ബ്രഹ്മാ സ്യാദൃഷിരീരിതഃ സുമതിഭിര്ഗായത്രമുക്തം ച ത-

ച്ഛന്ദസ്ത്വേപി സരസ്വതീ നിഗദിതാ തന്ത്രേഷു തദ്ദേവതാ.

ആദ്യന്തസ്വരഷട്കലഘ്വപരയോരന്തസ്ഥിതൈഃ കാദിഭി-
ര്വര്ഗൈര്യാന്തഗതൈഃ ക്രമേണ കഥിതാന്യസ്യാഃ ഷഡങ്ഗാനി ച৷৷7.2৷৷

കാനനവൃത്തദ്വ്യക്ഷി

ശ്രുതിനോഗണ്ഡോഷ്ഠദന്തമൂര്ധാസ്യേ.

ദോഃപത്സംധ്യഗ്രേഷു ച
പാര്ശ്വദ്വയപൃഷ്ഠനാഭിജഠരേഷു৷৷7.4৷৷

സംദീക്ഷിതോ വിമലധീര്ഗുരുണാനുശിഷ്ടോ

ലക്ഷം ന്യസേത്സുനിയതഃ പ്രജപേച്ച താവത്.

അന്തേ ഹുതം പ്രതിഹുനേന്മധുരത്രയാക്തൈഃ
ശുദ്ധൈസ്തിലൈരഭിയജേദ്ദിനശോക്ഷരേശീമ്৷৷7.6৷৷

പ്രവിധായ പദ്മമിതി പീഠമഥോ

കഥിതക്രമേണ വിധിനാഭിയജേത്.

നവഭിശ്ച ശക്തിഭിരമുത്ര സമാ-
വരണൈഃ സമര്ചയതു വര്ണതനുമ്৷৷7.8৷৷

അങ്ഗാന്യാദൌ തദനു ച കലായുഗ്മശശ്ചാഷ്ടവര്ഗാ-

ന്ബ്രഹ്മാണ്യാദീഞ്ഛതമഖമുഖാനപ്യഥോ ലോകപാലാന്.

മുഖ്യൈര്ഗ്രന്ഥൈഃ പ്രവരകുസുമൈര്ധൂപദീപൈര്നിവേദ്യൈ-
ര്വര്ണാഞ്ജാപി യജതു ദിനശോ ഭാരതീം ഭക്തിനമ്രഃ৷৷7.10৷৷

വര്ഗസ്വരയാദ്യംശാഃ

ക്രമേണ കലധൌതരജതതാമ്രാഃ സ്യുഃ.

ഇതി രചിതം രുചകമിദം
സാധകസര്വാര്ഥദായി സതതം സ്യാത്৷৷7.12৷৷

കമലോദ്ഭവൌഷധിരസേവ ച യാ

പയസാ ച പക്വമഥ സര്പിരപി.

അയുതാഭിജപ്തമമുനാ ദിനശോ
ലിഹതാം കവിര്ഭവതി വത്സരതഃ৷৷7.14৷৷

ആധാരോദ്യച്ഛക്തിബിന്ദൂത്ഥിതായാ

വക്ത്രേ മൂര്ധേന്ദുഗ്രസന്ത്യാഃ പ്രഭായാഃ.

ക്ഷാദ്യാന്താര്ണാന്പാതയേദ്വഹ്നിസോമ-
പ്രോതാന്മന്ത്രീ മുച്യതേ രോഗജാതൈഃ৷৷7.16৷৷

കലാഃ കലാനാദഭവാ വദന്ത്യജാഃ

കചാദിവര്ണാനുഭവാഷ്ടതാദികാന്.

പയാദികാന്മാക്ഷരജാശ്ച ബിന്ദുജാഃ
ക്രമാദനന്താവധികാസ്തു ഷാദികാന്৷৷7.18৷৷

മന്ത്രോദ്ധാരവിധാനേ

വര്ണവ്യത്യാസക്ലൃപ്തിരുദ്ദിഷ്ടാ.

ആഭിഃ ശ്രീകണ്ഠാദി-
പ്രോക്തൈര്വാ നാമഭിര്വിശേഷജ്ഞൈഃ৷৷7.20৷৷

രുദ്രാദീഞ്ഛക്തിയുതാന്ന്യസ്യേ-

ദ്യാദ്യാംസ്ത്വഗാദിധാതുയുഗാന്.

ശ്രീകണ്ഠാദൌ വിദ്വാ-
ന്വര്ണാന്പ്രാഗ്ബീജസംയുതാന്വാപി৷৷7.22৷৷

ശക്ത്യാ ശക്തിശ്രീഭ്യാം

ശക്തിശ്രീക്ലീഭിരന്വിതൈര്വര്ണൈഃ.

ശ്രീശക്തിയുഗശരാദ്യൈ-
രഥവാഭിഹിതഃ സമൃദ്ധയേ ന്യാസഃ৷৷7.24৷৷

പൂര്വം മഹാഗണപതിം സ്വവിധാനസിദ്ധ-

രൂപം ച സാങ്ഗമപി സാവരണം വിചിന്ത്യ.

ബീജേന സംയുതമൃചാ പ്രജപേത മാലാ-
മന്ത്രം നിജേഷ്ടവിധയേവഹിതോ യഥാവത്৷৷7.26৷৷

സ മുനിശ്ഛന്ദോദൈവത-

മപി സാങ്ഗം മാതൃകാം ച വിന്യസ്യേത്.

പ്രാഗഭിഹിതേന വിധിനാ
വാരത്രിതയം ഗൃഹാംശ്ച സപ്ത തഥാ৷৷7.28৷৷

താരശ്ച ശക്തിരജപാ പരമാത്മബീജം

വഹ്നേഃപ്രിയാ ച ഗദിതാ ഇതി പഞ്ചമന്ത്രാഃ.

ഏഭിസ്ത്രിതീയലിപിഭിഃ കഥിതഃ പ്രപഞ്ച-
യാഗാഹ്വയോ ഹുതവിധിഃ സകലാര്ഥദായീ৷৷7.30৷৷

ജായാഗ്നേര്ഹൃദയമഥോ ശിരശ്ച സോഹം

ഹംസാത്മാ ത്വഥ ച ശിഖാ സ്വയം ച വര്മ.

താരാഖ്യം സ്വമുദിതമീക്ഷണം തഥാസ്ത്രം
പ്രോക്തം സ്യാദ്ധരിഹരവര്ണമങ്ഗമേവമ്৷৷7.32৷৷

സാകാരശ്ചാത്മമന്ത്രഃ ഷഡിന്ദ്രിയാത്മക ഉച്യതേ.
സകാരൌകാരഹകാരാ ബിന്ദുഃ പഞ്ചാര്ണകോ മനുഃ৷৷7.34৷৷

ബ്രഹ്മാ ബൃഹത്തയാ സ്യാ-

ത്പരമപദേന പ്രകാശിതഃ പ്രവരഃ.

ഗായകസംത്രാണനതോ
ഗായത്രം സമുനിനിഗദിതം ഛന്ദഃ৷৷7.36৷৷

സ്വേതി സ്വര്ഗഃ സ്വേതി ചാത്മാ സമുക്തോ

ഹേത്യാഹുതിര്ഹേതി വിദ്യാദ്ഗതിം ച.

സ്വര്ഗാത്മാവധ്യാതതാ ധാമശാഖാ
വഹ്നേര്ജായാ യത്ര ഹൂയേത സര്വമ്৷৷7.38৷৷

ഹമിതി പ്രകാശിതോഹം

സ ഇതി ച സകലപ്രകാശനിര്വാണമ്.

അതുലമനുഷ്ണമശീതം
യത്തദിതീത്ഥം പ്രകാശിതേഹ ശിഖാ৷৷7.40৷৷

ആദ്യൈസ്ത്രിഭേദൈസ്തപനാന്തികൈര്യ-

ത്സൃജത്യജസ്രം ജഗതോസ്യ ഭാവമ്.

തേജസ്തദേതന്മനുവര്യകസ്യ
നേത്രത്രയം സന്ത ഉദാഹരന്തി৷৷7.42৷৷

യദാ ലിപിവിഹീനോയം തദാത്മാഷ്ടാക്ഷരഃ സ്മൃതഃ.
ഏതത്സര്വപ്രപഞ്ചസ്യ മൂലമഷ്ടാക്ഷരം സ്മൃതമ്৷৷7.44৷৷

മാതൃകാന്യാസവത്സാര്ഥം ലിപിനാഷ്ടാക്ഷരേണ തു.
നിത്യം ന്യസേത്സംയതാത്മാ പഞ്ചാശദ്വാരമുത്തമമ്৷৷7.46৷৷

സ്മര്തവ്യാശേഷലോകാന്തര്വര്തി യത്തേജ ഐശ്വരമ്.
ബ്രഹ്മാഗ്നൌ ജുഹുയാത്തസ്മിന്സദാ സര്വത്ര വര്തിനി৷৷7.48৷৷

ഏവം വര്ണവിഭേദഭിന്നമദൃഢം മാംസാന്ത്രമജ്ജാവൃതം

ദേഹം തത്ക്ഷരമക്ഷരേ സുവിശദേ സര്വത്ര വര്തിന്യഥ.

ഹുത്വാ ബ്രഹ്മഹുതാശനേ വിമലധീസ്തേജഃസ്വരൂപീ സ്വയം
ഭൂത്വാ സര്വമനും ജപേദഭിയജേദ്ധ്യായേത്തഥാ തര്പയേത്৷৷7.50৷৷

പ്രപഞ്ചയാഗസ്തു വിശേഷതോ വിപ-

ത്പ്രപഞ്ചസംസാരവിശേഷയാപകഃ.

പരശ്ച നിത്യം ഭജതാമയത്നതഃ
പരസ്യ ചാര്ഥസ്യ നിവേദകസ്തഥാ৷৷7.52৷৷

പ്രോക്തക്രമേണ വിഘ്നാ-

ദികമപി ഹുത്വാ ക്രമേണ മന്ത്രിതമഃ.

ഏകാവൃത്ത്യാ ജുഹുയാ-
ത്പ്രപഞ്ചയാഗാഹ്വയം ഘൃതേന തതഃ৷৷7.54৷৷

ഏതൈര്ജുഹോതി നിയുതാധികലക്ഷസംഖ്യം

മന്ത്രീ തതോര്ധമഥവാപി തദര്ധകം യഃ.

സ ത്വൈഹികീം സകലസിദ്ധിമവാപ്യ വാഞ്ഛാ-
യോഗ്യാം പുനഃ പരതരാം ച പരത്ര യാതി৷৷7.56৷৷

ദ്വാദശസഹസ്രമഥവാ

തദ്ദ്വിഗുണം ച ചതുര്ഗുണം വാഥ.

ജുഹുയാത്ക്ഷുദ്രഗ്രഹരിപു-
വിഷമജ്വരഭൂതസംഭവേ കോപേ৷৷7.58৷৷

ഏതൈഃ സഹസ്രദ്വിതയാഭിവൃത്ത്യാ

ജുഹോതി യസ്തു ക്രമശോ യഥാവത്.

ജയേത്ക്ഷണേനൈവ സ വിസ്മൃതീശ്ച
സാപസ്മൃതീഃ ശാപഭവാംശ്ച ദോഷാന്৷৷7.60৷৷

ലക്ഷം തദര്ധകം വാ

മധുരത്രയസംയുതൈര്ഹുനേദേതൈഃ.

അബ്ദത്രയാദഥാര്വാ-
ക്ത്രിഭുവനമഖിലം വശേ കുരുതേ৷৷7.62৷৷

ലക്ഷം തിലാനാം ജുഹുയാദ്യവാനാം

ശാന്ത്യൈ ശ്രിയേഥോ നലിനൈശ്ച താവത്.

ദൌഗ്ധ്യേന പുഷ്ട്യൈ യശസേ ഘൃതേന
വശ്യായ ജാതീകുസുമൈശ്ച ലോണൈഃ৷৷7.64৷৷

പഞ്ചാശദൌഷധിവിപാചിതപഞ്ചഗവ്യ-

ജാതേ ഘൃതേന ശതവൃത്തി ഹുനേദ്ധടാഗ്നൌ.

താവത്പ്രജപ്യ വിധിനാഭിസമര്ച്യ സിദ്ധം
ഭസ്മാദദീത സകലാഭ്യുദയാവഹം തത്৷৷7.66৷৷

ഏകാദശാര്ധകണികാം വരകാഞ്ചനസ്യ

ദദ്യാത്തദൈവ ഗുരവേഥ സഹസ്രഹോമേ.

അര്ധോര്ധ്വപഞ്ചകണികാ ദ്വികണാ ച സാര്ധാ
സ്യാദ്ദക്ഷിണേഹ കഥിതാ മുനിഭിസ്ത്രിധൈവ৷৷7.68৷৷

അഥ ഹിതവിധയേ വിദുഷാം

വക്ഷ്യേ പ്രാണാഗ്നിഹോത്രവിഹിതവിധിമ്.

ബദ്ധ്വാ പദ്മാസനമൃജു-
കായോ മന്ത്രീ വിശേത്പുരോവദനഃ৷৷7.70৷৷

മധ്യേന്ദ്രവരുണശശിയമ-

ദിഗ്ഗതാനി ക്രമേണ കുണ്ഡാനി.

ആവസഥജസഭ്യാഹവനീ-
യാന്വാഹാര്യഗാര്ഹപത്യാനി৷৷7.72৷৷

ക്ഷാദ്യാസ്തേ സപ്തവര്ഗാ മരകതപശുമേദാഹ്വനീലാഭവര്ണാ

ഭൂയഃ സ്യുര്വിദ്രുമാഭാഃ കുലിശസമരുചഃ പുഷ്യവൈഡൂര്യഭാസഃ.

സര്വേ തേ പഞ്ചശോഭീ സ്രവദമൃതമയാ വ്യാപകാഃ സ്പര്ശസംജ്ഞാ
മുക്താമാണിക്യരൂപാഃ സുമതിഭിരുദിതാശ്ചാഷ്ടശഃ സ്യുഃ സ്വരാഖ്യഃ৷৷7.74৷৷

ഇത്യേവം ഹുതവിധിമന്വഹം ദിനാദൌ

യേ സമ്യഗ്വിദധതി മന്ത്രിണഃ ശതാര്ധമ്.

തേ രത്നൈരപി കനകാംശുകൈഃ സധാന്യൈഃ
സംപന്നാഃ സകലജഗത്പ്രിയാ ഭവന്തി৷৷7.76৷৷

ഹലയുതവര്ഗതൃതീയൌ

പരാഃ സശാന്തീശ്ച പശ്ചിമേ വഹ്നൌ.

ഭൃഗുരേഫഫാദിപഞ്ചക-
സദ്യാതിഥിലോചനാനി സവ്യേഗ്നൌ৷৷7.78৷৷

വ്യോമ്നാ മധ്യേ സ്ഥിതേഗ്നാവഖിലമവിരതം ശബ്ദമൈന്ദ്രേനിലേന

സ്പര്ശം സ്വേനൈവ രൂപം പുനരപരഭവേ സൌമ്യജേദ്ഭീ രസം ച.

യാമ്യേ ഗന്ധം പൃഥിവ്യോഭയരുചിരുചിരൈരക്ഷരൌഘൈര്ഹുനേദ്യോ
മന്ത്രീ സ്യാത്സര്വവേദ്യപ്രതിമഥനസമുദ്ഭാസിതപ്രത്യഗാത്മാ৷৷7.80৷৷

കല്പാദിത്യമുഖസ്വമൂലവിലസത്കല്പാനലാന്തസ്ഫുര-

ച്ചന്ദ്രാര്കഗ്രഹകാലഭൂതഭുവനബ്രഹ്മേശവിഷ്ണ്വാദികഃ.

അവ്യക്തോക്ഷരസംജ്ഞകോമൃതമയസ്തേജോദ്വയോദ്യത്പ്രഭോ
നിത്യാനന്ദമയസ്ത്വനാദിനിധനോ യഃ സ്യാത്സ ഹംസാത്മകഃ৷৷7.82৷৷

സപ്തമ്യന്താം ച കുണ്ഡാഖ്യാമാഖ്യാം ച മരുതാമപി.
ഹിരണ്യാ ഗഗനാ രക്താ കൃഷ്ണാഭിര്വര്ണമീരയേത്৷৷7.84৷৷

ഊര്ധ്വാധസ്തിര്യഗൂര്ധ്വാധസ്തിര്യക്സമമഥോ വദേത്.
ഗച്ഛതൂക്ത്വാ ഠയുഗ്മം ച പഞ്ചാഗ്നീന്സംസ്മരേത്തതഃ৷৷7.86৷৷

മന്ത്രം സര്വമനുക്രമ്യ ജിഹ്വാഃ സംസ്മൃത്യ സര്വശഃ.
ബഹുരൂപാം തു സംകല്പ്യ പഞ്ചാനലശിഖായുതാമ്৷৷7.88৷৷

തൂഷ്ണീം ഹുത്വാ പിധായാദ്ഭിരുപസ്പൃശ്യ വിധാനതഃ.
ആരഭ്യ മൂലാധാരം സ്വമാമസ്തകമനുസ്മരേത്৷৷7.90৷৷

സംചിന്ത്യ ക്ഷരിതാമൃതാക്ഷരശതാര്ധാമ്ഭോവസിക്തം ഹവി-

സ്തൈര്ജപ്ത്വാ കുടിലാന്തരാധിരധികം സംദീപ്തപഞ്ചാനലഃ.

സായംപ്രാതരനേന ഹോമവിധിനാ ഭോജ്യാനി നിത്യം ഭജ-
ന്പ്രാണീ ന പ്രമദോദരം പ്രവിശതി പ്രാണാഗ്നിഹോത്രീ പുനഃ৷৷7.92৷৷

ഇതി ജഗദനുഷക്താം താമിമാം വര്ണമാലാം

ന്യസത ജപത ഭക്ത്യാ ജുഹ്വതാഭ്യര്ചയീത.

നിരുപമകവിതായുഃകീര്തികാന്തീന്ദിരാപ്ത്യൈ
സകലദുരിതരോഗോച്ഛിത്തയേ മുക്തയേ ച৷৷7.94৷৷