Devotional Hyms - Devi

৷৷śrīḥ৷৷

৷৷dēvīcatuḥṣaṣṭyupacārapūjāstōtram৷৷

uṣasi māgadhamaṅgalagāyanai-

rjhaṭiti jāgṛhi jāgṛhi jāgṛhi.

atikṛpārdrakaṭākṣanirīkṣaṇai-
rjagadidaṅ jagadamba sukhīkaru৷৷1৷৷

kanakamayavitardiśōbhamānaṅ

diśi diśi pūrṇasuvarṇakumbhayuktam.

maṇimayamaṇṭapamadhyamēhi māta-
rmayi kṛpayāśu samarcanaṅ grahītum৷৷2৷৷

kanakakalaśaśōbhamānaśīrṣaṅ

jaladharalambi samullasatpatākam.

bhagavati tava saṅnivāsahētō-
rmaṇimayamandiramētadarpayāmi৷৷3৷৷

tapanīyamayī sutūlikā

kamanīyā mṛdulōttaracchadā.

navaratnavibhūṣitā mayā
śibikēyaṅ jagadamba tē.rpitā৷৷4৷৷

kanakamayavitardisthāpitē tūlikāḍhyē

vividhakusumakīrṇē kōṭibālārkavarṇē.

bhagavati ramaṇīyē ratnasiṅhāsanē.smi-
nnupaviśa padayugmaṅ hēmapīṭhē nidhāya৷৷5৷৷

maṇimauktikanirmitaṅ mahāntaṅ

kanakastambhacatuṣṭayēna yuktam.

kamanīyatamaṅ bhavāni tubhyaṅ
navamullōcamahaṅ samarpayāmi৷৷6৷৷

dūrvayā sarasijānvitaviṣṇu-

krāntayā ca sahitaṅ kusumāḍhyam.

padmayugmasadṛśē padayugmē
pādyamētadurarīkuru mātaḥ৷৷7৷৷

gandhapuṣpayavasarṣapadūrvā-

saṅyutaṅ tilakuśākṣatamiśram.

hēmapātranihitaṅ saha ratnai-
rarghyamētadurarīkuru mātaḥ৷৷8৷৷

jalajadyutinā karēṇa jātī-

phalatakkōlalavaṅgagandhayuktaiḥ.

amṛtairamṛtairivātiśītai-
rbhagavatyācamanaṅ vidhīyatām৷৷9৷৷

nihitaṅ kanakasya saṅpuṭē

pihitaṅ ratnapidhānakēna yat.

tadidaṅ jagadamba tē.rpitaṅ
madhuparkaṅ janani pragṛhyatām৷৷10৷৷

ētaccampakatailamamba vividhaiḥ puṣpairmuhurvāsitaṅ

nyastaṅ ratnamayē suvarṇacaṣakē bhṛṅgairbhramadbhirvṛtam.

sānandaṅ surasundarībhirabhitō hastairdhṛtaṅ tē mayā
kēśēṣu bhramarabhramēṣu sakalēṣvaṅgēṣu cālipyatē৷৷11৷৷

mātaḥ kuṅkumapaṅkanirmitamidaṅ dēhē tavōdvartanaṅ

bhaktyāhaṅ kalayāmi hēmarajasā saṅmiśritaṅ kēsaraiḥ.

kēśānāmalakairviśōdhya viśadānkastūrikōdañcitaiḥ
snānaṅ tē navaratnakumbhasahitaiḥ saṅvāsitōṣṇōdakaiḥ৷৷12৷৷

dadhidugdhaghṛtaiḥ samākṣikaiḥ

sitayā śarkarayā samanvitaiḥ.

snapayāmi tavāhamādarā-
jjanani tvāṅ punaruṣṇavāribhiḥ৷৷13৷৷

ēlōśīrasuvāsitaiḥ sakusumairgaṅgāditīrthōdakai-

rmāṇikyāmalamauktikāmṛtarasaiḥ svacchaiḥ suvarṇōdakaiḥ.

mantrānvaidikatāntrikānparipaṭhansānandamatyādarā-
tsnānaṅ tē parikalpayāmi janani snēhāttvamaṅgīkuru৷৷14৷৷

bālārkadyuti dāḍimīyakusumapraspardhi sarvōttamaṅ

mātastvaṅ paridhēhi divyavasanaṅ bhakttyā mayā kalpitam.

muktābhirgrathitaṅ sukañcukamidaṅ svīkṛtya pītaprabhaṅ
taptasvarṇasamānavarṇamatulaṅ prāvarṇamaṅgīkuru৷৷15৷৷

navaratnamayē mayārpitē

kamanīyē tapanīyapādukē.

savilāsamidaṅ padadvayaṅ
kṛpayā dēvi tayōrnidhīyatām৷৷16৷৷

bahubhiragarudhūpaiḥ sādaraṅ dhūpayitvā

bhagavati tava kēśānkaṅkatairmārjayitvā.

surabhibhiraravindaiścampakaiścārcayitvā
jhaṭiti kanakasūtrairjūṭayanvēṣṭayāmi৷৷17৷৷

sauvīrāñjanamidamamba cakṣuṣōstē

vinyastaṅ kanakaśalākayā mayā yat.

tannyūnaṅ malinamapi tvadakṣisaṅgāt
brahmēndrādyabhilaṣaṇīyatāmiyāya৷৷18৷৷

mañjīrē padayōrnidhāya rucirāṅ vinyasya kāñcīṅ kaṭau

muktāhāramurōjayōranupamāṅ nakṣatramālāṅ galē.

kēyūrāṇi bhujēṣu ratnavalayaśrēṇīṅ karēṣu ktramā-
ttāṭaṅkē tava karṇayōrvinidadhē śīrṣē ca cūḍāmaṇim৷৷19৷৷

dhammillē tava dēvi hēmakusumānyādhāya phālasthalē

muktārājivirājamānatilakaṅ nāsāpuṭē mauktikam.

mātarmauktikajālikāṅ ca kucayōḥ sarvāṅgulīṣūrmikāḥ
kaṭyāṅ kāñcanakiṅkiṇīrvinidadhē ratnāvataṅsaṅ śrutau৷৷20৷৷

mātaḥ phālatalē tavātivimalē kāśmīrakastūrikā-

karpūrāgarubhiḥ karōmi tilakaṅ dēhē.ṅgarāgaṅ tataḥ.

vakṣōjādiṣu yakṣakardamarasaṅ siktvā ca puṣpadravaṅ
pādau candanalēpanādibhirahaṅ saṅpūjayāmi kramāt৷৷21৷৷

ratnākṣataistvāṅ paripūjayāmi

muktāphalairvā rucirairaviddhaiḥ.

akhaṇḍitairdēvi yavādibhirvā
kāśmīrapaṅkāṅkitataṇḍulairvā৷৷22৷৷

janani campakatailamidaṅ purō

mṛgamadōpayutaṅ paṭavāsakam.

surabhigandhamidaṅ ca catuḥsamaṅ
sapadi sarvamidaṅ parigṛhyatām৷৷23৷৷

sīmantē tē bhagavati mayā sādaraṅ nyastamēta-

tsindūraṅ mē hṛdayakamalē harṣavarṣaṅ tanōti.

bālādityadyutiriva sadā lōhitā yasya kāntī-
rantardhvāntaṅ harati sakalaṅ cētasā cintayaiva৷৷24৷৷

mandārakundakaravīralavaṅgapuṣpai-

stvāṅ dēvi saṅtatamahaṅ paripūjayāmi.

jātījapāvakulacampakakētakādi-
nānāvidhāni kusumāni ca tē.rpayāmi৷৷25৷৷

mālatīvakulahēmapuṣpikā-

kāñcanārakaravīrakaitakaiḥ.

karṇikāragirikarṇikādibhiḥ
pūjayāmi jagadamba tē vapuḥ৷৷26৷৷

pārijātaśatapatrapāṭalai-

rmallikāvakulacampakādibhiḥ.

ambujaiḥ sukusumaiśca sādaraṅ
pūjayāmi jagadamba tē vapuḥ৷৷27৷৷

lākṣāsaṅmilitaiḥ sitābhrasahitaiḥ śrīvāsasaṅmiśritaiḥ

karpūrākalitaiḥ śirairmadhuyutairgōsarpiṣā lōḍitaiḥ.

śrīkhaṇḍāgarugugguluprabhṛtibhirnānāvidhairvastubhi-
rdhūpaṅ tē parikalpayāmi janani snēhāttvamaṅgīkuru৷৷28৷৷

ratnālaṅkṛtahēmapātranihitairgōsarpiṣā lōḍitai-

rdīpairdīrghatarāndhakārabhidurairbālārkakōṭiprabhaiḥ.

ātāmrajvaladujjvalapravilasadratnapradīpaistathā
mātastvāmahamādarādanudinaṅ nīrājayāmyuccakaiḥ৷৷29৷৷

mātastvāṅ dadhidugdhapāyasamahāśālyannasaṅtānikāḥ

sūpāpūpasitāghṛtaiḥ savaṭakaiḥ sakṣaudrarambhāphalaiḥ.

ēlājīrakahiṅgunāgaraniśākustumbharīsaṅskṛtaiḥ
śākaiḥ sākamahaṅ sudhādhikarasaiḥ saṅtarpayāmyarcayan৷৷30৷৷

sāpūpasūpadadhidugdhasitāghṛtāni

susvādubhaktaparamānnapuraḥsarāṇi.

śākōllasanmaricijīrakabāhlikāni
bhakṣyāṇi bhuṅkṣva jagadamba mayārpitāni৷৷31৷৷

kṣīramētadidamuttamōttamaṅ

prājyamājyamidamujjvalaṅ madhu.

mātarētadamṛtōpamaṅ payaḥ
saṅbhramēṇa paripīyatāṅ muhuḥ৷৷32৷৷

uṣṇōdakaiḥ pāṇiyugaṅ mukhaṅ ca

prakṣālya mātaḥ kaladhautapātrē.

karpūramiśrēṇa sakuṅkumēna
hastau samudvartaya candanēna৷৷33৷৷

atiśītamuśīravāsitaṅ

tapanīyē kalaśē nivēśitam.

paṭapūtamidaṅ jitāmṛtaṅ
śuci gaṅgājalamamba pīyatām৷৷34৷৷

jambvāmrarambhāphalasaṅyutāni

drākṣāphalakṣaudrasamanvitāni.

sanārikēlāni sadāḍimāni
phalāni tē dēvi samarpayāmi৷৷35৷৷

kūśmāṇḍakōśātakisaṅyutāni

jambīranāraṅgasamanvitāni.

sabījapūrāṇi sabādarāṇi
phalāni tē dēvi samarpayāmi৷৷36৷৷

karpūrēṇa yutairlavaṅgasahitaistakkōlacūrṇānvitaiḥ

susvādukramukaiḥ sagaurakhadiraiḥ susnigdhajātīphalaiḥ.

mātaḥ kaitakapatrapāṇḍurucibhistāmbūlavallīdalaiḥ
sānandaṅ mukhamaṇḍanārthamatulaṅ tāmbūlamaṅgīkuru৷৷37৷৷

ēlālavaṅgādisamanvitāni

takkōlakarpūravimiśritāni.

tāmbūlavallīdalasaṅyutāni
pūgāni tē dēvi samarpayāmi৷৷38৷৷

tāmbūlanirjitasutaptasuvarṇavarṇaṅ

svarṇāktapūgaphalamauktikacūrṇayuktam.

sauvarṇapātranihitaṅ khadirēṇa sārdhaṅ
tāmbūlamamba vadanāmburuhē gṛhāṇa৷৷39৷৷

mahati kanakapātrē sthāpayitvā viśālān

ḍamarusadṛśarūpānbaddhagōdhūmadīpān.

bahughṛtamatha tēṣu nyasya dīpānprakṛṣṭā-
nbhuvanajanani kurvē nityamārārtikaṅ tē৷৷40৷৷

savinayamatha datvā jānuyugmaṅ dharaṇyāṅ

sapadi śirasi dhṛtvā pātramārārtikasya.

mukhakamalasamīpē tē.mba sārthaṅ trivāraṅ
bhramayati mayi bhūyāttē kṛpārdraḥ kaṭākṣaḥ৷৷41৷৷

atha bahumaṇimiśrairmauktikaistvāṅ vikīrya

tribhuvanakamanīyaiḥ pūjayitvā ca vastraiḥ.

militavividhamuktāṅ divyamāṇikyayuktāṅ
janani kanakavṛṣṭiṅ dakṣiṇāṅ tē.rpayāmi৷৷42৷৷

mātaḥ kāñcanadaṇḍamaṇḍitamidaṅ pūrṇēndubimbaprabhaṅ

nānāratnaviśōbhihēmakalaśaṅ lōkatrayāhlādakam.

bhāsvanmauktikajālikāparivṛtaṅ prītyātmahastē dhṛtaṅ
chatraṅ tē parikalpayāmi śirasi tvaṣṭrā svayaṅ nirmitam৷৷43৷৷

śaradindumarīcigaurabarṇai-

rmaṇimuktāvilasatsuvarṇadaṇḍaiḥ.

jagadamba vicitracāmaraistvā-
mahamānandabharēṇa bījayāmi৷৷44৷৷

mārtāṇḍamaṇḍalanibhō jagadamba yō.yaṅ

bhaktyā mayā maṇimayō mukurō.rpitastē.

pūrṇēndubimbaruciraṅ vadanaṅ svakīya-
masminvilōkaya vilōlavilōcanē tvam৷৷45৷৷

indrādayō natinatairmakuṭapradīpai-

rnīrājayanti satataṅ tava pādapīṭham.

tasmādahaṅ tava samastaśarīramēta-
nnīrājayāmi jagadamba sahasradīpaiḥ৷৷46৷৷

priyagatiratituṅgō ratnapalyāṇayuktaḥ

kanakamayavibhūṣaḥ snigdhagambhīraghōṣaḥ.

bhagavati kalitō.yaṅ vāhanārthaṅ mayā tē
turagaśatasamētō vāyuvēgasturaṅgaḥ৷৷47৷৷

madhukaravṛtakumbhanyastasindūrarēṇuḥ

kanakakalitaghaṇṭākiṅkiṇīśōbhikaṇṭhaḥ.

śravaṇayugalacañcaccāmarō mēghatulyō
janani tava mudē syānmattamātaṅga ēṣaḥ৷৷48৷৷

drutataraturagairvirājamānaṅ

maṇimayacakracatuṣṭayēna yuktam.

kanakamayamamuṅ vitānavantaṅ
bhagavati tē hi rathaṅ samarpayāmi৷৷49৷৷

hayagajarathapattiśōbhamānaṅ

diśi diśi dundubhimēghanādayuktam.

atibahu caturaṅgasainyamēta-
dbhagavati bhaktibharēṇa tē.rpayāmi৷৷50৷৷

parighīkṛtasaptasāgaraṅ

bahusaṅpatsahitaṅ mayāmba tē vipulam.

prabalaṅ dharaṇītalābhidhaṅ
dṛḍhadurgaṅ nikhilaṅ samarpayāmi৷৷51৷৷

śatapatrayutaiḥ svabhāvaśītai-

ratisaurabhyayutaiḥ parāgapītaiḥ.

bhramarīmukharīkṛtairanantai-
rvyajanaistvāṅ jagadamba vījayāmi৷৷52৷৷

bhramaralulitalōlakuntalālī-

vigalitamālyavikīrṇaraṅgabhūmiḥ.

iyamatirucirā naṭī naṭantī
tava hṛdayē mudamātanōtu mātaḥ৷৷53৷৷

mukhanayanavilāsalōlavēṇī-

vilasitanirjitalōlabhṛṅgamālāḥ.

yuvajanasukhakāricārulīlā
bhagavati tē puratō naṭanti bālāḥ৷৷54৷৷

bhramadalikulatulyālōladhammillabhārāḥ

smitamukhakamalōdyaddivyalāvaṇyapūrāḥ.

anupamitasuvēṣā vārayōṣā naṭanti
parabhṛtakalakaṇṭhyō dēvi dainyaṅ dhunōtu৷৷55৷৷

ḍamaruḍiṇḍimajarjharajhallarī-

mṛduravadragaḍaddragaḍādayaḥ.

jhaṭiti jhāṅkṛtajhāṅkṛtajhāṅkṛtai-
rbahudayaṅ hṛdayaṅ sukhayantu tē৷৷56৷৷

vipañcīṣu saptasvarānvādayantya-

stava dvāri gāyanti gandharvakanyāḥ.

kṣaṇaṅ sāvadhānēna cittēna mātaḥ
samākarṇaya tvaṅ mayā prārthitāsi৷৷57৷৷

abhinayakamanīyairnartanairnartakīnāṅ

kṣaṇamapi ramayitvā cēta ētattvadīyam.

svayamahamaticitrairnṛttavāditragītai-
rbhagavati bhavadīyaṅ mānasaṅ rañjayāmi৷৷58৷৷

tava dēvi guṇānuvarṇanē

caturā nō caturānanādayaḥ.

tadihaikamukhēṣu jantuṣu
stavanaṅ kastava kartumīśvaraḥ৷৷59৷৷

padē padē yatparipūjakēbhyaḥ sadyō.śvamēdhādiphalaṅ dadāti.
tatsarvapāpakṣayahētubhūtaṅ pradakṣiṇaṅ tē paritaḥ karōmi৷৷60৷৷

raktōtpalāraktalatāprabhābhyāṅ dhvajōrdhvarēkhākuliśāṅkitābhyām.
aśēṣabṛndārakavanditābhyāṅ namō bhavānīpadapaṅkajābhyām৷৷61৷৷

caraṇanalinayugmaṅ paṅkajaiḥ pūjayitvā

kanakakamalamālāṅ kaṇṭhadēśē.rpayitvā.

śirasi vinihitō.yaṅ ratnapuṣpāñjalistē
hṛdayakamalamadhyē dēvi harṣaṅ tanōtu৷৷62৷৷

atha maṇimayamañcakābhirāmē

kanakamayavitānarājamānē.

prasaradagarudhūpadhūpitē.smi-
nbhagavati bhavanē.stu tē nivāsaḥ৷৷63৷৷

ētasminmaṇikhacitē suvarṇapīṭhē

trailōkyābhayavaradau nidhāya hastau.

vistīrṇē mṛdulatarōttaracchadē.smi-
nparyaṅkē kanakamayē niṣīda mātaḥ৷৷64৷৷

tava dēvi sarōjacihnayōḥ padayōrnirjitapadmarāgayōḥ.
atiraktatarairalaktakaiḥ punaruktāṅ racayāmi raktatām৷৷65৷৷

atha mātaruśīravāsitaṅ nijatāmbūlarasēna rañjitam.
tapanīyamayē hi paṭṭakē mukhagaṇḍūva(?)jalaṅ vidhīyatām৷৷66৷৷

kṣaṇamatha jagadamba mañcakē.smi-

nmṛdutalatūlikayā virājamānē.

atirahasi mudā śivēna sārdhaṅ
sukhaśayanaṅ kuru tatra māṅ smarantī৷৷67৷৷

muktākundēndugaurāṅ maṇimayamakuṭāṅ ratnatāṭaṅkayuktā-

makṣasrakpuṣpahastāmabhayavarakarāṅ candracūḍāṅ trinētrām.

nānālaṅkārayuktāṅ suramakuṭamaṇidyōtitasvarṇapīṭhāṅ
sānandāṅ suprasannāṅ tribhuvanajananīṅ cētasā cintayāmi৷৷68৷৷

ēṣā bhaktyā tava viracitā yā mayā dēvi pūjā

svīkṛtyaināṅ sapadi sakalānmē.parādhānkṣamasva.

nyūnaṅ yattattava karuṇayā pūrṇatāmētu sadyaḥ
sānandaṅ mē hṛdayakamalē tē.stu nityaṅ nivāsaḥ৷৷69৷৷

pūjāmimāṅ yaḥ paṭhati prabhātē

madhyāhnakālē yadi vā pradōṣē.

dharmārthakāmānpuruṣō.bhyupaiti
dēhāvasānē śivabhāvamēti৷৷70৷৷

pūjāmimāṅ paṭhēnnityaṅ pūjāṅ kartumanīśvaraḥ.
pūjāphalamavāpnōti vāñchitārthaṅ ca vindati৷৷71৷৷

pratyahaṅ bhaktisaṅyuktō yaḥ pūjanamidaṅ paṭhēt.
vāgvādinyāḥ prasādēna vatsarātsa kavirbhavēt৷৷72৷৷


iti śrīmatparamahaṅsaparivrājakācāryasya

śrīgōvindabhagavatpūjyapādaśiṣyasya

śrīmacchaṅkarabhagavataḥ kṛtau

dēvīcatuḥṣaṣṭyupacārapūjāstōtraṅ

saṅpūrṇam৷৷