ത്രിമൂര്തിസര്ഗാച്ച പുരാഭവത്വാ-

ത്ത്രയീമയത്വാച്ച പുരൈവ ദേവ്യാഃ.

ലയേ ത്രിലോക്യാ അപി പൂരണത്വാ-
ത്പ്രായോമ്ബികായാസ്ത്രിപുരേതി നാമ৷৷8.2৷৷

വാഗൈശ്വര്യാതിശയദതയാ വാഗ്ഭവം ബീജമുക്തം

ത്രൈലോക്യക്ഷോഭണവശതാകൃഷ്ടിദം കാമരാജമ്.

ശാക്തം ക്ഷ്വേലാപഹരണകവിതാകാരകം മന്ത്രമേത-
ത്പ്രോക്തം ധര്മദ്രവിണസുഖമോക്ഷപ്രദം സാധകാനാമ്৷৷8.4৷৷

മൂര്ധനി ഗുഹ്യഹൃദോരപി

നേത്രത്രിതയേ ച കര്ണയോരാസ്യേ.

അംസദ്വയേ ച പൃഷ്ഠേ
കൂര്പരയോര്നാഭിമണ്ഡലേ ന്യസ്യേത്৷৷8.6৷৷

ആതാമ്രാര്കായുതാഭാം കലിതശശികലാരഞ്ജിതപ്താം ത്രിണേത്രാം

ദേവീം പൂര്ണേന്ദുവക്ത്രാം വിധൃതജപപടീപുസ്തകാഭീത്യഭീഷ്ടാമ്.

പീനോത്തുങ്ഗസ്തനാര്താം വലിലസിതവിലഗ്നാമസൃക്പങ്കരാജ-
ന്മുണ്ഡസ്രങ്മണ്ഡിതാങ്ഗീമരുണതരദുകൂലാനുലേപാം നമാമി৷৷8.8৷৷

പ്രാണായാമൈഃ പവിത്രീകൃതതനുരഥ മന്ത്രീ നിജാധാരരാജ-

ദ്യോനിസ്ഥാം ദിവ്യരൂപാം പ്രമുദിതമനസാഭ്യര്ചയിത്വോപചാരൈഃ.

ആബദ്ധ്വാ യോനിമുദ്രാമപി നിജഗുദലിങ്ഗാന്തരസ്ഥാം പ്രദീപ്താം
ഭൂയോ ദ്രവ്യൈഃ സുശുദ്ധൈരരുണരുചിഭിരിത്യാരഭേദ്ബാഹ്യപൂജാമ്৷৷8.10৷৷

വഹ്നേഃ പുരദ്വിതയവാസവയോനിമധ്യ-

സംബദ്ധവഹ്നിവരുണേശസമാശ്രിതാശ്രീ.

ദേവ്യര്ചനായ വിഹിതം മുനിഭിഃ പുരൈവ
ലോകേ സുദുര്ലഭമിദം നവയോനിചക്രമ്৷৷8.12৷৷

പ്രാങ്മധ്യയോന്യോഃ പുനരന്തരാലേ

സംപൂജയേത്പ്രാഗ്ഗുരുപാദപങ്ക്തിമ്.

പരാഭിധാനാമപരാഹ്വയാം ച
പരാപരാഖ്യാമപി വാഗ്ഭവാദിമ്৷৷8.14৷৷

സുഭഗാ ഭഗാ ഭഗാന്തേ

സര്പിണി ഭഗമാലിനീ അനങ്ഗാഹ്വാ.

തത്പൂര്വകുസുമസംജ്ഞാ
തദാദികേ ചാഥ മേഖലാമദനേ৷৷8.16৷৷

അസിതാങ്ഗാഖ്യോ രുരുരപി

ചണ്ഡഃ ക്രോധാഹ്വയസ്തഥോന്മത്തഃ.

സകപാലിഭീഷണാഖ്യഃ
സംഹാരശ്ചാഷ്ടഭൈരവാഃ കഥിതാഃ৷৷8.18৷৷

അച്ഛാഭഃ സ്വച്ഛവേഷോ ധരണിമയഗൃഹേ വാഗ്ഭവം ലക്ഷമേകം

യോ ജപ്യാത്തദ്ദശാംശം വിഹിതഹുതവിധിര്മന്ത്രജപ്താഞ്ജനാദിഃ.

കാവ്യൈര്നാനാര്ഥവൃത്തൈസ്ത്രിഭുവനമഖിലം പൂരയേന്മന്ത്രജാപീ
മാരാര്ത്യാ വിഹ്വലാഭിഃ പുനരയമനിശം സേവ്യതേ സുന്ദരീഭിഃ৷৷8.20৷৷

സസുരാസുരസിദ്ധയക്ഷ-

വിദ്യാധരഗന്ധര്വഭുജംഗചാരണാനാമ്.

പ്രമദാമദവേഗതോ വികീര്ണാ-
ഭരണാഃ സ്രസ്തദുകൂലകേശജാലാഃ৷৷8.22৷৷

രോമാഞ്ചകഞ്ചുകിതഗാത്രലതാഘനോദ്യ-

ദുത്തുങ്ഗപീനകുചകുമ്ഭനിപീഡിതാങ്ഗ്യഃ.

ഔത്സുക്യഭാരപൃഥുവേപഥുഖേദസന്ന-
പാദാരവിന്ദചലനസ്ഖലനാഭിയാതാഃ৷৷8.24৷৷

മസ്തകാരചിതദോര്ദ്വയാഞ്ജലി-

പ്രാഭൃതാ ഹരിണശാബലോചനാഃ.

വാഞ്ഛിതാര്ഥകരണോദ്യതാശ്ച ത-
ദ്ദൃഷ്ടിപാതമഭി സംനമന്തി താഃ৷৷8.26৷৷

പലാശപുഷ്പൈര്മധുരത്രയാക്തൈ-

ര്ഹോമം വിദധ്യാദയുതാവധിം യഃ.

സരസ്വതീമന്ദിരമാശു ഭൂയാ-
ത്സൌഭാഗ്യലക്ഷ്മ്യോശ്ച സ മന്ത്രജാപീ৷৷8.28৷৷

മാലതീവകുലജൈര്ദലൈര്ദലൈ-

ശ്ചന്ദനാമ്ഭസി ഘനേ നിമജ്ജിതൈഃ.

ശ്രീകരീകുസുമകൈര്ഹുതക്രിയാ
സൈവ ചാസു കവിതാകരീ മതാ৷৷8.30৷৷

മധുരത്രയേണ സഹ വില്വജൈഃ ഫലൈ-

ര്ഹവനക്രിയാശു ജനതാനുരഞ്ജനീ.

അപി സൈവ സാധകസമൃദ്ധിദായിനീ
ദിനശോ വിശിഷ്ടകമലാകരീ മതാ৷৷8.32৷৷

ഫുല്ലൈര്ബില്വപ്രസൂനൈസ്തദഭിനവദലൈ രക്തവാരാഹിപുഷ്പൈഃ

പ്രത്യഗ്രൈര്ബന്ധുജീവൈരരുണസരസിജൈരുത്പലൈഃ കൈരവാഹ്വൈഃ.

നന്ദ്യാവര്തൈഃ സകുന്ദൈര്നൃപതരുകുസുമൈഃ പാടലീനാഗപുഷ്പൈഃ
സ്വാദ്വക്തൈരിന്ദിരാപ്ത്യൈ ജുഹുത ച ദിനശഃ സര്പിഷാ പായസേന৷৷8.34৷৷

വഹ്നേ(?)ര്ബിമ്ബദ്വയപരിവൃതാധാരസംസ്ഥം സമുദ്യ-

ദ്ബാലാര്കാഭം സ്വരഗണസമാവേഷ്ടിതം വാഗ്ഭവാഖ്യമ്.

വാണ്യാ സ്വീയാദ്വദനകുഹരാത്സംതതം നിഃസരന്ത്യാ
ധ്യായേന്മന്ത്രീ പ്രതതകിരണപ്രാവൃതം ദുഃഖശാന്ത്യൈ৷৷8.36৷৷

മൂര്ധ്നോഥ ദ്വാദശാന്തോദിതശശധരബിമ്ബസ്ഥയോനൌ സ്ഫുരന്തം

സംവീതം വ്യാപകാര്ണൈര്ധവലരുചി മകാരസ്ഥിതം ബീജമന്ത്യമ്.

ധ്യാത്വാ സാരസ്വതാച്ഛാമൃതജലലുലിതം ദിവ്യകാവ്യാദികര്താ
നിത്യം ക്ഷ്വേലാപമൃത്യുഗ്രഹദുരിതവികാരാന്നിഹന്ത്യാശു മന്ത്രീ৷৷8.38৷৷

ഗുഹ്യസ്ഥിതം വാ മദനസ്യ ബീജം

ജപാരുണം രക്തസുധാഃ സ്രവന്തമ്.

വിചിന്ത്യ തസ്മിന്വിനിവേശ്യ സാധ്യാം
വശീകരോത്യേവ വിദഗ്ധലോകമ്৷৷8.40৷৷

സംക്ഷേപതോ നിഗദിതാ ത്രിപുരാഭിധാനാ

വിദ്യാ സജാപഹവനാ സവിധാനപൂജാ.

സോപാസനാ ച സകലാഭ്യുദയപ്രസിദ്ധ്യൈ
വാണീരമാപ്തിവിധയേ ജഗതോ ഹിതായ৷৷8.42৷৷

മധ്യേ വദ്യക്ഷരയോഃ

സദവദവാഗ്വക്ഷരാ നിചന്ദ്രയുഗേ.

പ്രോക്താ ദശാക്ഷരീയം
കണ്വവിരാജൌ ച വാഗൃഷിപ്രഭവാഃ৷৷8.44৷৷

അമലകമലസംസ്ഥാ ലേഖിനീപുസ്തകോദ്യ-

ത്കരയുഗലസരോജാ കുന്ദമന്ദാരഗൌരാ.

ധൃതശശധരഖണ്ഡോല്ലാസികോടീരചൂഡാ
ഭവതു ഭവഭയാനാം ഭങ്ഗിനീ ഭാരതീ വഃ৷৷8.46৷৷

മാതൃകോക്തവിധിനാക്ഷരാമ്ബുജേ

ശക്തിഭിശ്ച വിനിയുജ്യ പൂര്വവത്.

പീഠമന്ത്രവചസാ മഹേശ്വരീം
പൂജയേത്പ്രഥമമങ്ഗമന്ത്രകൈഃ৷৷8.48৷৷

ഇതി സിദ്ധമനുര്മനോജദൂരോ

നചിരാദേവ കവിര്ഭവേന്മനസ്വീ.

ജപഹോമരതഃ സദാവഗച്ഛേ-
ദ്വനിതാം വാഗധിപേതി ഗൌരവേണ৷৷8.50৷৷

ഹൃദയദ്വയസേ സ്ഥിതോഥ തോയേ

രവിബിമ്ബേ പ്രതിപദ്യ വാഗധീശാമ്.

ജപതസ്ത്രിസഹസ്രസംഖ്യമര്വാ-
ക്കവിതാ മണ്ഡലതോ ഭവേത്പ്രഭൂതാ৷৷8.52৷৷

ചതുരങ്ഗുലജൈഃ സമിത്പ്രസൂനൈ-

ര്ജുഹുയാദ്യോ മധുരത്രയാവസിക്തൈഃ.

മനുജഃ സമവാപ്യ ധീവിലാസാ-
നചിരാത്കാവ്യകൃതാം ഭവേത്പുരോഗഃ৷৷8.54৷৷

ആദ്യന്തപ്രണവഗശക്തിമധ്യസംസ്ഥാ

വാഗ്ഭൂയോ ഭവതി സരസ്വതീചഡേന്താ.

നത്യന്തോ മനുരയമീശസംഖ്യവര്ണഃ
സംപ്രോക്തോ ഭുവി ഭജമാനപാരിജാതഃ৷৷8.56৷৷

ഹംസാരൂഢാ ഹരഹസിതഹാരേന്ദുകുന്ദാവദാതാ

വാണീ മന്ദസ്മിതയുതമുഖീ മൌലിബദ്ധേന്ദുലേഖാ.

വിദ്യാ വീണാമൃതമയഘടാക്ഷസ്രഗാദീപ്തഹസ്താ
ശുഭ്രാബ്ജസ്ഥാ ഭവദഭിമതപ്രാപ്തയേ ഭാരതീ സ്യാത്৷৷8.58৷৷

പൂജായാം പാര്ശ്വയുഗേ

സസംസ്കൃതാ പ്രാകൃതാ ച വാഗ്ദേവ്യാഃ.

കേവലവാങ്മയരൂപാ
സംപൂജ്യാങ്ഗൈശ്ച ശക്തിഭിസ്തദനു৷৷8.60৷৷

ഇതി നിഗദിതോ വാഗീശ്വര്യാഃ സഹോമജപാര്ചനാ-

വിധിരനുദിനം മന്ത്രീ ത്വേനാം ഭജന്പരിമുച്യതേ.

സകലദുരിതൈര്മേധാലക്ഷ്മീയശോഭിരവാപ്യതേ
പരമപരമാം ഭക്തിം പ്രാപ്യോഭയത്ര ച മോദതേ৷৷8.62৷৷

അമലകമലാധിവാസിനി

മനസോ വൈമല്യദായിനി മനോജ്ഞേ.

സുന്ദരഗാത്രി സുശീലേ
തവ ചരണാമ്ഭോരുഹം നമാമി സദാ৷৷8.64৷৷

ത്വച്ചരണാമ്ഭോരുഹയോഃ

പ്രണാമഹീനഃ പുനര്ദ്വിജാതിരപി.

ഭൂയാദനേഡമൂക-
സ്ത്വദ്ഭക്തോ ഭവതി ദേവി സര്വജ്ഞഃ৷৷8.66৷৷

വര്ണതനോമൃതവര്ണേ

നിയതമനിര്വര്ണിതേപി യോഗീന്ദ്രൈഃ.

നിര്ണീതികരണദൂരേ
വര്ണയിതും ദേവി ദേഹി സാമര്ഥ്യമ്৷৷8.68৷৷

പുസ്തകജപവടഹസ്തേ

വരദാഭയചിഹ്നചാരുബാഹുലതേ.

കര്പൂരാമലദേഹേ
വാഗീശ്വരി ശോധയാശു മമ ചേതഃ৷৷8.70৷৷

വിദ്യാരൂപേവിദ്യാ-

നാശിനി വിദ്യോതിതേന്തരാത്മവിദാമ്.

ഗദ്യൈഃ സപദ്യജാതൈ-
രാദ്യൈര്മുനിഭിഃ സ്തുതേ പ്രസീദ മമ৷৷8.72৷৷

വേദാത്മികേ നിരുക്ത-

ജ്യോതിര്വ്യാകരണകല്പശിക്ഷാഭിഃ.

സച്ഛന്ദോഭിഃ സംതത-
ക്ലൃപ്തഷഡങ്ഗേന്ദ്രിയേ പ്രസീദ മമ৷৷8.74৷৷

ബോധാത്മികേ ബുധാനാം

ഹൃദയാമ്ബുജചാരുരങ്ഗനടനപരേ.

ഭഗവതി ഭവഭങ്ഗകരീം
ഭക്തിം ഭദ്രാര്ഥദേ പ്രസീദ മമ৷৷8.76৷৷