बीजैस्त्रिभिर्द्विरुक्तैः

कुर्यादङ्गानि साधकः सिद्ध्यै।

पूर्वतरेरितयोर्वा
द्वयोरथैकं तदङ्गयोः प्रभजेत्।।12.2।।

आबद्धरत्नमकुटां मणिकुण्डलोद्य

त्केयूरकोर्मिरशनाह्वयनूपुराढ्याम्।

ध्यायेद्धृताब्जयुगपाशकशाङ्कुरेक्षु
चापां सपुष्पविशिखां नवहेमवर्णाम्।।12.4।।

योगेश्वरीमिति विचिन्त्य जपेच्च मन्त्र

मादित्यलक्षमथ मन्त्रितमो जपान्ते।

श्रीराजवृक्षसमिधां सजपार्तवानां
तावत्सहस्रसमितं मधुरैर्जुहोतु।।12.6।।

लक्ष्मीगौरीमनसिशयबीजानि कृत्वा कलायां

तां वा बिन्दौ तमपि गगने तच्च सिन्दूरवर्णम्।

स्मृत्वा बुद्ध्या भुवनमखिलं तन्मयन्वेन मन्त्री
देवान्वश्यानपि वितनुते किं पुनर्मर्त्यजातीन्।।12.8।।

सहृदयभगवत्यै दान्तरण्यै धरार्णाः

सणिधरशिवधार्णारे द्विठान्ता ध्रुवाद्याः।

गदितमिति धराया मन्त्रमुत्कृष्टधात्री
सुखसुतधनधान्यप्राप्तिदं कीर्त्तिदं च।।12.10।।

मुख्याम्भोजे निविष्टारुणचरणतला श्यामलाङ्गी मनोज्ञा

चञ्चच्छाल्यग्रचुम्बच्छुकलसितकरा प्राप्तनीलोत्पला च।

रत्नाकल्पाभिरामा मणिमयमकुटा चित्रवस्त्रा प्रसन्ना
दिश्याद्विश्वंभरा वः सततमभिमतं वल्लभा कैटभारेः।।12.12।।

पीठे विष्णोः पूजयेत्पूर्वमन्त्रै

र्भूवह्न्यम्बुप्राणसंज्ञैश्च भूतैः।

शान्त्यन्ताभिः शक्तिभिः साकमाशा
पालैः पृथ्वीं संयतात्मोपचारैः।।12.14।।

पिङ्गलां पृथुलशालिमञ्जरीं

यो जुहोति मधुरत्रयोक्षिताम्।

नित्यशः शतमथास्य मण्डला
द्धस्तगा भवति विस्तृता मही।।12.16।।

षण्मासादनुभृगुवारमेष होमः

संपन्नान्समुपनयेद्धराप्रदेशान्।

पुत्रान्वा पशुमहिषेष्टजुष्टपुष्टा
मिष्टामप्यनुदिनमिन्दिरां समग्राम्।।12.18।।

अथ पुरुषार्थचतुष्टय

सिद्धिकरी मन्त्रजापनिरतानाम्।

त्वरिताख्येयं विद्या
निगद्यते जपहुतार्चनाविधिभिः।।12.20।।

वर्मद्धर्ये च तदन्त्यः

शिवयुक्चरमेऽङ्गनाद्युसाधिलवम्।

अन्त्यः स योनिरस्त्रा
न्तिकः सतारो मनुर्दशार्णयुतः।।12.22।।

कूर्मादिभ्यां द्वाभ्यां

द्वाभ्यामपि पूर्वपूर्वहीनाभ्याम्।

कुर्यात्सप्तभिरर्णै
रङ्गानि च षट् क्रमेण मन्त्रज्ञः।।12.24।।

श्यामतनुमरुणपङ्कज

चरणतलां वृषलनागमञ्जीराम्।

स्वर्णांशुकपरिधानां
वैश्याहिद्वन्द्वमेखलाकलिताम्।।12.26।।

नृपफणिकेयूरां तां

गलविलसद्विविधमणियुताभरणाम्।

द्विजनागविहितकुण्डल
मण्डितगण्डद्वयीमुकुरशोभाम्।।12.28।।

कुञ्चितकुन्तलविलस

न्मकुटाघटिताहिवैरिपिञ्छयुताम्।

कैरातीं वनकुसुमो
ज्ज्वलां मयूरातपत्रकेतनिकाम्।।12.30।।

दीक्षां प्राप्य गुरोरथ

लक्षं जप्याद्दशांशकं जुहुयात्।

बिल्वसमिद्भिस्त्रिमधुर
युक्ताभिः साधकः सुसंयतधीः।।12.32।।

हुङ्काराख्या खेचरि

चण्डेसच्छेदनी तथा क्षपणी।

भूयः स्त्रियाह्वया हुं
कारीसक्षेमकारिकाः पूज्याः।।12.34।।

सस्वर्णवेत्रयष्ट्यौ

द्वाःस्थे पूज्ये पुनर्जयाविजये।

कृष्णो बर्बरकेशो
लगुडधरः किंकरश्च तत्पुरतः।।12.36।।

जपहुतपूजाभेदै

रिति सिद्धे मन्त्रजापिनो मन्त्रे।

नारीनरनरपतयः
कुर्वन्ति सदा नमस्क्रियामस्मै।।12.38।।

स्मरशरविह्वलिताङ्ग्यो

रोमाञ्चितगात्रवल्लरीललिताः।

घनघर्मबिन्दुमौक्तिक
विलसत्कुचगण्डमण्डलद्वितयाः।।12.40।।

श्लथमानांशुकचिकुरा

मदविवशस्खलितमन्दभाषिण्यः।

मृदुतरमस्तकविरचित
नत्यञ्जलयः प्रसादकाङ्क्षिण्यः।।12.42।।

इत्यादि वाणिनीभि

र्विलोभ्यमानो यदा न विक्रियते।

मन्त्री तदेत्य वाञ्छित
मखिलं तस्मै ददाति सा देवी।।12.44।।

इक्षुशकलैः समृद्ध्यै

दूर्वाभिः स्वायुषे श्रिये धान्यैः।

धान्याय यवैः पुष्ट्यै
गोधूमैःऋद्धये तिलैर्जुहुयात्।।12.46।।

अरुणोत्पलैश्च पुष्ट्यै

मधूकजैरिष्टसिद्धयेऽशोकैः।

पुत्राप्त्यै पाटलजैः
स्त्रीसिद्ध्यै निम्बजैश्च विद्विष्ट्यै।।12.48।।

हुतसंख्यासाहस्री

नियुता वाथायुतान्तिकी भवति।

यावत्संख्यो होम
स्तावज्जप्यश्च मन्त्रिणा मन्त्रः।।12.50।।

तत्कर्णरन्ध्रजापा

त्सद्यो नश्युर्विषग्रहादिरुजः।

तद्यन्त्रस्थापनमपि
विषभूतादिप्रशान्तिकृद्भवति।।12.52।।

आख्यां मध्यगतानले लिखतु दिक्पङ्क्तिष्वथ स्युः सह्रूं (?)

क्ष्रूं च्रूं छ्रूं करणद्विषष्टिपदके शैवादि कालीमनुम्।

नैःऋत्यादि तथा क्रमाक्रमवृतं बाह्येऽनलैरावृतं
प्रोक्तं निग्रहचक्रमन्तकपुरप्राप्तिप्रदं वैरिणाम्।।12.54।।

यमापाटटपामाय

माटमोटटमोटमा।

वामो भूरिरिभूमोवा
टररीस्त्वस्त्वरीरट।।12.56।।

चक्रे चाष्टाष्टपदे

कालीशिवयातुधानखण्डाद्यम्।

यमदहनानिलवीतं
विलिख्य विषदण्डिमर्कटीलिप्तम्।।12.58।।

खण्डेष्वेकाशीतिषु मध्येन्दुगसाध्यं

जुंसः पूर्वं दिक्स्थचतुष्पङ्क्तिषु शैखम्।

लिख्याल्लक्ष्मीं शिष्टचतुःषष्ठिषु विद्वा
नीशाद्यं कन्यादि च बाह्ये त्वरिताख्याम्।।12.60।।

श्रीसामायायामासाश्री

सानोयाज्ञेज्ञेयानोसा।

मायालीलालालीयामा
याज्ञेलालीलीलाज्ञेया।।12.62।।

चतुःषष्ट्यंशे वा क्रमविदथ लक्ष्मीमनुममुं

शिवाद्यं नैःऋत्यादिकमपिः चतुर्णामृतवृतम्।

बहिः स्वच्छे पट्टे कनकविहिते पूर्वविधिना
लिखित्वा जप्त्वा निक्षिपतु शितधीर्यत्र तदिदम्।।12.64।।

हुंकारे साध्यसंज्ञां विलिखतु तदधः कर्णिकायां च शिष्टा

नष्टौ वर्णान्दलेष्वारचयतु हरमायां त्रिशो वेष्टयित्वा।

कुम्भस्थं यन्त्रमेतत्सरसिजपुटितं सर्वरक्षाप्रसिद्ध्यै
क्लृप्तं सर्वोपसर्गप्रशमनफलदं श्रीकरं वश्यकारि।।12.66।।

स्मरदीर्घैधरकाग्न्यों

दीर्घाभ्यक्ष्वेलदद्रलान्तशिवाः।

अभितः शक्तिनिरुद्धो
द्वादशवर्णोऽयमीरितो मन्त्रः।।12.68।।

इन्दुकलाकलितोज्ज्वलमौलि

र्मारमदाकुलितायुगनेत्रा।

शोणितसिन्धुतरङ्गितपोत
द्योतितभानुदलाम्बुजसंस्था।।12.70।।

स्मृत्वा नित्यां देवी

मेवं प्रजपेन्मनुं शतसहस्रम्।

अयुतं जुहुयादन्ते
नृपतरुसमिधां घृतेन वा सिद्ध्यै।।12.72।।

हृल्लेखा क्लेदनी नन्दा क्षोभणी मदनातुरा।
निरञ्जना रागवती तथान्या मदनावती।।12.74।।

अङ्गैः शक्तिभिराभि

र्मातृभिराशाधिपैः क्रमात्पूज्या।

भक्तिभरानतवपुषा
भवभयभङ्गाय मन्त्रिणाहरहः।।12.76।।

इतीरिता लोकहिताय वज्र

प्रस्तारिणी मन्दिरमिन्दिरायाः।

या सर्वनारीनरराजवर्ग
संमोहनी मोहनबाणभूता।।12.78।।

रक्तारक्तांशुककुसुमविलेपादिका सेन्दुमौलिः

स्विद्यद्वक्त्रा मदविवशसमाघूर्णितत्रीक्षणा च।

दोःसत्पाशाङ्कुशयुतकपालाभया पद्मसंस्था
देवी पायादमितफलदा नित्यशः पार्वती वः।।12.80।।

पीठं पूर्ववदभ्यर्च्य तत्रावाह्यापि पूजयेत्।
अङ्गैश्च शक्तिभिर्लोकपालैर्देवीं समाहितः।।12.82।।

प्रजपेत्प्रमदां विचिन्त्य यां वा

शयनस्थो मनुवित्सहस्रमानम्।

निशि मारशिलीमुखाहताङ्गी
नचिरात्सा मदविह्वला समेति।।12.84।।