दद्याच्च दिव्यभावं

क्षिणुयाद्दुरितान्यतो भवेद्दीक्षा।

मननात्तत्त्वपदस्य
त्रायत इति मन्त्र उच्यते भयतः।।5.2।।

शुभकर्मणि दीक्षायां

मण्टपकरणे गृहादिविधिषु तथा।

विहितो वास्तुबलिः स्या
द्रक्षाविघ्नोपशान्तिसंपद्भ्यः।।5.4।।

तद्देहसंस्थिता ये

देवास्ते विश्रुतास्त्रिपञ्चाशत्।

मण्डलमध्याद्यर्च्या
यथा तथोक्तक्रमेण कथ्यन्ते।।5.6।।

प्राग्याम्यवारुणोद

ग्दिक्कोष्ठचतुष्पदेषु समभियजेत्।

आर्याख्यं सविवस्व
त्संज्ञं मित्रं महीधरं क्रमशः।।5.8।।

अश्रेः पार्श्वोत्थपद

द्वन्द्वे शर्वं गुहार्यमणौ च तथा।

जम्भकपिलिपिञ्छाख्यौ
चरकिविदार्यौ च पूतनाः प्रोक्ताः।।5.10।।

ईशानाख्यः स पर्जन्यो जयन्तः शक्रभास्करौ।
सत्यो वृषान्तरिक्षौ च देवताः प्रागुदीरिताः।।5.12।।

निःऋतिदौवारिकश्चैवः सुग्रीवो वरुणस्तथा।
पुष्पदन्तासुरौ शोषरोगौ प्रत्यग्दिगाश्रिताः।।5.14।।

इतीरितानामपि देवतानां

चित्राणि कृत्वा रजसा पदानि।

पयोऽन्धसा साधुबलिर्विधेयो
द्रव्यैश्च वा तन्त्रविशेषसिद्धैः।।5.16।।

सप्ताहतो वा नवरात्रतो वा

प्रागेव दीक्षादिवसाद्यथावत्।

सपालिकापञ्चमुखीशराव
चतुष्टये बीजनिवापमुक्तम्।।5.18।।

वैष्णव्यस्त्वथ पालिका अपि चतुर्विंशाङ्गुलोच्छ्रायकाः

वैरिञ्च्यो घटिकास्तु पञ्चवदना द्व्यष्टाङ्गुलोच्छ्रायकाः।

शैवाः स्युर्द्विषडङ्गुला अपि शरावाह्वा जलक्षालिताः
सूत्रैश्च प्रकलय्य पङ्क्तिषु च ताः प्रोक्तक्रमाद्विन्यसेत्।।5.20।।

शालीकङ्गुश्यामा

तिलसर्षपमुद्गमाषनिष्पावाः।

खल्वाढकीसमेता
बीजानि विदुः प्ररोहयोग्यानि।।5.22।।

हारिद्राद्भिः सम्यगभ्युक्ष्य वस्त्रै

राच्छाद्याद्भिः सिञ्चतां पञ्चघोषैः।

सायंप्रातः शर्वरीषु प्रदद्या
दुक्तैर्द्रव्यैस्तद्बलिं साधकेशः।।5.24।।

लाजतिलनक्तरजो

दधिसक्त्वन्नानि भूतकूराख्यम्।

पित्र्यं तिलतण्डुलकं
सोडुम्बिकधानलाजकं याक्षम्।।5.26।।

कृसरं च वैष्णवेयं

यदि नवरात्रं क्रमेण बलिरुक्तः।

तारादिकैर्नमोऽन्तैः
स्वैः स्वैरपि नामभिश्च बलिमन्त्रः।।5.28।।

प्रागेव लक्षणयुतानि च मण्टपेऽस्मि

न्कुण्डानि कारयतु सम्यगथो दिशासु।

आखण्डलार्कभववारिपभाधिपानां
दोर्मात्रकाणि विलसद्गुणमेखलानि।।5.30।।

विंशद्भिश्चतुरधिकाभिरङ्गलीभिः

सूत्रेणाप्यथ परिसूत्र्य भूमिभागम्।

ताभिश्च प्रखनतु तावतीभिरेकां
त्यक्त्वा चाङ्गुलिमपि मेखलाश्च कार्याः।।5.32।।

योनिस्तत्पश्चिमस्यामथ दिशि चतुरश्रस्थलारब्धनाळा

तन्मध्योल्लासि रन्ध्रोपरिपरि वितताश्वत्थपत्रानुकारा।

उत्सेधायामकाभ्यां प्रकृतिविकृतिसंज्ञाङ्गुलाष्टाङ्गुला स्या
द्विस्तृत्या द्वादशार्धाङ्गुलमितनमिताग्रा निविष्टेव कुण्डे।।5.34।।

ततो मण्टपमध्ये तु स्थण्डिलं गोमयाम्बुना।
उपलिप्य यथान्यायं तस्य मध्ये निधापयेत्।।5.36।।

तन्मध्यस्थितयाम्योदगग्रं सूत्रं निधापयेत्।
ततो मध्यात्सपद्धस्तमानेन च दिशं प्रति।।5.38।।

कोणमत्स्यस्थिताग्राणि दिक्षु सूत्राणि पातयेत्।
ततो भवेच्चतुष्कोष्ठं चतुरश्रं च मण्डलम्।।5.40।।

निहिताग्रयुगं सूत्रं चतुष्कं प्रतिपातयेत्।
कृत एवं भवेयुस्ते कोणकोष्ठेषु मत्स्यकाः।।5.42।।

यदा तदाजो विभजेत्पदानि क्रमशः सुधीः।
पदैः षोडशभिर्मध्ये पद्मं वृत्तत्रयान्वितम्।।5.44।।

द्वाराणि पदषट्काणि शोभाख्याः स्युश्चतुष्पदाः।
चतुष्पदाश्चोपशोभाः षट्पदं कोणकं भवेत्।।5.46।।

निहिताग्रयुगं सूत्रं तद्भवेद्राशिमण्डलम्।
कर्णिकायाः केसराणां दलसंधेर्दलस्य च।।5.48।।

भवेन्मण्डलमध्यार्धे कर्णिका चतुरङ्गुला।
त्र्यङ्गुलाः केसराश्च स्युः संधिश्च चतुरङ्गुला।।5.50।।

ततश्च राशिचक्रं स्यात्स्वं स्वं वर्णविभूषितम्।
राशिमङ्गुलकैः कुर्यात्षड्भिर्नवभिरेव वा।।5.52।।

यदि वा वर्तुलमराः स्युश्च द्वादशराशयः।
ते स्युः पिपीलिकामध्या मातुलङ्गनिभा अपि।।5.54।।

तद्बही रुचिरान्कुर्याच्चतुरान्कल्पशाखिनः।
ललितान्रूढकुसुमान्फलपल्लवशोभितान्।।5.56।।

मयूरचक्रवाकाद्यैरारूढविटपानतान्।
सर्वर्तुनिष्कृतिकरान्विलोचनमनोहरान्।।5.58।।

राशेरन्यत्र रचयेत्प्रमोहादन्यमण्डलम्।
आवाह्य देवतामन्यामर्चयेदन्यदेवताम्।।5.60।।

कृतं समस्तं व्यर्थं स्यादज्ञेन ज्ञानमानिना।
तस्मात्सर्वप्रयत्नेन राशीन्साधिपतीन्क्रमात्।।5.62।।

रजांसि पञ्चवर्णानि पञ्चद्रव्यात्मकानि च।
पीतशुक्लारुणशितिश्यामान्येतानि भूतशः।।5.64।।

कृष्णं दग्धपुलाकोत्थं श्यामं बिल्वदलादिजम्।
सितेन रजसा कार्याः सीमा रेखा विपश्चिता।।5.66।।

दलान्यच्छान्यन्तरालं श्यामचूर्णेन पूरयेत्।
सितरक्तासितैर्वर्णैर्वृत्तत्रयमुदीरितम्।।5.68।।

राशिचक्रावशिष्टानि कोणानि श्रृणु यानि वै।

पीठपादानि तानि स्युररुणान्यपि तानि वा।
तत्तत्पादोक्तवर्णानि तत्तदाकारवन्ति वा।।5.70।।