അത്രിഃ ക്ഷിണാ കാലകര്ണകാമികായുഗ്രയേക്ഷരാഃ.
തുധ്യാമധ്യഗതാഃ സ്യുര്ഭ്യം വടമൂലനിവാസിനേ৷৷26.2৷৷

ശുകഃ പ്രോക്തോ മുനിശ്ഛന്ദോനുഷ്ടുപ്ച സമുദാഹൃതമ്.
ദക്ഷിണാമൂര്തിരുദ്രോസ്യ ദേവതാ സമുദീരിതാ৷৷26.4৷৷

മന്ത്രീ കുര്യാത്ഷഡങ്ഗാനി ജാതിയുഞ്ജി സമാഹിതഃ.
കാലികശ്രുതിദൃഗ്ഗണ്ഡദ്വയനാസാസ്യകേ ദശ৷৷26.6৷৷

മുദ്രാം ഭദ്രാര്ഥദാത്രീം സപരശുഹരിണാം ബാഹുഭിര്ബാഹുമേകം

ജാന്വാസക്തം ദധാനോ ഭുജഗവരസമാബദ്ധകക്ഷ്യോ വടാധഃ.

ആസീനശ്ചന്ദ്രഖണ്ഡപ്രതിഘടിതജടഃ ക്ഷീരഗൌരസ്ത്രിണേത്രോ
ദദ്യാദാദ്യൈഃ ശുകാദ്യൈര്മുനിഭിരഭിനുതോ ഭാവശുദ്ധിം ഭവോ വഃ৷৷26.8৷৷

ദ്വാത്രിംശദയുതമാനം

ജപ്യാച്ച ജുഹോതു തദ്ദശാംശമിതൈഃ.

ദുഗ്ധാപ്ലുതൈസ്തിലൈര്വാ
സാജ്യേന പയോന്ധസാ ദ്വയേനാപി৷৷26.10৷৷

ജീവശിഖികര്ണരേഫാ-

ന്പ്രതിവീപ്സ്യ പ്രാദികാംശ്ച പുനരപി താന്.

മേധാപ്യായിനിയാന്താം-
സ്താനേവ തരാന്തികാന്സതനുരൂപാന്৷৷26.12৷৷

ഋഷിരസ്യാഘോരാഖ്യഃ

സംപ്രോക്തസ്ത്രിഷ്ടുബുച്യതേ ച്ഛന്ദഃ.

രുദ്രോപ്യഘോരപൂര്വഃ
സമീരിതോ ദേവതാ തഥാസ്യ മനോഃ৷৷26.14৷৷

കദൃഗാസ്യകണ്ഠഹൃന്നാ-

ഭ്യന്ധൂരുഷു ജാനുജങ്ഘയോഃ പദയോഃ.

ഏകാദശധാ ഭിന്നൈ-
ര്മന്ത്രാര്ണൈര്ന്യസതു വിഗ്രഹേ മന്ത്രീ৷৷26.16৷৷

കാലാഭ്രാഭഃ കരാഗ്രൈഃ പരശുഡമരുകൌ ഖഡ്ഗഖേടൌ ച ബാണേ-

ഷ്വാസൌ ശൂലം കപാലം ദധദതിഭയദോ ഭീഷണാസ്യസ്ത്രിണേത്രഃ.

രക്താകാരാമ്ബരോ ഹി പ്രവരഘടിതഗാത്രോരിനാഗഗ്രഹാദീ-
ന്ഖാദന്നിഷ്ടാര്ഥദായീ ഭവദനഭിമതച്ഛിത്തയേ സ്യാദഘോരഃ৷৷26.18৷৷

ഘൃതാവസിക്തൈസ്തിലതണ്ഡുലൈശ്ച

ജയാവസാനേ ജുഹുയാദ്ദശാംശമ്.

ഘൃതപ്ലുതൈര്വാഥ ഹവിര്ഭിരേവം
താവത്പ്രജുഹ്വന്സമുപൈതി കാമാന്৷৷26.20৷৷

മന്ത്രാക്ഷരത്രയോദ്യ-

ദ്ദലമധ്യദലാഗ്രകം ച തദ്ബാഹ്യേ.

വഹ്നിപുടാശ്രിസാമാശ്രിത-
കവചാസ്ത്രം പ്രതിവിലിഖ്യ യന്ത്രമിദമ്৷৷26.22৷৷

അങ്ഗാവൃതേരനു ച ഹേതിഭിരീരിതാഭിഃ

പശ്ചാച്ച മാതൃഭിരഥാപി ദിശാധിനാഥൈഃ.

സംപൂജയീത വിധിനേതി ഷഡക്ഷരോക്ത-
മാര്ഗേണ വാ മനുപരിസ്ഫുരണായ മന്ത്രീ৷৷26.24৷৷

സിതകിംശുകനിര്ഗുണ്ഡീ-

കനകാപാമാര്ഗജന്മനാം സമിധാമ്.

പൃഥഗപി സഹസ്രഹോമാ-
ന്നിഗ്രഹമോക്ഷോചിരാദ്ഗ്രഹാണാം സ്യാത്৷৷26.26৷৷

ഷട്കോണേ കര്ണികായാം സ്ഫുരയുഗലവൃതാം സാധ്യഗര്ഭാം ച ശക്തിം

കോണാഗ്രേ പ്രസ്ഫുരദ്വന്ദ്വകമഥ വിലിഖേന്മന്ത്രവര്ണാന്ദലേഷു.

ഷഡ്വേദദ്വന്ദ്വഷഡ്വേദകചതുര്യുഗഷ(?)ട്സംഖ്യകാന്ബാഹ്യഷട്കേ
വര്മാസ്ത്രാര്ണാം തദേതദ്ഗ്രഹഗദഭയഹൃദ്യന്ത്രമാഘോരമാഹുഃ৷৷26.28৷৷

തസ്മാദഘോരാസ്ത്രമനും പ്രജപ്യാ-

ത്സമര്ചയേത്തദ്വിഹിതം യഥാവത്.

ഹുനേച്ച തേനൈവ സമസ്തവാഞ്ഛാ-
സംസിദ്ധയേ ചാഥ വിമുക്തയേ ച৷৷26.30৷৷

ഋഷിരസ്യ കഹോലാഖ്യ-

ശ്ഛന്ദോ ദേവ്യാദികാ ച ഗായത്രീ.

സ്യാദ്ദേവതാ ച മൃത്യും-
ജയരുദ്രോങ്ഗാന്യഥാചരേദ്ഭൃഗുണാ৷৷26.32৷৷

ജപ്തവ്യോയം മന്ത്രവര്യസ്ത്രിലക്ഷം

ദീക്ഷാപൂര്വം ഹോമകൃത്സ്യാദ്ദശാംശൈഃ.

ദുഗ്ധാജ്യാക്തൈഃ ശുദ്ധഖണ്ഡൈര്ഗലൂച്യാ
ഗുര്വാദേശാത്സാധകോ ഹവ്യവാഹേ৷৷26.34৷৷

ഇതി ജപഹുതാര്ചനാദ്യൈഃ

സിദ്ധോ മന്ത്രോക്തമൂര്തിവിഹിതമനുഃ.

സംഭാവയേന്നിജാന്ത-
ര്യോഗം കൃത്യാപമൃത്യുനാശകരമ്৷৷26.36৷৷

ഊര്ധ്വാധഃപ്രോതപദ്മദ്വയദലനിചിതൈരക്ഷരാദ്യൈര്ധ്രവാദ്യൈ-

രാദ്യന്തൈര്മന്ദമന്ദപ്രതിഗലിതസുധാപൂരസംസിച്യമാനമ്.

ഈശാനം സൂക്ഷ്മരൂപം വിമലതരസുഷുമ്നാന്തരാ സംനിഷണ്ണം
ധ്യായന്നാപ്നോതി രോഗൈര്നിയതപരിഹൃതഃ സംജപാദ്ദീര്ഘമായുഃ৷৷26.38৷৷

ഇതി കൃതയന്ത്രവിഭൂഷിത-

മണ്ഡലമധ്യേ നിധായ കലശമപി.

ആപൂര്യ ചാഭിഷിഞ്ചേ-
ച്ഛ്രീവശ്യകരം ഗ്രഹാഭിചാരഹരമ്৷৷26.40৷৷

യസ്തു വഹ്നൌ ജുഹോത്യേവം യാവത്സംഖ്യേന സാധകഃ.
താവത്സംഖ്യൈഃ സുധാകുമ്ഭൈരഗ്നിഃ പ്രീണാതി ശംകരമ്৷৷26.42৷৷

മന്ത്രാന്തേ സാധ്യാഖ്യാം

പാലയയുഗലം പ്രതീപമപി മന്ത്രമ്.

പ്രോക്ത്വാ സമാപയേന്മനു-
മയമപി മൃത്യുംജയാഹ്വയോ മന്ത്രഃ৷৷26.44৷৷

ചതുരങ്ഗുലപരിമാണൈ-

രമൃതാഖണ്ഡൈരഥാര്കസാഹസ്രമ്.

ജുഹുയാച്ച ദുഗ്ധസിക്തൈ-
രാരോഗ്യായായുഷേ ച ലക്ഷ്മ്യൈ ച৷৷26.46৷৷

തീവ്രേ ജ്വരേ ഘോരതരേഭിചാരേ

സോന്മാദകേ ദാഹഗദേ ച മോഹേ.

തനോതി ശാന്തിം നചിരേണ ഹോമഃ
സംജീവനം ചാബ്ദശതപ്രമാണമ്৷৷26.48৷৷

നിജജന്മദിനേ ശതം ശതം യോ

ജുഹുയാദ്ദ്രവ്യവരൈഃ സസപ്തസംഖ്യൈഃ.

മധുരൈരപി ഭോജയേച്ച വിപ്രാ-
നഭിവാഞ്ഛന്നിയമേന ദീര്ഘമായുഃ৷৷26.50৷৷

ദൂര്വാത്രിതയൈര്ജുഹുയാ-

ന്മന്ത്രവിദേകാദശാഹുതീര്ദിനശഃ.

ജിത്വാപമൃത്യുരോഗാ-
ന്പ്രയാത്യസാവായുഷശ്ച ദൈര്ഘ്യമപി৷৷26.52৷৷

സിതസിദ്ധാര്ഥസഹസ്രാ-

ഹുത്യാ നശ്യന്ത്യുപദ്രവാ ജ്വരജാഃ.

തദ്വദപാമാര്ഗഹുതാ
മൃത്യുംജയമപ്യരോഗതാം ലഭതേ৷৷26.54৷৷