ऋषिः प्रजापतिश्छन्दो गायत्रं विष्णुरुच्यते।
देवता हृद्ध्रुवेण स्यान्नमसा शिर उच्यते।।21.3।।

सपादजानुयुगललिङ्गनाभ्युदरेषु च।
हृद्दोर्गलास्यदृङ्मस्तशिखास्वक्षरतो न्यसेत्।।21.5।।

हृत्कुक्षिनाभिषु तथा गुह्यजानुपदेष्वधः।
करकण्ठास्यदृङ्मस्तशिखासूर्ध्वं च विन्यसेत्।।21.7।।

हरिमुज्ज्वलचक्रदराब्जगदा

कुलदोः परिघं सितपद्मगतम्।

वलयाङ्गदहारकिरीटधरं
नवकुन्दरुचं प्रणमामि सदा।।21.9।।

पीठे हरेरथाङ्गैः

सशक्तिभिर्मूर्तिभिस्तदनु यजेत्।

केशवसुरनाथाद्यै
रपि देवं भक्तिपूर्वतो विद्वान्।।21.11।।

द्वादशाक्षरजपं तु सार्चनं

यो भजेत्सुनियतो दिने दिने।

ऐहिकं समुपलभ्य वाञ्छितं
प्रेत्य याति पदमक्षयं हरेः।।21.13।।

अन्त्यतुरीयतदादिक

भृगुदहनानन्तवह्निवर्मास्त्रैः।

तारादिर्मनुरुक्तः
स्यादभिमतसिद्धिदो रथाङ्गाख्यः।।21.15।।

ऐन्द्रीं समारभ्य दिशं त्वधस्ता

दन्तं समुक्त्वा क्रमशो दशानाम्।

चक्रेण बध्नामि नमस्तथोक्त्वा
चक्राय शीर्षं च दिशां प्रबन्धः।।21.17।।

तारं तु मूर्ध्न्यथ सितारुणकृष्णवर्णं

मध्ये भ्रुवोश्च समथो वदने हकारम्।

हृद्गुह्यजानुपदसंधिषु चावशिष्टा(?)
न्वर्णान्न्यसेदिति तनौ पुनरग्निवर्णान्।।21.19।।

प्रोक्त्वा सुदर्शनायेति विद्महेऽन्ते महापदम्।
ज्वालाय धीमहे चोक्त्वा तन्नश्चक्रः प्रचोदयात्।।21.21।।

नमो भगवते प्रोक्त्वा महासुदर्शनाय च।
महाचक्राय च तथा महाज्वालाय चेत्यथ।।21.23।।

षट्कोणान्तःस्थतारं विवरलिखितमन्त्राक्षरं सिद्धिराज

त्स्वाङ्गं बाह्ये कलाकेसरमुदरगताष्टाक्षरं चाष्टपत्रम्।

पद्मं वर्णैर्विराजद्विकृतिदललसत्षोडशार्णं त्रिवीतं
व्योमान्त्यार्णं स्वनाम्ना विरचितगुणपाशाङ्कुशं चक्रयन्त्रम्।।21.25।।

क्वाथैः पयोभूरुहचर्मसिद्धै

र्दुग्धेन गव्यैरपि पञ्चभिर्वा।

मूत्रैः पशोर्वा प्रतिपूर्य कुम्भं
समर्चयेच्चक्रहरिं यथावत्।।21.27।।

चक्रशङ्खगदापद्ममुसला धनुरेव च।
पाशाङ्कुशौ पीतरक्तसितश्यामा द्विजस्त्विमाः।।21.29।।

संपूज्य चैवं विधिना हरिं तु

शिष्यं गुरुः प्रीततमोऽभिषिञ्चेत्।

भक्त्या स्वशक्त्या विभवैर्द्विजाती
न्संतर्प्य भूयो गुरुणानुशिष्टः।।21.31।।

समुद्रतीरेऽप्यथ वाद्रिश्रृङ्गे

समुद्रगानां सरितां च तीरे।

जपेद्विविक्ते निज एव गेहे
विष्णोर्गृहे वा पुरुषो मनस्वी।।21.33।।

पीताभा कर्णिका स्यादरुणतरमरं श्यामलं चान्तरालं

नेमि श्वेतं च बाह्ये विरचितशितिरेखाकुलं पार्थिवान्तम्।

चक्रद्वन्द्वं लिखित्वा विशदमतिरथो सौम्ययाम्यं च मन्त्री
कुम्भं संपूर्य सौम्ये प्ररचयतु तथा दक्षिणे होमकर्म।।21.35।।

संस्थाप्य दक्षिणस्यां

साध्यं कुम्भेन तेन नीराज्य।

तमथ घटं सद्रव्यं
बहिरारादष्टमे क्षिपेद्राशौ।।21.37।।

हृदयान्ते विष्णुपदं

प्रोक्त्वाथ गणेभ्य उच्चरेत्सर्वम्।

शान्तिकरेभ्यश्च बलिं
गृह्णन्त्विति शान्तये नमोन्तं स्यात्।।21.39।।

पालाशैर्वा स्तनज

द्रुमजैर्वा पञ्जरे कृते फलकैः।

संपूर्य पञ्चगव्यै
स्तत्र तु संस्थाप्य शुद्धमपि गदिनम्।।21.41।।

विप्रक्षीरद्रुमत्वङ्गलयजपुरकाश्मीरकुष्ठत्रियामा

बिल्वापामार्गराजीतिलतुलसियुगक्रान्तिदूर्वायवार्कैः।

लक्ष्मीदेवीकुशागोमयकमलवचारोचनापञ्चगव्यैः
सिद्धेऽग्नौ कुम्भसिद्धं मनुजपमहितं भस्म सर्वार्थदायि।।21.43।।

जुहुयाद्गुग्गुलुगुळिका

सहस्रकं साष्टकं च मन्त्रितमः।

त्रिदिनं चतुर्दिनं वा
सर्वोपद्रवनिवारणं भवति।।21.45।।

आज्याक्तैर्जुहुयाच्छ्रिये सरसिजैर्दूर्वाभिरप्यायुषे

मेधायै द्विजभूरुहैश्च कुमुदैः श्वेतैस्तथा वाससे।

शुद्धाज्यैः पशवेऽप्युदुम्बरभवैः पुत्राय चाश्वत्थजै
रेकाब्दं विधिवत्सहस्रसमितैरष्टोत्तरं मुक्तये।।21.47।।

मन्त्री सुनियतचित्त

श्चक्रस्थं भ्रामयेद्धिया ग्रस्तम्।

आविश्य सकलमुक्त्वा
मुञ्चति दग्धोऽग्निना शुनाभिभुवा।।21.49।।

कलावृतं चाहिपदाभिवेष्टितं

समक्षरं यच्छिरसि स्मरेत्सदा।

दशाहतोऽसौ प्रति चाट्यते रिपु
र्मृतिं तथा मण्डलतः प्रयाति।।21.51।।

स्रवत्सुधावर्षिणमिन्दुसप्रभं

समुज्ज्वलं यच्छिरसि प्रचिन्तयेत्।

क्षणात्समाप्यायितसर्वविग्रहो
भवेत्स मर्त्यः सुचिरं च जीवति।।21.53।।

स्थाने हृषीकेशविदर्भितं च

स्पष्टाक्षरं चाप्यभिजप्तमेतत्।

रक्षां ग्रहादेः सततं विधत्ते
यन्त्रं सुक्लृप्तं च मनुत्रयेण।।21.55।।