मेषादिकं यच्च चतुष्कमादौ

मासेषु तद्वायुगृहावृतं स्यात्।

सिंहादिकं भूगृहसंवृतं च
चापादिकं पार्थिवयुग्मवीतम्।।20.3।।

तानि त्रिषड्द्वादशकात्मकोक्तैः

स्युर्लक्षणैरप्यभिलक्षितानि।

स्वैः स्वैश्च नामप्रविभक्तरूप
भेदैर्बहिर्वेष्टितबिम्बकानि।।20.5।।

पद्मं चरोभस्थिरसंज्ञकेषु

रक्तप्रपीताच्छदलादिवर्णम्।

मासेषु यन्त्रोदरक्लृप्ततत्त
न्मासाभिधामूर्त्यभिधाक्षराढ्यम्।।20.7।।

सुवर्णगोक्षीरजपाशिलाल

पीतेन्द्रनीलारुणकैरवाभाः।

काश्मीरमेघाञ्जनरोचिषश्च
क्रमेण वर्णैरपि केशवाद्याः।।20.9।।

धात्रर्यममित्रत्राख्या

वरुणांशभगा विवस्वदिन्दुयुताः।

पूषाह्वयपर्जन्यौ
त्वष्टा विष्णुश्च भानवः प्रोक्ताः।।20.11।।

पञ्चममपि विष्ण्वशं

मधुसूदनभगवपञ्च षष्ठमपि।

त्रिविक्रमविवस्वदाख्यं
सप्तममन्यच्च वामनैन्द्रमपि।।20.13।।

आदौ विधानेषु समेतमूर्ति

शक्तीश्चतस्रोऽभियजेद्यथावत्।

राशिष्वथो भानुयुताश्च मूर्तीः
प्रवक्ष्यमाणं च निरूप्य मन्त्री।।20.15।।

प्रानुप्रोद्यत्स्वराष्टद्वितयवृतमहाबीजकं शक्तिलक्ष्मी

कामैरात्ताग्निकोणं बहिरभिवृतसिंहान्वितक्रोडमन्त्रम्।

बिन्दूनामन्तरालेष्वपि च विलिखितैः कादिवर्गैश्च युक्तं
षड्भिर्वायव्यगेहावृतमभिमतकामप्रदं मेषयन्त्रम्।।20.17।।

हयरथगजभृत्यादी

नरिभवशौर्यादिसिद्धिं च।

तेजो यशश्च विपुलं
पूजयितुर्वितनुते विधानमिदम्।।20.19।।

नित्यानन्दा व्यापिनी व्योमरूपा

शान्तिर्विद्यारूपिणी च प्रतिष्ठा।

कल्यामोघा चण्डिका दीप्तजिह्वे
त्येवं प्रोक्ताथावृतिः स्यात्तृतीया।।20.21।।

प्रागच्छन्मात्रभिख्यालिपिपरिवृतबीजं स्वरावीतवृत्तं

शाद्यैः क्षान्तैस्तदाद्यैरपि परिवृतगण्डं तदश्रात्तजुंसम्।

भाद्यैः कान्तैः प्रवीतं मयरलवहयुग्बिन्दुकं वायुगेहा
वीतं वाञ्छाप्रदानप्रसवगुणयुतं युग्मजं यन्त्रमेतत्।।20.23।।

पाशाद्यष्टाक्षरार्णप्रतिपुटितमहाष्टाक्षरावेष्टितान्त

र्बीजं शाखान्तरूढे गगननृहरिबीजात्तकोणं बहिश्च।

कामिन्यष्टाक्षराद्यन्तगहरिहरबीजावृतं प्रत्यनूद्य
द्वर्णाढ्यं वायुगेहस्थितमिति गदितं कर्कटोत्थं च यन्त्रम्।।20.25।।

भूतिर्विभूतिरुन्नति

नतिधृतिरतयश्च संयतिद्युतयः।

आवृतिरेका प्रोक्ता
श्रीवश्यकरं विधानमिति कथितम्।।20.27।।

पुष्टिस्तुष्टिर्धृतिरपि कृतिः शान्तिकान्तिप्रमोदा

मेधा हर्षा स्मृतिरभिमता कान्तिका स्यात्तृतीया।

कृष्णः सत्यो नृहरिवरदौ विश्वमूर्तिर्वरेण्यः
शौरिः शूरो नरमुरजितौ विष्णुजिष्णू चतुर्थी।।20.29।।

सर्गाद्यान्ताद्यमन्तैरभिवृतहृदयं दण्डिभिश्चापि हाही

हूहैहौहोभिरात्ताश्रिकमथ तु शिखाद्योतिवर्गान्त्यवर्णम्।

वर्णैः प्रत्यन्वितैः प्रावृतमवनिपुराश्रोल्लसत्कामबीजं
क्लिन्ने स्वाहार्णयुक्तं महिततरफलं कन्यकोत्थं च यन्त्रम्।।20.31।।

आद्यैरावीतबीजं ग्रहवलययुतं हुंफडायुक्तकोणं

बाह्ये पाशाङ्कुशार्णावृतमथ युगषण्मूर्तिनामार्णमर्णैः।

प्रत्यन्वेष्यद्भिरुद्यद्धरियुतहरवर्णैश्च वीतं धरायाः
कोणेषूद्यन्नृसिंहाक्षरमिति कथितं स्यात्तुलायन्त्रमेतत्।।20.33।।

अक्लीबद्वादशाज्द्वादशलिपिवृतहृल्लेखमश्रिद्विषट्क

प्रोल्लास्यष्टाक्षरोष्मार्णकमपि लिपिभिः कादिभिश्चाभिवीतम्।।

तद्बाह्ये चन्द्रबिम्बप्रपुटितवसुधामण्डलाश्रिप्रराज
त्क्लीबार्णं वृश्चिकोत्थं प्रवरतरफलप्राप्तिदं यन्त्रमेतत्।।20.35।।

द्राविणी मोहिनी चेति तृतीयेयं समावृतिः।
अन्वयाप्तिं धर्मरतिं प्राप्नुयादस्य चार्चनात्।।20.37।।

हर्षाह्वा सुनदारुणा सगगना घोरा रमा द्राविणी

वीरा वीरिणिहारिणी सहरिणी मन्दारिका द्वादश।

प्रोक्तेयं च समावृतिः पुनरिदं संपूजयन्प्राप्नुया
ल्लक्ष्मीसंततिबुद्धिवश्यपटुताकान्तीश्च भक्तिं शुभाम्।।20.39।।

मेधा हर्षा श्रद्धा

कृपा रतिर्वा सरस्वती प्रीतिः।

वाणी चेति तृतीया
वृतिरुक्ता मकरजे विधानेऽस्मिन्।।20.41।।

शक्तिश्रीकामबीजैः पुटितहरिहरब्रह्मभिश्चावृतान्त

र्बीजं कोणद्विषट्कस्फुरितनृहरिबीजप्रतिद्योतितं च।

आदिक्षान्तैश्च वर्णैर्वृतमवनिपुरद्वन्द्वकोणान्तकाम
श्रीशक्तिक्ष्मार्णचिन्तामणिमनु तदिदं श्रीकरं कुम्भयन्त्रम्।।20.43।।

अवनिपशुपुत्रसंपद

मपि पितृसौख्यं च हृत्प्रबोधं च।

कुरुते विधानमेत
त्प्रयोक्तुरन्ते च निर्वृतिं परमाम्।।20.45।।

हृष्टिर्वृष्टिस्तुष्टिरिष्टा सुपुष्टिः

कान्तिर्मेधा मङ्गला वामसंज्ञा।

दुर्गा प्रज्ञा भारती मध्यसंस्था
वाक्सामर्थ्यं श्रीकरं स्याद्विधानम्।।20.47।।

दीर्घायुषो मुख्यतरेन्दिराश्च

महाप्रभावाः स्वसमानवीर्याः।

कलेबरान्ते विगताधयस्ते
विष्णोरनन्यं पदमाप्नुवन्ति।।20.49।।

कर्षोन्मिते च हाटक

पट्टे पत्रं विलिख्य चतुरश्रे।

तद्द्वित्र्यंशकृते वा
कलशेषु विनिक्षिपेच्च दीक्षासु।।20.51।।

एषां यागविधीना

मेकेन तु पूजयंस्तदवसाने।

तत्तन्मूर्तिप्रीत्यै
संस्तोतव्योऽनया हरिः स्तुत्या।।20.53।।

अज प्रसीद भगवन्नमितद्युतिपञ्जर।
अप्रमेय प्रसीदास्मद्दुःखहन्पुरुषोत्तम।।20.55।।

प्रसीद तुङग तुङ्गानां प्रसीद शिव शोभन।
प्रसीद स्पष्ट गम्भीर गम्भीराणां महाद्युते।।20.57।।

गुरोर्गरीयः सर्वेश प्रसीदानन्य देहिनाम्।
जय माधव मायात्मञ्जय केशव केशिहन्।।20.59।।

जय चक्रगदापाणे जयाजय्य जनार्दन।
जय रत्नाकराबन्ध किरीटाक्रान्तमस्तक।।20.61।।

नमस्ते नलिनापाङ्ग नमस्ते नयनाञ्जन।
नमः पापहरेशान नमः सर्वभयापह।।20.63।।

नमो विभिन्नज्ञेयांश नमः स्मृतिपथातिग।
नमस्त्रिमूर्तिभेदेन सर्गस्थित्यन्तहेतवे।।20.65।।

विश्वाय विश्ववन्द्याय विश्वभूतात्मने नमः।
नमोऽस्तु योगिध्येयाय नमोऽस्त्वध्यात्मरूपिणे।।20.67।।

देवेश कर्म सर्वं मे भवेदाराधनं तव।
विषयेष्वपि सङ्गो मे हुतं विष्णो तवाच्युत।।20.69।।