ऋषिरस्याजश्छन्दो

गायत्रं देवता च भुवनेशी।

अङ्गानि षट् क्रमेण
प्रोक्तानि प्रणवशक्तिबीजाभ्याम्।।14.2।।

संदीक्षितोऽथ प्रजपेच्च मन्त्रं

मन्त्री पुनर्लक्षचतुष्कमेनम्।

पुष्पैस्तदन्ते द्विजवृक्षजातैः
स्वादुप्लुतैर्वा जुहुयात्सरोजैः।।14.4।।

प्रयजेदथ प्रभूतां

विमलां साराह्वयां समाराध्याम्।

परमसुखामग्न्यादि
ष्वश्रिषु मध्ये च पीठक्लृप्तेः प्राक्।।14.6।।

दीप्ता सूक्ष्मा जया भद्रा विभूतिर्विमला तथा।
अमोघा विद्युता चैव नवमी सर्वतोमुखी।।14.8।।

आवाह्य हार्ल्लेखिकमर्कमर्घ्य

पाद्याचमाद्यैर्मधुपर्कयुक्तैः।

प्रपूजयेदावरणैः समस्त
संपत्त्यवाप्त्यै तदधीनचेताः।।14.10।।

प्रतिपूज्य शक्तिमिति तत्र पुरः

प्रणिधाय ताम्ररचितं चषकम्।

प्रजपन्मनुं प्रतिगतक्रमतः
प्रतिपूरयेत्सुविमलैः सलिलैः।।14.12।।

इष्ट्वा दिनेशमथ पीठगतं तथैव

व्योमस्थितं परिवृतावरणं विलोक्य।

अष्टोत्तरं शतमथ प्रजपेन्मनुं तं
पूर्वोत्तरं निजकरेण पिधाय पात्रम्।।14.14।।

अथ कृतपुष्पाञ्जलिरपि

पुनरष्टशतं जपेन्मनुं मन्त्री।

यावद्रश्मिषु भानो
र्व्याप्नोत्यम्भः सुधामयं तदपि।।14.16।।

तस्मादिनाय दिनशो ददताद्दिनादौ

दैन्यापनोदितनवे दिनवल्लभाय।

अर्घ्यं समग्रविभवस्त्वथ वार्कवारे
पारं स गच्छति भवाह्वयवारिराशेः।।14.18।।

एकीकृत्य समस्तवस्त्वनुगतानादित्यचन्द्रानला

न्वेदाद्येन गुणात्मकेन सगुणानाकृष्य हृल्लेखया।

सर्वं तत्प्रतिमथ्य तावपि समावष्टभ्य हंसात्मना
नित्यं शुद्धमनन्यमक्षरपदं मन्त्री भवेद्योगतः।।14.20।।

विष्णुपदं ससुधाकरखण्डं

चन्द्रयुगावधिकं वतुरीयम्।

क्षेत्रविदो मनुरेष समुक्तो
यं प्रजपत्यपि संततमात्मा।।14.22।।

अरुणकनकवर्णं पद्मसंस्थं च गौरी(?)

हरनियमितचिह्नं सौम्य तानूनपातम्।

भवतु भवदभीष्टावाप्तये पाशाटङ्का
भयवरदविचित्रं रूपमर्धाम्बिकेशम्।।14.24।।

निक्षिप्य कलमस्मि

न्पूर्वोक्तानामपामथैकेन।

आपूर्य चोपचर्य च
विद्वानङ्गैः प्रपूजयेत्पूर्वम्।।14.26।।

इति परिपूज्य च कलशं

पुनरभिषिच्याथ नियमितोऽर्घ्यमपि।

दद्यादिनाय चैहिक
पारत्रिकसिद्धये चिरं मन्त्री।।14.28।।

व्योमानुगेन च सुधाम्बुमुचा सुदामा

प्रद्योतमानसविनिःसृतशीतरुग्भ्याम्।

आबाधिता दहनचन्द्रलसन्महोभ्यां
रोगापमृत्युविषदाहरुजः प्रयान्ति।।14.30।।

विधाय लिपिपङ्कजं मनुयुतोल्लसत्कर्णिकं

निधाय घटमत्र पूरयतु वारिणा तन्मुखम्।

विधाय शशिनात्ममन्त्रयुतवामदोष्णा पुनः
सुधायितरसैः स्वसाध्यमभिषेचयेत्तज्जलैः।।14.32।।

करेण तेनैव जलाभिपूर्णं

प्रजप्य मन्त्री करकं पिधाय।

सुधायितैस्तैर्विषिणं निषिञ्चे
द्विषं निहन्यादपि कालकूटम्।।14.34।।

इत्यजपामन्त्रविधिः

संप्रोक्तः संग्रहेण मन्त्रिवराः।

यं प्राप्य सकलवसुसुख
धर्मयशोभुक्तिमुक्तिभाजः स्युः।।14.36।।

गुह्यादाचरणतलं

कण्ठादागुह्यमागलं कान्तान्।

विन्यस्य मन्त्रबीजा
न्क्रमेण मन्त्री करोतु चाङ्गानि।।14.38।।

अरुणसरोरुहसंस्थ

स्त्रिदृगरुणोऽरुणसरोजयुगलधरः।

कलिताभयवरदो द्युति
बिम्बोऽमितभूषणस्त्विनोऽवतु वः।।14.40।।

प्रागभिहितेन विधिना

पीठाद्यं प्रतिविधाय तत्र पुनः।

विन्यस्य कलशमस्मि
न्प्रपूजयेत्तरणिमपि च सावरणम्।।14.42।।

प्रागादिदिशासंस्थाः

शशिबुधगुरुभार्गवाः क्रमेण स्युः।

आग्नेयादिष्वश्रिषु
धरणिजमन्दाहिकेतवः पूज्याः।।14.44।।

अपरकराभयमुद्रा

विकृतमुखोऽहिः कराहिताञ्जलियुक्।

दंष्ट्रोग्रास्यो मन्दः
सुवर्णसदृशांशुकादिभूषश्च।।14.46।।

गोरोचनास्रतिलवैणवराजिरक्त

शीताख्यशालिकरवीरजपाकुशाग्रान्।

श्यामाकतण्डुलयुतांश्च यथाप्रलाभा
न्संयोज्य भक्तिभरतोऽर्घ्यविधिर्विधेयः।।14.48।।

गृहपरिमितमिष्ट्वा पूर्वक्लृप्त्या दिनेशं

प्रतिजुहुत निजर्क्षे वैकृते वा ग्रहाणाम्।

शुभमतिरुपरागे चन्द्रभान्वोः स्वभे वा
रिपुनृपजभये वा घोररूपे गदे वा।।14.50।।

सोमादीनां दिशि दिशि समाधाय वह्निं यथाव

द्धोमे सम्यक्कृतवति मुदं यान्ति सर्वे ग्रहाश्च।

युद्धे सम्यग्जयमपि रुजः शान्तिमायुश्च दीर्घं
कृत्वा शान्तिं व्रजति पुनेरकत्र वा सर्वहोमः।।14.52।।

त्यद्यन्त आर्यसूर्यर्णा मेधारेचिकया गुणः।
व्यत्ययोऽष्टाक्षरः प्रोक्तः सौरः सर्वार्थसाधकः।।14.54।।

सत्यब्रह्माविष्णुरुद्रैः साग्निभिः सर्वसंयुतैः।
तेजोज्वालामणिं हुंफट्स्वाहान्तैरङ्गमाचरेत्।।14.56।।

सशिरोमुखगलहृदयो

दरनाभिशिवाङ्घ्रिषु प्रविन्यस्येत्।

प्रणवाद्यैरष्टार्णैः
क्रमेण सोऽयं तदक्षरन्यासः।।14.58।।

संदीक्षितस्तु मन्त्री

मन्त्रं प्रजपेत्तु वर्णलक्षं तम्।

जुहुयात्ित्रमधुरसिक्तै
र्दुग्धतरुसमिद्वरैर्वसुसहस्रम्।।14.60।।

शुद्धाद्भिररुणवासो

युगेन संवेष्ट्य पूजयेत्क्रमशः।

अङ्गावृतैः परस्ता
दादित्याद्यैरुषादिशक्तियुतैः।।14.62।।

संपूज्यैवं दिनेशं पटुमतिरथ जप्त्वा च हुत्वाभिषेकं

कृत्वा दत्तेन संख्यां वसुमपि गुरवे सांशुकं भोजयेच्च।

विप्रानादित्यसंख्यानिति विदितमनुं नित्यशोऽर्घ्यं च दद्या
द्वारे वा भास्करीये शुभतरचरितो वल्लभाय ग्रहाणाम्।।14.64।।