ദദ്യാച്ച ദിവ്യഭാവം

ക്ഷിണുയാദ്ദുരിതാന്യതോ ഭവേദ്ദീക്ഷാ.

മനനാത്തത്ത്വപദസ്യ
ത്രായത ഇതി മന്ത്ര ഉച്യതേ ഭയതഃ৷৷5.2৷৷

ശുഭകര്മണി ദീക്ഷായാം

മണ്ടപകരണേ ഗൃഹാദിവിധിഷു തഥാ.

വിഹിതോ വാസ്തുബലിഃ സ്യാ-
ദ്രക്ഷാവിഘ്നോപശാന്തിസംപദ്ഭ്യഃ৷৷5.4৷৷

തദ്ദേഹസംസ്ഥിതാ യേ

ദേവാസ്തേ വിശ്രുതാസ്ത്രിപഞ്ചാശത്.

മണ്ഡലമധ്യാദ്യര്ച്യാ
യഥാ തഥോക്തക്രമേണ കഥ്യന്തേ৷৷5.6৷৷

പ്രാഗ്യാമ്യവാരുണോദ-

ഗ്ദിക്കോഷ്ഠചതുഷ്പദേഷു സമഭിയജേത്.

ആര്യാഖ്യം സവിവസ്വ-
ത്സംജ്ഞം മിത്രം മഹീധരം ക്രമശഃ৷৷5.8৷৷

അശ്രേഃ പാര്ശ്വോത്ഥപദ-

ദ്വന്ദ്വേ ശര്വം ഗുഹാര്യമണൌ ച തഥാ.

ജമ്ഭകപിലിപിഞ്ഛാഖ്യൌ
ചരകിവിദാര്യൌ ച പൂതനാഃ പ്രോക്താഃ৷৷5.10৷৷

ഈശാനാഖ്യഃ സ പര്ജന്യോ ജയന്തഃ ശക്രഭാസ്കരൌ.
സത്യോ വൃഷാന്തരിക്ഷൌ ച ദേവതാഃ പ്രാഗുദീരിതാഃ৷৷5.12৷৷

നിഃഋതിദൌവാരികശ്ചൈവഃ സുഗ്രീവോ വരുണസ്തഥാ.
പുഷ്പദന്താസുരൌ ശോഷരോഗൌ പ്രത്യഗ്ദിഗാശ്രിതാഃ৷৷5.14৷৷

ഇതീരിതാനാമപി ദേവതാനാം

ചിത്രാണി കൃത്വാ രജസാ പദാനി.

പയോന്ധസാ സാധുബലിര്വിധേയോ
ദ്രവ്യൈശ്ച വാ തന്ത്രവിശേഷസിദ്ധൈഃ৷৷5.16৷৷

സപ്താഹതോ വാ നവരാത്രതോ വാ

പ്രാഗേവ ദീക്ഷാദിവസാദ്യഥാവത്.

സപാലികാപഞ്ചമുഖീശരാവ-
ചതുഷ്ടയേ ബീജനിവാപമുക്തമ്৷৷5.18৷৷

വൈഷ്ണവ്യസ്ത്വഥ പാലികാ അപി ചതുര്വിംശാങ്ഗുലോച്ഛ്രായകാഃ

വൈരിഞ്ച്യോ ഘടികാസ്തു പഞ്ചവദനാ ദ്വ്യഷ്ടാങ്ഗുലോച്ഛ്രായകാഃ.

ശൈവാഃ സ്യുര്ദ്വിഷഡങ്ഗുലാ അപി ശരാവാഹ്വാ ജലക്ഷാലിതാഃ
സൂത്രൈശ്ച പ്രകലയ്യ പങ്ക്തിഷു ച താഃ പ്രോക്തക്രമാദ്വിന്യസേത്৷৷5.20৷৷

ശാലീകങ്ഗുശ്യാമാ-

തിലസര്ഷപമുദ്ഗമാഷനിഷ്പാവാഃ.

ഖല്വാഢകീസമേതാ
ബീജാനി വിദുഃ പ്രരോഹയോഗ്യാനി৷৷5.22৷৷

ഹാരിദ്രാദ്ഭിഃ സമ്യഗഭ്യുക്ഷ്യ വസ്ത്രൈ-

രാച്ഛാദ്യാദ്ഭിഃ സിഞ്ചതാം പഞ്ചഘോഷൈഃ.

സായംപ്രാതഃ ശര്വരീഷു പ്രദദ്യാ-
ദുക്തൈര്ദ്രവ്യൈസ്തദ്ബലിം സാധകേശഃ৷৷5.24৷৷

ലാജതിലനക്തരജോ

ദധിസക്ത്വന്നാനി ഭൂതകൂരാഖ്യമ്.

പിത്ര്യം തിലതണ്ഡുലകം
സോഡുമ്ബികധാനലാജകം യാക്ഷമ്৷৷5.26৷৷

കൃസരം ച വൈഷ്ണവേയം

യദി നവരാത്രം ക്രമേണ ബലിരുക്തഃ.

താരാദികൈര്നമോന്തൈഃ
സ്വൈഃ സ്വൈരപി നാമഭിശ്ച ബലിമന്ത്രഃ৷৷5.28৷৷

പ്രാഗേവ ലക്ഷണയുതാനി ച മണ്ടപേസ്മി-

ന്കുണ്ഡാനി കാരയതു സമ്യഗഥോ ദിശാസു.

ആഖണ്ഡലാര്കഭവവാരിപഭാധിപാനാം
ദോര്മാത്രകാണി വിലസദ്ഗുണമേഖലാനി৷৷5.30৷৷

വിംശദ്ഭിശ്ചതുരധികാഭിരങ്ഗലീഭിഃ

സൂത്രേണാപ്യഥ പരിസൂത്ര്യ ഭൂമിഭാഗമ്.

താഭിശ്ച പ്രഖനതു താവതീഭിരേകാം
ത്യക്ത്വാ ചാങ്ഗുലിമപി മേഖലാശ്ച കാര്യാഃ৷৷5.32৷৷

യോനിസ്തത്പശ്ചിമസ്യാമഥ ദിശി ചതുരശ്രസ്ഥലാരബ്ധനാളാ

തന്മധ്യോല്ലാസി രന്ധ്രോപരിപരി വിതതാശ്വത്ഥപത്രാനുകാരാ.

ഉത്സേധായാമകാഭ്യാം പ്രകൃതിവികൃതിസംജ്ഞാങ്ഗുലാഷ്ടാങ്ഗുലാ സ്യാ-
ദ്വിസ്തൃത്യാ ദ്വാദശാര്ധാങ്ഗുലമിതനമിതാഗ്രാ നിവിഷ്ടേവ കുണ്ഡേ৷৷5.34৷৷

തതോ മണ്ടപമധ്യേ തു സ്ഥണ്ഡിലം ഗോമയാമ്ബുനാ.
ഉപലിപ്യ യഥാന്യായം തസ്യ മധ്യേ നിധാപയേത്৷৷5.36৷৷

തന്മധ്യസ്ഥിതയാമ്യോദഗഗ്രം സൂത്രം നിധാപയേത്.
തതോ മധ്യാത്സപദ്ധസ്തമാനേന ച ദിശം പ്രതി৷৷5.38৷৷

കോണമത്സ്യസ്ഥിതാഗ്രാണി ദിക്ഷു സൂത്രാണി പാതയേത്.
തതോ ഭവേച്ചതുഷ്കോഷ്ഠം ചതുരശ്രം ച മണ്ഡലമ്৷৷5.40৷৷

നിഹിതാഗ്രയുഗം സൂത്രം ചതുഷ്കം പ്രതിപാതയേത്.
കൃത ഏവം ഭവേയുസ്തേ കോണകോഷ്ഠേഷു മത്സ്യകാഃ৷৷5.42৷৷

യദാ തദാജോ വിഭജേത്പദാനി ക്രമശഃ സുധീഃ.
പദൈഃ ഷോഡശഭിര്മധ്യേ പദ്മം വൃത്തത്രയാന്വിതമ്৷৷5.44৷৷

ദ്വാരാണി പദഷട്കാണി ശോഭാഖ്യാഃ സ്യുശ്ചതുഷ്പദാഃ.
ചതുഷ്പദാശ്ചോപശോഭാഃ ഷട്പദം കോണകം ഭവേത്৷৷5.46৷৷

നിഹിതാഗ്രയുഗം സൂത്രം തദ്ഭവേദ്രാശിമണ്ഡലമ്.
കര്ണികായാഃ കേസരാണാം ദലസംധേര്ദലസ്യ ച৷৷5.48৷৷

ഭവേന്മണ്ഡലമധ്യാര്ധേ കര്ണികാ ചതുരങ്ഗുലാ.
ത്ര്യങ്ഗുലാഃ കേസരാശ്ച സ്യുഃ സംധിശ്ച ചതുരങ്ഗുലാ৷৷5.50৷৷

തതശ്ച രാശിചക്രം സ്യാത്സ്വം സ്വം വര്ണവിഭൂഷിതമ്.
രാശിമങ്ഗുലകൈഃ കുര്യാത്ഷഡ്ഭിര്നവഭിരേവ വാ৷৷5.52৷৷

യദി വാ വര്തുലമരാഃ സ്യുശ്ച ദ്വാദശരാശയഃ.
തേ സ്യുഃ പിപീലികാമധ്യാ മാതുലങ്ഗനിഭാ അപി৷৷5.54৷৷

തദ്ബഹീ രുചിരാന്കുര്യാച്ചതുരാന്കല്പശാഖിനഃ.
ലലിതാന്രൂഢകുസുമാന്ഫലപല്ലവശോഭിതാന്৷৷5.56৷৷

മയൂരചക്രവാകാദ്യൈരാരൂഢവിടപാനതാന്.
സര്വര്തുനിഷ്കൃതികരാന്വിലോചനമനോഹരാന്৷৷5.58৷৷

രാശേരന്യത്ര രചയേത്പ്രമോഹാദന്യമണ്ഡലമ്.
ആവാഹ്യ ദേവതാമന്യാമര്ചയേദന്യദേവതാമ്৷৷5.60৷৷

കൃതം സമസ്തം വ്യര്ഥം സ്യാദജ്ഞേന ജ്ഞാനമാനിനാ.
തസ്മാത്സര്വപ്രയത്നേന രാശീന്സാധിപതീന്ക്രമാത്৷৷5.62৷৷

രജാംസി പഞ്ചവര്ണാനി പഞ്ചദ്രവ്യാത്മകാനി ച.
പീതശുക്ലാരുണശിതിശ്യാമാന്യേതാനി ഭൂതശഃ৷৷5.64৷৷

കൃഷ്ണം ദഗ്ധപുലാകോത്ഥം ശ്യാമം ബില്വദലാദിജമ്.
സിതേന രജസാ കാര്യാഃ സീമാ രേഖാ വിപശ്ചിതാ৷৷5.66৷৷

ദലാന്യച്ഛാന്യന്തരാലം ശ്യാമചൂര്ണേന പൂരയേത്.
സിതരക്താസിതൈര്വര്ണൈര്വൃത്തത്രയമുദീരിതമ്৷৷5.68৷৷

രാശിചക്രാവശിഷ്ടാനി കോണാനി ശ്രൃണു യാനി വൈ.

പീഠപാദാനി താനി സ്യുരരുണാന്യപി താനി വാ.
തത്തത്പാദോക്തവര്ണാനി തത്തദാകാരവന്തി വാ৷৷5.70৷৷