ഋഷിരപി ഗണകോസ്യ സ്യാ-

ച്ഛന്ദോനിചൃദന്വിതാ ച ഗായത്രീ.

സകലസുരാസുരവന്ദിത-
ചരണയുഗോ ദേവതാ മഹാഗണപഃ৷৷16.3৷৷

മന്ദാരാദ്യൈഃ കല്പക-

വൃക്ഷവിശേഷൈര്വിശിഷ്ടതരഫലദൈഃ.

ശിശിരിതചതുരാശേന്ത-
ര്ബാലാതപചന്ദ്രികാകുലേ ച തലേ৷৷16.5৷৷

രത്നമയേ മണിവജ്ര-

പ്രവാലഫലപുഷ്പപല്ലവസ്യ സതഃ.

മഹതോധസ്താദൃതുഭി-
ര്യുഗപത്സംസേവിതസ്യ കല്പതരോഃ৷৷16.7৷৷

ബീജാപൂരഗദേക്ഷുകാര്മുകരുജാചക്രാബ്ജപാശോത്പല-

വ്രീഹ്യഗ്രസ്വവിഷാണരത്നകലശപ്രോദ്യത്കരാമ്ഭോരുഹഃ.

ധ്യേയോ വല്ലഭയാ സപദ്മകരയാശ്ലിഷ്ടോ ജ്വലദ്ഭൂഷയാ
വിശ്വോത്പത്തിവിപത്തിസംസ്ഥിതികരോ വിഘ്നോ വിശിഷ്ടാര്ഥദഃ৷৷16.9৷৷

മദജലലോലുപമധുകര-

മാലാം നിജകര്ണതാലതാഡനയാ.

നിര്വാസയന്മുഹുര്മുഹു-
രമരൈരസുരൈശ്ച സേവിതോ യുഗപത്৷৷16.11৷৷

ധ്യേയൌ ച പദ്മയുഗചക്രദരൈഃ പുരോക്തൌ

പാശാങ്കുശാഖ്യപരശുത്രിഖൈരഥാന്യൌ.

യുഗ്മോത്പലേക്ഷുമയചാപധരൌ തൃതീയാ-
വന്യൌ ശുകാഹ്വകലമാഗ്രഗദാരഥാങ്ഗൈഃ৷৷16.13৷৷

അഗ്രാശ്രാവാമോദഃ

പ്രമോദസുമുഖൌ ച തദഭിതോശ്രിയുഗേ.

പൃഷ്ഠേ ച ദുര്മുഖാഖ്യ-
സ്ത്വമുമഭിതോ വിഘ്നവിഘ്നകര്താരൌ৷৷16.15৷৷

സിദ്ധിസമൃദ്ധീ ചാന്യാ

കാന്തിര്മദനാവതീ മദദ്രവയാ.

ദ്രാവിണിവസുധാരാഖ്യേ
വസുമത്യപി വിഘ്നനിധിയുഗപ്രമദാഃ৷৷16.17৷৷

ദിനശഃ സ ചതുശ്ചത്വാ-

രിംശത്സംഖ്യം പ്രതര്പയേദ്വിഘ്നമ്.

ഉക്തജപാന്തേ മന്ത്രീ
ജുഹുയാച്ച ദശാംശതോഷ്ടഭിര്ദ്രവ്യൈഃ৷৷16.19৷৷

അനുദിനമര്ചയിതവ്യോ

ജപതാ മനുമപി ച മന്ത്രിണാ ഗണപഃ.

പ്രാക്പ്രോക്തപദ്മപീഠേ
സശക്തികേ സാധികാ മനൌ വിധിനാ৷৷16.21৷৷

സര്വയുതം ശക്തിപദം

പ്രോക്ത്വാ കമലാസനായ നമ ഇതി ച.

ആസനമന്ത്രഃ പ്രോക്തോ
നവശക്ത്യന്തേ സമര്ചയേദമുനാ৷৷16.23৷৷

ദീക്ഷാഭിഷേകയുക്തഃ

പ്രജപേത്സംപൂജയേദിതി ഗണേശമ്.

അഭിധീയതേസ്യ ച പുന-
ര്ഗുര്വാദേശേന മന്ത്രിണോ ദീക്ഷാ৷৷16.25.

സംപൂജയേദ്യഥാവ-

ത്ക്രമാത്സമാവാഹ്യ ഗണപമിഥുനാനി.

അഭ്യര്ച്യ ചോപചാരൈ-
ര്ഹുത്വാ വിധിവത്പുനഃ സമഭിഷിഞ്ചേത്৷৷16.27৷৷

സ്വര്ണാപ്ത്യൈ മധുനാ ച ഗവ്യപയസാ ഗോസിദ്ധയേ സര്പിഷാ

ലക്ഷ്മ്യൈ ശര്കരയാ ജുഹോതു യശസേ ദധ്നാ ച സര്വര്ദ്ധയേ.

അന്നൈരന്നസമൃദ്ധയേ ച സതിലൈര്ദ്രവ്യാപ്തയേ തണ്ഡുലൈ-
ര്ലാജാഭിര്യശസേ കുസുമ്ഭകുസുമൈഃ സാശ്വാരിജൈര്വാസസേ৷৷16.29৷৷

മന്ത്രേണാഥ പുരാമുനൈവ ചതുരാവൃത്ത്യാ സമാതര്പ്യ ച

ശ്രീശക്തിസ്മരഭൂവിനായകരതീര്നാമ്നൈവ ബീജാദികമ്.

ആമോദാദിനിധിദ്വയം ച സചതുഃപൂര്വം ചതുര്വാരകം
മന്ത്രീ തര്പണതത്പരോഭിലഷിതം സംപ്രാപ്നുയാന്മണ്ഡലാത്৷৷16.31৷৷

പരിവീതദൃഢാവരണം

തച്ച ചതുര്ദ്വാരതോരണോല്ലസിതമ്.

തസ്മിന്മണ്ഡപവര്യേ
ചതുരശ്രാമുന്നതാം സ്ഥലീം കൃത്വാ৷৷16.33৷৷

ഊര്ധ്വാദിമേഖലാസു

ക്രമേണ വിലിഖേന്നിജേഷ്ടസമവാപ്ത്യൈ.

സംപ്രോക്തലക്ഷണയുതം
പ്രവിരചയേന്മണ്ഡലം സ്ഥലീമധ്യേ৷৷16.35৷৷

ആധായ വൈശ്വാനരമത്ര കുണ്ഡേ

സമര്ച്യ മന്ത്രൈഃ ക്രമശഃ കൃശാനോഃ.

തൈരേവ പൂര്വം ജുഹുയാദ്ധൃതേന
മന്ത്രീ സമൃദ്ധ്യാ ച തതസ്ത്രിവാരമ്৷৷16.37৷৷

പുനഃ സമസ്തേന ച മന്ത്രവര്ണ-

സംഖ്യം പ്രജുഹ്വന്നപി സര്പിഷൈവ.

പൂര്വപ്രദിഷ്ടൈര്ജുഹുയാദഥാഷ്ട-
ദ്രവ്യൈഃ പ്രസിക്തൈര്മധുരത്രയേണ৷৷16.39৷৷

കരികലഭാഃ കരിണീഭിഃ

സംപാത്യന്തേവടേത്ര ഗണപതിനാ.

പ്രതിദിനമഭ്യവഹാര്യ ച
വിപ്രാന്സംവര്ധിതസ്തദാശീര്ഭിഃ৷৷16.41৷৷

മിഥുനാനാം ഗണപാനാം

നിധ്യോശ്ച തഥാങ്ഗമാതൃലോകേശാനാമ്.

മന്ത്രീ ഘൃതേന ഹുത്വാ-
ഭ്യര്ച്യ ച ഹോമം സമാപയേത്സമ്യക്৷৷16.43৷৷

പ്രോക്തസ്ത്വേവം ദശഭുജമനുഃ സംഗ്രഹേണാത്ര ഭക്തോ

ദീക്ഷാം പ്രാപ്തോ വിധിവദഭിജപ്ത്വാഥ ഹുത്വാര്ചയിത്വാ.

നുത്വാ നത്വാ ദിനമനു തഥാ തര്പയിത്വാ സ്വകാമാ-
ല്ലബ്ധ്വാ ചാന്തേ വ്രജതി മുനിഭിഃ പ്രാര്ഥനീയം പദം തത്৷৷16.45৷৷

ചതുരീയോ വിലോമേന താരാദിര്ബിന്ദുസംയുതഃ.
വൈഘ്നോ മന്ത്രോ ഹൃദന്തോര്ചാവിധൌ ഹോമേ ദ്വിഠാന്തകഃ৷৷16.47৷৷

രക്തോ രക്താങ്ഗരാഗാംശുകകുസുമയുതസ്തുന്ദിലശ്ചന്ദ്രമൌലി-

ര്നേത്രൈര്യുക്തസ്ത്രിഭിര്വാമനകരചരണോ ബീജപൂരാത്തനാസഃ.

ഹസ്താഗ്രാക്ലൃപ്തപാശാങ്കുശരദവരദോ നാഗയജ്ഞാഭിഭൂഷോ
ദേവഃ പദ്മാസനോ വോ ഭവതു നതസുരോ ഭൂതയേ വിഘ്നരാജഃ৷৷16.49৷৷

പീഠേ തീവ്രാദിഭിഃ പദ്മകര്ണികായാം വിനായകമ്.
ആവാഹ്യ പൂജയേദ്ദിക്ഷു ചതുര്ഷ്വപി യജേത്പുനഃ৷৷16.51৷৷

വക്രതുണ്ഡൈകദംഷ്ട്രൌ ച മഹോദരഗജാനനൌ.
ലമ്ബോദരശ്ച വികടോ വിഘ്നരാഡ്ധൂമവര്ണകൌ.16.53৷৷

നാലികേരാന്വിതൈര്മന്ത്രീ സക്തുലാജതിലൈര്ഹുനേത്.
ആരഭ്യാച്ഛാം പ്രതിപദം ചതുര്ഥ്യന്തം ചതുഃശതമ്৷৷16.55৷৷

മധുരത്രയസിക്താഭിര്ലാജാഭിഃ സപ്തവാസരമ്.
ജുഹുയാത്കന്യകാര്ഥീ വാ കന്യകാ വാ വരാര്ഥിനീ৷৷16.57৷৷

ദധ്യന്നലോണമുദ്രാഭിഹുനേന്നിശി ചതുര്ദിനമ്.
ഇഷ്ടാര്ഥസിദ്ധ്യൈ മതിമാന്സദ്യഃ സംവാദസിദ്ധയേ৷৷16.59৷৷

ചത്വാരിംശച്ചതുഃപൂര്വം തത്പൂര്വം വാ ചതുഃശതമ്.
ചത്വാരിംശദ്ദിനാത്തസ്യ കാങ്ക്ഷിതാ സിദ്ധിരേഷ്യതി৷৷16.61৷৷

സമീരണം പ്രതിഷ്ഠാപ്യ ജപ്ത്വാഷ്ടശതസംഖ്യകമ്.
തൂഷ്ണീം പ്രഭക്ഷയേദേതത്സപ്തരാത്രാദ്വശീകരമ്৷৷16.63৷৷

ഋഷിദേവതേ തു പൂര്വേ

ച്ഛന്ദസ്തു വിരാഡമുഷ്യ സംപ്രോക്താ.

ബീജേന ദീര്ഘഭാജാ
കഥിതോങ്ഗവിധിഃ ക്രമേണ ബിന്ദുമതാ৷৷16.65৷৷

ഭാസുരഭൂഷണദീപ്തോ

ബൃഹദുദരഃ പദ്മവിഷ്ടരോ ലലിതഃ.

ധ്യേയോനായതദോഃപദ-
സരസിരുഹഃ സംപദേ സദാ മനുജൈഃ৷৷16.67৷৷

വിഘ്നവിനായകവീരാഃ

സശൂലവരദേഭവക്ത്രകൈകരദാഃ.

ലമ്ബോദരശ്ച മാത-
ങ്ഗാവൃത്യോരന്തരാ ച ലോകേശാഃ৷৷16.69৷৷

ഏകമപി നാലികേരം

സചര്മലോഷ്ടേന്ധനം ഹുനേന്മന്ത്രീ.

ദിനശശ്ചത്വാരിംശ-
ദ്ദിനതഃ സ തു വാഞ്ഛിതാര്ഥമഭ്യേതി৷৷16.71৷৷

അഷ്ടഭിരേതൈര്വിഹിതോ

ഹോമഃ സര്വാര്ഥസാധകോ ഭവതി.

ദിനശഃ സഘൃതാന്നഹുതോ
ഗൃഹയാത്രായാപകോ ഗൃഹസ്ഥാനാമ്৷৷16.73৷৷

സമഹാഗണപതിയുക്തൈ-

ര്വിഘ്നാദ്യൈര്ദശഭിരാഹ്വയൈര്ദിനശഃ.

തര്പണപൂജാഹുതവിധി-
രപി വാഞ്ഛിതസിദ്ധിദായകോ ഭവതി৷৷16.75৷৷

പ്രാഗ്ഭാഷിതാനപി വിധീന്വിധിവദ്വിദധ്യാ-

ന്മന്ത്രീ വിശേഷവിദഥാന്വഹമാദരേണ.

ഏകത്ര വാ ഗണപതൌ മനുജാഃ സ്വരുച്യാ
നാമാനുരൂപമനുമേനമമീ ഭജന്തു৷৷16.77৷৷