Devotional Hyms - Devi

৷৷শ্রীঃ৷৷

প্রাতঃ স্মরামি ললিতাবদনারবিন্দং

বিম্বাধরং পৃথুলমৌক্তিকশোভিনাসম্৷

আকর্ণদীর্ঘনযনং মণিকুণ্ডলাঢ্যং
মন্দস্মিতং মৃগমদোজ্জ্বলফালদেশম্৷৷1৷৷

প্রাতর্ভজামি ললিতাভুজকল্পবল্লীং

রক্তাঙ্গুলীযলসদঙ্গুলিপল্লবাঢ্যাম্৷

মাণিক্যহেমবলযাঙ্গদশোভমানাং
পুণ্ড্রেক্ষুচাপকুসুমেষুসৃণীর্দধানাম্৷৷2৷৷

প্রাতর্নমামি ললিতাচরণারবিন্দং

ভক্তেষ্টদাননিরংত ভবসিন্ধুপোতম্৷

পদ্মাসনাদিসুরনাযকপূজনীযং
পদ্মাঙ্কুশধ্বজসুদর্শনলাঞ্ছনাঢ্যম্৷৷3৷৷

প্রাতঃ স্তুবে পরশিবাং ললিতাং ভবানীং

ত্রয্যন্তবেদ্যবিভবাং করূণানবদ্যাম্৷

বিশ্বস্য সৃষ্টিবিলযস্থিতিহেতুভূতাং
বিদ্যেশ্বরীং নিগমবাঙ্মনসাতিদূরাম্৷৷4৷৷

প্রাতর্বদামি ললিতে তব পুণ্যনাম

কামেশ্বরীতি কমলেতি মহেশ্বরীতি৷

শ্রীশাম্ভবীতি জগতাং জননী পরেতি৷
বাগ্দেবতেতি বচসা ত্রিপুরেশ্বরীতি৷৷5৷৷

যঃ শ্লোকপঞ্চকমিদং ললিতাম্বিকাযাঃ

সৌভাগ্যদং সুললিতং পঠতি প্রভাতে৷

তস্মৈ দদাতি ললিতা ঝটিতি প্রসন্না
বিদ্যাং শ্রিযং বিমলসৌখ্যমনন্তকীর্তিম্৷৷6৷৷


ইতি শ্রীমত্পরমহংসপরিব্রাজকাচার্যস্য

শ্রীগোবিন্দভগবত্পূজ্যপাদশিষ্যস্য

শ্রীমচ্ছংকরভগবতাঃ কৃতৌ

ললিতাপঞচরত্নং সংপূর্ণম্৷৷