Devotional Hyms - Devi

৷৷শ্রীঃ৷৷

৷৷নবরত্নমালিকা৷৷
হারনূপুরকিরীটকুণ্ডলবিভূষিতাবযবশোভিনীং

কারণেশবরমৌলিকোটিপরিকল্প্যমানপদপীঠিকাম্৷

কালকালফণিপাশবাণধনুরঙ্কুশামরুণমেখলাং
ফালভূতিলকলোচনাং মনসি ভাবযামি পরদেবতাম্৷৷1৷৷

গন্ধসারঘনসারচারুনবনাগবল্লিরসবাসিনীং

সান্ধ্যরাগমধুরাধরাভরণসুন্দরাননশুচিস্মিতাম্৷

মন্ধরাযতবিলোচনামমলবালচন্দ্রকৃতশেখরীং
ইন্দিরারমণসোদরীং মনসি ভাবযামি পরদেবতাম্৷৷2৷৷

স্মেরচারুমুখমণ্ডলাং বিমলগণ্ডলম্বিমণিমণ্ডলাং

হারদামপরিশোভমানকুচভারভীরুতনুমধ্যমাম্৷

বীরগর্বহরনূপুরাং বিবিধকারণেশবরপীঠিকাং
মারবৈরিসহচারিণীং মনসি ভাবযামি পরদেবতাম্৷৷3৷৷

ভূরিভারধরকুণ্ডলীন্দ্রমণিবদ্ধভূবলযপীঠিকাং

বারিরাশিমণিমেখলাবলযবহ্নিমণ্ডলশরীরিণীম্৷

বারিসারবহকুণ্ডলাং গগনশেখরীং চ পরমাত্মিকাং
চারুচন্দ্ররবিলোচনাং মনসি ভাবযামি পরদেবতাম্৷৷4৷৷

কুণ্ডলত্রিবিধকোণমণ্ডলবিহারষড্দলসমুল্লস-

ত্পুণ্ডরীকমুখভেদিনীং চ প্রচণ্ডভানুভাসমুজ্জ্বলাম্৷

মণ্ডলেন্দুপরিবাহিতামৃততরঙ্গিণীমরুণরূপিণীং
মণ্ডলান্তমণিদীপিকাং মনসি ভাবযামি পরদেবতাম্৷৷5৷৷

বারণাননমযূরবাহমুখদাহবারণপযোধরাং

চারণাদিসুরসুন্দরীচিকুরশেখরীকৃতপদাম্বুজাম্৷

কারণাধিপতিপঞ্চকপ্রকৃতিকারণপ্রথমমাতৃকাং
বারণান্তমুখপারণাং মনসি ভাবযামি পরদেবতাম্৷৷6৷৷

পদ্মকান্তিপদপাণিপল্লবপযোধরাননসরোরুহাং

পদ্মরাগমণিমেখলাবলযনীবিশোভিতনিতম্বিনীম্৷

পদ্মসংভবসদাশিবান্তমযপঞ্চরত্নপদপীঠিকাং
পদ্মিনীং প্রণবরূপিণীং মনসি ভাবযামি পরদেবতাম্৷৷7৷৷

আগমপ্রণবপীঠিকামমলবর্ণমঙ্গলশরীরিণীং

আগমাবযবশোভিনীমখিলবেদসারকৃতশেখরীম্৷

মূলমন্ত্রমুখমণ্ডলাং মুদিতনাদবিন্দুনবযৌবনাং
মাতৃকাং ত্রিপুরসুন্দরীং মনসি ভাবযামি পরদেবতাম্৷৷8৷৷

কালিকাতিমিরকুন্তলান্তঘনভৃঙ্গমঙ্গলবিরাজিনীং

চূলিকাশিখরমালিকাবলযমল্লিকাসুরভিসৌরভাম্৷

বালিকামধুরগণ্ডমণ্ডলমনোহরাননসরোরুহাং
কালিকামখিলনাযিকাং মনসি ভাবযামি পরদেবতাম্৷৷9৷৷

নিত্যমেব নিযমেন জল্পতাং

ভুক্তিমুক্তিফলদামভীষ্টদাম্৷

শংকরেণ রচিতাং সদা জপে-
ন্নামরত্ননবরত্নমালিকাম্৷৷10৷৷


ইতি শ্রীমত্পরমহংসপরিব্রাজকাচার্যস্য

শ্রীগোবিন্দভগবত্পূজ্যপাদশিষ্যস্য

শ্রীমচ্ছংকরভগবতঃ কৃতৌ

নবরত্নমালিকা সংপূর্ণা৷৷