സര്ഗാദര്കഃ ക്ഷതോ വിംശതിയുഗമയുതം ശാന്തഗം ചന്ദ്രബിമ്ബം

ശ്രീബാഹുഃ ശുക്ലമേദോഹരിശയനഹകാരാ മനുഃ ശ്രീകരാഖ്യഃ.

ഋഷ്യാദ്യാ വാമപങ്ക്തീരഹിരപി പുനരങ്ഗാനി യാന്തൈര്ഹുമന്തൈ-
ര്ഭീഷത്രാസപ്രമര്ദപ്രസഹിതഗദിതധ്വംസരക്ഷൈര്ദ്വിരുക്തൈഃ৷৷22.2৷৷

ദുഗ്ധാബ്ധിദ്വീപവര്യപ്രവിലസിതസുരോദ്യാനകല്പദ്രുമാധോ

ഭദ്രാമ്ഭോജന്മപീഠോപരിഗതവിനതാനന്ദനസ്കന്ധസംസ്ഥഃ.

ദോര്ഭിര്ബിഭ്രദ്രഥാങ്ഗം സദരമഥ ഗദാപങ്കജേ സ്വര്ണവര്ണോ
ഭാസ്വന്മൌലിര്വിചിത്രാഭരണപരിഗതഃ സ്യാച്ഛ്രിയേ വോ മുകുന്ദഃ৷৷22.4৷৷

ആരാധ്യ ചൈവം വിധിനാ ച വിഷ്ണും

മന്ത്രീ പുനര്ഹോമവിധിം കരോതു.

ശ്രീദുഗ്ധവൃക്ഷോത്ഥസമിദ്ഭിരബ്ജൈഃ
സാജ്യേന ദൌഗ്ധേന ച സര്പിഷാ ച৷৷22.6৷৷

ദ്രവ്യൈസ്തൈഃ പ്രതിജുഹുയാദ്ദശാംശമാനൈ-

രാചാര്യം പുനരപി പൂജയേജ്ജപാന്തേ.

സംപ്രാപ്നോത്യപരിമിതാം ശ്രിയം ച കീര്ത്തി
കാന്തിം വാ ചിരമനുരജ്യതേ ച ലോകൈഃ৷৷22.8৷৷

പരിപൂജയേച്ച വിപ്രാം-

സ്തേഷു ദിനേഷു സ്വശക്തിതോ ഭക്ത്യാ.

അപമൃത്യുരോഗപാപാ-
ന്വിജിത്യ സ തു ദീര്ഘമായുരാപ്നോതി৷৷22.10৷৷

ഏവം പ്രോക്തൈഃ പ്രതിജപഹുതാര്ചാദിഭിര്മന്ത്രമേനം

ഭക്ത്യാ യോ വാ ഭജതി മനുജോ നിത്യശഃ സോചിരേണ.

ഇഷ്ടൈഃ പുത്രൈര്ധരണിധനധാന്യാദിഭിര്ഹൃഷ്ടചേതാഃ
സ്യാദപ്യന്തേ പരമപരിശുദ്ധം പരം ധാമ വിഷ്ണോഃ৷৷22.12৷৷

വാക്യം പ്രോക്ത്വാ ഹൃദാഖ്യം തദനു ഭഗവതേയുഗ്വരാഹം ച രൂപാ-

യേത്യുക്ത്വാ വ്യാഹൃതീനാമുപരി ച പതയേ ഭൂപതിത്വം ച മേന്തേ.

ദേഹീത്യാഭാഷ്യ ദാന്തഃ സുമതിരഥ പുനര്ദാപയസ്വേതി ഹാന്തം
പ്രോക്ത്വാ താരാദികം പ്രോദ്ധരതു മനുവരം തത്ര യസ്ത്രിംശദര്ണമ്৷৷22.14৷৷

അസ്യൈകശ്രൃങ്ഗോ ഹൃദയം ശിരശ്ച

വ്യോമോല്കതേജോധിപതിഃ ശിഖാ ച.

സ്യാദ്വിശ്വരൂപം കവചം മഹാദ്യോ
ദംഷ്ട്രോസ്ത്രമുക്തം സ്വയമേവ ചാങ്ഗമ്৷৷22.16৷৷

ജാന്വോരാപാദമുദ്യത്കനകമിവ ഹിമപ്രഖ്യമാജാനു നാഭേഃ

കണ്ഠാദാനാഭി വഹ്നിപ്രഭമഥ ശിരസശ്ചാര്ഗലം നീലവര്ണമ്.

മൌലേര്വ്യോമാഭമാകം കരലസദരിശങ്ഖാസിഖേടം ഗദാ ശ-
ക്ത്യാഖ്യേഷ്ടാഭീതിയുക്തം പ്രണമത വസുധോല്ലാസിദംഷ്ട്രം വരാഹമ്৷৷22.18৷৷

ഹേമപ്രഖ്യം പാര്ഥിവേ മണ്ഡലേ വാ

നീഹാരാഭം നീരജേഗ്നേസ്തദാഭമ്.

വായോഃ കൃഷ്ണം ദ്യുപ്രഭം വാ ദിവിസ്ഥം
ക്രോഡം വ്യാപ്തം സത്യസംസ്ഥം യജേദ്വാ৷৷22.20৷৷

പ്രാഗ്ദക്ഷിണപ്രത്യഗുദഗ്ദിശാസു

ചത്വാരി ചാങ്ഗാനി യജേത്ക്രമേണ.

അസ്ത്രം വിദിക്ഷൂര്ധ്വമധശ്ച ചക്രാ-
ദ്യസ്ത്രാണി പൂജ്യാനി വരാഹമൂര്തേഃ৷৷22.22৷৷

ദംഷ്ട്രായാം വസുധാം സശൈലനഗരാരണ്യാപഗാം ഹുംകൃതൌ

വാഗീശീം ശ്വസിതേനിലം രവിശശീ വാഹ്വോശ്ച ദക്ഷാന്യയോഃ.

കുക്ഷൌ സ്യുര്വസവോ ദിശഃ ശ്രുതിപഥേ ദസ്രൌ ദൃശോഃ പാദയോഃ
പദ്മോത്ഥോ ഹൃദയേ ഹരിഃ പൃഥഗമീ പൂജ്യാ മുഖേ ശംകരഃ৷৷22.24৷৷

ധ്യാനാദപി ധനസിദ്ധി-

ര്മന്ത്രജപാച്ചാധരോ ഭവേത്സധരഃ.

ജപപൂജാഹുതവിധിഭി-
ര്മങ്ക്ഷു നരോ ധനധരേന്ദിരാവാന്സ്യാത്৷৷22.26৷৷

ഹരിസ്ഥേര്കേഷ്ടമ്യാമഥ സിതരുചൌ കോലവപുഷാ

സിതാം ഗവ്യൈഃ സര്വൈര്യുതമയുതജപ്താമപി ശിലാമ്.

ഉദഗ്വക്ത്രോ മന്ത്രീ മനുജപരതഃ സ്ഥാപയതു താ-
മയത്നം ക്ഷേത്രേഷു ദ്രുതമരിനിരോധം ശമയതി৷৷22.28৷৷

ആരാധ്യ ചാഷ്ടോര്ധ്വശതപ്രമാണം

സാജ്യേന മന്ത്രീ ഹവിഷാഥ തേന.

സത്പാരവാരം ജുഹുയാദ്യഥാവ-
ത്ക്ഷേത്രോത്ഥിതാപത്പ്രശമം പ്രയാതി৷৷22.30৷৷

ഹുതക്രിയൈവം ദിവസൈശ്ച സപ്തഭി-

ര്വിനാശയേദ്ഭൂമിവിവാദസംകടമ്.

പരേതവേതാലപിശാചഡാകിനീ-
സമുത്ഥിതാം വാ വികൃതിം വിധിസ്ത്വയമ്৷৷22.32৷৷

നൃപതരുസമിധാമയുതം

മന്ത്രേണാനേന യോ ഹുനേന്മന്ത്രീ.

ഗൃഹയാത്രാസ്യ ന സീദേ-
ത്ക്ഷേത്രാദികമപി ച വര്ധതേ ക്രമശഃ৷৷22.34৷৷

മന്ത്രേണാനേന സര്പിര്ജുഹുത ദശശതം മണ്ഡലാത്സ്വര്ണസിദ്ധിഃ

സ്വാദ്വക്തേനാഞ്ജലിന്യാ അപി കുസുമസഹസ്രേണ വാ വാസസാം ച.

ലാജാനാം കന്യകായാ അപി ച മധുമതാം ഹോമതോ വാഞ്ഛിതായാഃ
സിദ്ധീ രക്തോത്പലാനാമപി മധുരയുജാം സ്യാദ്ധുതാച്ഛ്രീഃ സമഗ്രാ৷৷22.36৷৷

താരേമുമപി ലിഖിത്വാ

തദ്ബാഹ്യേനലപുരം സമാപുടിതമ്.

തദ്ബാഹ്യേ ച ചതുര്ദല-
മബ്ജം സ്യാത്തദ്ബഹിസ്തഥാഷ്ടദലമ്৷৷22.38৷৷

രന്ധ്രേഷ്വങ്ഗമനൂനപി

ദലമൂലേഷ്ടാര്ണകേസരാണി ലിഖേത്.

അഷ്ടാവഷ്ടൌ ദലമനു
സൂകരമന്ത്രസ്യ ചാക്ഷരാന്ക്രമശഃ৷৷22.40৷৷

വ്യഞ്ജനകിഞ്ജല്കേന്ത്യേ

ദ്വൌ ദ്വൌ ത്രയമന്ത്യകേ ദലേ വിലിഖേത്.

താഹമഹീകോലാര്ണൈഃ
പ്രവേഷ്ടയേത്സാധ്യവര്ണപരിപുടിതൈഃ৷৷22.42৷৷

അഷ്ടസു ശൂലേഷു തഥാ

വാരാഹം വാസുസേനസംവൃത്തമ്.

ലാക്ഷാകുങ്കുമചന്ദന-

ലഘുകര്പൂരൈഃ സരോചനൈര്വിലിഖേത്৷৷

ഗോശകൃദമ്ഭോയുക്തൈ-
ര്ലേഖിന്യാ ഹൈമയാ ദിനേ പ്രവരേ৷৷22.44৷৷

മന്ത്രീ സമാസ്ഥായ വരാഹരൂപം

സാധ്യപ്രദേശേ നിഖനേച്ച യന്ത്രമ്.

സ്ഥിരാഖ്യരാശാവഭിവാഹ്യ കോല-
മങ്ഗാനി ദിക്ഷു ക്ഷിപതാം യഥാവത്৷৷22.46৷৷