ഋഷിഃ പ്രജാപതിശ്ഛന്ദോ ഗായത്രം വിഷ്ണുരുച്യതേ.
ദേവതാ ഹൃദ്ധ്രുവേണ സ്യാന്നമസാ ശിര ഉച്യതേ৷৷21.3৷৷

സപാദജാനുയുഗലലിങ്ഗനാഭ്യുദരേഷു ച.
ഹൃദ്ദോര്ഗലാസ്യദൃങ്മസ്തശിഖാസ്വക്ഷരതോ ന്യസേത്৷৷21.5৷৷

ഹൃത്കുക്ഷിനാഭിഷു തഥാ ഗുഹ്യജാനുപദേഷ്വധഃ.
കരകണ്ഠാസ്യദൃങ്മസ്തശിഖാസൂര്ധ്വം ച വിന്യസേത്৷৷21.7৷৷

ഹരിമുജ്ജ്വലചക്രദരാബ്ജഗദാ-

കുലദോഃ പരിഘം സിതപദ്മഗതമ്.

വലയാങ്ഗദഹാരകിരീടധരം
നവകുന്ദരുചം പ്രണമാമി സദാ৷৷21.9৷৷

പീഠേ ഹരേരഥാങ്ഗൈഃ

സശക്തിഭിര്മൂര്തിഭിസ്തദനു യജേത്.

കേശവസുരനാഥാദ്യൈ-
രപി ദേവം ഭക്തിപൂര്വതോ വിദ്വാന്৷৷21.11৷৷

ദ്വാദശാക്ഷരജപം തു സാര്ചനം

യോ ഭജേത്സുനിയതോ ദിനേ ദിനേ.

ഐഹികം സമുപലഭ്യ വാഞ്ഛിതം
പ്രേത്യ യാതി പദമക്ഷയം ഹരേഃ৷৷21.13৷৷

അന്ത്യതുരീയതദാദിക-

ഭൃഗുദഹനാനന്തവഹ്നിവര്മാസ്ത്രൈഃ.

താരാദിര്മനുരുക്തഃ
സ്യാദഭിമതസിദ്ധിദോ രഥാങ്ഗാഖ്യഃ৷৷21.15৷৷

ഐന്ദ്രീം സമാരഭ്യ ദിശം ത്വധസ്താ-

ദന്തം സമുക്ത്വാ ക്രമശോ ദശാനാമ്.

ചക്രേണ ബധ്നാമി നമസ്തഥോക്ത്വാ
ചക്രായ ശീര്ഷം ച ദിശാം പ്രബന്ധഃ৷৷21.17৷৷

താരം തു മൂര്ധ്ന്യഥ സിതാരുണകൃഷ്ണവര്ണം

മധ്യേ ഭ്രുവോശ്ച സമഥോ വദനേ ഹകാരമ്.

ഹൃദ്ഗുഹ്യജാനുപദസംധിഷു ചാവശിഷ്ടാ(?)-
ന്വര്ണാന്ന്യസേദിതി തനൌ പുനരഗ്നിവര്ണാന്৷৷21.19৷৷

പ്രോക്ത്വാ സുദര്ശനായേതി വിദ്മഹേന്തേ മഹാപദമ്.
ജ്വാലായ ധീമഹേ ചോക്ത്വാ തന്നശ്ചക്രഃ പ്രചോദയാത്৷৷21.21৷৷

നമോ ഭഗവതേ പ്രോക്ത്വാ മഹാസുദര്ശനായ ച.
മഹാചക്രായ ച തഥാ മഹാജ്വാലായ ചേത്യഥ৷৷21.23৷৷

ഷട്കോണാന്തഃസ്ഥതാരം വിവരലിഖിതമന്ത്രാക്ഷരം സിദ്ധിരാജ-

ത്സ്വാങ്ഗം ബാഹ്യേ കലാകേസരമുദരഗതാഷ്ടാക്ഷരം ചാഷ്ടപത്രമ്.

പദ്മം വര്ണൈര്വിരാജദ്വികൃതിദലലസത്ഷോഡശാര്ണം ത്രിവീതം
വ്യോമാന്ത്യാര്ണം സ്വനാമ്നാ വിരചിതഗുണപാശാങ്കുശം ചക്രയന്ത്രമ്৷৷21.25৷৷

ക്വാഥൈഃ പയോഭൂരുഹചര്മസിദ്ധൈ-

ര്ദുഗ്ധേന ഗവ്യൈരപി പഞ്ചഭിര്വാ.

മൂത്രൈഃ പശോര്വാ പ്രതിപൂര്യ കുമ്ഭം
സമര്ചയേച്ചക്രഹരിം യഥാവത്৷৷21.27৷৷

ചക്രശങ്ഖഗദാപദ്മമുസലാ ധനുരേവ ച.
പാശാങ്കുശൌ പീതരക്തസിതശ്യാമാ ദ്വിജസ്ത്വിമാഃ৷৷21.29৷৷

സംപൂജ്യ ചൈവം വിധിനാ ഹരിം തു

ശിഷ്യം ഗുരുഃ പ്രീതതമോഭിഷിഞ്ചേത്.

ഭക്ത്യാ സ്വശക്ത്യാ വിഭവൈര്ദ്വിജാതീ-
ന്സംതര്പ്യ ഭൂയോ ഗുരുണാനുശിഷ്ടഃ৷৷21.31৷৷

സമുദ്രതീരേപ്യഥ വാദ്രിശ്രൃങ്ഗേ

സമുദ്രഗാനാം സരിതാം ച തീരേ.

ജപേദ്വിവിക്തേ നിജ ഏവ ഗേഹേ
വിഷ്ണോര്ഗൃഹേ വാ പുരുഷോ മനസ്വീ৷৷21.33৷৷

പീതാഭാ കര്ണികാ സ്യാദരുണതരമരം ശ്യാമലം ചാന്തരാലം

നേമി ശ്വേതം ച ബാഹ്യേ വിരചിതശിതിരേഖാകുലം പാര്ഥിവാന്തമ്.

ചക്രദ്വന്ദ്വം ലിഖിത്വാ വിശദമതിരഥോ സൌമ്യയാമ്യം ച മന്ത്രീ
കുമ്ഭം സംപൂര്യ സൌമ്യേ പ്രരചയതു തഥാ ദക്ഷിണേ ഹോമകര്മ৷৷21.35৷৷

സംസ്ഥാപ്യ ദക്ഷിണസ്യാം

സാധ്യം കുമ്ഭേന തേന നീരാജ്യ.

തമഥ ഘടം സദ്രവ്യം
ബഹിരാരാദഷ്ടമേ ക്ഷിപേദ്രാശൌ৷৷21.37৷৷

ഹൃദയാന്തേ വിഷ്ണുപദം

പ്രോക്ത്വാഥ ഗണേഭ്യ ഉച്ചരേത്സര്വമ്.

ശാന്തികരേഭ്യശ്ച ബലിം
ഗൃഹ്ണന്ത്വിതി ശാന്തയേ നമോന്തം സ്യാത്৷৷21.39৷৷

പാലാശൈര്വാ സ്തനജ-

ദ്രുമജൈര്വാ പഞ്ജരേ കൃതേ ഫലകൈഃ.

സംപൂര്യ പഞ്ചഗവ്യൈ-
സ്തത്ര തു സംസ്ഥാപ്യ ശുദ്ധമപി ഗദിനമ്৷৷21.41৷৷

വിപ്രക്ഷീരദ്രുമത്വങ്ഗലയജപുരകാശ്മീരകുഷ്ഠത്രിയാമാ

ബില്വാപാമാര്ഗരാജീതിലതുലസിയുഗക്രാന്തിദൂര്വായവാര്കൈഃ.

ലക്ഷ്മീദേവീകുശാഗോമയകമലവചാരോചനാപഞ്ചഗവ്യൈഃ
സിദ്ധേഗ്നൌ കുമ്ഭസിദ്ധം മനുജപമഹിതം ഭസ്മ സര്വാര്ഥദായി৷৷21.43৷৷

ജുഹുയാദ്ഗുഗ്ഗുലുഗുളികാ-

സഹസ്രകം സാഷ്ടകം ച മന്ത്രിതമഃ.

ത്രിദിനം ചതുര്ദിനം വാ
സര്വോപദ്രവനിവാരണം ഭവതി৷৷21.45৷৷

ആജ്യാക്തൈര്ജുഹുയാച്ഛ്രിയേ സരസിജൈര്ദൂര്വാഭിരപ്യായുഷേ

മേധായൈ ദ്വിജഭൂരുഹൈശ്ച കുമുദൈഃ ശ്വേതൈസ്തഥാ വാസസേ.

ശുദ്ധാജ്യൈഃ പശവേപ്യുദുമ്ബരഭവൈഃ പുത്രായ ചാശ്വത്ഥജൈ-
രേകാബ്ദം വിധിവത്സഹസ്രസമിതൈരഷ്ടോത്തരം മുക്തയേ৷৷21.47৷৷

മന്ത്രീ സുനിയതചിത്ത-

ശ്ചക്രസ്ഥം ഭ്രാമയേദ്ധിയാ ഗ്രസ്തമ്.

ആവിശ്യ സകലമുക്ത്വാ
മുഞ്ചതി ദഗ്ധോഗ്നിനാ ശുനാഭിഭുവാ৷৷21.49৷৷

കലാവൃതം ചാഹിപദാഭിവേഷ്ടിതം

സമക്ഷരം യച്ഛിരസി സ്മരേത്സദാ.

ദശാഹതോസൌ പ്രതി ചാട്യതേ രിപു-
ര്മൃതിം തഥാ മണ്ഡലതഃ പ്രയാതി৷৷21.51৷৷

സ്രവത്സുധാവര്ഷിണമിന്ദുസപ്രഭം

സമുജ്ജ്വലം യച്ഛിരസി പ്രചിന്തയേത്.

ക്ഷണാത്സമാപ്യായിതസര്വവിഗ്രഹോ
ഭവേത്സ മര്ത്യഃ സുചിരം ച ജീവതി৷৷21.53৷৷

സ്ഥാനേ ഹൃഷീകേശവിദര്ഭിതം ച

സ്പഷ്ടാക്ഷരം ചാപ്യഭിജപ്തമേതത്.

രക്ഷാം ഗ്രഹാദേഃ സതതം വിധത്തേ
യന്ത്രം സുക്ലൃപ്തം ച മനുത്രയേണ৷৷21.55৷৷