Devotional Hyms - Devi

||ଶ୍ରୀଃ||

||ଭବାନୀଭୁଜଂଗମ୍||

ଷଡାଧାରପଙ୍କେରୁହାନ୍ତର୍ବିରାଜ-

ତ୍ସୁଷୁମ୍ନାନ୍ତରାଲେତିତେଜୋଲ୍ଲସନ୍ତୀମ୍|

ସୁଧାମଣ୍ଡଲଂ ଦ୍ରାବଯନ୍ତୀଂ ପିବନ୍ତୀଂ
ସୁଧାମୂର୍ତିମୀଡେ ଚିଦାନନ୍ଦରୂପାମ୍||1||

ଜ୍ବଲତ୍କୋଟିବାଲାର୍କଭାସାରୁଣାଙ୍ଗୀଂ

ସୁଲାବଣ୍ଯଶ୍ରୃଙ୍ଗାରଶୋଭାଭିରାମାମ୍|

ମହାପଦ୍ମକିଞ୍ଜଲ୍କମଧ୍ଯେ ବିରାଜ-
ତ୍ିତ୍ରକୋଣେ ନିଷଣ୍ଣାଂ ଭଜେ ଶ୍ରୀଭବାନୀମ୍||2||

କ୍ବଣତ୍କିଙ୍କିଣୀନୂପୁରୋଦ୍ଭାସିରତ୍ନ-

ପ୍ରଭାଲୀଢଲାକ୍ଷାର୍ଦ୍ରପାଦାବ୍ଜଯୁଗ୍ମମ୍|

ଅଜେଶାଚ୍ଯୁତାଦ୍ଯୈଃ ସୁରୈଃ ସେବ୍ଯମାନଂ
ମହାଦେବି ମନ୍ମୂର୍ଧ୍ନି ତେ ଭାବଯାମି||3||

ସୁଶୋଣାମ୍ବରାବଦ୍ଧନୀବୀବିରାଜ-

ନ୍ମହାରତ୍ନକାଞ୍ଚୀକଲାପଂ ନିତମ୍ବମ୍|

ସ୍ଫୁରଦ୍ଦକ୍ଷିଣାବର୍ତନାଭିଂ ଚ ତିସ୍ରୋ
ବଲୀରମ୍ବ ତେ ରୋମରାଜିଂ ଭଜେହମ୍||4||

ଲସଦ୍ବୃତ୍ତମୁତ୍ତୁଙ୍ଗମାଣିକ୍ଯକୁମ୍ଭୋ-

ପମଶ୍ରି ସ୍ତନଦ୍ବନ୍ଦ୍ବମମ୍ବାମ୍ବୁଜାକ୍ଷି|

ଭଜେ ଦୁଗ୍ଧପୂର୍ଣାଭିରାମଂ ତବେଦଂ
ମହାହାରଦୀପ୍ତଂ ସଦା ପ୍ରସ୍ନୁତାସ୍ଯମ୍||5||

ଶିରୀଷପ୍ରସୂନୋଲ୍ଲସଦ୍ବାହୁଦଣ୍ଡୈ-

ର୍ଜ୍ବଲଦ୍ବାଣକୋଦଣ୍ଡପାଶାଙ୍କୁଶୈଶ୍ଚ|

ଚଲତ୍କଙ୍କଣୋଦାରକେଯୂରଭୂଷୋ-
ଜ୍ଜ୍ବଲଦ୍ଭିର୍ଲସନ୍ତୀଂ ଭଜେ ଶ୍ରୀଭବାନୀମ୍||6||

ଶରତ୍ପୂର୍ଣଚନ୍ଦ୍ରପ୍ରଭାପୂର୍ଣବିମ୍ବା-

ଧରସ୍ମେରବକ୍ତ୍ରାରବିନ୍ଦାଂ ସୁଶାନ୍ତାମ୍|

ସୁରତ୍ନାବଲୀହାରତାଟଙ୍କଶୋଭାଂ
ମହାସୁପ୍ରସନ୍ନାଂ ଭଜେ ଶ୍ରୀଭବାନୀମ୍||7||

ସୁନାସାପୁଟଂ ସୁନ୍ଦରଭ୍ରୂଲଲାଟଂ

ତବୌଷ୍ଠଶ୍ରିଯଂ ଦାନଦକ୍ଷଂ କଟାକ୍ଷମ୍|

ଲଲାଟେ ଲସଦ୍ଗନ୍ଧକସ୍ତୂରିଭୂଷଂ
ସ୍ଫୁରଚ୍ଛ୍ରୀମୁଖାମ୍ଭୋଜମୀଡେହମମ୍ବ||8||

ଚଲତ୍କୁନ୍ତଲାନ୍ତର୍ଭ୍ରମଦ୍ଭୃଙ୍ଗବୃନ୍ଦଂ

ଘନସ୍ନିଗ୍ଧଧମ୍ମିଲ୍ଲଭୂଷୋଜ୍ଜ୍ବଲଂ ତେ|

ସ୍ଫୁରନ୍ମୌଲିମାଣିକ୍ଯବଦ୍ଧେନ୍ଦୁରେଖା-
ବିଲାସୋଲ୍ଲସଦ୍ଦିବ୍ଯମୂର୍ଧାନମୀଡେ||9||

ଇତି ଶ୍ରୀଭବାନି ସ୍ବରୂପଂ ତବେଦଂ

ପ୍ରପଞ୍ଚାତ୍ପରଂ ଚାତିସୂକ୍ଷ୍ମଂ ପ୍ରସନ୍ନମ୍|

ସ୍ଫୁରତ୍ବମ୍ବ ଡିମ୍ଭସ୍ଯ ମେ ହୃତ୍ସରୋଜେ
ସଦା ବାଙ୍ମଯଂ ସର୍ବତେଜୋମଯଂ ଚ||10||

ଗଣେଶାଭିମୁଖ୍ଯାଖିଲୈଃ ଶକ୍ତିବୃନ୍ଦୈ-

ର୍ବୃତାଂ ବୈ ସ୍ଫୁରଚ୍ଚକ୍ରରାଜୋଲ୍ଲସନ୍ତୀମ୍|

ପରାଂ ରାଜରାଜେଶ୍ବରି ତ୍ରୈପୁରି ତ୍ବାଂ
ଶିବାଙ୍କୋପରିସ୍ଥାଂ ଶିବାଂ ଭାବଯାମି||11||

ତ୍ବମର୍କସ୍ତ୍ବମିନ୍ଦୁସ୍ତ୍ବମଗ୍ନିସ୍ତ୍ବମାପ-

ସ୍ତ୍ବମାକାଶଭୂବାଯବସ୍ତ୍ବଂ ମହତ୍ତ୍ବମ୍|

ତ୍ବଦନ୍ଯୋ ନ କଶ୍ିଚତ୍ପ୍ରପଞ୍ଚୋସ୍ତି ସର୍ବଂ
ତ୍ବମାନନ୍ଦସଂବିତ୍ସ୍ବରୂପାଂ ଭଜେହମ୍||12||

ଶ୍ରୁତୀନାମଗମ୍ଯେ ସୁବେଦାଗମଜ୍ଞା

ମହିମ୍ନୋ ନ ଜାନନ୍ତି ପାରଂ ତବାମ୍ବ|

ସ୍ତୁତିଂ କର୍ତୁମିଚ୍ଛାମି ତେ ତ୍ବଂ ଭବାନି|
କ୍ଷମସ୍ବେଦମତ୍ର ପ୍ରମୁଗ୍ଧଃ କିଲାହମ୍||13||

ଗୁରୁସ୍ତ୍ବଂ ଶିବସ୍ତ୍ବଂ ଚ ଶକ୍ତିସ୍ତ୍ବମେବ

ତ୍ବମେବାସି ମାତା ପିତା ଚ ତ୍ବମେବ|

ତ୍ବମେବାସି ବିଦ୍ଯା ତ୍ବମେବାସି ବନ୍ଧୁ-
ର୍ଗତିର୍ମେ ମତିର୍ଦେବି ସର୍ବଂ ତ୍ବମେବ||14||

ଶରଣ୍ଯେ ବରେଣ୍ଯେ ସୁକାରୁଣ୍ଯମୂର୍ତେ

ହିରଣ୍ଯୋଦରାଦ୍ଯୈରଗଣ୍ଯେ ସୁପୁଣ୍ଯେ|

ଭବାରଣ୍ଯଭୀତେଶ୍ଚ ମାଂ ପାହି ଭଦ୍ରେ
ନମସ୍ତେ ନମସ୍ତେ ନମସ୍ତେ ଭବାନି||15||

ଇତୀମାଂ ମହଚ୍ଛ୍ରୀଭବାନୀଭୁଜଂଗଂ

ସ୍ତୁତିଂ ଯଃ ପଠେଦ୍ଭକ୍ତିଯୁକ୍ତଶ୍ଚ ତସ୍ମୈ|

ସ୍ବକୀଯଂ ପଦଂ ଶାଶ୍ବତଂ ବେଦସାରଂ
ଶ୍ରିଯଂ ଚାଷ୍ଟସିଦ୍ଧିଂ ଭବାନୀ ଦଦାତି||16||

ଭବାନୀ ଭବାନୀ ଭବାନୀ ତ୍ରିବାର-

ମୁଦାରଂ ମୁଦା ସର୍ବଦା ଯେ ଜପନ୍ତି|

ନ ଶୋକଂ ନ ମୋହଂ ନ ପାପଂ ନ ଭୀତିଃ
କଦାଚିତ୍କଥଂଚିତ୍କୁତଶ୍ଚଜ୍ଜନାନାମ୍||17||


ଇତି ଶ୍ରୀମତ୍ପରମହଂସପରିବ୍ରାଜକାଚାର୍ଯସ୍ଯ

ଶ୍ରୀଗୋବିନ୍ଦଭଗବତ୍ପୂଜ୍ଯପାଦଶିଷ୍ଯସ୍ଯ

ଶ୍ରୀମଚ୍ଛଂକରଭଗବତଃ କୃତୌ

ଭବାନୀଭୁଜଂଗଂ ସଂପୂର୍ଣମ୍||