अजकलाप्रथमावनिशान्तिभि

र्युतसुधाकरखण्डविकासिभिः।

निगदितो मनुरेष मनोभुवः
सकलधर्मयशोर्थसुखावहः।।17.2।।

अरुणमरुणवासोमाल्यदामाङ्गरागं

स्वकरकलितपाशं साङ्कुशास्त्रेषुचापम्।

मणिमयमकुटाद्यैर्दीप्तमाकल्पजातै
ररुणनलिनसंस्थं चिन्तयेदङ्गयोनिम्।।17.4।।

मोहिनी क्षोभिणी त्रासी स्तम्भिन्याकर्षिणी तथा।
द्राविणीह्लादिनीक्लिन्नाक्लेदिन्यः स्मरशक्तयः।।17.6।।

अनङ्गरूपा सानङ्गमदनानङ्गमन्मथा।
अनङ्गकुसुमानङ्गकुसुमातुरसंज्ञका।।17.8।।

आलिख्यात्कर्णिकायामनलपुरपुटे मारबीजं ससाध्यं

तद्रन्ध्रेष्वङ्गषट्कं बहिरपि गुणशो मारणाय त्रिवर्णान्।

मालामन्त्रं दलाग्रेष्वपि गुहमुखशः पार्थिवाश्रिष्वनङ्गं
कुर्याद्यन्त्रं तदेतद्भुवनमपि वशे का कथा मानवेषु।।17.10।।

नत्यन्ते कामदेवाय प्रोक्त्वा सर्वजनं वदेत्।
प्रियायेति तथा सर्वजनसंमोहनाय च।।17.12।।

वशमुक्त्वा कुरुं वीप्स्य कथयेद्वह्निवल्लभाम्।
प्रोक्तो मदनमन्त्रोऽष्टचत्वारिंशद्भिरक्षरैः।।17.14।।

वक्ष्ये विधानमन्य

न्मनोभवस्याथ मोहनं जगतः।

येनार्चितः स देवो
वाञ्छितमखिलं करोति मन्त्रविदाम्।।17.16।।

अरुणतरवसनमाल्या

नुलेपनाभरणमिषुशरासधरम्।

न्यस्तशरबीजदेहो
ध्यायेदात्मानमङ्गजं रुचिरम्।।17.18।।

सुरता वारुणी लोला कान्तिः सौदामिनी तथा।
कामच्छत्रा चन्द्रलेखा शुकी च मदनाह्वया।।17.20।।

अपत्रपो युवा कामी चूतपुष्पो रतिप्रियः।
ग्रीष्मस्तपान्त ऊर्जश्च हेमन्तः शिशिरो मदः।।17.22।।

अपाङ्गभ्रूविलासौ द्वौ हावभावौ स्मरप्रियाः।

माधवी मालती चैव हरिणाक्षी मदोत्कटा।
एताश्चामरहस्ताः स्युः पूज्याः कोणेषु संस्थिताः।।17.24।।

मदनविधानमितीत्थं

प्रोक्तं योऽनेन पूजयेद्विधिना।

स तु सकललोकपूज्यो
भवेन्मनोज्ञश्च मन्दिरं लक्ष्म्याः।।17.26।।

इति मदनयोगरत्या

यो रमयेन्नित्यशो निजां वनिताम्।

स तु भुक्तिमुक्तिकामी
वनिताजनहृदयमोहनो भवति।।17.28।।

सुधामयीं च तद्योनिं नवनीतमयं स्मरेत्।
संगच्छेच्च शिवज्वालालीढं तद्धृदयादिकम्।।17.30।।

कुसुमास्त्रधिया बाह्ये स्पृशेत्कररुहैरपि।
हानिं न कुर्याज्जीवस्य मन्त्री विशदमानसः।।17.32।।

साध्याख्या कामवर्णैः प्रतिपुटितलसत्कर्णिकं पत्रराज

त्तारर्त्विक्पक्षजाष्टादशसमिदृतुगण्डान्तगान्ताक्षराढ्यम्।

आशाशूलाङ्कितं तद्विपतिरिपुदले सम्यगालिख्य सेरं
मारं जप्त्वास्य यामाशयति वशगता सा भवेत्सद्य एव।।17.34।।

तारयुजा त्वमुनाग्नौ

हुत्वा संपातितेन चाज्येन।

संभोजयेत्पतिं स्वं
वनिता स नितान्तरञ्जितो भवति।।17.36।।

अभिनवैः सुमनोभिरशोकजै

र्दधितिलैर्विहिता हवनक्रिया।

परमवश्यकरी परिकाङ्क्षिता
मपि लभेदचिरादिव कन्यकाम्।।17.38।।

कुङा मध्यगताः ष्णायगोव्यर्णा यल्लमध्यगाः।
गोपीजनवकाराः स्युर्भायस्वाहास्मरादिकाः।।17.40।।

मूलमन्त्रचतुर्वर्णचतुष्केण द्विकेन च।
प्रोक्तान्यङ्गानि भूयोऽमुं चिन्तयेद्देवकीसुतम्।।17.42।।

अयुतद्वितयावधिर्जपः स्या

दरुणैरम्बुरुहैर्हृतो दशांशैः।

मुरजिद्विहिते तु पीठवर्ये
दिनशो नन्दसुतः समर्चनीयः।।17.44।।

जुहुयाद्दुग्धहविर्भि

र्विमलैः सर्पिःसितोपलोपेतैः।

इष्टां तुष्टो लक्ष्मीं
समावहेत्सद्य एव गोविन्दः।।17.46।।

वन्द्यं देवैर्मुकुन्दं विकसितकरवन्दाभमिन्दीवराक्षं

गोपीगोबृन्दवीतं जितरिपुनिवहं कुन्दमन्दारहासम्(?)।

नीलग्रीवाग्रपिञ्छाकलनसुविलसत्कुन्तलं भानुमन्तं
देवं पीताम्बराढ्यं यजतु च दिनशो मध्यमेऽह्नो रमायै।।17.48।।

त्रिकालमेवं प्रविचिन्त्य शार्ङ्गिणं

प्रपूजयेद्यो मनुजो महामनाः।

स धर्ममर्थं सुसुखं श्रियं परा
मवाप्य देहापदि मुक्तिमाप्नुयात्।।17.50।।

भिक्षावृत्तिर्दिनमनु तमेवं विचिन्त्यात्मरूपं

गोपीस्त्रीभ्यो मुहुरपहरन्तं मनोभिः सहैव।

लीलावृत्त्या ललितललितैश्चेष्टितैर्दुग्धसर्पि
र्दध्याद्यं वा स पुनरमितामेति भिक्षां गृहेभ्यः।।17.52।।