଦଚଲତନଯେ ଧୂମଲତିକା
ଜନସ୍ତାଂ ଜାନୀତେ ତବ ଜନନି ରୋମାବଲିରିତି||76||

ଯଦେତତ୍କାଲିନ୍ଦୀତନୁତରତରଙ୍ଗାକୃତି ଶିବେ

କୃଶେ ମଧ୍ଯେ କିଂଚିଜ୍ଜନନି ତବ ଯଦ୍ଭାତି ସୁଧିଯାମ୍|

ବିମର୍ଦାଦନ୍ଯୋନ୍ଯଂ କୁଚକଲଶଯୋରନ୍ତରଗତଂ
ତନୂଭୂତଂ ବ୍ଯୋମ ପ୍ରବିଶଦିବ ନାଭିଂ କୁହରିଣୀମ୍||77||

ସ୍ଥିରୋ ଗଙ୍ଗାବର୍ତଃ ସ୍ତନମୁକୁଲରୋମାବଲିଲତା-

କଲାବାଲଂ କୁଣ୍ଡଂ କୁସୁମଶରତେଜୋହୁତଭୁଜଃ|

ରତେର୍ଲୀଲାଗାରଂ କିମପି ତବ ନାଭିର୍ଗିରିସୁତେ
ବିଲଦ୍ବାରଂ ସିଦ୍ଧେର୍ଗିରିଶନଯନାନାଂ ବିଜଯତେ||78||

ନିସର୍ଗକ୍ଷୀଣସ୍ଯ ସ୍ତନତଟଭରେଣ କ୍ଲମଜୁଷୋ

ନମନ୍ମୂର୍ତେର୍ନାରୀତିଲକ ଶନକୈସ୍ତ୍ରୁଟ୍ଯତ ଇବ|

ଚିରଂ ତେ ମଧ୍ଯସ୍ଯ ତ୍ରୁଟିତତଟିନୀତୀରତରୁଣା
ସମାବସ୍ଥାସ୍ଥେମ୍ନୋ ଭବତୁ କୁଶଲଂ ଶୈଲତନଯେ||79||

କୁଚୌ ସଦ୍ଯଃ ସ୍ବିଦ୍ଯତ୍ତଟଘଟିତକୂର୍ପାସଭିଦୁରୌ

କଷନ୍ତୌ ଦୋର୍ମୂଲେ କନକକଲଶାଭୌ କଲଯତା|

ତବ ତ୍ରାତୁଂ ଭଙ୍ଗାଦଲମିତି ବଲଗ୍ନଂ ତନୁଭୁବା
ତ୍ରିଧା ନଦ୍ଧଂ ଦେବି ତ୍ରିବଲି ଲବଲୀବଲ୍ଲିଭିରିବ||80||

ଗୁରୁତ୍ବଂ ବିସ୍ତାରଂ କ୍ଷିତିଧରପତିଃ ପାର୍ବତି ନିଜା-

ନ୍ନିତମ୍ବାଦାଚ୍ଛିଦ୍ଯ ତ୍ବଯି ହରଣରୂପେଣ ନିଦଧେ|

ଅତସ୍ତେ ବିସ୍ତୀର୍ଣୋ ଗୁରୁରଯମଶେଷାଂ ବସୁମତୀଂ
ନିତମ୍ବପ୍ରାଗ୍ଭାରଃ ସ୍ଥଗଯତି ଲଘୁତ୍ବଂ ନଯତି ଚ||81||

କରୀନ୍ଦ୍ରାଣାଂ ଶୁଣ୍ଡାନ୍କନକକଦଲୀକାଣ୍ଡପଟଲୀ-

ମୁଭାଭ୍ଯାମୂରୁଭ୍ଯାମୁଭଯମପି ନିର୍ଜିତ୍ଯ ଭବତି|

ସୁବୃତ୍ତାଭ୍ଯାଂ ପତ୍ଯୁଃ ପ୍ରଣତିକଠିନାଭ୍ଯାଂ ଗିରିସୁତେ
ବିଧିଜ୍ଞେ ଜାନୁଭ୍ଯାଂ ବିବୁଧକରିକୁମ୍ଭଦ୍ବଯମସି||82||

ପରାଜେତୁଂ ରୁଦ୍ରଂ ଦ୍ବିଗୁଣଶରଗର୍ଭୌ ଗିରିସୁତେ

ନିଷଙ୍ଗୌ ଜଙ୍ଘେ ତେ ବିଷମବିଶିଖୋ ବାଢମକୃତ|

ଯଦଗ୍ନେ ଦୃଶ୍ଯନ୍ତେ ଦଶଶରଫଲାଃ ପାଦଯୁଗଲୀ-
ନଖାଗ୍ରଚ୍ଛହ୍ମାନଃ ସୁରମକୁଟଶାଣୈକନିଶିତାଃ||83||

ଶ୍ରୁତୀନାଂ ମୂର୍ଧାନୋ ଦଧତି ତବ ଯୌ ଶେଖରତଯା

ମମାପ୍ଯେତୌ ମାତଃ ଶିରସି ଦଯଯା ଧେହି ଚରଣୌ|

ଯଯୋଃ ପାଦ୍ଯଂ ପାଥଃ ପଶୁପତିଜଟାଜୂଟତଟିନୀ
ଯଯୋର୍ଲାକ୍ଷାଲକ୍ଷ୍ମୀରରୁଣହରିଚୂଡାମଣିରୁଚିଃ||84||

ନମୋବାକଂ ବ୍ରୂମୋ ନଯନରମଣୀଯାଯ ପଦଯୋ-

ସ୍ତବାସ୍ମୈ ଦ୍ବନ୍ଦ୍ବାଯ ସ୍ଫୁଟରୁଚିରସାଲକ୍ତକବତେ|

ଅସୂଯତ୍ଯତ୍ଯନ୍ତଂ ଯଦଭିହନନାଯ ସ୍ପୃହଯତେ
ପଶୂନାମୀଶାନଃ ପ୍ରମଦବନକଙ୍କେଲିତରବେ||85||

ମୃଷା କୃତ୍ବା ଗୋତ୍ରସ୍ଖଲନମଥ ବୈଲକ୍ଷ୍ଯନମିତଂ

ଲଲାଟେ ଭର୍ତାରଂ ଚରଣକମଲେ ତାଡଯତି ତେ|

ଚିରାଦନ୍ତଃଶଲ୍ଯଂ ଦହନକୃତମୁନ୍ମୂଲିତବତା
ତୁଲାକୋଟିକ୍ବାଣୈଃ କିଲିକିଲିତମୀଶାନରିପୁଣା||86||

ହିମାନୀହନ୍ତବ୍ଯଂ ହିମଗିରିନିବାସୈକଚତୁରୌ

ନିଶାଯାଂ ନିଦ୍ରାଣଂ ନିଶି ଚରମଭାଗେ ଚ ବିଶଦୌ|

ବରଂ ଲକ୍ଷ୍ମୀପାତ୍ରଂ ଶ୍ରିଯମତିସୃଜନ୍ତୌ ସମଯିନାଂ
ସରୋଜଂ ତ୍ବତ୍ପାଦୌ ଜନନି ଜଯତଶ୍ିଚତ୍ରମିହ କିମ୍||87||

ପଦଂ ତେ କୀର୍ତୀନାଂ ପ୍ରପଦମପଦଂ ଦେବି ବିପଦାଂ

କଥଂ ନୀତଂ ସଦ୍ଭିଃ କଠିନକମଠୀକର୍ପରତୁଲାମ୍|

କଥଂ ବା ବାହୁଭ୍ଯାମୁପଯମନକାଲେ ପୁରଭିଦା
ଯଦାଦାଯ ନ୍ଯସ୍ତଂ ଦୃଷଦି ଦଯମାନେନ ମନସା||88||

ନଖୈର୍ନାକସ୍ତ୍ରୀଣାଂ କରକମଲସଂକୋଚଶଶିଭି-

ସ୍ତରୂଣାଂ ଦିବ୍ଯାନାଂ ହସତ ଇବ ତେ ଚଣ୍ଡି ଚରଣୌ|

ଫଲାନି ସ୍ବଃସ୍ଥେଭ୍ଯଃ କିସଲଯକରାଗ୍ରେଣ ଦଦତାଂ
ଦରିଦ୍ରେଭ୍ଯୋ ଭଦ୍ରାଂ ଶ୍ରିଯମନିଶମହ୍ନାଯ ଦଦତୌ||89||

ଦଦାନେ ଦୀନେଭ୍ଯଃ ଶ୍ରିଯମନିଶମାଶାନୁସଦୃଶୀ-

ମମନ୍ଦଂ ସୌନ୍ଦର୍ଯପ୍ରକରମକରନ୍ଦଂ ବିକିରତି|

ତବାସ୍ମିନ୍ମନ୍ଦାରସ୍ତବକସୁଭଗେ ଯାତୁ ଚରଣେ
ନିମଜ୍ଜନ୍ମଜ୍ଜୀବଃ କରଣଚରଣଃ ଷଟ୍ଚରଣତାମ୍||90||

ପଦନ୍ଯାସକ୍ରୀଡାପରିଚଯମିବାରବ୍ଧୁମନସଃ

ସ୍ଖଲନ୍ତସ୍ତେ ଖେଲଂ ଭବନକଲହଂସା ନ ଜହତି|

ଅତସ୍ତେଷାଂ ଶିକ୍ଷାଂ ସୁଭଗମଣିମଞ୍ଜୀରରଣିତ-
ଚ୍ଛଲାଦାଚକ୍ଷାଣଂ ଚରଣକମଲଂ ଚାରୁଚରିତେ||91||

ଗତାସ୍ତେ ମଞ୍ଚତ୍ବଂ ଦ୍ରୁହିଣହରିରୁଦ୍ରେଶ୍ବରଭୃତଃ

ଶିବଃ ସ୍ବଚ୍ଛଚ୍ଛାଯାଘଟିତକପଟପ୍ରଚ୍ଛଦପଟଃ|

ତ୍ବଦୀଯାନାଂ ଭାସାଂ ପ୍ରତିଫଲନରାଗାରୁଣତଯା
ଶରୀରୀ ଶ୍ରୃଙ୍ଗାରୋ ରସ ଇବ ଦୃଶାଂ ଦୋଗ୍ଧି କୁତୁକମ୍||92||

ଅରାଲା କେଶେଷୁ ପ୍ରକୃତିସରଲା ମନ୍ଦହସିତେ

ଶିରୀଷାଭା ଚିତ୍ତେ ଦୃଷଦୁପଲଶୋଭା କୁଚତଟେ|

ଭୃଶଂ ତନ୍ବୀ ମଧ୍ଯେ ପୃଥୁରୁରସିଜାରୋହବିଷଯେ
ଜଗତ୍ତ୍ରାତୁଂ ଶଂଭୋର୍ଜଯତି କରୁଣା କାଚିଦରୁଣା||93||

କଲଙ୍କଃ କସ୍ତୂରୀ ରଜନିକରବିମ୍ବଂ ଜଲମଯଂ

କଲାଭିଃ କର୍ପୂରୈର୍ମରକତକରଣ୍ଡଂ ନିବିଡିତମ୍|

ଅତସ୍ତ୍ବଦ୍ଭୋଗେନ ପ୍ରତିଦିନମିଦଂ ରିକ୍ତକୁହରଂ
ବିଧିର୍ଭୂଯୋ ଭୂଯୋ ନିବି଼ଡଯତି ନୂନଂ ତବ କୃତେ||94||

ପୁରାରାତେରନ୍ତଃପୁରମସି ତତସ୍ତ୍ବଚ୍ଚରଣଯୋଃ

ସପର୍ଯାମର୍ଯାଦା ତରଲକରଣାନାମସୁଲଭା|

ତଥା ହ୍ଯେତେ ନୀତାଃ ଶତମଖମୁଖାଃ ସିଦ୍ଧିମତୁଲାଂ
ତବ ଦ୍ବାରୋପାନ୍ତସ୍ଥିତିଭିରଣିମାଦ୍ଯାଭିରମରାଃ||95||

କଲତ୍ରଂ ବୈଧାତ୍ରଂ କତିକତି ଭଜନ୍ତେ ନ କବଯଃ

ଶ୍ରିଯୋ ଦେବ୍ଯାଃ କୋ ବା ନ ଭବତି ପତିଃ କୈରପି ଧନୈଃ|

ମହାଦେବଂ ହିତ୍ବା ତବ ସତି ସତୀନାମଚରମେ
କୁଚାଭ୍ଯାମାସଙ୍ଗଃ କୁରବକତରୋରପ୍ଯସୁଲଭଃ||96||

ଗିରାମାହୁର୍ଦେବୀଂ ଦ୍ରୁହିଣଗୃହିଣୀମାଗମବିଦୋ

ହରେଃ ପତ୍ନୀଂ ପଦ୍ମାଂ ହରସହଚରୀମଦ୍ରିତନଯାମ୍|

ତୁରୀଯା କାପି ତ୍ବଂ ଦୁରଧିଗମନିଃସୀମମହିମା
ମହାମାଯା ବିଶ୍ବଂ ଭ୍ରମଯସି ପରବ୍ରହ୍ମମହିଷି||97||

କଦା କାଲେ ମାତଃ କଥଯ କଲିତାଲକ୍ତକରସଂ

ପିବେଯଂ ବିଦ୍ଯାର୍ଥୀ ତବ ଚରଣନିର୍ଣେଜନଜଲମ୍|

ପ୍ରକୃତ୍ଯା ମୂକାନାମପି ଚ କବିତାକାରଣତଯା
କଦା ଧତ୍ତେ ବାଣୀମୁଖକମଲତାମ୍ବୂଲରସତାମ୍||98||

ସରସ୍ବତ୍ଯା ଲକ୍ଷ୍ମ୍ଯା ବିଧିହରିସପତ୍ନୋ ବିହରତେ

ରତେଃ ପାତିବ୍ରତ୍ଯଂ ଶିଥିଲଯତି ରମ୍ଯେଣ ବପୁଷା|

ଚିରଂ ଜୀବନ୍ନେବ କ୍ଷପିତପଶୁପାଶବ୍ଯତିକରଃ
ପରାନନ୍ଦାଭିଖ୍ଯଂ ରସଯତି ରସଂ ତ୍ବଦ୍ଭଜନବାନ୍||99||

ପ୍ରଦୀପଜ୍ବାଲାଭିର୍ଦିବସକରନୀରାଜନବିଧିଃ

ସୁଧାସୂତେଶ୍ଚନ୍ଦ୍ରୋପଲଜଲଲବୈରର୍ଘ୍ଯରଚନା|

ସ୍ବକୀଯୈରମ୍ଭୋଭିଃ ସଲିଲନିଧିସୌହିତ୍ଯକରଣଂ
ତ୍ବଦୀଯାଭିର୍ବାଗ୍ଭିସ୍ତବ ଜନନି ବାଚାଂ ସ୍ତୁତିରିଯମ୍||100||


ଇତି ଶ୍ରୀମତ୍ପରମହଂସପରିବ୍ରାଜକାଚାର୍ଯସ୍ଯ

ଶ୍ରୀଗୋବିନ୍ଦଭଗବତ୍ପୂଜ୍ଯପାଦଶିଷ୍ଯସ୍ଯ

ଶ୍ରୀମଚ୍ଛଂକରଭଗବତଃ କୃତୌ

ସୌନ୍ଦର୍ଯଲହରୀ ସଂପୂର୍ଣା||