Devotional Hyms - Devi

৷৷ശ്രീഃ৷৷

৷৷ഗൌരീദശകമ്৷৷

ലീലാലബ്ധസ്ഥാപിതലുപ്താഖിലലോകാം

ലോകാതീതൈര്യോഗിഭിരന്തശ്ിചരമൃഗ്യാമ്.

ബാലാദിത്യശ്രേണിസമാനദ്യുതിപുഞ്ജാം
ഗൌരീമമ്ബാമമ്ബുരുഹാക്ഷീമഹമീഡേ৷৷1৷৷

പ്രത്യാഹാരധ്യാനസമാധിസ്ഥിതിഭാജാം

നിത്യം ചിത്തേ നിര്വൃതികാഷ്ഠാം കലയന്തീമ്.

സത്യജ്ഞാനാനന്ദമയീം താം തനുരൂപാം
ഗൌരീമമ്ബാമമ്ബുരുഹാക്ഷീമഹമീഡേ৷৷2৷৷

ചന്ദ്രാപീഡാനന്ദിതമന്ദസ്മിതവക്ത്രാം

ചന്ദ്രാപീഡാലംകൃതനീലാലകഭാരാമ്.

ഇന്ദ്രോപേന്ദ്രാദ്യര്ചിതപാദാമ്ബുജയുഗ്മാം
ഗൌരീമമ്ബാമമ്ബുരുഹാക്ഷീമഹമീഡേ৷৷3৷৷

ആദിക്ഷാന്താമക്ഷരമൂര്ത്യാ വിലസന്തീം

ഭൂതേ ഭൂതേ ഭൂതകദമ്ബപ്രസവിത്രീമ്.

ശബ്ദബ്രഹ്മാനന്ദമയീം താം തടിദാഭാം
ഗൌരീമമ്ബാമമ്ബുരുഹാക്ഷീമഹമീഡേ৷৷4৷৷

മൂലാധാരാദുത്ഥിതവീഥ്യാ വിധിരന്ധ്രം

സൌരം ചാന്ദ്രം വ്യാപ്യ വിഹാരജ്വലിതാങ്ഗീമ്.

യേയം സൂക്ഷ്മാത്സൂക്ഷ്മതനുസ്താം സുഖരൂപാം
ഗൌരീമമ്ബാമമ്ബുരുഹാക്ഷീമഹമീഡേ৷৷5৷৷

നിത്യഃ ശുദ്ധോ നിഷ്കല ഏകോ ജഗദീശഃ

സാക്ഷീ യസ്യാഃ സര്ഗവിധൌ സംഹരണേ ച.

വിശ്വത്രാണക്രീഡനലോലാം ശിവപത്നീം
ഗൌരീമമ്ബാമമ്ബുരുഹാക്ഷീമഹമീഡേ৷৷6৷৷

യസ്യാഃ കുക്ഷൌ ലീനമഖണ്ഡം ജഗദണ്ഡം

ഭൂയോ ഭൂയഃ പ്രാദുരഭൂദുത്ഥിതമേവ.

പത്യാ സാര്ധം താം രജതാദ്രൌ വിഹരന്തീം
ഗൌരീമമ്ബാമമ്ബുരുഹാക്ഷീമഹമീഡേ৷৷7৷৷

യസ്യാമോതം പ്രോതമശേഷം മണിമാലാ-

സൂത്രേ യദ്വത്ക്വാപി ചരം ചാപ്യചരം ച.

താമധ്യാത്മജ്ഞാനപദവ്യാ ഗമനീയാം
ഗൌരീമമ്ബാമമ്ബുരുഹാക്ഷീമഹമീഡേ৷৷8৷৷

നാനാകാരൈഃ ശക്തികദമ്ബൈര്ഭുവനാനി

വ്യാപ്യ സ്വൈരം ക്രീഡതി യേയം സ്വയമേകാ.

കല്യാണീം താം കല്പലതാമാനതിഭാജാം
ഗൌരീമമ്ബാമമ്ബുരുഹാക്ഷീമഹമീഡേ৷৷9৷৷

ആശാപാശക്ലേശവിനാശം വിദധാനാം

പാദാമ്ഭോജധ്യാനപരാണാം പുരുഷാണാമ്.

ഈശാമീശാര്ധാങ്ഗഹരാം താമഭിരാമാം
ഗൌരീമമ്ബാമമ്ബുരുഹാക്ഷീമഹമീഡേ৷৷10৷৷

പ്രാതഃകാലേ ഭാവവിശുദ്ധഃ പ്രണിധാനാ-

ദ്ഭക്ത്യാ നിത്യം ജല്പതി ഗൌരീദശകം യഃ.

വാചാം സിദ്ധിം സംപദമഗ്ര്യാം ശിവഭക്തിം
തസ്യാവശ്യം പര്വതപുത്രീ വിദധാതി৷৷11৷৷