മന്ത്രസ്യാസ്യ മുനിഃ പ്രജാപതിരഥ ച്ഛന്ദശ്ച ദേവ്യാദികാ

ഗായത്രീ ഗദിതാ ജഗത്സു പരമാത്മാഖ്യസ്തഥാ ദേവതാ.

അക്ലീബൈര്യുഗമധ്യഗധ്രുവയുതൈരങ്ഗാനി കുര്യാത്സ്വരൈ-
ര്മന്ത്രീ ജാതിയുതൈശ്ച സത്യരഹിതൈര്വാ വ്യാഹൃതീഭിഃ ക്രമാത്৷৷18.3৷৷

ദീക്ഷിതോ മനുമിമം ശതലക്ഷം

സംജപേത്പ്രതിഹുനേച്ച ദശാംശമ്.

പായസൈര്ഘൃതയുതൈശ്ച തദന്തേ
വിപ്രഭൂരുഹഭവാഃ സമിധോ വാ৷৷18.5৷৷

അഭ്യര്ച്യ വൈഷ്ണവമഥോ വിധിനൈവ പീഠ-

മാവാഹ്യ തത്ര സകലാര്ഥകരം മുകുന്ദമ്.

അങ്ഗൈഃ സമൂര്തിയുഗശക്തിയുഗൈഃ സുരേന്ദ്ര-
വജ്രാദികൈര്യജതു മന്ത്രിവരഃ ക്രമേണ৷৷18.7৷৷

ചതുര്ഭുജാശ്ചക്രശങ്ഖഗദാപങ്കജധാരിണഃ.
കിരീടകേയൂരിണശ്ച പീതാമ്ബരധരാ അപി৷৷18.9৷৷

ആത്മാന്തരാത്മപരമജ്ഞാനാത്മാനസ്തു മൂര്തയഃ.
നിവൃത്തിശ്ച പ്രതിഷ്ഠാ ച വിദ്യാ ശാന്തിശ്ച ശക്തയഃ৷৷18.11৷৷

ഇത്ഥം മന്ത്രീ താരമമും ജാപഹുതാര്ചാ-

ഭേദൈരങ്ഗീകൃത്യ ച യോഗാനപി യുഞ്ജ്യാത്.

യൈഃ സംലബ്ധ്വാ ചേഹ സമഗ്രാം ശ്രിയമന്തേ
ശുദ്ധം വിഷ്ണോര്ധാമ പരം പ്രാപ്സ്യതി യോഗീ৷৷18.13৷৷

യോഗാപ്തിദൂഷണപരം ത്വഥ കാമകോപ-

ലോഭപ്രമോഹമദമത്സരതേതി ഷട്കമ്.

വൈരിം ജയേത്സപദി യോഗവിദേനമങ്ഗൈ-
ര്യോഗസ്യ ധീരമതിരഷ്ടഭിരിഷ്ടദൈശ്ച৷৷18.15৷৷

സത്യമഹിംസാ സമതാ

ധൃതിരസ്തേയം ക്ഷമാര്ജവം ച തഥാ.

വൈരാഗ്യമിതി യമഃ സ്യാ-
ത്സ്വാധ്യായതപോര്ചനാവ്രതാനി തഥാ৷৷18.17৷৷

രേചകപൂരകകുമ്ഭക-

ഭേദാത്ിത്രവിധഃ പ്രഭഞ്ജനായാമഃ.

മുഞ്ചേദ്ദക്ഷിണയാനില-
മഥാനയേദ്വാമയാ ച മധ്യമയാ৷৷18.19৷৷

ചിത്താത്മൈക്യധൃതസ്യ

പ്രാണസ്യ സ്ഥാനസംഹൃതിഃ സ്ഥാനാത്.

പ്രത്യാഹാരോ ജ്ഞേയ-
ശ്ചൈതന്യയുതസ്യ സമ്യഗനിലസ്യ৷৷18.21৷৷

സംസ്ഥാപയേച്ച തത്രേ-

ത്യേവം ധ്യാനം വദന്തി തത്ത്വവിദഃ.

സത്താമാത്രം നിത്യം
ശുദ്ധമപി നിരഞ്ജനം ച യത്പ്രോക്തമ്৷৷18.23৷৷

അഥ വാ ശോഷണദഹന-

പ്ലാവനഭേദേന ശോധിതേ ദേഹേ.

പഞ്ചാശദ്ഭിര്മാത്രാ-
ഭേദൈര്വിധിവത്സമായമേത്പ്രാണാന്৷৷18.25৷৷

പൂര്വമിഡായാ വദനേ

വിചിന്തയേദ്ധൂമ്രമാനിലം ബീജമ്.

തേനാഗതേന ദേഹം
പ്രശോഷയേത്സാന്തരാധികരചരണമ്৷৷18.27৷৷

സംപൂരയേത്സുധാമയ-

ജലശീകരവര്ഷിണാ തനും സകലാമ്.

നിര്മായ മാനസേന ച
പരിപൂര്ണമനാശ്ചിരം ഭൂയാത്৷৷18.29৷৷

പ്രസാരിതം വാമകരം നിജാങ്കേ

നിധായ തസ്യോപരി ദക്ഷിണം ച.

ഋജുഃ പ്രസന്നോ വിജിതേന്ദ്രിയഃ സ-
ന്നാധാരമത്യന്തസമം സ്മരേത്സ്വമ്৷৷18.31৷৷

തന്മധ്യഗതം ശുദ്ധം

ശബ്ദബ്രഹ്മാതിസൂക്ഷ്മതന്തുനിഭമ്.

തേജഃ സ്മരേച്ച താരാ-
ത്മകമപി മൂലം ചരാചരസ്യ സദാ৷৷18.33৷৷

അസ്യ തു വേദാദിത്വാ-

ത്സര്വമനൂനാം പ്രയുജ്യതേഥാദൌ.

യോനിശ്ച സര്വദേഹേ
ഭവതി ച സ ബ്രഹ്മ സര്വസംവാദേ৷৷18.35৷৷

ഉച്ചാര്യോച്ചാര്യ ച തം

ക്രമാന്നയേദുപരി ഷഡ്ദ്വയാന്താന്തമ്.

മനസാ സ്മൃതേ യദാസ്മി-
ന്മനോ ലയം യാതി താവദഭ്യസ്യേത്৷৷18.37৷৷

അപമൃത്യുരോഗപാപജി-

ദചിരേണ സുസിദ്ധിദോ നൃണാം യോഗഃ.

അഥ വാ മൂലാധാരോ-
ത്ഥിതാ പ്രഭാ ബിസവിഭേദതന്തുനിഭാ৷৷18.39৷৷

അഥ വാ ത്രിവലയബിന്ദുഗ-

ധാമ പ്രണവേന സംനയേദൂര്ധ്വമ്.

പീതോര്ണാതന്തുനിഭം
സൌഷുമ്നേനൈവ വര്ത്മനാ യോഗീ৷৷18.41৷৷

അഥ വാദിബീജമൌ പുന-

രുമപി വിഷേ തമപി സംഹരേദ്ബിന്ദൌ.

ബിന്ദും നാദേ തമപി ച
ശക്തൌ ശക്തിം തഥൈവ ശാന്താഖ്യേ৷৷18.43৷৷

സ്വാത്മനി സംഹൃത്യൈവം

കരണേന്ദ്രിയവര്ഗനിര്ഗമാപേതഃ.

നിര്ലീനപുണ്യപാപോ
നിരുച്ഛ്വസന്ബ്രഹ്മഭൂത ഏവ സ്യാത്৷৷18.45৷৷

ജാഗ്രത്സ്വപ്നസുഷുപ്തീ

തുരീയതദതീതകൌ പുനസ്താസു.

സ്വൈരിന്ദ്രിയൈര്യദാത്മാ
ഭുങ്ക്തേ ഭോഗാന്സ ജാഗരോ ഭവതി৷৷18.47৷৷

പശ്യതി പരം യദാത്മാ

നിസ്തമസാ തേജസാ തുരീയം തത്.

ആത്മപരമാത്മപദയോ-
രഭേദതോ വ്യാപ്നുയാദ്യദാ യോഗീ৷৷18.49৷৷

സസുഷുമ്നാഗ്രകയോരപി

യുഞ്ജീയാജ്ജാഗ്രദാദിഭിഃ പവനമ്.

ബീജോച്ചാരോ ജാഗ്ര-
ദ്ബിന്ദുഃ സ്വപ്നഃ സുഷുപ്തിരപി നാദഃ৷৷18.51৷৷

നാഭിര്ഹൃദയം ഗ്രീവാ

സലമ്ബികാഗ്രം തഥൈവ നാസാഗ്രമ്.

ഭ്രൂമധ്യലലാടാഗ്രസു-
ഷുമ്നാഗ്രം ദ്വാദശാന്തമിത്യേവമ്৷৷18.53৷৷

സ്ഥാനേഷ്വേഷ്വാത്മമനഃ-

സമീരസംയോഗകര്മണോഭ്യാസാത്.

അചിരേണോത്ക്രാന്ത്യാദ്യാ
ഭവന്തി സംസിദ്ധയഃ പ്രസിദ്ധതരാഃ৷৷18.55৷৷

അവനിജലാനലമാരുത-

വിഹായസാം ശക്തിഭിശ്ച തദ്ബിമ്ബൈഃ.

മാരൂപ്യമാത്മനശ്ച
പ്രതിനീത്വാ തത്തദാശു ജയതി സുധീഃ৷৷18.57৷৷

ഇതി യോഗമാര്ഗഭേദൈഃ

പ്രതിദിനമാരൂഢയോഗയുക്തധിയഃ.

സിദ്ധയ ഉപലക്ഷ്യന്തേ
മോക്ഷപുരീസംപ്രവേശനദ്വാരാഃ৷৷18.59৷৷

ത്രൈകാല്യജ്ഞാനോഹൌ

മനോജ്ഞതാ ച്ഛന്ദതോ മരുദ്രോധഃ.

നാഡീസംക്രമണവിധി-
ര്വാക്സിദ്ധിര്ദേഹതശ്ച ദേഹാപ്തിഃ৷৷18.61৷৷

പ്രാപ്തിഃ പ്രാകാമ്യം ചേ-

ത്യഷ്ടൈശ്വര്യാണി യോഗയുക്തസ്യ.

അഷ്ടൈശ്വര്യസമേതോ

ജീവന്മുക്തഃ പ്രവക്ഷ്യതേ യോഗീ.

യോഗാനുഭവമഹാമൃത-
രസപാനാനന്ദനിര്ഭരഃ സതതമ്৷৷18.63৷৷